الســلام عليكم ورحمة الله وبركاته ..
:
:
روايه : بإسم الامل ، حاول لتحقيق الأحلام ؛ للكاتبه : خَدشْ ،
روايه تمت كتابتها ونهايتها ؛ غير قابله للتعديل ؛
وبما انها جاهزه وكامله ؛ يوميًا بارتين إن شاء الله ؛
واتمنى انها تعجبكُم ؛ وتنال حماسكم ..
–
:
البارت الاول .. :
: يممه تكفييين مابي يممه
امها : يابنتي كل شيء صار مو بيدي والرجال ماينعاب .. روحي ياعذبه خليه يشوفك
عذبه : يمه مابي اتزوج حرام ليه ابوي يسوي فيني كذآ
ام عذبه : هذي سنة الحياة والبنت مصيرها ببيت رجلها
عذبه : بس انا توني صغيره
ام عذبه تنهي الكلام : آلحقيني للمطبخ وخذي صينية العصاير وادخلي للمجلس عليهم ..
عذبه بخوف : يمه ابوي بيقعد معي صح ؟
ام عذبه : ايه ايه يالله خلصي
طلعت ام عذبه وخلت عذبه بغرفتها تفكر ( ، سبحان الله .. انا الوحيده اللي ب العايله ما افكر ب الزواج ، وانا اللي تزوجت اول وحده .. الله يسامحك يبه )
قامت وكملت مكياجها الخفيف وعدلت لبسها الناعم والهادي و اللي كان عباره عن تنوره جنز طويله فيها خطوط عشوائيه باللون الابيض وبلوزه بيضاء نص كم ماسكه ع خصرها .. ونزلت للمطبخ عند امها
عذبه : يمه وش رايك فيني ؟
ام عذبه : ماشاءالله لاقوة الا بالله .. تهبلين يابنتي تهبليين .. الله يهنيك يارب ويوفقك ويسعدك دنيا واخره
عذبه : الله يسمع منك يمه ..
دخل ضاري اخو عذبه : يمه ابوي يقول ويــن عـ .. " قطع كلامه والتفت على عذبه " يالله امشي معي
عذبه بخوف : ضاري تكفى مابي اشوفه
ضاري : اقول بلا دلع بنات خلصينا
عذبه : يممه تكفين والله خاااااايفه مابي اتزوج خلاص
ضاري بعصبيه مصطنعه : عذبه بسسسسسرعه الرجال له ساعه ينتظرك بالمجلس
عذبه : طيب طيب " واخذت الصينيه من امها وطلعت برا المطبخ مع اخوها ضاري "
عند باب المجلس ..
عذبه ترتجف وبصوت هادي : ض ضــ ـآري والله خايفه
ضاري بحنان : عذبه يــاعذبه .. كلها دقايق تدخلين ويشوفك شوي وتطلعين .. سمي بالله وتوكلي
عذبه : ادخل معي طيب
ضاري : لا ما اقدر .. خلاص لاتخافين ابوي موجود
عذبه " بسم الله الرحمن الرحيم .. يارب يارب ساعدني .. "
دخلت بخطوات هاديه و مرتجفه وعيون خايفه .. وحطت الصينيه ع الطاوله وقعدت جنب ابوها ساكته
ابو عذبه : مافيه سلام ولا شيء .. قومي سلمي على زوجك
عذبه " هذا اللي ناقص اقوم اسلم " قالت ب احراج وهي ب مكانها : السلام عليكم
ابوها وعزام زوجها : وعليكم السلام والرحمه ..
عزام : اخبارك عذبه .. ؟
عذبه " ياويلي ياويلي .. يمه ويييينك بموت " : آآ الحمدلله بـ خـ ـير
ابو عذبه وهو يقوم : اجل اخليكم انا طالع
عذبه وهي تناظر ابوها برجاء " لاااا وش هالورطه ، بيطلع ويخليني مع هاللي يسمى زوجي ، مستحيييل ، يارب ساعدني احس بيغمى علي "
طلع ابو عذبه وقام عزام وجلس مكان ابوها جنبها ..
عزام : طيب وانا ؟
عذبه بآرتباك واضح : اا انت وش ؟
عزام : ماتهمك اخباري ؟
عذبه " ياربي وش هالاحرااج " : ……
قرب لها عزام اكثر ومسك ايدها اللي كانت ب حضنها : تراني ما اكل على فكره ..
عذبه من لمساته صارت ترجف اكثر ، سحبت يدها منه وماقالت شيء
عزام ب آبتسامه : كم عمرك ؟
عذبه " فاضي يسأل وانا بهالحال " : بدخل عشرين
عزام : لك طولة العمر ان شاء الله . . ابوك يقول انك ماكملتي دراسه بعد الثانوي ..
عذبه : ايه صح ماكملت
عزام : ليه طيب ؟
عذبه بعفويه : ييييييع مااحب الدراسه اببببد ، ماصدقت افتكيت من الثانويه تبوني اكمل بعد
عزام : هههههههههه وليه ماتحبينها
عذبه استحت " الله يفشلني اااخخ " : آآ بس كذا ، قلق وومدري ايش " لاتناااظر ضاعت علومي "
عزام وهو يمد ايده للطاوله ياخذ العصير وقربه لعذبه : اشربي
عذبه وهي تمد ايدها بتاخذه ، نزل عزام ايدها وقال : لا لا .. انا بشربك
عذبه " شكلي اليوم بموت منه " : هاه .. لا لا مابي اصلا م م اشتهي
عزام : افاا .. كل ذا عشانه من ايدي .. خلاص هونت خذي اشربيه بنفسك
عذبه : لا مابي
عزام وهو يحطه : اوكي بكيفك .. ابي رقمك
عذبه باستعجال : وش تبي فيه !؟
عزام : هههههههههه ، تخيلي زوج مايعرف رقم زوجته
عذبه " الله ياااااخذك مصدق نفسك زوج " : …… 05
عزام وهو يسجل : وش تبيني اسميك ؟
عذبه " وش دخلني فيك بعد " : آآ اللي تبي
عزام بتفكير : مممممممم قلتي اللي تبي هاه . . وش رايك ب الخجوله
عذبه نزلت راسها بحيا ولاردت
عزام : لا اجل ليتي ما تكلمت .. تراك جد تستحين ب زياده
عذبه " يارب يسسكت .. ابي اطلللع " : ………
عزام : عذبه ؟
عذبه : …….
عزام : ماسمعت ردك ؟
عذبه " وش تبيني اقول اصلاً ؟ " : …….
عزام مد يده ورفع راسها له وعلى طول نزلت عيونها : ناظريني
عذبه رفعت عيونها بخجل ..
عزام وهو يمرر يده ع خدها بهدوء وقال بصوت هامس : تهبلين ..
قرب لها اكثر ومسك ايدينها الثنتين وقربها له وباس خدها بهدوء
عذبه راحة بخرايطها من الحيا .. على طول فلتت منه وطلعت برا المجلس وهي مو مستوعبه شيء وطيران على غرفتها
عزام : هههههههههههههه ياحليلها والله ..
:
:
السآعه 1 آلليل . . ( بعد 4 ساعات من الحدث ) .. بغرفة عذبه ..
عرُوب ( اخت عذبه ) بحماس : ايوه ايوه وش بعد ؟
عذبه بحيا : يووووه خلاص ولا شيء ..
عروب : افا افا .. قولي بس وش قلتوا ..
عذبه : ماصار شيء اصلا بس سلمت واخذ اخباري وتبادلنا الارقام وطلعت
عروب غمزت لها : عليييينا
عذبه وهي ترميها بالمخده : اقول اطلعي بنام
عروب وهي تطلع : الله يرزقني بسس
عذبه بصوت عالي عشان تسمعه : ياقليلة الادب
رجعت لها عروب وهي عند الباب : ماقلت شيء عيب .. الله يرزقني من جد
عذبه : اطلعي اطلعي بس . .
طلعت عروب وقامت عذبه للحمام ( وانتم بكرامه ) تاخذ شَآوَر وبعد نص ساعه طلعت ولبست بجامه خفيفه وعلى طول رمت نفسها على سريرها وراحت بسابع نومه
:
:
آلسآعَه 9 الصبح .. ب صالة ابو عزام . .
ليم ( اخت عزام ) : اخييييراً يالشايب تزوجت
عزام : حرام عليك انا شايب ؟
آلين ( اختهم ) : ايييييه شايب ونص ، اجل فيه احد بالثلاثينات مايتزوج
عزام : لاتأيدين ياحلوه وبعدين انا توني بعز الشباب عمري 28 والحمدلله تزوجت
ليم : عزام تكفى بطلبك طلب
عزام : قولي ي آم الطلبات . ؟
ليم : اعزمها
عزام : من هي ؟
ليم : من غيرها يعني .. عذبه
عزام ب ابتسامه : ليه ؟
ليم : بشوفها تخيل ماشفتها ولا مره !
عزام : اما ماشفتيها ولا مره .. قبل 6 شهور شايفتها يوم كنا بالشاليه !
ليم : يووووه اكيد تغيرت عقب ذيك الطلعات
آلين وهي تقهرها : هههههه مسسكينه عاد تصدقين تههههههبل مرره ياحبي لها تغيرت وااجد
ليم : عزام اعزمها !
عزام وهو يقوم : قريب بتزوجها وتشوفينها لين تملين " مع اني ماظن ينمل منها " المهم انا طالع ولاتحتروني ع الغداء بطول
آلين : بروووح معك
عزام ب ابتسامه مكر : بروح مع ربعي تروحين معي ؟
آلين ب استهبال : ماعندي مانع ، بلبس عبايتي وبجي لاتروح عني
عزام : اقول اقعدي بمحلك بس مافيه روحه
ليم : عزااااام تكفى كل يوم تطلع مع ربعك ، خصص لنا يوم تطلعنا فيه
عزام : سواقك انا ؟
ليم : يعني لازم تصير سواقي عشان تطلعني ؟
عزام : يااااه ياكثر بربرتك ، خلاص يصير خير لارجعت
ليم بفرح : يعني بتطلعنا
عزام : قلت يصير خير
آلين : يعني ايه ولا لا ؟
عزام يجاريهم : ايه ايه " وطلع "
:
:
بيت ابـوضـآري .. بغرفة عذبه
صحت وهي متكاسله عن اي شيء ، رفعت عيونها وشافت الساعه 12 الظهر . .
: ااااه ، نمت كل ذا الوقت ، مع اني احس فيني نووم
قامت وعدلت بجامتها ودخلت الحمام ( وانتم بكرامه )
عذبه : ااااااف زي كل يوم المعجون مأخوذ
طلعت وزينت شعرها ع السريع ونزلت وهي تثاوب .. لقت امها وضاري بالصاله
عذبه وهي رايحه لهم : صباح مدري مساء الخير
ام ضاري : هلا ببنتي هلا والله تعالي اجلسي جنبي
ضاري : اخص والله وش هالدلع
ام ضاري : بنتي بعد قلبي بتروح بعد شهرين وشلون ما ادلعها
عذبه بصدمه : وشششو ؟ وش وش شهرين اروح وين اروح ؟
ام ضاري : زواجك بعد شهرين يمه
عذبه : لا من قال انا ماقلت ابي بعد شهرين لا لا مابي
ام ضاري : انا وام عزام امس حددنا موعد العرس وشفناه مناسب بعد شهرين وانتي ماتدرسين ولا شيء يعني ماوراك شيء ابد
عذبه وهي تقوم : قلت لكم لا يعني لا .. مابي زواجي بعد شهرين يمه بدري حرام عليكم على الاقل خذوا رأيي ليه تحددون وتخططون بدون ماتشاوروني
ام ضاري : طيب قولي لي وش اللي يخليك ماتبينه بعد شهرين .. ؟ اذا كانت اسبابك مقنعه اتفقنا نآجله
عذبه : انا كذا مااااااابي مايمديني اسوي شيء ولا اتجهز ولاشيء ونفسياً ما استعديت مابي مابي مااااااااابييييي " وغطت وجهها بيدينها ورقت لغرفتها تبكي "
ام ضاري بحزن : الله يهديها هالبنت .. مدري وش فيها
ضاري : ماعليه يمه تلقينها خايفه من الزواج تعرفين البنات وسوالفهم .. لاتآجلينه ولا شيء انا اشوف موعد الزواج مناسب لها وهي ماعندها لاشغل ولا مشغله بيمديها تتجهز ان شاء الله وتخلص وتتزوج وكل شيء بيكون تمام بآذن الله
ام ضاري : الله يسمع منك ياوليدي وتمشي الامور بخير .. عقبالك يمه
ضاري " قلبتها علي " : انا شايل فكرة الزواج من بالي الحين يصير خير بعدين يمه
ام ضاري : متى بعدين وانا امك كل ما اقولك تقول بعدين
ضاري " لا بالله قلبت " : ان شاء الله ان شاء الله يمه
:
:
بيت ابو رعد .. ( جيران ابو ضاري ) .. الساعه 2 .. عالغدآء ..
…………………………… – هَمسه ( ابو رعد متوفي من سنيِيين بحادث .. )
ام رعد : ماشاءالله عليها عذبه .. امس طالعه قمر
سجي : ايه يمه بسم الله عليها حتى اسلوبها حلو
سُهى : يعني سبحان الله ماعرفتي اسلوبها الا امس وحنا جيرانهم من سنييييييين ونكلمهم ونمون عليهم ومصاحبين عذبه تقولين نقرب لهم
ام رعد : اذكري الله يابنت لا يصير شيء يفرقنا
سجى : الا اقول يمه .. ليه احس علاقتك مع ام ضاري احسن بكثيير مع باقي الجارات
ام رعد : والله يابنتي اني احبهم كلهم بس ام ضاري قريبه مني اكثر وصديقتي الله يوفقها يارب
سُهى : عاد تدرون وش احسن شيء امس .. ان المعازيم مو كثيرين .. الواحد يقدر ياخذ راحته
سجى : ايه والله انـ … " قطع كلامها صوت جوالها يرن " ردت ..
سجى : هـلآ والله بالعروسه
عذبه بصوت باكي : سجى تخيلي زواجي بعد شهرين امي تقول اتفقت مع ام عزام وحددوه بعد شهرين " ورجعت تبكي "
سجى : بسم الله عليك هدي هدي
عذبه : سجى مابي قولي لهم مااااابي
سجى : عذوبه حبيبتي انتي هدي وكل شيء بينحل بهدوء
عذبه وهي تحاول ماتبكي : ……..
سجى : شوفي ياقلبي بعد شهرين حلو مافيه شيء ولا احسه بدري مره واذا ع التجهيز انا راح اكون معك واسوي لك اللي تبينه بس انتي لاتبكين
عذبه بصوت مبحوح : بس انا مابي اصلا انا مابي الزواج كله
سجى : ليه وش السبب ؟
عذبه : ما احس اني مستعده لآي شيء والزواج مسؤوليه وانا توني ع المسؤوليات وتوني صغيره بعد و و ..
قاطعتها سجى : اقول بس لاتخلقين الاعذار .. صح الزواج مسؤوليه بس انتي قدها وقدود واذا عالصغر مانتي صغيره وفيه اللي اصغر منك تزوجوا وشوفيهم الحين كيف .. ؟
عذبه : مادري مادري
سجى : انا ما انكر شعورك تجاه الزواج واكيد بتصيرين قلقانه وخايفه عشان كذا انتي على طول رفضتي .. لكن لو تفكرين زين راح تشوفين انه مالك حق باللي تقولينه .. استخيري والله يوفقك
عذبه : آن شاءالله .. " وب احراج " اسفه ازعجتك
سجى : اي والله ازعجتيني تراني جالسه اتغدى
عذبه : هههههه احسن يالدبا انحفي
سجى : حراااااام عليك انا دبا ؟
عذبه : ايه احسك سامنه كم كيلو .. انتبهي بس تنتفخين علينا
سجى بعصبيه مصطنعه : انا اقول مالدب غيرك ياثوره يالله طسي مع عزامك ذا ولاتكلميني لمده يومين زعلت خلاص " وسكرت السماعه "
سهى : عسى ماشر وش فيها عذبه
سجى : ابد بس تقول حددوا موعد الزواج وماتبيه
ام رعد : حلو متى حددوه ؟
سجى : بعد شهرين
سهى : يؤ يؤ يؤ .. ياويلي ياعذبه تنرحم .. بدري مره
سجى : لاتقولين لها شيء ولا بدري ولا هم يحزنون .. تو احاول اقنعها والحمدلله ان شاء الله اقتنعت
ام رعد : شهرين تقولون بدري ؟ الله على ايام زمان .. اخذت ابوكم الله يرحمه ملكه وزواج بنفس اليوم وكانت بعد خطبتي ب آسبوع
سجى ونهى : الله يرحمه ..
سهى : بس يمه ترى جيل عن جيل يفرق
ام رعد : مانقول غير الله يستر علينا دينا واخره ..
سهى وسجى : اميين ..
:
:
ف بيت لينآ ب الشرقيه ( اخت عزام المتزوجه ) .. الساعه 6 المغرب ..
نايف : دقي دقي خليني ابارك له
لينا : حسافه امس ماحضرت الملكه
نايف : ماعليه خيرها ب غيرها بس دقي عليه باركي وعطيني ابارك له
لينا : طيب " وبعد مادقت " السسلام يامعرس
عزام : ههههه هلا لينا اخباركم ؟
لينا : الحمدلله بخير ومشتاقين لكم انا ونواف ( ولدها )
عزام : تشتاق لكم العافيه يارب
لينا : اعذرنا عزام ماجينا امس .. نايف انشغل شوي .. وآلف مبروك ياخوي .. تستاهل والله
عزام : لا عادي ولا يهمك يكفي اتصالك .. والله يبارك فيك
لينا : يالله ان شاء الله بعد شهرين اكون عندكم واحضر زواجك ..
عزام ب استغراب : بعد شهرين ؟
لينا : ايه ، شكل امي بعدها ماقالت لك .. دقيت عالبيت ابارك قالت انك برى واخذتنا السوالف وقالت لي ان زواجك بعد شهرين
عزام بأبتسامه : والله .. ؟ حلو كثييييييير
لينا : هههه شكلك متشوق له
عزام : آسآلي نايف قبل ياخذك وش كان ؟ متشوق ولا
لينا وهي تناظر نايف : والله وانا اختك اشك
عزام : هههههههه حرام عليك عطيني اياه بس ..
مدت الجوال له وراحت تشوف ولدها ..
نايف : هلا والله ابو نايف
عزام : هلا فيك .. بس تراني ماني مستغني عن ولدي عشان اسميه عليك
نايف : لا والله وش قصدك يعني ؟
عزام : ابد الله يسلمك اشوفك مسمي نواف علي ..
نايف : ههههههه يعني وحده بوحده
عزام : ايووه .. كذا ..
نايف : اقول اعقل بس .. هذا وانت بتتزوج .. مبروك يارجاال والله يعينك عليها ترى الحريم لويه
عزام " يامحلاا طاريها " : الله يبارك بعمرك يارب .. شكل اختي مطلعه قرونك خخخخ
نايف : اختك وغير اختك .. وبتقول نايف قال ..
عزام : اجل على كذا الله يعين الجميع
نايف بخبث : بس تراه حلـو
عزام : ههههههههههههه الله العالم من اللي المفروض يعقل ..
نايف : اقول اختك جت يالله لاتسمع الحش ..
عزام : مع السلامه
نايف : فمان الكريم . .
:
:
ف بيت ابو عزام .. الساعه 9 الليل ..
دخل عزام ومالقى بالصاله غير امه وابوه ..
عزام : السلام عليكم ..
امه وابوه : وعليكم السلام ..
ام عزام : وينك يايمه كل اليوم ادق عليك مقفل جوالك ؟
عزام : لا يمه بس قضى شحنه . .
ام عزام : اقعد اقعد
عزام : وهذي قعده .. عندك شيء صح . ؟
ام عزام : ايه .. بقولك حددنا موعد زواجك .. بعد شهرين . .
عزام : ايه يمه ادري .. قالت لي لينا . .
ام عزام : وهاللينا ماتمسك لسانها .. المهم ياوليدي .. مناسبك ولا تبيني اغيره . ؟
عزام : لا يمه شدعوه تغيرينه .. الا اذا بتخلونه بعد شهر ترى ما اقول لا
ابو عزام : ههههههه اركد ياولد ..
عزام وهو يوقف : امزح معك يمه والموعد زين يعطيك العافيه يالغاليه .. انا بروح انام اجل .. تبون شيء . ؟
ابو عزام : اقعد تونا بدري ..
عزام : لا تعباان احس جسمي مكسر . .
ام عزام : بسم الله عليك ياوليدي .. طيب تعش معنا
عزام : لا يمه ما اشتهي .. يالله سلام
وقبل يرقى نزلت ليم ووراها آلين : لا لا مافيه نووم
آلين : ايه نسيت انك مواعدنا نطلع ؟ مافيه نوم يالله رح شغل السياره على مانلبس عباياتنا
عزام : بسم الله الرحمن الرحيم .. شوي شوي الطلعه ماراح تطير
ليم : انا معك بآنها ماراح تطير .. بس انت اللي راح تطير .. مدري وين كنت من الصبح للحين .. 12 ساعه برا البيت يالظالم !! انا اطالبك ب ساعتين ثلاث بس
آلين : ايه صح وش كنت تسوي 12 ساعه ؟ تروح تغازل يمين يسار هاه ؟ تكلم طلع اللي عندك لا آفضحك عند عذبه واخليها ترفض الزواج
عزام : يوووه والله انكم ازعاج .. وبعدين اذكروا الله حتى الساعات اللي اطلعها حاسبينها .. بس يالله ولا يهمكم راح اطلعكم بكرا
ليم : لا اليوم
عزام : تعباااااااان .. خليها بكرا
آلين : اذا بكرا راح نطول ترى
عزام : ايه يصير خير
ليم : موب تقول يصير خير وتسحب علينا زي اليوم
عزام بملل : خلاص بكرا يعني بكرا وان شاءالله ما اسحب عليكم .. زين كذا ؟
آلين وليم : ايه زين ..
عزام : تصبحون على خير . .
الكل : وانت من اهله ..
ام عزام : آلين ليم .. روحوا جهزوا العشاء
آلين بصوت وااطي مابسمعه الا ليم : قولي انك تبين تصرفينا ونفهم
ليم : والله انك صادقه " وراحوا "
ام عزام : اقول يابو عزام متى راح نبدآ نجهز جناح عزام ؟؟
آبو عزام : والله متى مابغيتوا تبدون ابدوا .. لو تبون من بكرا بعد
ام عزام : الله يوفقهم يارب
ابو عزام : امين ..
:
:
ف بيت ابو ضاري .. الساعه 2 الليل .. بغرفة عروب ..
عروب وهي تكلم سهى : لا الحمدلله هجدت ووافقت على شهرين
سهى : حلو والله الله يوفقهم
عروب : امين .. عقبالنا ياشيخه
سهى : خلينا نخلص الثانويه وبعديه نفكر بالزواج
عروب : اييييه .. قريب قريب
سهى : اقول لاتصيرين مشفوحه كذا .. وش تبين بالزواج
عروب : ابي اتدلع واتدلع ويصير لي بيت لحالي و اطلع وادخل متى مابغيت وألــف اسواق الرياض كلها
سهى : هههههههههههههههههههههههههههههههههههه مصدقه عمرك والله .. اي دلع اللي تتكلمين عنه .؟ بيحبسك تقولين حمار
عروب : لا حبيبتي .. انا راح افرض شخصيتي عليه .. يبيني كذا ياهلا مايبيني بيت اهلي ابرك لي
سهى : انتي خليه يجي ويصير خير بس . .
عروب : وانتـي آلـ .. " قاطعها دخُول اخوها عز "
عز : عرووبه وين طست اختك ؟
عروب : بسم الله .. وش فيك داخل كذا .. اقل شيء طق الباب تنحنح سو اي شيء .. وبعدين صح متى جيت من استراحتكم ذي ؟
عز : يالليل سآلتك سؤال وسويتي لي سالفه .. اول شيء نمت بالاستراحه يومين وهذاني قدامك .. وثاني شيء رحت بشوف عذبه مالقيتها بغرفتها ولا بالصاله قلت اكيد عندك بالغرفه والحين ممكن تقولين اختك وين طست . . ؟
عروب وهي تكلم سهى : اقول سهوووي اكلمك بعدين .. لا لا بس اخوي قلق تعرفينه .. هههه ان شاء الله .. يالله مع السلامه ..
عز : عيني عينك هذا وانا قدامك تسبيني اجل من وراي وش تسوين ؟
عروب : امدحك خخخخخخخ اقول قم قم ندور الاخت المفقوده لاتصير انتحرت
عز : فاضي لامها انا .. لاشفتيها قولي لها ترجع لي الكَمِرَه حقتي بغرفتي
عروب : بسسس !! مسسوي كل هالسالفه عشان الكمره .. وانا على بالي بتبارك لها ..
عز : قلت اللي عندي ووصليه لها .. سلااام .. " وطلع "
طلعت وراه عروب وراحت تحت بالمطبخ .. مالقت عذبه .. راحت تدورها بالبيت ومالقتها ..
عروب : يممممممه اختي وين راحت .. معقوله طلعت مع ضاري ولا قالت لي ؟؟؟
راحت لغرفة عذبه ومالقتها .. وسمعت صوت بالحمام ..
عروب : عذبه عععذبه .. انتي بالحمام ؟؟
عذبه بهدوء : ايه ..
قعدت عروب ع كرسي المكتبه اللي بالغرفه تنتظر عَذبه .. ويوم طلعت انهبلت من شكلها المبهذل وعيونها الحمراء
عروب : عععذبه !! وش فيك .. ؟
عذبه بهدوء وهي تنسدح بسريرها وتغطي جسمها كامل مع وجهها : ولاشيء .. تبين شيء ؟؟
قربت لها ووخرت البطانيه عنها : كنتي تبكين .. ؟
سحبت البطانيه : عروب تعبانه وابي انام .. اذا عندك شيء قولي لي واذا مافيه شيء اطلعي وسكري الباب وراك .. " وتغطت "
عروب سحبت البطانيه ورمتها بالارض بعيد .. : قومي كلميني ..
عذبه بعصبيه : وهذاني قعدت .. فيه شيء .. ؟ تبين شيء .. ؟ خلصيني .. ؟
قعدت جنبها : عذبه وش فيك ؟ ليه كنتي تبكين . ؟ احد سوا لك شيء . ؟ قولي لي انا اختك
عذبه بغصه : ماكنت ابكي ولا احد سوا لي شيء . . انتي ليه جايه ؟
عروب : مو مهم انا ليه جيت .. المهم انتي وش فيك الحين .؟
عذبه استسلمت لدموعها اللي نزلت على خدها بهدوء : مابي الزواج ..
عرُوب : ليه .. ؟ ماتبين عزام انتي ؟
عذبه : السالفه مو على اني مابي عزام .. انا مابي الزواج كله .. وقهرتني طريقة زواجي منه .. يوم خطبني قلت لأبوي اني مابي .. ورفضت .. بس ماسمع مني ابوي وقالي اذا فيه سبب غير انك ماتبين الزواج قوليه .. اذا مافيه راح اوافق .. وعزام رجال مايعيبه شيء .. وامي ماقدرت تسيطر ع الوضع .. وبلغتهم موافقتي وانا ماوافقت .. حتى بعد الملكه وشوفتي له .. ما احس اني ابي الزواج ..
عرُوب : ليه .. ؟ قالك شيء ضايقك .. ؟ معاملتة موب زينه ؟
عذبه : لا آبد .. كلامه ومعاملته واسلوبه حلو .. فعلاً عزام ماينعاب .. بس ما ادري احس اني ما ارتحت .. ويوم حددوا موعد الزواج .. تضايقت مرره .. يعني مو كفايه اني ماوافقت .. يروحون يحددون بمزاجهم .. ما ادري ياعروب ما ادري .. ما احس اني مابي عزام .. بس انا مابي الزواج كله .. ولا عزام ماعليه قاصر ..
عروب : لاتخلين الشيطان يلعب بعقلك .. وصلي لك ركعتين ياشيخه وان شاء الله ب ترتاحين .. ومع الايام بتتعودين ع عزام و بتتقبلين الزواج
عذبه : ماظن ..
عروب : انتي ليه كذا متشائمه ..
عذبه : ………
عروب : اجل تبكين على انك ماتبين الزواج هاه . . قولي انك ماتبين تفارقيني وانا افهم
عذبه : روحي بس من زينك وش ابي فيك اصلاً
عروب : يوم خلصـت حاجتها نكرتني
عذبه : ههههههههههه لا جد وش افارقك .. ماراح اموت انا .. بزوكم ان شاء الله
عروب : لا بفقدك لارحتوا شههر العسل ياعسسله انتي
عذبه وهي تاخذ دفتر من ع الطاوله وترميه عليها : اطلعي برا يالفاشله
عروب : هههههههههه سلام
طلعت ورجعت على طول : صح نسيت اقولك
عذبه : وش ؟
عروب : عز رجع من الاستراحه وكان يدورك .. يقولك رجعي الكمره لغرفته
عذبه : يووه نسيت تصدقين .. افتحي دولابي تلقينها فيه خذيها وحطيها بغرفته
عروب نفذت اللي قالته وطلعت ..
وعذبه اخذت البطانيه من عالارض وحطتها ع السرير وقامت تصلي وتدعي ان الله يسعدها بهالزواج ..
:
:
من بكرا العصر .. الساعه 4 .. ف بيت ابو رعد .. الصآله ..
رعد : يمه متى بتجي ام ضاري وعيالها ؟
ام رعد : ماراح يجون وانا امك حنا اللي راح نروح لهم يوم الخمس ..
رعد : ليه الخمس يوم ؟ ليه ماتروحون اليوم ؟
سُهى : يالغبي نسيت .. حنا كل خميس ياهم يجوننا ياحنا نروح لهم .. هالمره حنا اللي بنروح لهم الخميس ..
رعد : ياذكيه ما اكلمك انا .. اكلم امي .. ياشينك بس
سهى : ادري اني ذكيه ماجبت شيء جديد .. ومن ناحية الشين .. لاتخاف وارثته منك
رعد : اسسم الله علي .. انا شين ؟ انا لارحت لآي مول تلقين البنات وراي طابور .. من ملحي طبعاً
سهى : امححححق ملح .. انت شايف نفسك بالمرايه قبل تجي تتكلم ؟ خايس معفن مدري وش تبي من الحياة اصلاً
ام رعد : بسسسسس بسس . . اوف وانتم كل ماتجتمعون لازم تتهاوشون ؟ اتمنى يجي يوم ماتتخانقون فيه
رعد : اسف يمه بس بنتك تجيب الهم . .
سهى : الله العــــآلم من اللي يجيب الهم . .
رعد : مافيه غيرك . .
ام رعد : بس خلااااااااص .. سهى روحي لغرفتك
سهى : يمه ليه انا اللي دايم اروح لغرفتي .. اول شي هو اللي بادي وثاني شيء خليه هو يطس لغرفته بعد بعد تراه بيتي مثل ماهو بيتكم
رعد : امووت على بيتك انا .. مادفعتي فيه ولا فلس .. لاتهايطين يعني
سهى : اجل انت اللي دافع فيه ؟ اصلا موجود قبل لاتنولد يالبزر
رعد : اذا انا بزر انتي وش تطلعين ؟؟
سهى : مالك دخل
ام رعد استسلمت وقامت وخلتهم يتهاوشون مع بعض .. ك العاده .. !
:
:
ف بيت ابو نوآف ( نايف زوج لينا ) ..
نايف توه داخل البيت : لينــــآ .. يالينـــــــــآ
لينا : ……..
راح لغرفتهم لقاها نايمه .. راح لمها
نايف : لينا ..
لينا : ….
نايف وهو يهزها : ليووونه .. ليينا .. بسك نوم قومي ..
لينا : هممممم
نايف : قومي جبت الغداء من برا اليوم ..
لينا وهي مغمضه عيونها ومتغطيه : مابي
نايف : افااا .. ليه ؟
لينا وهي تغطي وجهها : ما اشتهي
نايف وهو يقعد جنبها ويوخر البطانيه ويقعدها : ليه ماتشتهين ؟
لينا : مادري ما اشتهي شيء ابد
نايف : زعلانه قلبي ؟
لينا بهدوء وهي ترجع تنسدح : لا
نايف : اوكي انا بأروح اجهز الغداء بصحون وبشوفك بالصاله
لينا : لا نايف قلت لك ما اشتهي
نايف : وانا راح اخليك تشتهين ..
لينا : بـس آنـآ بـ . .
قاطعها نايف : لا بس ولاهم يحزنون .. تدرين شلون قومي معي الحين .. قومي
لينا بكسل : مالي خلق
نايف بأستغراب : وش فيك اليوم مانتي طبيعيه ؟
لينا : خلاص قمت
اول ماقامت من السرير حست بدوخه فقدت توازنها
نايف وهو يمسكها : لييينآ لينآ
لينا : ……
سدحها نايف ع السرير وقعد جنبها
نايف وهو يصحيها : لينا حبيبتي .. لينا ليناا
فتحت لينا عيوني بتعب : هممم
نايف وهو يجيب عبايتها : قومي اوديك للمستشفى
لينا : مايحتاج
نايف : الله يهديك وش اللي مايحتاج . . قومي بس
لينا بهدوء : ناايف
نايف : عيُونه
لينا بأبتسامه باهته : بنااام " وغمضت عيونها "
نايف بخوف : لينا والله اني خايف عليك .. تكفين قومي نتطمن ونرجع .. تكفين لينا
استسلمت لينا له وقامت .. ولبست عبايتها بمساعدته ونزلت بمساعدته
نايف وهو يحطها ع الكنب : بروح اجيب نواف وبجي .. لايقعد بالبيت بروحه . .
وراح طيران لغرفـة نواف الصغير وشاله وهو نآيم ونزل تحت وساعدها وراحوا للمستشفى ودخلوها الغرفه ..
بعد نص ساعه من الانتظار .. طلعت الدكتوره ..
فز نايف لها وهو شايل نواف .. : عسى ماشر لينا وش فيها ؟
الدكتُوره : انت زوجها ؟
نايف : ايه .. ليه فيها شيء ؟
الدكتٌوره : مافيها الا الخير تطمن .. بس هي شوي مرهقه ومهمله نفسها وتغذيتها سيئه وهالشيء لا من مصلحتها ولا من مصلحة الجنين ..
نايف : الجنيييييين ؟
الدكتوره بأبتسامه : ايه مبروك زوجتك حامل . .
نايف بأبتسامه : الله يبارك فيك يارب ويبشرك بالجنه .. اقدر اشوفها ؟
الدكتُوره : ايه تقدر وبعد نص ساعه لا انتهى المغذي تقدر تاخذها البيت
نايف : شكراً
الدكتوره : ماسوينا الا الواجب ..
دخل نايف عليها وحط نواف ع الكنب ومدده .. وراح لها
نايف بأبتسامه : قالت لك ؟
لينا بخجل : ايه
نايف : مبروك ياحلى زوجه بالدنيا
نزلت لينا راسها : الله يبارك فيك
نايف : لا شدعوه تستحين .. ارفعي راسك ناظريني . .
رفعت راسها و دمعت عيونها
نايف : لا لا ما اتفقنا على كذا .. المفروض تفرحين مو تحزنين ..
لينا : انا فرحاانه كثيير .. لدرجه ماتتصورها .. الحمدلله زوجي وولدي عندي وولدي الثاني بالطريق . .وش ابي اكثر من كذا .. الله يخليكم لي ولا يحرمني منكم
نايف بأبتسامه : ولا يحرمنا منك ..
لينا : ممم تتمنى ولد ولا بنت ؟
نايف : اللي يجي من الله حياه الله اهم شيء انك امه
لينا بحيا وهي تضيع السالفه : آآ ابي اطلع
نايف : لا اصبري لين يخلص المغذي اللي بيدك
لينا : ومتى يخلص ؟
نايف : بعد نص ساعه
لينا بملل : لااا مابي . . ما احب ريحة المستشفيات ..
نايف : ياقلبي كلها نص ساعه تحملي . .
لينا وهي تحاول تفك المغذي من ايدها : آفففففف
نايف وهو يبعد ايدها : لا لا لا خليه .. لهدرجه مو متحمله
لينا : خلآص تكفى خلنا نطلع
نايف وهو يمسح على شعرها : ماعليه حبيبتي تحملي شوي
لينا : ما اقدر هالمغذي اساساً ماله داعي بس يخلوننا نقعد على غير سنع
نايف : هههههههه اخص يادكتُوره
لينا : ترى والله كنت ناويه ادخل الطب .. بس تراجعت يوم تذكرت ريحة المستشفيات
نايف : ههههههههههههههههههههههه طيرتي قسم كامل عشان ريحة ! وبعدين وش فيها ريحتهم حلوه
لينا طيرت عيونها : وششش اللي حلوه ؟ مع وين تششم انت !!
نايف : يعني من وين بالله خخخخ بس مو كريهه لهدرجه ..
لينا : اااااااااااه احس نفسي بنتحر .. الله يصبرني
نايف : تحملي عشاني ..
:
:
:
ف بيت ابو عزام .. الساعه 6 المغرب . . الصاله . .
ليم : دقي دقي عليه لاينسى الموعد
آلين : لو ينسى لآنسيه نفسه
ام عزام : ارفقوا على ولدي وش فيكم عليه . . خلاص هو وعدكم ماراح يخلف
آلين : والله انك مسكينه يمه .. ولدك هذا مابقى احد ماخلف الوعد معه
ام عزام : بسم الله على ولدي من هالكلام ..
ليم : تدرين وش مشكلتك يمه ؟
ام عزام : وش ؟
ليم : انك ماتدرين !
ام عزام : ادري عن ايش ؟
ليم بكذب : انا مره كنت بروح لغرفتي وسمعته يتكلم بغرفته وقفت اتسمع وانا مو قصدي بس شدني الكلام .. لقيته يقول حبيبتي ومدري وش وان شاء الله بشوفك قريب ومن هالكلام يمه .. من الاخير ولدك يغاازل
ام عزام بدفاع : لا والله تلقينه يكلم عذبه
ليم : لا يمه اصلاً هالسالفه قبل لا يخطبها
ام عزام : ما اصدقك
آلين تآييد بكذب : الا يمه صدقي .. حتى انا مره قلت له باخذ جوالك بصور فيه لان جوالي خربان وارتبك وعيا .. خايف لا اشوف الصور والرسايل والمكالمات ويوم لزمت عليه عطاني عشان ما اشك وفتحت الرسايل وشفت كاتب لوحده مسميها ( عمري ) على موعدنا اليوم بـ …..
ام عزام بصدمه : صادقين انتم ؟
ليم وآلين : يمه اجل بنتبلى اخونا ؟ ترى حتى حنا مصدومين مثلك
ام عزام : وليه ماقلتوا لي وقتها
ليم : من ستر على مسلم ستر الله عليه ..
آلين : عشان كذا يمه لازم تفركشون الزواج هذا حرام تظلمون عذبه مع واحد مغازلجي
على كلمتها الاخيره دخل عزام ب آبتسامه وراح لأمه وباس راسها : السلام عليكم
ام عزام : ماعليك السلام يالصااااايع .. انا اخر عمري تلعب علي اجل .. هات جوالك اشوف هااااات
عزام بأستغراب : وش فيك يمه ؟
ام عزام : قل وش اللي مافيه .. ليه تسوي كذا ياعزام ؟ هذي تربيتي فيك ؟ هات الجوااااال اقولك
عزام : يمه هدي هدي وكل شيء تبينه بيصير " وطلع جواله " سمي يمه ولاتزعلين
ليم وآلين انفجروا ضحك : ههههههههههههههههههههههههههههههههههههههه ههههههههههههههههههههههههههههههآآآآآآآآآآييي اااااااه بطني ااااااااه
ليم : ههههههههههههه ييمه ترى هههههههههه م م ههههههههههههههههه نمزح ههههههههه
آلين : بس كنا بنردها له خخخخخخ عشان امس ماودانا ..
عزام : وش السالفه ؟
ام عزام وهي تجلس : حسسبي الله عليكم كانكم هبلتوا فيني .. طيحتوا قلبي .. عقاب لكم اليوم مافيه روحه
ليم : لاااااا يمه تكفين لااااااا
ام عزام : اجل ليه تسوون كذا ؟
آلين : بس كنا بنسوي مقلب يمه ترانا نمزح تكفين خليه يودينا
ام عزام : لا يعني لا
عزام : احد يفهمني وش صاير ؟
ام عزام : اخواتكم يقولون انك ………………….. " قالت له كل شيء "
عزام : افااا يمه وانتي صدقتيهم !
ام عزام بندم : الشيطان شاطر وانا امك
آلتفت عزام على اخواته : وانتم هين مافيه طلعه لمدة اسبوع
ليم : لااااااااا عزام تكفى والله انا اسسسسسفه اسسفه اسفه اتوب ما اعيدها
عزام بأبتسامة مكر : لا .. خلي مقالبكم تنفعكم
آلين : عزاااااااااااااام تكفى
عزام : قلت لآ .. " وراح لغرفته وخلاهم "
ليم : يمه تكفين توسطي لنا
آلين : ايه يمه الله يوفقك تككفين
ام عزام : لا .. تستاهلون ..
ليم وآلين بعصبيه : ضاعت علينا
غرفة عزام . .
: ادق ولا لا .. ؟ ادق وش اقولها ؟ ايه بس ب اتطمن .. يووه خلني ادق زوجتي وش فيها ..
بحث عن اسم ( الخجوله ) وابتسم يوم قراه .. ودق ..
ثواني وجاه صوتها : آلــو . .
عزام بأبتسامه : هلا
عذبه بأستغراب : هلا .. من معي .. ؟
عزام " هه يعني من تنتظرين اتصاله ؟ " : افااا .. ماعرفتيني ؟
عذبه بملل : لا ماعرفتك ولا راح اعرفك ولا ابي اعرفك ولا تشرفني معرفتك ولو سمحت لاعاد تتصل " وسكرت بوجهه "
عزام بصدمه " معقووله !! معقوله ماذكرت صوتي ؟ صح ماعندها رقمي .. بس صوتي ؟؟ انا صوتها مراح من بالي .. شكلها والله ماجابت طاريي وانا افكر فيها كثير .. ، بس هين ياعذبذب ،، وين بتروحين يعني .. احسن حل اهبل فيها ههههههه "
رجع دق عليها ولا ردت .. ارسل لها ( عذبه .. ردي .. ) .. دقيقتين ورجع دق عليها . . وردت
عذبه بأستعجال : انت من ؟ كيف عرفت اسمي ؟
عزام : ههههههه هماك تقولين ماتبين تعرفيني ؟ شلون تسآلين من انت ؟
عذبه : ياااااااربيه .. بتقول ولا لا ؟
عزام بروقاان : واذا قلت لا وش بتسوين ؟
عذبه : ماراح اسوي شيء ..
عزام : تبيني اقول من انا . .؟
عذبه بضيق : ايه
عزام : انا عبدالله
عذبه بأستغراب : عبدالله .. ؟!
عزام : ايه عبدالله .. ليه مستغربه ؟
عذبه : ما اعرف احد بهالاسم .. ؟
عزام : مو شرط تعرفين .. يكفي انه هو يعرفك .. !
عذبه : طيب وش تبي ؟
عزام : ابيك
عذبه : …….
عزام : ترى مو من صالحك السكوت !
عذبه بخوف وعصبيه : من انت ووش تبي مني وكيف عرفت اسمي ورقمي وش تبييييييييييي ؟
عزام " يالبى قلبك والله " : من انت انا عبدالله .. ووش تبي مني .. ابيك انتي كلك .. وكيف عرفت اسمي ورقمي .. سر المهنه
عذبه بقهر : تدري انك حقييييييييييير
عزام " عاد انا اليوم مروق لك " : لا والله ما ادري .. وش رايك ليه انا حقير ؟
عذبه : لانك حقير ياحقير .. قلت لك ما اعرفك ومسألة انك عرفتني حلها انت ومع السلامه
عزام : لحظه لحظه . .
عذبه : …….
عزام : شوفي .. لو تسكرين الخط قبل لا اقول انا سكريه بتشوفين شيء ماعمرك شفتيه !
عذبه : يممه خوفتني !! وش بتسوي يعني ؟
عزام : ممممممم ابسط شيء اودي صورك لاخوك عز ممممم ولا تدرين ضاري احسن !! ولا وش رايك ابوك ؟
عذبه بخوف : تكفى الله يسعدك لا تدخلني بمشاكل ..
عزام : انتي اللي جبتيه لنفسك
عذبه برجاء : والله والله قلت لك ما اعرف احد بأسم عبدالله والله اني ما اعرفك ولا اذكرك ولا شيء .. تكفى خلني بحالي ..
عزام " اخخ قطعت قلبي " : مو مشكله راح اسكر الحين .. بس اي وقت ادق عليك تردين فاهمه !
عذبه بعناد : لااااااااااا مافهمت !
عزام : لا بتفهمين !
عذبه : قلت لك لا يعني لا يعني لا يعني لا .. انت غبي ماتفهم ؟؟ خلاص انا مابيك اطلع من حياتي ياخي .. لا اعرفك ولا شيء وش تبي ؟
عزام : ابيك انتي !
عذبه : يعني ؟
عزام : بقابلك !
عذبه : لآآآآآآآآآآآآآآآآآآآآآ .. هذا اللي ناقص بعد ..
عزام : وش فيها لو قابلتيني ؟
عذبه : قل وش مافيها . . انا بأسكر .!
عزام : لا لاتسكرين ..
عذبه : وش تبي ؟
عزام : قلت لك اقابلك !
عذبه " ذا من جده يتكلم " : اسمع يا اخ عبدالله .. انك تستهبل ومدري كيف وهالسوالف موب عندي .. روح دور لك وحده تستقبل خرابيطك !
عزام : مممممم حلو .. خرابيطي ياقمر راح توصل لآبوك ولآخوانك ! ويكفي اني عرفت اسمك واسمائهم !! واذا تبين زياده ما اقول لا !
عذبه خافت وسكتت
عزام : عذبه
عذبه : ………
عزام : عذووووبتي
عذبه : لاتقول عذوبتي ماني لك انا !
عزام " بالحقيقه لي " : تبين تروحين صح ؟
عذبه : ايه مليت منك
عزام : تؤ تؤ تؤ .. لا تقولين هالكلام لانه راح يوديك بداهيه
عذبه : …….
عزام : اوكي ياقمر انا راح اسكر .. ومثل ماقلت لك متى ما اتصلت تردين !! لو تطنشين اتصال واحد انتي ادرى وش بيصير
عذبه على طول : اوكي اوكي مع السلامه " وسكرت "
عزام " ههههههههههههههه ياحليلها والله .. تههههبل لاعصبت .. ولاخافت قصه ثانيه .. فديتها بسس .. "
:
:
ف بيت ابو ضاري .. الساعه 11 الليل .. غرفة عز . .
ضاري : بس انا ما احب
عز : ماراح يضرك لو جيت معي للآستراحه .. انت جرب بس ..
ضاري : ما ادري .. ماتعود على اخوياك وكذا
عز : عاد اخوياي دايم لاجيت يقولون وين ضاري ماجاء معك ..
ضاري : طيب انا عندي فكره احسن
عز : وش ؟
ضاري : اعزم اخوياي انا مع اخوياك ونتجمع بأستراحتكم !! وش رايك ؟
عز : حلو .. خلآص اجل وش رايك نخليها بكرا الاربعاء . ؟
ضاري : لا لا خلها الخمس .. جارتنا ام رعد راح تجي مع بناتها .. وانا وانت نصرف انفسنا ب الاستراحه لين مايرجعون !
عز : ايه صح .. حلو يابو الافكار .. اشوفك الخميس !
ضاري : وجع بتروح تنام هناك ؟
عز : اجل وش اسوي هنا ؟
ضاري : ترى نوماتك كاثره !! اركد بس
عز : يالله يالله بس .. سلام
ضاري : انتبه لنفسك .. مع السلامه . ،
طلع عز للآستراحه .. وضـآري لغرفته ..
بنفس البيت والوقت .. بغرفة عذبه ..
عذبه كانت على سريرها تفكر ب الاتصال " ياربييه .. من هذآ ؟ وكيف عرف اسمي ؟ اصلا صوري وش جابها عنده ؟ من هو اصلاً ؟ عبدالله ؟ ومن عبدالله ؟ يعني لو اقول انه واحد كذاب .. يمكن .. بس كيف عرف اسمي ؟ واسماء اخواني وابوي ؟ هذا اكيد واحد يعرفني ؟ بس من هو ؟ يااااااااالله وش هالمصيبَه .. ناقصه انا .. لا وش يبي بعد اقابله !! مصدق نفسه .. بس لو فعلاً ماقابلته على قولتة بيوصل صوري لآخواني .. وقتها راح يذبحوني بدون لايسمعون مني !! اصلا وش يسمعون ؟ انا نفسي ما اقتنعت باللي يصير .. طيب يمكن يكذب علي بس بيخوفني وهو ماعنده صوري ؟ طيب اسمممممممي كيف عرفه ؟ هذي المشكله .. اففففففف حسبي الله عليك ياعبدالله كانك منكد علي .. "
دخلت عليها عــروب .. : بوووووووووو
نطت عذبه : بسسم الله .. وجع ياسخيفه
عروب : وااضح انك تسبحييين بالتفكير ..
عذبه " الا غرقت " : يتهيأ لك
عروب : ايه هين .. لو كذا كان يوم دخلت ماخفتي ..
عذبه : طيب بغيتي شيء ؟
عروب : يعني لازم كل ماجيت ادخل اكون ابغى شيء .. ؟ اختي وبسولف معها
عذبه : انا اقول روحي شوفي دروسك ابرك
عروب ب أبتسامه غبيه : بكرا اجازه ياقمر ! نسيتي ؟
عذبه ب آستغراب : بكرا اربعاء .. ؟
عروب : ادري .. من متى انا اروح الاربعاء اصلاً ؟ اجازتي اربعاء وخميس وجمعه
عذبه : هههه الله يهديك .. اهتمي بدراستك
عروب : لا بأقتدي بآختي آللي ماكملت الثانويه
عذبه : بس انا معي شهادة الثانويه حلوه .. اقدر ادخل الجامعه بنسبتي .. بس انتي لو تهملين كذا ماراح تقدرين !
عروب : اووووه خلاص سكري هالموضوع .. عندك لبس تلبسينه يوم الخميس ؟ ولا نروح نشتري بكرا ؟
عذبه : لااا مالي خلق اروح لشيء .. و آلدولاب ملياان
عروب : بس انا ماعندي شيء !
عذبه : يافقاااااشه . ماعندك شيء مره وحده .. ؟ لو افتح دولابك طاحت علي الملابس من كثرها .. بس قولي ودي اجدد وخلصنا
عروب : حلووه اختي فاهمتني .. ودي اجدد .. ماودك تجددين معي ؟
عذبه : مالها داعي وبعدين ام رعد شايفتنا مليون مره موب لازم كل مره نكشخ فيها .. رقعي لك اي لبس وخلاص
عروب : تقولين كذآ ؟
عذبه : ايه اقول ونص ..
:
:
يوم الاربعاء .. الساعه 3 العصر .. ف بيت ام عزام ..
رن التلفون .. وردت ليم بكسل : الو
ام ضاري : السلام عليكم ورحمة الله
ليم : وعليكم السلام ..
ام ضاري : انتي آلين صح .. ؟
ليم " من ذي الفاضيه " : لا ليـم ..
ام ضاري : وش اخبارك يابنيتي .. ؟
ليم : الحمدلله ياخاله ..
ام ضاري : روحي نادي امك
ليم : من اقولها . ؟
ام ضاري : ام ضاري .. ام عذبه ..
ليم عدلت جلستها : هلا والله خالتي اخبارك واخبار العروس ؟
ام ضاري : الحمدلله كلنا بخير ..
ليم : دقايق وانادي امي ..
راحت للمطبخ وقالت لآمها وردت امها ..
ام عزام : هلا هلا ام ضاري
ام ضاري : ياهلا .. اخبارك واخبار عزام والبنات .. ؟
ام عزام : الحمدلله كلنا بخير وصحه وعافيه .. اخباركم انتم وعروستنا وعيالك كلهم .. ان شاء الله بخير .. ؟
ام ضاري : كلنا بخير وانا اختك .. حبيت اعزمك بكرا الخميس .. واتمنى ماترفضين . .
ام عزام : والله مادري وش اقول خصوصاً انها اول عزيمه .. بس انا اقول ليه ماتجون انتم عندنا ؟
ام ضاري : والله ياوخيتي الجاره بتجي ولا اقدر اخليها .. تعالي معنا انتي وانبسطي وخلي بناتك يجون ينبسطون مع البنات شوي
ام عزام : ان شاء الله ومشكوره يابعدي ماتقصرين والله
ام ضاري : لا شدعوه ماسويت شيء كلها عزيمه ..
ام عزام : خلاص اجل بكرا المغرب حنا عندكم ..
ام ضاري : حياكم الله بأي وقت تبون ..
ام عزام : بس هااه .. لكم عزيمه عندنا !
ام ضاري : مالها داعي ياأم عزام ..
ام عزام : الا لها داعي .. ولاتزيدين على كلامي .. خلاص بعد جيتنا تجونا وقت ثاني ..
ام ضاري : خلاص مالك الا طيبة الخاطر .. يعني جيه ب جيه
ام عزام : هههههه تقدرين تقولين كذا
ام ضاري : يالله اجل ما اطول عليك ..
ام عزام : ياهلا ومشكوره مره ثانيه وكثري اتصال
ام ضاري : بعون الله .. مع السلامه
ام عزام : مع السلامه . .
سكرت ام عزام من ام ضاري .. والتفتت لليم النايمه ع الكنب ..
ام عزام : ليييم .. لييييييم
ليم : هممم هلا يمه
ام عزام : قومي كلميني شوي
ليم وهي تجلس : هلا
ام عزام : ام ضاري توها كلمتني .. وعزمتنا عندها بكرا .. روحي قولي لآختك عشان يكون عندها خبر ..
ليم بفرحه : والله !! اجل خلينا نروح اليوم للسُوق !
ام عزام : بلا سوق بلا خرابيط .. قلت عزيمه خفيفه ماقلت بنروح عرس .. بعدين دواليبكم مليانه
ليم : طيب طيب بروح اقولها .. سسلام . .
:
:
ببيت ابو رعد .. الساعه 8 العِشآء .. غرفة سُهى ..
سُهى تكلم عروب بالجوال ..
سُهى : كذآآآآآآآبه !
عروب : والله العظيم تو امي مسكره منها .. شوفي اجل دامهم بيجون قولي لآختك نروح للسوق مع عذبه وش رايك ؟
سُهى : حلو خلاص اجل .. بروح اقول لآمي اول احط عندها خبر .. وبعدها بقول لرعد يودينا
عروب : مالها داعي سيارتين .. خلي اللي يودينا يوديكم معنا .. مايفصلنا الا جدار ترى !
سهى : لا فششله
عروب : لا فشله ولا هم يحزنون .. خلاص بقول لـ ضآري … بعد ربع ساعه القاكم برا .. مع السلامه
سُهى : مع السلامه . .
بعد ماسكرت سهى من عروب راحت لـ سجى وقالت لها كل شيء وخلتها تتجهز .. وقالت لآمها وبعدها راحـت تلبس . .
وبعد ربع ساعه .. طلعوا سُهى وسجى .. مع عروب وعذبه .. بسيارة ضاري للمول ..
:
:
بِيت نآيِف ..
لِينآ : خلآص اجل بروح اجهز العشآء ..
نايف : لا لا .. اقعدي لا تتحركين .. شكلك ماسمعتي تنبيهات الدكتُوره .. انا بآطلب عشاء من برا ..
لينا بملل : يووه نآيف .. قالت لاترهقين نفسك بس مو معناته ما اتحرك .. حشى مشلوله !
نايف : بسم الله عليك .. لاتقولين كذآ .. بس انا خايف عليك ..
لينا بأبتسامه : اوكي بس اخر مره ازينه هالايام ..
نايف : لا
لينا : اففففففف .. طيب خلآص اطلب .. انا بروح اشوف نواف
نآيف : نواف نايم توني شايفه .. مايحتاج ترقين .. اقعدي لا تتعبين نفسك ..
طفشت لينا وقعدت بملل ..
قام نايف وقعد جنبها .. وحط ايده على بطنها .. وهمس ب آذنها : ليونه لاتزعلين .. بس مابي اتعبك ولا اتعب هذآ ( وهو يحرك ايده ع بطنها )
لينا وهي تلفت له : نايف انا مو زعلانه .. بس جد طفشت ، لا تسوين لا تطبخين لا تتحركين ، كل شيء لا
نايف : فيه احد تجيه الراحه ويرفضها
لينا : بس مو كذا عاد !
نايف : معليش تحمليني ..
لينا : طيب ابي اشوف اهلي !
نايف بأستغراب : وش دخل هالموضوع الحين .. ؟
لينا : مافيه شيء .. بس اشتقت لهم
نايف : خلاص مو اتفقنا نروح لهم بعرس عزام ؟
لينا : اتفقنا صح .. بس ابي اشوفهم قبل العرس .. وبيوم العرس بعد ..
نايف : وش معنى ؟
لينا : اهلي كيف ماتبيني اشوفهم ؟ بعدين عرس عزام بعد شهرين .. تبيني شهرين ما اشوفهم ؟
نايف : خلاص ولا يهمك بس انتي الحين ارتاحي
لينا : نايف لا تسكتني .. بتوديني لهم ولا ؟
نايف : ايه حبيبتي بوديك ليه لا .. عمري وعدتك بشيء واخلفت انا ؟
لينا : لا .. بس متى بتوديني ؟
نايف : خليها علي .. اشوف الوقت المناسب واوديك ..
لينا : لا نايف انت دايم تقول كذا وتنسى او تتناسى مدري عنك ..
نايف " الله يصبرني على هالحمل " : لا ياقلبي ماراح انسى ان شاء الله ..
لينا : ابيه بآقرب وقت
نايف : من عيوني
لينا : وش رايك اليوم ؟
نايف : ههههههههه ليونه قلنا بأقرب وقت بس مو معناته اليوم !
لينا : خلاص اجل بكرا !
نايف " يااارب " : ماعليه حبيبتي لا اليوم ولا بكرا ..قلت لك بشوف الوقت المناسب ..
لينا : لا بكرا يعني بكرا !
نايف : ياقلبي انتي .. ناسيه شغلي هنا ؟
لينا : لا مانسيته .. بس خذ اجازه ماعلي منك تدبر .. بس ابي اشوف اهلي
نايف " تحسبين الامور سهله " : ولايهمك راح اخذ اجازه .. بس اصبري علي . .
لينا بصراخ : يوووووه .. قلت لك بكرا وش اللي اصبري علي !
قرب لها نايف بهدوء وضمها له .. وقال بهمس : ارتاحي .. ولاتشيلين هم .. بكرا بكرا مثل ماتبين ..
لينا : …….
نايف وهو يمسح على شعرها : ليونه
لينا : ……..
نايف : ليونتي زعلاانه ؟
لينا : …….
نايف وهو يرفعها من حضنه .. بس انصدم يوم شاف دموعها : لينا .. ؟ وش فيك تبكين ؟
لينا : ……
نايف : خلاص ليون قلت لك بكرا .. ولو تبين اليوم ماعندي مانع .. بس ليه هالدموع ؟
لينا بهمس : نايف
نايف : عيونه وقلبه وروحه وكـلّه
لينا بنفس الهمس وهي تنزل راسها لصدره : احبك .. !
:
:
ف المول ..
عروب : رجاءاً بنات خلونا ننتظم ولا نضيع الوقت .. كفايه اننا متآخرين !
سُهى : خلاص اجل عشان نخلص بسرعه .. انا وعروب بنروح مع بعض .. وانتم " تآشر على عذبه وسجى " روحوا مع بعض ..
سجى : حلو واذا قضينا ندق ع بعض نلتقي بهالمكان !
عروب : اوكي يالله . .
وتفرقوا .. سهى وعروب مع بعض .. وسجى وعذبه مع بعض ..
عند سهى وعروب ..
سُهى : لا تعالي هالمحل
عروب : لا لا هنا تعالي هذآك بايخ
سهى : اقولك تعالي انا قد دخلته حلو وفي بلايز تههبل
عروب : وانا اقولك تعالي هنا .. هالمحل انا بعد قد دخلته .. عنده تنانير تطير العقل
سهى : اقولك تعالي هناااااا وبعدين اجي معك للي تبينه !
عروب : لا تعالي معي وبعدين انا اجي معك !
سهى : آفففففف خلاص طسي للي تبينه .. بروح لحالي
وفعلاً .. عروب راحت للي تبيه بروحها .. وسهى بروحها ..
دخلت عروب المحل .. شافته حق اقمشَه ! انصدمت وطلعت بهدوء عكس يوم دخلت !
وسُهى .. دخلت لقت المحل حق اطفال ! وطلعت مثل عروب ..
ويوم تلاقوا قالت سهى : اشوفك شريتي اللي يطير العقل !
عروب : عاد انتي اللي شريتي اللي يهههبل !
سُهى : يعني محد شرى شيء ..
عروب : اصلاً المحل اللي دخلته حق اقمشه مو تنانير والعب عليك ماعمري دخلته
سهى بفشله : وانا حق اطفال ! وكنت العب عليك ماعمري دخلته بس ابيك تجين معي
عروب : ههههههههههه هذي نهاية العناد .. كلنا خسرنآ
سهى : اقول تعالي تعالي بس … انا اقول هالمحل احسن ..
:
:
عند سَجى وعذبه . .
كانت سجى تشتري و تعطي رآييها ببعض القطع وتسولف ع عذبه .. بس عذبه مو لمها .. ولا لها خلق تشتري شيء .. وودها تطلع من المول بآي طريقه
سجى : عذبه وش فيك اليوم ؟ مو ع بعضك ؟
عذبه : مافيني شيء بس احس اني تعبت !
سجى : تونا داخلين يالعجوز امداك تتعبين ؟ " والتفتت للتيشرتات تشوفها "
عذبه بملل : سجى
سجى وهي تناظر التيشرتات : هااه
عذبه بهدوء وصوت واااطي : تسوقي لي
سجى : وشو ؟ ما اسمع !
عذبه : اقول تسوقي لي .. اشتري لي
سجى : من جدك ؟
عذبه : ايه .. وانا بروح اقعد بآحد الكراسي اللي برا هالمحل .. لاخلصتي اطلعي لي ..
سجى بأستغراب : قلنا مالك خلق وتعبانه بس مو لهدرجه ؟
عذبه برجاء : تكفين سجى ..
سجى : خلاص ولا يهمك .. بس عاد اقل شيء خلك معي !
عذبه : لا مالي خلق اوقف حتى .. ماراح ابعد برا هالمحل ولا طلعتي بجي معك لمحل ثاني ..
سجى : طيب خلاص .. بس انتبهي تبعدين .. اقعدي بالكراسي اللي برا المحل .. مو تروحين للمريخ !
عذبه وهي تطلع : خلاص طيب . .
وهي تمشي للكراسي .. رن جوالها .. واول ماقعدت طلعت الجوال من الشطنه .. مجرد ماشافت الرقم ضاااااق خلقها .. بس ردت
عذبه بهدوء : نعم .. ؟
عزام : هلا والله بهالصوت .. اخبارك ؟
عذبه : زفت ..
عزام : افااا .. عسى ماشر ليه زفت ؟
عذبه : بسببك يااخ عبدالله
عزام : بسببي !
عذبه : ايه بسببك ..
عزام : ليه وش سويت ؟
عذبه : ابد يابريء ماسويت شيء ..
عزام بآستهبال : ايه اشوا على بالي
عذبه بقههر : وش تبي داق ؟
عزام : اشتقت لك .. حبيت ادق اسمع صوتك
عذبه : صوتي وسمعته .. خلاص سكر !
عزام : لا لحظه .. انا مامليت !
عذبه بعصبيه : وانا بنتظرك لين تمل حضرتك !
عزام : اقول .. اسمع عندك ازعاج .. وينك فيه ؟
عذبه : مو شغلك ..
عزام : يؤ يؤ .. وش قلت لك قبل .. عدلي كلامك معي ولا انتي عارفه وش راح يصير !
عذبه " الله ياخذك " : …….
عزام يكرر السؤال : وينك فيه ؟
عذبه بهمس : بالمول ..
عزام : آي مول ؟
عذبه : وش عليك عاد ؟
عزام : بشوفك !
عذبه بخوف : لا لا .. تكفى عبدالله لا .. حرام عليك لا تسوي فيني كذا ..
عزام بصوت حاد : قلت لك بآي مول !
عذبه : …….
عزام " ياويلي ويلاااه ياعذبه ، مدري ليه اسوي كذا " : ماراح تقولين لي اي مول يعني !
عذبه : طبعاً لا .. مستغنيه عن نفسي انا ؟
عزام : ليه ؟؟ انا ماقلت بآكلك .. بس بشوفك ياقمر
عذبه : عبدالله
عزام : قلبه
عذبه بصوت راجي ومرتجف : اتركني بحالي
عزام " اااااه ياعذبتي ، حتى رجاك جنان " : بشرط
عذبه : اذا بتقول اقابلك لا
عزام : ليه ؟
عذبه : عبدالله انت تستهبل ؟ تكلم بعقل لو سمحت .. تبيني اقابلك بصفتك من ؟ قلت لك مابيننا شيء يخليك تقول هالكلام .. صحيح يمكن تعرفني بمجرد انك ذكرت الاسماء .. بس هذا مايعني اني اضحي بنفسي لك .. معليش يا اخ عبدالله .. راح اكتم سؤالي بآنك كيف عرفت اسمي .. لاني ادري انك ماراح تجاوب .. واللي علي اني ما ارد عليك .. واللي عليك ماتدق !
عزام " اعترف لها وبس ؟ " : انتي عارفه لو ادق وماتردين وش بيصير ياكيكه .. لو ماتنفذين اي امر صورك مباشره تروح لآخوانك
عذبه : انا واثقه بآن صوري مو عندك .. مو لهدرجه افرط بصوري انا !
عزام : ياقمر مثل ماجبت اسمك بسهوله .. مو صعبه اجيب الصور .. مصادري موثوقه
عذبه : وممكن اعرف مصادرك اخ عبدالله ؟
عزام : تدرين .. لو تفكرين زين راح تعرفين المصادر .. واصل المصادر .. بس شكلك ماجربتي حتى تفكريـن !!
عذبه بملل : طيب انا راح اسكر .. ممكن ؟
عزام : ايوه كذا ياشاطره استآذني قبل .. ولي مكالمه ثانيه معك
عذبه : يحصل خير .. مع السلامه ..
عزام : بآلف سلامه ياحلوه
سكرت عذبه من عزام .. واللي تحسبه عبدالله .. وقعدت تفكر بآخر كلامه .. " شلون يعني لو افكر زين اعرف مصادره ؟ اصلا انا عساني اعرفه هو عشان اعرف مصادره .. من ممكن يكون . ؟ وليه يسوي كذا اصلاً ؟!! "
عند سجى ..
سجى : لو سمحت بس بروح اوريها القطعه
البائع : معليش اختي .. خليها هي تجي ممنوع تطلع اي قطعه بدون دفع السعر
سجى وهي تآشر على عذبه اللي مو لمها : هذي هي ماراح يضر لو اطلع دقيقه وارجع
البائع : اسف اختي .. ممنوع
طلعت سجى جوالها ودقت على عذبه وجتها ..
سجى : شوفي شريت لك هالتنوره مع هالبلوزه .. حلو ولا تبين تغيرين ؟
عذبه بدون ماتناظرهم : حاسبي حاسبي انا واثقه بذوقك .. المهم انتي خلصتي لبسك ؟
سجى : من زماااان حبيبتي !
عذبه : خلاص اجل بدق ع عروب بشوفهم خلصوا وانتي حاسبي " وطلعت بوكها وعطته سجى "
سجى : فلوسنا وحده .. ماله داعي تدفعين ..
عذبه رجعت بوكها من اول مره بدون لاتلزم عليها .. لانها تعرف انها بالنهايه بتستسلم لها ..
ودقت على عروب اللي قالت لها انهم خالصين وينتظرونهم .. وطلعوا عذبه وسجى بعد ماحاسبوا
وهم يمشون رايحين للمكان اللي متفقين عليه ..
سجى : عذبه من كنتي تكلمين قبل شوي ؟
عذبه بدون اهتمام : عروب
سجى : لا لا .. اقصد يوم كنتي جالسه برا المحل ؟
عذبه بآرتباك : م محد
سجى : الا شفتك تكلمين !
عذبه : يتهيأ لك
سجى : معقوله اتخيل ؟!
عذبه : ايه ايه .. تعالي هنا شوفيهم هم هناك
سجى طنشت موضوع المكالمه وراحت لهم ..
دقت عذبه ع ضاري يرجعهم .. وقعدوا ب الكراسي ينتظرونه
سُهى : وروني وش شريتوا
سجى : بكرا تشوفينهم علينا خلاص ..
سُهى : لا بس اعرف ذوقكم خايس .. قلت اشوفهم من الحين عشان اذا ماصارو حلوين نرجعهم الحين مدامنا بالمول للحين
سجى : ارحميييييينآ عاد .. انتي اللي ذوقك يخلي العاقل ينجن ..
سُهى : اكيد .. انا اصلاً واثقه من ذوقي .. يالله بس وروني
سجى : قلت بكرا وماراح اغير كلامي
سهى : ترفقي بنا ياصاحبه الكلمه الثابته
سجى : ليه عندك شك بهالشيء ؟
سهى : الله يشفيك يا اختي .. ما اقول غير الله يعين اللي بياخذك
سجى : يحمد ربه بعد
:
:
ف بيت ابو عزام .. بغرفة آلين ..
ليم : مممممم لا لا احسه مايجي . .
آلين : يابنت الحلال حلو والله والوانه تهبل ومتناسق
ليم : مدري ما اعجبني
آلين وهي تدور بالدولاب : طيب شوفي .. وش رايك بهذي ؟
ليم : لا ييييع اللي علي ارحم
آلين : اقول ليم .. انقلعي برا وسكري الباب .. لبسك ولقيناه .. خليني ادور لي لبس
ليم : اففففففف " وطلعت "
على طلعتها دخل عزام
آلين بدون ماتشوفه : لييييييم ياتبن قلت اطلعي
عزام بأبتسامه : ليم وطلعت ممكن ادخل انا ؟
آلين رفعت راسها : بسم الله .. عزام بغرفتي ؟ وش هالتطورات .. حياك حياك " وهي تآشر عالكنب اللي كان مليان بلايز وتنانير وفساتين "
عزام : وين اجلس انا ؟
الين وهي تشيل الملابس وترميهم ع السرير : معليش منهبلين ع عزيمه بكرا وجالسين ندور ملابس انا وليم
عزام : وانا جاي اسآلك .. العزيمه بس حريم ؟
آلين : اكيد لا … فيه رجال !
عزام بأبتسامه : حلو .. بس انتي متآكده ؟
آلين : اكييييد فيه .. يعني بالعقل !!؟
عزام : امي قالت لك كذا طيب ؟
آلين : لا امي ماقالت ومايحتاج تقول اصلاً . .
عزام : اخاف اجي ويصير مافيه ؟
الين : لاتجي اجل
عزام : بس انا ودي
آلين : اخص اخص .. اكيد عشان عذييبووه
عزام " يالباها " : بصراحه ايه .. وانا جيت بقولك اذا كان فيه رجال ف انا ابي اشوفها !
آلين : ووشلون بتشوفها ؟
عزام : وعشان كذا انا جاي اتفق معك
آلين : يعني شلون مافهمت ؟
عزام : انا بآصير بآي مكان .. وخليها تجي بالمكان اللي انا فيه !
آلين : آلمشكله ماعرف بيتهم
عزام : ليه انتي مارحتي لهم مع امي ؟
آلين : الا بس مارحت ادور بالبيت واساساً ماحفظته ..
عزام : افففف ماعلي منك دبريني
آلين : كلها شهرين وتصيرون تحت سقف واحد .. ماتقدر تصبر
عزام : شهرين طويله .. وانا عندي موضوع ابي اكلمها فيه قبل الزواج
آلين : وشو هو ؟
عزام : لا تصيرين ملقوفه .. بيني وبينها
آلين : كلمها طيب ؟
عزام : …….
آلين : ماعندك رقمها ؟
عزام : الا عندي بس هذا شسمه .. م مدري !
آلين بآستغراب : وش ماتدري ؟
عزام : آلين بقولك كل شيء بس لاتقولين لآحد ..
آلين بتعجب : قول سرك ببير
عزام : تكفين لايطلع لآخد .. خصوصاً السوسه ليم . !
آلين : ههههههه والله لو تسمعك تسوي لك بلاوي .. قل ياخوي وش عندك ؟
عزام : يوم الملكه اخذت رقمها .. وبعد يومين مدري ثلاثه دقيت عليها .. بس تعرفين يطلع لها رقم .. لانها ماتعرف رقمي ولا سمتني ولا شيء .. واساساً وقتها كانت مرتبكه ومو همها الرقم .. المهم دقيت عليها وماعرفتني .. قلت آلعب عليها واخوفها شوي .. قلت لها آسمي عبدالله وانتي عذبه واخوانك ………… " آلى اخره .." وانا بكرا ابي اقابلها عشان افهمها اني عزام واني كنت استهبل عليها .. لاني احسها بتموت من الخوف .. وماودي تطول هاللعبه .. تقدرين تسمينه عقاب لانها ماعرفتني !!
آلين بصدمه : من جدك ؟
عزام : آيه والله
آلين : مهبووووووول انت ؟ ليه تسوي كذآ ؟ حرام عليك والله .. عذبه ماتستاهل هالمقلب او المزحه منك .. كل ذا لانها ماعرفتك ؟؟ عقابك قوي معليش .. وغير كذا بعذرها ماتعرفك . لانها اساساً ماتعرف رقمك .. انت المفروض يوم اخذت رقمها تعطيها رنه عشان تسميك وتعرفك .. مو تاخذه وتدق عليها بعد كم يوم ! اكيد الاخت بتصير ناسيه !
عزام : تنسى زوجها ؟
آلين : مو هذا قصدي .. بس ماراح يجي ببالها اي احد .. سوا انت او غيرك .. حرام والله حرام .. انا لو احد يهددني كذآ .. اتوقع انتحر !
عزام بقلق : لهدرجه ؟!
آلين : انصحك تدق عليها الحين وتعلمها .. والله ماتستاهل !
عزام : لا بكرا اقابلها احسن
آلين : وش يضمن لك انك بكرا راح تشوفها ؟
عزام : بقول لآبوها بتطمن عليها خمس دقايق يعني .. ولا جت افهمها ..
آلين : كل شيء توقعته الا هالشيء .. ماتوقعته ابد .. خصوصاً منك . . عاد عذبه اعرفها خوافه خلقه .. مدري وش شعورها الحين
عزام بندم : خلاص عاد لاتكبرين الموضوع . .
آلين : مااقول غير الله يعينها عليك .. اذا هذي بدايتها ياعزام .. وش تتوقع تاليتها ؟
قام عزام بضيق وطلع لغرفته ..
:
:
ف بيت ابو رعــد .. غرفة سجى .. الساعه 3 الفجر . .
سُهى : سجى وش رايك بهالتيور ؟
سجى : واااااو روعه .. مستحيل يكون اختيارك ؟
سُهى : ذوق عروب ..
سجى : كنت متوقعه .. انتي الالوان اللي تختارينها غريبه ونوعاً ما فاقعه .. اما هذا حلو اسود ..
سهى : لهدرجه ذوقي مو حلو ؟
سجى : انا ماقلت مو حلو .. بس التغيير والتشكيل حلو ..
سهى : اقول جوعاااااانه ودااايخه
سجى : جوعانه روحي للمطبخ .. وفيك نوم اصبري لين يآذن الفجر وصلي ونامي . .
سُهى وهي تغير لبسها : لاتناظرين طيب
سجى وهي تعطيها ظهرها : بسرعه طيب
ويوم خلصت قالت : يالله اجل بروح اسوي لي شي .. تبين ازين لك معي ؟
سجى : وش هالكرم اللي نازل عليك ؟
سهى : يووه تبين ولا لا
سجى : ايه ابي بس دقايق واجي
سهى : طيب .. " وراحت لغرفتها ورمت اغراضها ع الكنب الموجود ونزلت تبي تروح للمطبخ "
وقبل لاتدخل شافت رعد توه جـآي من برآ
سُهى : خييييييييييير اخ رعد .. ليه توك تجي ؟
رعد : اللهم سكنهم مساكنهم .. من وين طلعتي انتي
سهى : من تحت الارض . . وين كنت ؟
رعد : زوجتي يوم تسآليني هالسؤال ؟
سهى : بسسم الله علي .. اموت ولا اتزوج واحد مثلك !
رعد : اقول بلا بربره .. وش عندك مانمتي ؟
سهى : ولاشيء رحنا السوق ورجعنا متآخرين شوي وجلست اقوس واسولف مع سجى شوي وقلت لها بنزل اسوي لنا شيء جوعانين و . .
رعد : بس بس حشى .. تشرحين لي حياتك انتي ؟
سهى : مدري عنك انت اللي سآلت
رعد بينهي الكلام : طيب خلاص اللي بتزينينه زيني لي منه .. حتى انا جوعان
سهى : وجع .. مجاعه
رعد بصراخ : اقـووول !
سهى تتصنع الخوف : يممه خفت ! على فكره صوتك مهما تصرخ واطي !
رعد : هههههه سهى تكفين فكيني شرك .. راجع تعباان وجوعاان مو ناقصك
سهى : يالكذآب .. لو تعبان مثل ماتقول ماقعدت تكلمني !
رعد : قلت تعبان ماقلت اطرم !
سهى : حتى ولو .. التعبان مايتكلم !
رعد : خلاص مدام سهى . . انا اسف بس روحي شوفي شغلك
سهى : اصلاً غصب بتعتذر .. وبعدين انا انسه مو مدام
رعد : وااااااااااه .. خلاص طيب روحي يا انسه !
سهى : طيب وش تبي ازين ؟
رعد : اي شيء ..
سهى : بزين سندويشات نقانق !
رعد : وش هالعناد .. انتي عارفه اني ما احب النقانق ..!
سهى بعناد : عاد انا ابي نقانق وتو سجى قالت ابي نقانق بعد .. عشان كذا بزين وبزين لك معنا .. تبي ياهلا ماتبي ادخل معي زين لك اللي تبي
سجى وهي تنزل الدرج : ايا الفقاشه انا قلت ابي نقانق .. ماقلت شيء !
رعد : سجى تكفين خذي هالبزر وروحي معها المطبخ .. زيني اي شيء الا نقانق ..
سهى : احترم نفسك اخ رعد .. انا مو بزر !! شايفني انت على غفله !
رعد طنشها وقال لسجى : وين امي ؟
سجى : نايمه
رعد وهي يرقى الدرج : خلاص روحي زيني لي .. بروح اغير واجي
سهى بصوت عالي عشان يسمعه : لــــــيــــــه مارديــــــت .. خــآيف يالبزر !
سجى : وجع اسكتي .. امي نايمه ..
سهى وهي تحت يدها على فمها : اييه صح .. اخر مره صرخت قامت وهاوشتني .. عسى ماقامت بس
سجى : لا ان شاء الله .. امشي امشي للمطبخ بس ..
ويوم دخلوا .. كل وحده بدت تسوي شغل ..
سهى : وش بتسوين .؟
سجى : امممم بيض ..
سهى : تكفين تكفين خلينا نسوي نقانق عشان ماياكل رعد
سجى : ههههه حرام عليك ليه كذا
سهى : بس كذا قاهرني
سجى : اقول زيني الشاهي وانا البيض . .
سهى : مابي شاهي ابي عصير
سجى " الله يصبرني على عنادها " : سوي اللي تبين بس بسرعه
سهى : خلاص خلاص هونت ابي معكم شاهي
سكتت سجى وبدوا يشتغلون .. ربع ساعه وخلصوا على دخلة رعد ..
رعد : يالله تراني ميت جوع
سهى : لو تموت ونفتك منك
سجى : سسسسهى !
رعد : قاعد على راسك انا ؟
سهى : تقدر تقول كذا .. ناشب لي بالبلعوم
رعد : لو ماني جوعان رديت .. مشكلتي مالي خلقك !
سهى : لا تتعذر بآنك جوعان .. قل انك خايف وانا افهم !
رعد : ههههههه .. اجل خايف هاه .. اقول سجى جيبوا الاكل بالصاله
سهى : بس انا ابي اكل بالمطبخ !
رعد : وانا الصاله .. اقعدي لحالك ..
سهى : لا خلاص هونت بجي معكم
رعد : الله يشفيك يالمريضه
شالوا الصواني وراحوا للصاله ..
سهى : على فكره اخ رعد .. تراني سليمه ماني مريضه ياجاهل !
سجى : تكفون خلونا ناكل براحه .. كل يوم لازم تتمشكلون !
سهى ورعد بنفس الوقت : هي تبدآ . هو يبدأ !
سجى : كلكم دايم تبدون بالمشاكل .. مره انت ومره هي .. مدري شلون امي صابره عليكم .. لو اني مكانها اظن اني متبريه منكم ..
سهى : وججع بسم الله علي .. مو لهدرجه ..
رعد : اقول بس عن البربره الزايده .. ووحده منكم تكوي لي شماغي لـ بكرا ..
سهى : موب فاضين .. وده للغسال يكويه . .
رعد : اقول سهى .. وش رايك مانكلم بعض لمدة اسبوع ؟
سهى : لا لا .. تبيني اهجرك فوق 3 ايام .. ما اقدر !
رعد : اخص .. كل ذا حب . .
سهى : لا بس اشتاق للهوش ..
واستمروا إلى مالا نهايه ..
:
:
التوقعات إن وجد .. ولنا لقاء غدًا إن شاء الله للبارتين 3 ؛ 4 .
ياليت تكبري الخط شوي ……..وانتبهي لما تنزلي البارتات ماتكرري بعض المشاهد انا عدلت لك البارتات وحذفت منها المكرر
القوانين / الإطلاع هام و الإلتزام ضروري
وهذا الموضوع راح يفيدك ياليت تطلعي عليه
وبخصُوص الإضافات حبيت أنبه بإن الروايه تمت كتابتها مسبقًا وغير قابله للتعديل ؛
وبالنسبه لـ المشاهد المُكرره .. يمكن فيه ما انتبهت عالعمُوم شكرًا لكِ عالتعديل ؛
إن شاء الله لتكبير الخط ؛ وشاكره لك تعاونك وقرائتك للبارتات .. .
لا ما اتفقنا على كذا ") ض1
كيف بنزل البارتين الحين هااا .. 🙂
انتظركم ,
أنـــــــــــاقرأت روايتــــــك
وحبيـــــــــــت أقـــــــــولك أن روايتــــــــك كلمــــــــــة روووووعة قليلـــــة بحقــــــــها
وأتمنــــــــــــى إنـــــــــــــك تعتبريـــــــــني مــــــــــــن متـــــــــــابعينــــــــــك
كنت لم اقرائها بالكامل موفقه اختي الكريمه