صينية التوست بالفرن [ مشاركة في فعالية Cook Time ] 2024.

كيف حالكم ، وكيف الاجازه معكم ؟؟

مثل ماتشوفون اليوم دوري بـ مسابقة الطبخ واللي للاسف كنت ناسيتها
وزين مني اني تذكرت بس متى تذكرت امس تالي الليل ولا كان يمديني اسوي شي
فـ تذكرت اني قبل فتره مسويه صينيه بالفرن لصديقتي وسويت لنا معها ^^
فـ لما شيكت على الصور وللاسف الشديد انو الصور كانت ناقصه
والاكيد انو الكل راح يعرفها لانها معروفه عند الكل وماجبت شي جديد ^^

ونبداْ بـ قول بسم الله

اولاً المقادير :

2 كيس من التوست المنزوع الاطراف
بصله وفلفل بارد ( رومي ) مقطعه مربعات
دجاج مفروم وانا ما أستخدم الا الوطنيه لانها الافضل بالنسبه لي ^^
2 قشطه
شريحة جبن سلايز
1 جبن كرفت مبشور
1 م ص كاتشب
1 حبه ماجي
والبهارات ( بهارات الدجاج – فلفل احمر مجروش – شوية ملح )
وشويه من صلصة ماجي < تعطي ريحه ونكهه جنان للاكل =))

ثانياً الطريقه :

نحمس البصل وبعد مايذبل البصل نحط الفلفل وثم نحط فوقه الدجاج المفروم
نقلبهم لين ماينشف موية الدجاج

وبعده نضيف البهارات و الكاتشب و شوي صلصة ماجي
ونتركه لين مايستوي وبعده نضيف شريجة الجبن سلايز وشوي من الجبن المبشور
ونص علبة قشطه او اكتفي بمقدار معين حسب ماتبين وتحبين ^^

الخطوه التاليه للاسف مالحقت اصورها لان كنت مستعجله بس هي سهله مرررره
نجيب القشطه ونحطه بـ المقلاه ونزيد شوووي ماي او حليب مقدار نص بياله شاي تقريباً
ونحرك لين مايسخن وبعدها نحط 1 حبه ماجي وشوي فلفل مجروش والجبن المبشور
واذا ثقلت زيدوا ماي او حليب لان انا ما اخليها سايله مره ولا ثقيله مرررره

وبعد مانخلص نجيب البايروكس ونصف التوست طبقه او طبقتين
وندهنه شوي من الخلطه

وبعده نحط الدجاج ونصف فوقه التوست وبعده نحط باقي الخله < وللاسف هالخطوه بعد ماصورتها
وندخله بالفرن لين مايحمر من فوووق

وهذي الصواني واحد مقصدر لـ صديقتي والثاني طبعاً لنا ^^

وعوافي

وإسمحولي عالتقصير ^^