ألفيّة العذاب 2024.

[poem font="simplified arabic,5,white,bold,normal" bkcolor="black" bkimage="" border="double,4,royalblue" type=1 line=0 align=center use=ex num="0,black"]
الألف أولف من عذابي قصايد=يبكي لها شخصِ عن العين نايد
مما جرالي خذ علومِ وكايد=يحرم على قافي كلامِ خيالي
والبا بلادي كيف فيها تغرّبت=الناس جنبي بس ياخوك جنّبت
كلِّ شرابه عذب وأنا تعذّبت= يالعن أبو وقتِ يغّر الرجالي
والتا توالفنا وصرنا ولايف=ثم أفترقنا يا حسين الوصايف
خايف من الأيام يا بنت خايف=إن ما أجتمعنا ويش يجري لحالي
والثا ثمان سنين أمشي وأناديك=وأبكيت أهل الشرق من كثر ما أبكيك
أسمع صدى صوتي من سنين يدعيك=وأشكي على الله كل شيِّ جرالي
والجيم جاوبت الحمام بسماها=يا غايبه وجذور قلبي معاها
ما أدري متى الأيام يقضي بلاها =ويلتم شملِ فرقته الليالي
والحا حلفت لدار الأجناب لا أروح=يوم أنتهى صبري وضاقت بي الروح
لا صار سدّك بين الأنذال مفضوح=أقلب عقارب ساعتك للزوالي
والخا خساره يا بقيّة ربوعي=لفراقكم ترجف محاني ضلوعي
والله ماني للجماعه قطوعي=لاشك بركاني يذيب الجبالي
والدال دللني زماني ودارا =أقفى وخلانا يهود ونصارا
راحت حياتي مغترب باالديارا=أشد كفّي وأثري الكف خالي
والذال ذلّ النفس صعبِ علينا=ننسى ولو با الموت شخصِ نسينا
يا إللي نحت بك كلمة العاذلينا=إللي حكى لك فيك ياما حكى لي
والرا رسم لي صاحبي لوحة أخلاق=في ليلةِ ظلما تهيّض بمشتاق
وبا الشمس سالت لوحته كلها نفاق=وأقسمت ما أنظر لوحةِ با الليالي
والزاي زوله ساكنِ في عيوني=في سلوتي في خلوتي في شجوني
لو خنتني أعاهدك لك ما أخوني=الحب الأول .. ما ينسيه تالي
والسين سافرنا إلى الغرب والشرق=وماشفت مثله في حياتي ولا عرق
( بينه وما بين الأناثي صِدِقْ فرق )=ماله مثيلِ في دلال وجمالي
والشين شفت الموت مليون مرّه=بس أن موتي ما بلاني بشرّه
ول يا غريبِ جاليِ عن مقرّه=يطرق على الفنجال صفر الدلالي
والصاد صبر أيوب ربي يجيبه=عند الحبيب إللي غدا له حبيبه
تقلّبت فروة حياةِ غريبه= وشربت كاس المرّ من بعد حالي
والضاد ضيقة صدر وأحزان وهموم=تجمّعت في صدر رجّال محروم
صبّت عيونه ثم تابت عن النوم= بارضِ بعيده دونها الشوف مالي
والطا طويلات الليالي سهرناه=والبعد والحرمان غصبِ عرفناه
يالله أنا طالبك يالله يا الله=تفرج بجودك يا عزيز الجلالي
والعين عيد الناس يذكر ولا شيف=من لي ثمن سنين عيدي تصانيف
تفرقوا يا عيد فيك المواليف=وحبل الرجا يا عيد با الحيل طالي
والغين غرّ العين خادع سرابه=حتى تخاوينا أنا والذيابه
مابين غربات الزمان وعذابه=من بدّ كل النـاس أمشي لحالي
والفا فؤادي خايفِ لا يتفطّر=لا قمت في بعض الليال أتفكّر
الله من وقتِ علينا تغيّر=عجاجةِ تصفق بنا كل جالي
والقاف قابلته وفي عينها دموع=وأقفيت عدّ القلب با الأرض مجدوع
يالله نسجد لك ونركع لك ركوع=أرحم عبادك يا مجيب السؤالي
والكاف كلا ثم كلا وكلاّ=ما أنساك ما دام النهار يتجلاّ
لين الترايب فوق قبري تهلاّ=ويصير عقب الموت حبِّ خيالي
واللام لابدّ السّرا يدور يا هيه= يامن جحدت الطيب وأنكرت راعيه
يالعن أبو طيبِ غدا الهمّ تاليه=ماهي لنا يا عزوتي يا حلالي ؟
والنون نارِ تعتلق وتغمزلي=تاكل عيوني ثم با القلب تدلي
رجعت يا الراكب خلاوي ورجلي=ماعدّ لك بحبال شمّر حبالي
والها هنوفِ يابو نايف صغيره=صارت لي بعقد المشايخ عشيره
وطفلِ صغيرِ مادرى عن مصيره=أوصيك كان الموت فرّق غوالي
والواو وصيتك بطفلي وأنا أنخاك=يارد لحاله لو يجي وسط الأتراك
وقل له تخلص نفسك اليوم يمناك=رصّه على الرمضا وبرد الشمالي
والياء يا ربي رضينا بما صار=آمنت بك وأسلمت لك كل الأقدار
وأرجي عساها فكّةِ لي من النار=طالبك ياللي با السما فوق عالي[/poem]

منقول