كنت اود ان اكتب في العنوان للكاتبه واسمي .. لكن خجلاً يبدر نقص مني ولا استحق هذا الاسم وامنيتي حقاً ان تكن هديتي بعد ان احظى بشرف إعجابكم ذاك اللقب قبل اسمي ..
بالعربي حلاته منكم مو مني ههههه
ولكن ارجو عند النقل ذكر اسمي ( مـا يـهـم ) حفظاً للحقوق ..
في عالم الكتابه التجربه الاولى والمولود الاول والتلاعـب الاول !
1-1-2015 12:15 am كُتبت
أيحسبني طفلةً يتلاعب بها ؟ وانا التي حـكـى القرآن عن كــيـــدي …. !
الـتـلاعب الاول :
بدر بتوديع لاخوه بدموع تلسع خده كلسعة حرقة الانتقام التي ولدت بهذه اللحظه بداخله بالبدايه من عمرها ! .. غطاه بالفرش الابيض كلها دقايق ويصير تحت التراب ويندفن!!
امه من وراه: ترررركييي ااه ياقلب امك لا تروح خلاص راح اكلم ابوك يشتريلك السياره اللي تبيها بس لا تخلي امك بحسرتها لا تخلييييييهاا ..
وتبكي بكاء ام فقدت قطعه منها بذمه وضمير !!
ابو بدر الرجل الشديد الصارم ولكن لوعة فقدان الابن هزته من الوريد للوريد ولكن متمسك بقناع القوه قد مايقدر: بس يا ام بدر قضاء الله وقدره بتعترضين؟ قدر الله وماشاء فعل بس قولي
حسبي الله ونعم الوكيل على اللي كان السبب !! يلا يا بدر خذ امك ودها للبيت ترتاح
بدر بأسى اللي مو عارف يحزن على اخوه ولا انكسار امه وابوه قدامه: يلا يما يلا .. وضمها من كتوفها يمشيها راجعين لإقامة مراسم العزاء الكئيبه ..
رجعوا كلهم للبيت المتواضع الذي يعبر عن ماديتهم البسيطه او اقل من بسيطه للتعبير الاصح .. ولكن غنى اصحاب هذا البيت بعزة النفس والقناعه والرضا بما اعطاهم الله
جعلهم يرونه قصراً ! المسأله قناعه لا اكثر ..
دخلوا لقوا شهد اخت بدر والفقيد تركي جالسه بنص الصاله بمنظر يقطع القلب لنصفين!!تبكي وماسكه صدرها كأنها تمسك قلبها لا يطلع من شهقاتها القويه ..
عرفوا انها استوعبت بعد ماكانت مصدومه .. ناظر بدر الانكسار اللي ملى هالبيت وين وصلوا وين ! ..
راح لها وقومها: قومي ياشهد واذكري الله ادعيله ياقلب اخوك ادعيله
شهد ببكاء: تركي راح يابدر راااح تخيل اني دخلت غرفته لقيتها فاضيه فاضيه يعني خلااص .. وكأنها مو مستوعبه الى الآن
امها مو بأقل حال منها خذت بنتها بحضنها وبكت معاها .. ابوهم جالس ويردد اللهم اجرني في مصيبتي واخلف لي خيراً منها .. لا حول ولا قوة الا بالله
بعد مرور شهرين …
بطلتنا ليال جالسه عند ابوها المندمج وبترجي: بابا تكفى لا تقول لاء لا تقول خلني اسافر فرنسا لوحدي مع صديقاتي كبرت خلاص !!
ابو ليال يقلب الاوراق باندماج: ليال بس قلت لا
ليال وبترجي اكثر: ماراح اطول اسبوع ومعانا ام وحده من البنات كبيره يعني ماله داعي هالـ لا .. وبضحك .. بعدين هذي ديرة ماما الله يرحمها حافظتها اكثر من ديرتي
ولا نسيت عيشتي فيها
ابو ليال رفع نظره من الاوراق وناظر ليال ابنته ذات الشعر الاشقر العسلي الى آخر ظهرها وعيونها الرماديه المرسومه بإتقان اذا عصبت تقلب عيونها خضرا ووجها القمري الذي يدل على بديع صنعه
ناظرها ماتشبه الا امها واهلها ابدا مافيها منه .. ماخذت منه الا غمازاته الواضحه عليها بقوه حتى لما تتكلم والشموخ والعناد والدليل انها قنعته ومشت اللي براسها ..
قال: ماشي يا ليال روحي واحرصي على نفسك وكل ساعتين دقي علي هناك متى ناوين عالسفر ؟
ليال بفرحه غمرت كل قلبها: جججد !! توقعتك توافق وماترفضلي طلب يا احلى بابا وناوين بعد يومين كذا ان شاءالله
ابتسم ابو ليال على فرحتها .. ملاحظها بشده بالشهرين اللي طافوا لا ليلها ليل ولا نهارها نهار ماتاكل ماتطلع من الغرفه مكتئبه ونحفت كثير وحاول يعرف السبب والى هاليوم
مو عارف شاللي صابها فجأه .. وماوافق على هالسفره الا عشان يطلعها من عزلتها وضيقتها ولا هو ابدا مو راضي على سفرة بنات! بس كله في سبيل ترجع بسمة ليال الجميله
ليال تذكرت شي خلاها تكشر: بابا شصار على هذا السواق الغبي؟ ماغيرته ؟ بابا ما ابغاه ما ابغاه .. كانت بتبكي بس حاولت تمسكها لا تخوف ابوها عليها قد ماتقدر
ابو ليال باستغراب: قدمت على سواق بس شكلي بعجل فيه اكثر واقلع ذا واسفره
ليال وتطالع يدها اللي شابكتهم ببعض بتوتر للذكرى اللي مرت وهدمت كل هدوء ببالها طيله الشهرين: اي الله يخليك بأسرع وقت يتغير ماقدر اتحمل غباءه اكثر وقامت
لغرفتها الشاهده على حزنها العريق ماقدرت تمسك دموعها اكثر بكت وبكت .. كالعاده
ابو ليال اتبع خطواتها بعيونه وبقلبه اسف على حالها والسبب مجهول
فوق عند ليال .. بغرفتها او بالاصح جناحها الواسع الكبير بألوانه الوردي الفااتح والتيفاني .. كل شي بهاللونين حتى الحمام والروب واغلب ملابسها .. الوانها المفضله
كانت ليال تبكي بتأنيب يعذبها وكأنها هي القاتله ! شهرين وتبي تعرف اي خبر عنه وتسأل ياترى شصار هل مات؟
الا اكيد اكييد مات اللي صار ماكان هين ابد ابد وبكت اكثثر بتأنيييبب واحساس التأنيب يذبح طوال الشوارب فكيف بقلب هذه الرقيقه! .. قامت توضت وصلت ودعت الله يريح قلبها ..
صباح اليوم الثاني ..
السكرتير: تقدر تتفضل .. واشر له بيده على مكتب المدير
دخل بدر وثبت نظره للمستغرق بالاوراق ومو منتبهله وعلى وجهه ابتسامة اصرار: السلام عليكم
رفع نظره ابو ليال للواقف امامه مباشره ونزل النظاره باستغراب: وعليكم السلام ويأشر بيده .. تفضل اجلس ياولدي
ناظره بدر شوي ثم جلس وهو يقول: انا ياعم يشرفني اشتغل عندك وسمعت انك مقدم وطالب سواق! الهندي ماهو احرص من عيال هالبلد على البلد اذا تشوفني انا اولى منه ؟
ابو ليال وهو محتاج هالشي جدا وممكن يغير من نفسية ليال المرهقه وتفرح اذا تغير: صحيح .. انا معاك يا ؟
بدر بسرعه: بدر اسمي بدر
ابو ليال: والنعم والله يابدر واعتبر نفسك من اليوم جاهز .. روح تحت بموقفي الخاص تلاقي سيارتي انتظرني نص ساعه بالكثير ونطلع للبيت
بدر ببسمة رضا: اشكرك عمي ان شاءالله ماتشوف مني قصور .. استأذن وطلع وروح الانتقام بداخله مازالت تكبر ..
بالفعل بعد نص ساعه وهم بالطريق ساكتين وبدر يسوق
تكلم ابو ليال: كم عمرك؟
بدر: 28 ياعمي
ابو ليال: ماشالله .. شنو شهاتك؟
ارتبك بدر كان متوقع هالسؤال اصلا: تخرجت من كلية الحقوق وببسمه.. المفروض محامي بس مالله كتب
ابو ليال: افا ليش عاد من خريج حقوق الى سواق
بدر متى يسكت هالشيبه وكأني راضي بسواق يعني: ياعم ظروف خاصه عثرتلي طريقي والحمدلله على كل حال
ابو ليال بتفهم: الله يسهل دربك
بدر ابتسم له وهو في قلبه وانا شاللي خلاني اوقف دوامي ووظيفتي فتره غير سواة بنتك !
الى هنا اقف بدايتي .. انتقادكم يهمني اكثر من ثنائكم
قراءه ممتعه ..
سبحان الله وبحمده .. سبحان الله العظيم
انتوا الملكات والله بطلتكم
ومليون مرحبا بأول قارئي روايتي ..
حاضر بكملها لكن بكره الصباح ان شاءالله بس بشوف التفاعل ):
تتككككفيييننن كممملييهاا !!
مرره حلوووةة ماشاءالله
أتوقع ليال هي السبب في موت تركي
وبدر بينتقمم منها بس أيش بيسوي مدري
تكفين الباارتت الي بعده خلييه طووييل حيييل
متابعتكك ‘$
حلوه توقعاتك والاحلى حضورك الجميل الذي أضاف لمسه فنيه لروايتي <3
وابشري بخليه طويل لكن هذا مجرد مقدمه للطويل
ومُتابعتك شرف ..
لا تطولي علينا بانتظارك
فكرة ام البطلة الاجنبية الي هدفها ان البطلة لازم تملك جمال فتان اجنبي فكرة مستهلكة القارئ صار يبحث عن الواقعية حتى في ملامح الاشخاص الابطال متشابهين في كل الروايات تقريبا لازم الي امها اجنبية تاخذ ملامحها مستحيل يتركوها تاخذ ملامح عربية لدرجة صرنا نحس ان مافي جمال عربي ابد او ان الجمال يكون بس في الشعر والعيون الملونة
لما القارئ يشوف جمال البطلة الاجنبي مباشرة بيحط بباله ان الكاتبة اعتماد نجاح روايتها على الجمال مو على حبكة وفكرة الرواية
فكرة الانتقام الي بين الابطال والي تنقلب بعدين لحب وغيره ايضا فكرة مستهلكة ياليت تطرحي افكار جديدة تميز روايتك وتهتمي بحبكة الرواية اكثر لان في عندك ثغرات خلت الحبكة اضعف وفيها تناقض
موقف ليال الي واضح انها سبب في الحادث الي تعرض له تركي ومات وحدة وصفتيها انها تحس بتأنيب الضمير وتملك مشاعر مستحيل بتترك انسان تسببت له بأذى بدون ماتنهار وتخبر ابوها مو شايفة اي مبرر لسكوتها حتى لو هي الي المسبب الرئيسي لموت تركي مابتقدر تسكت فكيف بشهرين ساكتة لا ولها مزاج تسافر وتتونس هالشيئين متناقضين جدا الي يكون قريب من ربه مابيكون تصرفه مثل ليال
قبول ابو ليال ان بدر يكون سواق لبنته على اي اساس وافق وهو ماعرف الا اسمه الاول ؟ مايدري اذا هو مجرم او انسان يخاف ربه ؟ يعني هالموقف فقد المصداقية والواقعية مافي رجال بيدخل رجال اجنبي ببيته بدون مايسأل عن كل صغيرة وكبيرة عنه وغير كذا ملاحظة تهاون الاب في هالامر يعني بنته تطلع مع سواق اجنبي عنها بدون طرف ثالث معاهم هالشئ يعتبر خلوة غير شرعية
اتمنى تنتبهي للاحداث الي بتطرحيها وتركزي فيها اكثر حتى ماتصير متناقضة
القوانين / الإطلاع هام و الإلتزام ضروري
وهذا الموضوع راح يفيدك ياليت تطلعي عليه
وردة الزيزفون ياورده
ملاحظاتك احطها فوق راسي لكن برد على كل ملاحظه
| فكرة ام البطلة الاجنبية الي هدفها ان البطلة لازم تملك جمال فتان اجنبي فكرة مستهلكة القارئ صار يبحث عن الواقعية حتى في ملامح الاشخاص الابطال متشابهين في كل الروايات تقريبا لازم الي امها اجنبية تاخذ ملامحها مستحيل يتركوها تاخذ ملامح عربية لدرجة صرنا نحس ان مافي جمال عربي ابد او ان الجمال يكون بس في الشعر والعيون الملونة
لما القارئ يشوف جمال البطلة الاجنبي مباشرة بيحط بباله ان الكاتبة اعتماد نجاح روايتها على الجمال مو على حبكة وفكرة الرواية |
صحيح ولكن انا عندي هدف من كون ام ليال اجنبيه غير متركز فقط في الجمال .. وهو انها عاشت هي وابوها مده طويله في فرنسا واعتقد عيشة ابوها في فرنسا بتخليه انسان متفتح اكثر بموضوع السواق الاجنبي .. هو غلط هالشي ..لكن هذي نظرته وعلى قولة بدر عيال البلد اوْلى من الوافدين
وبما ان الام فرنسيه ف مستحيل ليال ما تاخذ من امها شي هذي نقطه
| فكرة الانتقام الي بين الابطال والي تنقلب بعدين لحب وغيره ايضا فكرة مستهلكة ياليت تطرحي افكار جديدة تميز روايتك وتهتمي بحبكة الرواية اكثر لان في عندك ثغرات خلت الحبكة اضعف وفيها تناقض |
النقطه الثانيه يمكن ماينقلب حب؟ ويمكن من طرف واحد ؟ ويمكن ماراح يستمر في وظيفته اصلا؟ ويمكن ويمكن ويمكن .. لكن الاكيد كل كاتبه لها طريقتها
لكن مرات الاحظ ان فيه افكار مستهلكه لكن القارئ يطلبها كثير .. دايما اشوف موضوع الطلبات .. والاغلب ( ابي رواية يكون فيها اجبار عالزواج ونفس هالنوع … إلخ ) معنى كلامي ان بعض الافكار المستهلكه مطلوبه بشده ..
| موقف ليال الي واضح انها سبب في الحادث الي تعرض له تركي ومات وحدة وصفتيها انها تحس بتأنيب الضمير وتملك مشاعر مستحيل بتترك انسان تسببت له بأذى بدون ماتنهار وتخبر ابوها مو شايفة اي مبرر لسكوتها حتى لو هي الي المسبب الرئيسي لموت تركي مابتقدر تسكت فكيف بشهرين ساكتة لا ولها مزاج تسافر وتتونس هالشيئين متناقضين جدا الي يكون قريب من ربه مابيكون تصرفه مثل ليال |
لا عاد هذا من اسرار القصه بعده ماتوضح هالشي عدل لا تظلمونها ):
ومثل ماقلت هذا مقدمه فقط للبارتات الاخرى رغم قصره
وحاضر ياوردتنا الانيقه بنتبه لكل اللي حددتيه نورتيني والله ..
وصلوا للبيت .. عفوا للفله اللي تثبت من روعة شكلها الخارجي على ان الشكل الداخلي اروع .. وقفوا عند واجهة البيت وقبل لا بدر يصفط السياره كانت بلكونة احدى الغرف تطل على الواجهة وكانت السياره امامها مباشره ..
طلت ليال بكل عفويه من بلكونة غرفتها وكانت لابسه روب تيفاني مغطي جسمها ورابطه شعرها بفوضويه عارفه ان الآن وقت وصول ابوها من الشركه وكانت منتظرته ونادته بصوت عالي عشان يسمعها بلهفه: بااااباااااااااااااااااا
التفتوا اثنينهم لبلكونة ليال ابتسم ابو ليال وبدر التفت للصوب الثاني وساكت
ليال انتبهت ان رجل آخر مع ابوها وواضح سعودي ف بسرعه رجعت ورا بنعومه وسكرت البلكونه باحراج اللي سببته لنفسها ولابوها
ابو ليال يكلم بدر: هذي بنتي ليال اللي بتكون سواقها ان شاءالله .. ابتسم باحراج .. ماعليه اهي مطفوقه شوي هههه
بدر لف جهته اجل اسمها ليال! وبابتسامه مجامله: لا عادي عادي .. ورجع لف الصوب الثاني
ابو ليال بأمر: ناظرني بدر .. التفت له بدر .. وكمل .. اوصيك على بنتي هي اهم شي عندي .. حياة ليال وسعادتها ثم حياتي وسعادتي وهي عموماً الشهرين اللي طافوا كانت تشتكي بكثره
من سواقها الخاص وطلبت مني اغيره وجيت انت بداله .. مابي اشوفها تشتكي ابدا ابدا منك وكل ما شفت راحة ليال منك بكافئك باللي تبيه .. ماشي؟
بدر بغموض: تامر وراحتكم غاايتي
ابو ليال: قواك الله يبا .. اشر له على ملحق صغير يسار البيت بعيد شوي .. هذا بيكون مكانك غداك وعشاك وفطورك بيوصلك واذا احتجت اي شي كلمني ..
بدر: ماتقصر .. بس بغيت اروح لاهلي ابشرهم على وظيفتي ساعتين وراجع ان شاءالله .. الآنسه عندها شغل؟
ابو ليال: روح يبا اخذ راحتك وما اعتقد ليال تطلع بهالوقت
نزل ابو ليال ودخل البيت .. اتبعه بدر بنظراته وابتسم بسخريه .. حرك متوجه لاهله
وصل بدر ودخل لقى كل اهله مجتمعين عالغدا .. ابو بدر ام بدر شهد سلم وجلس على الطاوله معهم وبدا ياكل
ابو بدر يناظر بدر: اذا خلصت تعال لغرفتي ابيك بموضوع
بدر وعارف شنو بيكلمه فيه وبملل: حاضر
قام ابو بدر وقامت شهد ابنة السابعه عشر سنه ذات الملامح الرقيقه والشعر الاسود القصير بتغسل وبتدرس لكن وقفها بدر ينادي: شهد
لفت عليه وماردت
بدر بأمر: ساعدي امي ولمي معها الصحون بعدها روحي ادرسي .. سوت اللي قال عليه بكل رضى واحترام لعزيزها بدر وبدر قام غسل متوجه لابوه
طق الباب وقاله ابو بدر بصوت ماكسر صاحبه الزمن رغم الظروف اللي حصلت: ادخل يابدر ادخل
بدر: سم يبا
ابو بدر: انت عارف اني اشتغل بشركة العم ابو ليال صح ولالا ؟
بدر يطالعه: عارف
ابو بدر: اذاً انت ناوي تقطع رزق ابوك ومعميك الانتقام عن الصح من الغلط صح ؟
بدر حاول يكتم غضبه: يبا الله يخليك شغلك ماله اي دخل بشغلي وابو ليال ماراح يعرف اني ولدك ولا حتى بيطري على باله لو انت سكت وسترت على ولدك وخليت شغلي وتخطيطي يمشي مثل ما ابي!
ابو بدر بحزن: يابدر اترك عنك اللعب حول هالبيت حنا مو قدهم يبا مو قدهم
بدر مازال محافظ على اعصابه مايبي يضايق ابوه بكلمه: اذا هم داهيه فأنا ادهى واعلمهم منهو بدر .. وبملل من هالسيره .. وبعدين يبا اعتقد هالموضوع خلصنا منه وانا اليوم رحتله ووافق يوظفني عنده
ابو بدر مصدوم: وشنو وظفك ؟؟
بدر ويطالع للفراغ البعيد وجاوب بكلمتين: سواق للقاتله ..
ابو بدر بعصبيه وصوته بدا يعلى: بدر وبعدين معاك متى بتكبر متى تحسب حساب للي تسويه وتترك عنادك وحقدك وتركي وراح هذا يومه استوعب هذذذااا يومه ومكتوب لا بنت ابو ليال السبب ولا غيرها ابعد عن النار لا تلعب حولها تحرققك وانا ماني مستعد اخسر واحد ثاني من عيالي !!!
دخلت ام بدر على صوتهم اللي بدا يعلى وبوجهها علامة تساؤل؟
بدر بعصبيه: يبا مايصير اروحله واقوله خلاص كنسل وظيفتي وشوفلك سواق ثاني!! مو لعب بزران هو وانا طالع لبيته بسكن هناك .. ناظر امه .. يمه بروح اصفي حساباتي فتره وارجع ديروا بالكم
على شهد وان قدرت ازوركم بجيكم بين فتره وفتره متى مافضيت .. رجع يناظر ابوه وتقدم وباس راسه وابو بدر منزل راسه مو حاب تصرفات ولده ابداْ .. قال بدر: ارفع راسك يايبا مو انت اللي تنزله ومافيها شي ان خذيت حقي وحقكم ..يلا مع السلامه ..
وطلع لغرفته بسرعه اخذله ملابس وشوية اغراض وطلع من البيت وهو متضاايق ومتوجه لبيت ابو ليال ..
بوسط الفله كانت صالتين واسعتين وحده للضيوف ووحده للجلسه ومن اجمل الاثاث وكانت الاثنين
يغلبهم اللون الابيض وبين الصالتين الدرج الطويل الذي يؤدي للدور الثاني كانت ليال جالسه بصالة الجلوس على الكنبه اللي دائما تحب تجلس فيها والكل يعرف ان هذا مكان ليال ومحد يجلس فيه غيرها .. كانت لابسه ليقنز وبلوزه واسعه بأكمام ضيقه طويله
منزله الاكمام ومغطيه نص يدها ومو مبين الا اطراف اصابعها ( تحب تسوي هالحركه ) اللي ماسكه فيهم كوفي لاتيه وتشرب بعمق وبسرحاان .. قالها ابوها انه جاب سواق جديد وفرحت ان هذاك راح خلاص
بملل حطت الكوب عالطاوله ورفعت جوالها بتتصل على اسيل بنت عمها انتظرت مده ماردت ..
دقت مرتين وثلاث وخمس تنرفزت هذي وينها مو عادتها تنام هالحزه!!
دقت عالبيت وانتظرت احد يرد عليها
هناك في بيت ابو راكان
راكان نازل باستعجال وهو يلبس ساعته بيطلع سمع التلفون
شال التلفون وثبته بكتفه وهو يلبس ساعته باستعجال: الوو
ليال ارتبكت عرفته .. وشلون ماتعرفه وهو يشغل كل تفكيرها ردت بنعومه: الو السلام عليكم
راكان ترك ساعته ومسك التلفون بيده لهالصوت: وعليكم السلام ياهلا .. ليال مو
ليال بارتباك اكثر لما قال اسمها ردت: ايوه ليال .. راكان ولا عليك امر شوفلي اسيل وينها ادق عليها ماترد
راكان بابتسامه: لحظه .. وعلّى صوته .. اسيييييييييييييييل .. ماردت صرخ باستعجال لانه تأخر اسسسسسسسسسسسسسسيلووووووه
ليال مبتسمه لحلو هاللحظه والود ودها تكمل تكلمه بدال اسيل وابتسمت اكثر لهالفكره الغبيه اللي طرت
اسيل نازله بسرعه وهي ناويه تاكل اخوها: خير خير شهالصراخ اذني للحيني ماعرضتها للبيع ترا
راكان عطاها نظره وسكتت: ليال تبيك وثاني مره انتبهي لجوالك لا دق وماتحقرين خلق الله ومشى طالع من البيت
اسيل خذت التلفون تكلم ليال: يوووووه ليول والله كنت بالحمام ماسمعت ماعليه ماعليه
ليال بعصبيه: مالت عليك بس تنرفزين .. المهم سلسل والله اني بحالة طفش مايعلم فيها الا الله تجيني ولا اجيك ونطلع؟
اسيل: اول ناديني عدل سلسل بعينك ذي الرماديه مدري خضرا كنك قطو اللهم ياكافي
ليال: هههههههههههه خلصينا بس !
اسيل بتفكير: بيتنا فاضي منو اللي بيوديني لك وخبرك سايقنا هرب صارله يومين مدري وين اراضيه الكلب يدري اني ما استغني عنه واضيع من دونه
ليال: على طاري السواق انا جبت سواق جديد اذا تبين اخليه يمرك يجيبك عندي
اسيل بجديه: تغير ذاك بح خلاص؟
ليال بارتياح: ايه يا سلسل بح
اسيل: ردت وقالت سلسل هذي تبي تنذبح اليوم بس مو عارفه كيف المهم تبين تخلينه يمرني بعدين يرجعلك بعدين نطلع مشوار ترا بتزهقينه وتنحشينه نفس سواقنا اقول تعالي معه بعدين تعالي بيتنا
ليال بطفش: طيب طيب كليتيني ترا يلا البسي ربع ساعه واجيك .. مع السلامه
سكرت منها وراحت تلبس كانت الساعه 5 العصر
ليال نزلت وهي لابسه عبايتها ولثمتها وقبل لا تطلع من البيت شافت رئيسه الخدم
ليال نادتها: نورماان
نورمان اللبنانيه اللي عمرها بالثلاثينات قديمه في بيت ابو ليال وتعز ليال حييل: اهلين انسه ليال .. بشو بدك إخدمك؟
ليال بسرعه: نورمان روحي لملحق السواق قوليله بمشي بيت عمي ناصر ونادي واحد من البودي قارد يمشي معنا يدليه بيت عمي بسرعه
نورمان: على امرك .. مشت للملحق طقت الباب فتح لها الباب وكان لابس بنطرون رمادي وقميص ابيض على كتابات بالرمادي وينشف شعره واضح توه مخلص شور ومنتظرها تتكلم
نورمان استغربت وسامة هذا الرجل مو بالعاده يجيب ابو ليال سواق جنتل ابتسمت على تفكيرها وقالت: متأسفه ع الازعاج بس الانسه ليال بدا تروح على بيت عماا ووصتني تاخد معك البودي قارد حتى يدليك
هز راسه وقالها: طيب طيب قوليلها منتظرها بالسياره ورد دخل الملحق خذا مفتاح السياره وجواله وطلع للسياره منتظر ست الحسن واول مشوار له معاها !
طلعت ليال بطولها وتدور بعيونها بين سيارات البيت على سيارتها الخاصه من النوع المرسيدس .. لقتها وتقدمت بهدوء ركبت ورا وكان قدام البودي قارد وبدر .. ما التفتت لهم ابدا ركبت وحرك بدر والصمت سيد الموقف .. !
وصلوا بيت عمها ابو راكان .. لفت صوب دريشتها وكأنها تدور بعيونها على راكان لما مالقته رفعت جوالها واتصلت على اسيل وردت عليها بربشه
اسيل: هلا ليال
ليال بصوت مسموع: يلا انا تحت سلسل والله اعد للخمس ماطلعتي مشيت
ناظرها بدر من المرايا الاماميه بكل ما اوتي من حقد وكاره وجودها كرْه ماقد كرَه انسان او شي مثل ليال و وجودها .. لو كان الحقد يقتل لكانت ليال قتيلة امام حقده اللامنتهي !!
اسيل تفتح باب البيت: طيب هذاانيي طلعت لا تذلينااا عاد
ليال ناظرتها وسكرت وابتسمت من تحت لثمتها لاسيل اللي فتحت الباب بدفاشه وربشه وهي تقول: سلااااامم
حركت السياره للمول المحدد
ليال بنعومه: بسم الله شوي شوي عالسياره ابيها والله
اسيل: فكينا بس تبين اسكرها مثلك ( باستهبال وتنعم صوتها ) بأتراف اساابعي ؟؟
ليال ضحكت: ههههههه حراامم علييك
بدر كان وده يسكتون مو متحمل ازعاجهم بس ساكتلهم غصباً عنه .. اما البودي قارد ف متعود على هبال اسيل وليال اذا اجتمعوا ..
اسيل: غريبه ليول جايبه البودي قارد معك اليوم ماتعودنا يمشي معنا؟؟
ليال: ايوه السواق الجديد مايدل بيتكم وهو يدليه ولا انا تعرفيني ماحب اخذه معي !!
اسيل ناظرت بدر بعفويه لذكر اسمه بموضوعهم فقط ورجعت تناظر ليال بعدين انتبهت و رجعت لفت بسسرعه عليه مره ثانيه
ليال باستغراب: وش فيك ؟
اسيل بصوت مسموع بدون انتباه: الحين بس صدقت ان الهنود جميييليييييييين
ليال مافهمت: صح معروف الهنود فيهم جاذبيه بس وش فيك كذا فجأه؟
اسيل باستهبال: يالغبيه ناظري سواقكم والله انه عمي عرف يختار سواق يجيييب العاافييه
ليال بعفويه بتشوف الجمال اللي تقول عنه اسيل رفعت عيونها لقته يناظرها وعلى وجهه ابتسامة سخريه من حديثهم اللي بنظره تافه نزلت عينها بسرعه ماعرفت ليش خافت من نظراته؟ ردت عليها: صدق انك فاضيه
بدر ناظرهم بسخريه يحسبونه هندي! وتكلم موجه كلامه لأسيل: مشكوره يا انسه لكن للاسف ماني بهندي .. ورجع يناظر الطريق
سكتوا الثنتين من الصدمه!!!
ليال استغربت ليش مانبهني بابا ان السواق سعودي!!!! الله ياخذك يا اسيل عالموقف اللي حطيتينا فيه وجت بترقع الموضوع: معليش سوري
اسيل تلقط بقايا وجهها وكتمت ضحكتها عالموقف وبهمس لليال مايسمعونه: يافشلتيييييي
ليال ومازال الاحراج متمكن منها وبنفس الهمس: اسكتي واللي يعافيك دايما انتي كذا تحطينا بمواقف وماتنتبهين لنفسك !!!
اسيل طقتها بكوعها: وانا شعرفني انه سعودي
بدر عارف الا متأكد مليون بالميه ان الهمس والحوار هذا عنه .. ماعطاهم اهميه وصل للمول وناظر بالمرايا لليال اللي كانت بتنزل لكنه وقفها: انسه ليال
ماردت وناظرته
بدر بكره: الساعه كم اجيكم ؟؟
ليال تناظر اسيل بمعنى متى تبين نرجع واشرت بيدها اسيل على رقم 9 قالتله: امممم الساعه 9
بدر وكاره حتى الحديث معها ويحاول يختصر قد مايقدر: طيب عطيني رقمك اذا وصلت ادق عليك ؟
ليال نقلته الرقم وهو دق عليها وسكره عشان تعرف رقمه ..
ناظرته وقالت باستفسار: ايش اسمك؟ ناظرها وبسرعه قالت عشان اسجل رقمك؟
بدر ووده بس يحرك ويمشي بعيد جو السياره ومعها بالذات خنقه: بدر !
حركت راسها ونزلت بسرعه بخوف واضح من طريقة كلامه ولحقت اسيل
حرك بدر يوصل البودي قارد للبيت …
لحقتها لين صارت بجنبها وتكلم اسيل وهي تتأفف: ههففففففففف مابغينا نوصل .. وبعصبيه .. شفتيه يا اسييييل شفتييه ؟
اسيل وتفكيرها غير عن ليال المعصبه: ايييووه شففته عليه جاذبيه ابن الاييه
ضربتها ليال بكوعها وهي تقول بعصبيه: يالغبيه اقصد شفتيه كيف يناظر يخوف مدري كيف هذا راح يوصلني ويجيبني ويعيش معنا !! مو متطمنه ابد
اسيل تهديها: يابنت الحلال اذكري الله يعني وش بيسوي وابوك موجود والكل يحسبله الف حساب .. وبعدين خلك من هذا انا اللي مستغربه منه كيف هذا سواق وشكله اللي يشوفه يقول واحد
من نجوم هوليوود على هالوسامه وسعودي بعد!
ليال بعدم اهتمام: لا تعطينه اكبر من حجمه امشي بس نشرب شي نشف ريقي هالبدر
اسيل باستهبال: انشهد انه اسم على مسمى
ناظرتها ليال بمعنى الحمدلله والشكر ومشت
انتقادكم + تحفيزكم + ردودكم + تشجيعكم + ملاحظاتكم = تهمني وسبب لاستكمال مسيرتي الكتابيه ..
مالقيت ؟ اشيل قشي وامشي ههههه
قراءه ممتعه ..
سبحان الله وبحمده سبحان الله العظيم .