بسم الله الرحمن الرحيم
السلام عليكم ورحمة الله وبركاته
لماذا في بعض الأحيان نتخذ القرارات الخاطئه؟؟
لماذا نسير دائما في الطريق الخطأ؟؟
أمن أجل أن نتعلم؟؟
لماذا لا تعلمنا المدرسه أو الجامعه كيف نحب؟؟ أو كيف نتحكم بمشاعرنا؟؟
هل لأننا نحن من نعلم أنفسنا ونربيها؟؟
وهل هناك من ينقذنا من أوهامنا ويرشدنا للحب الحقيقي؟؟
هذا ما تحكي عنه روايتي ..أو قد تجسده لي ولكم ..
هذه روايتي الأولى ..التي تنتظر تفاعلكم مع أحداثها و مع شخصياتها ..
فآرائكم تسعدني ونقدكم يفيدني..
أترككم مع روايتي المتواضعه
( حب على الهامش )
************
::شخصيات الروايه::
*بيت أبو تركي:
ابو تركي،،ام تركي،،شوق (15 سنه)،،شجون(22 سنه،تدرس بالجامعه تخصص انجليزي
رويانه وشعرها متوسط الطول وناعم،عيونها سودا،جميله مرره وهي بطلة الروايه)،،
تركي(24سنه ،يدرس بالجامعه تخصص كيمياء)،،
*بيت ابو سلطان :
ابو سلطان (أخو ابو تركي )،،ام سلطان،،سلطان(9سنين ،،دلوع البيت لأنه وحيد امه وابوه)
*بيت أبو مشاري:
ام مشاري(حلمها تشوف ولدها سعيد)
مشاري(25سنه،وسييييم مرره،شعره ناعم وحريري ،أسمر فاتح ،جسمه رياضي ،عيونه عسليه،
أكبر همومه انه يعتني بسكسوكته،يدير شركة أبوه المتوفي)
*الشباب:
فهد(27سنه ،مملوح،مغرور)
خالد(30 سنه،طيب وعلى نياته،)
*الشابات:
ملاك(22سنه،مملوحه،أعز صاحبات شجون)
ندى(20 سنه،متكبره عشان فلوس ابوها،نحيفه مرره،شعرها طويل واسود)
جواهر(18سنه،،جميله مره،،دبدوبه،،متوسطة الطول)
ــــــــــــــــــــــــــــــــــــــــــــــــــ ــــــــ
(الجزء الأول)
{كلللللوووش..ألف مبروك يا أحلى شجون بالدنيا}
قالتها ملاك صاحبة شجون وأعز صاحبتها..واقرب وحده لها ..كانت تعرف كل شي عن تفاصيل
حياتها ..كانت قريبه منها لدرجة إنها تعرف عنها اللي يجهله الكثير ..
شاركتها احزانها وافراحها ..دموعها وضحكاتها..يمكن لأنها في نفس سنها ويمكن لقوة حبها لها..
شجون:الله يبارك فيك ..وعقبالك.
ملاك:لا مافي زواج الا بعد التخرج
شجون:وليش ان شالله؟!!
ملاك:عشان أضمن مستقبلي يمكن يجيني واحد يمنعني عن الدراسه.
شجون:اشرطي عليه وبعدين ليه كل هالتشاؤم؟
ملاك:مو تشاؤم بس أنا أحسب لكل شي حساب..
(فعلا كانت ملاك تحسب لكل شي حساب ..على الرغم انها تحب المغامرات والهبال بس طول عمرها
خايفه ان الدنيا تغدر فيها وتحطم احلامها يمكن اكتسبت هالشعور وهالخوف من اللي حولها
ويمكن من اللي تسمعه من حريم قرايبها وكانت دووم تحذر صاحبتها شجون..)
شجون:هذا الحلو فيك
ملاك:ماعليك مني وبعدين طلعنا عن موضوعنا..
شجون:أي موضوع!!
ملاك:يوووه يابرودك ياشجون موضوع زواجك
شجون:اهاا ..بعدين من متى صار موضوع ؟؟والموضوع على قولتك خطبه مو زواج..
ملاك:والخطبه وش بعدها ياحظي ؟؟ماعلينا المهم قولي لي وش مواصفاته ؟؟شكله؟؟اهله وش لابسين
عنده خوات؟؟كم وحده؟؟و…
شجون قاطعتها:وش هالاسئله اكلتيني
ملاك:لا تخافين راح يبقى شوي لحبيب القلب
شجون:ملاااااااك خلاص أحرجتيني
ملاك:ما استحمل الحيا اللي فيك ..يلاااا جاوبيني ولا تتهربين
شجون:اف منك مايفوتك شي ،،،اخذت نفس عالي بعدين قالت:
مواصفاته رجال مثل كل الرجال بس وسيييييم مره لما شفته انهبلت عليه وبصراحه ما توقعته كذا..
أما شعره أوووه ناعم وطويل الى حد ما يعني مو كثير ..هذا غير جسمه ماشالله عليه رياضي
ومعتني بنفسه وصحته وأما سكسوكته كانت مرتبه مرره شكله طلع من الحلاق وجانا هههه..
وطبعا أكثر هالكلام من وصف اختي شوق ..
وبعدها سكتت شجون شوي وهي تفكر..
ملاك:طيب والباقي..
شجون:طيب شوي شوي علي ..انتي عارفه ان ابوه يملك شركه لتأجير السيارات..
يعني حالتهم الماديه كويسه ..وماعنده الا اخت وحده في عمر اختي شوق..
وما اخفي عليك امه كانت كشخه مرره وكان باين على شكلها انها صغيره لكنها كبيره ..
وواضح انها مهتمه بنفسها..
ملاك:نسيت أهم شي وش اسم العريس؟؟
شجون وهي ذايبه:اسمه راكان..راكان..
**********
كان في غرفته مقفل الباب ومنسدح ع السرير ..ماكان وحده كانت معه دموعه..يفكر في نفسه..
في قلبه..أنا اخترت غلط؟؟حبيت غلط؟؟وش اللي سويته في حياتي ؟؟ليه يصير لي كذا؟؟
ليه كل ماحس قلبي بالفرحه تحترق..ليه البسمه ماتدوم ؟؟ليه..ليه..؟؟
انهيار ..حزن..شعور بالنقص ..مزيج من المشاعر كان يحس فيها ..ضم وسادته وجلس
يبكي ..ويبكي..
(مشاري حبيبي..مشاري)
قطع صوت أمه بكاه المر..يمكن انقطاع بكاه افضل له ويمكن كان البدايه لكتم مشاعره ..
مشاري وهو يمسح دموعه بهدوء:سمي يمه
ام مشاري:سلمت ..افتح الباب ياولدي ابشوفك..
مشاري:يمه أنا أبدل ملابسي وبنام
ام مشاري:طيب والعشا؟؟
مشاري:أنا ماني جوعان ..بس ابغى انام..
ام مشاري كانت عارفه ان ولدها اذا اصر على شي مو ممكن انه يتراجع عن اصراره ولو في اقل الامور
وزاد عناده بعد وفاة ابوه يوم كان عمرع 16سنه وهي ماكانت تحب تضغط عليه :براحتك
**********
أففففففف هالبزره للحين ماكبرت ..همس تركي بينه وبين نفسه وقال وهو معصب:شووووووووووق
شوق وهي تقلده:شوووووق ..خير أزعجت هالشوق
تركي:وانتي أزعجتيني اقصري على صوت الtv
شوق:ما ابغى يالله من تتوقع يفوز بالسباق توم واللا جيري ؟؟
تركي:شكلي ابرتكب فيك جريمه ..وهو يصرخ:يلاااااااا
شوق وهي خايفه:طيب طيب لا تعصب.. متي يجي ذاك اليوم اللي ارتاح من وجهك مثل شجون
تركي:شويق عيب عليك هالحكي انتي بزره
ماردت عليه شوق وضلت تفكر وهي سرحانه..استغرب تركي من تصرف اخته لانه يعرفها
لها لسانين ..
شوق:تصدق ياتركي ..احس ان فرحة شجون ماراح تدوم ..يمكن بيصير شي يكدر فرحتها
اتمنى يكون احساسي احساس بزره مثل ما قلت..
تركي:وش هالكلام !!ياويلك اذا قلتي لشجون شي
شوق:ليه انا مجنونه اقولها؟! بس انا خايفه عليها
تركي:احتفظي بخوفك لنفسك
قام تركي وراح لغرفته وترك شوق لوحدها بالصاله..
شوق بخاطرها:آآآه ..عمرك ماراح تفهمني ياتركي..
*********
في اليوم الثاني كانت شجون واقفه قدام المرايه تناظر ملابسها وتقول :يالله ..لازم اسوي حميه
سمنت وانا بتزوج..
شوق:ايه بعدين يتركك وياخذ وحده ثانيه
شجون:بسم الله متى دخلتي؟!وبعدين راكان يوم شافني انجن على جمالي
شوق:واثقه من نفسك كثير يالسمينه
شجون ما عطتها وجه وراحت ترد على جوالها اللي من زمااان يرن:الو
ملاك:اخيرا رحمتيني
شجون :كنت البس وما انتبهت للجوال
ملاك:متى بتروحين الجامعه يالدبه؟
شجون:أوووه ذبحتوني صحيح سمنت بس مو لهادرجه
ملاك:ليه من قال غيري
شجون:شوق يعني من غيرها!!
ملاك:اهاا ظنيت راكان قال لك شي
شجون:حرام عليك من يوم ما شافني ماكلمته
ملاك:اصلا هو ذايب منك مو قادر يشوفك ولا يكلمك
شجون :هههه رفعتي معنوياتي ..طيب يلا انا ابمشي الحين ..اشوفك بالجامعه.
ملاك:اوكي لا تطولين
شجون:طيب ..باي
قفلت شجون من ملاك وراحت تكمل مكياجها ولبسها بكل برود ومره تغني ومره تقول قصيده
وفي نص زينتها انتبهت للساعه اللي صارت متأخره ع المحاضره ..اسرعت شجون
واخذت كل ماتحتاجه ونزلت من الدرج بسرعه وهي تركض وماسكه بيدها اليمين جزمتها
وباليسار عبايتها وشنطتها..
ام تركي :شجون وش فيك تاخرتي ؟؟
شجون:باي ماما باي
وقفت دقيقه قبل ماتطلع من باب الصاله لبست عبايتها وجزمتها وطلعت تركض وهي تنافخ ..
لقت السواق موقف السياره بعيد عن الباب وراحت تركض لمكان السياره وفجـــأه..
( وفجأه انتهى الجزء الأول ..لكن تتوقعون وش اللي شافت شجون ؟؟معقوله شافت شخص ذكرها
بأيام الماضي؟؟او تتوقعون انه صار لشجون حادث؟؟بس من اللي صدمها ؟؟تتوقعون هو متعمد
ينتقم منها بهالطريقه ؟؟او من غير قصد؟؟)