ليت الله ولابعض القصايد 2024.

اخواني واخواتي في منتدى غرام
السلام عليكم ورحمة الله وبركاته
والله يالربع مدري وش اشارك به معكم لكن اليوم انا بطلع عن السستم حقي وبجيب لكم قصه وقصيده فياليت يكون معكم شوي سعة صدر وارجو منكم عدم التدقيق الزائد يعني(دام تمشي مشها) وهذي القصه او السالفه بمعنى اقرب حصلت لي نهاية عام 2024 تقريبآ وهو عندما كنت خارج من الدمام الى مدينة الرياض وكان الوالد الله يطول عمره راكب معي وكانت سيارتي كابرس نوع اس اس موديلها 2024 وكان موديل الالفين وسته لسه نازل بالسوق وكنت موقف عند محطه اعبي بنزين وفيه لكزس موديل 2024 موقفه عند محطه البنزين(كازيه عند اهل الشام) من الناحيه الثانيه وكان فيها بنتين جالسين بالمقاعد الخلفيه وكان معهم سواق ,, المهم ماقدرت اطالع فيهم على كيفي لأن ابوي شديد الملاحظه وسويت نفسي مطنش الوضع واذا جاء عندي فرصه لقطتهم بعين خخخخخخخخخخخخخخخخ المهم نزلت السوبر ماركت واخذت حاجات بسيطه ولقيت انهم مشوا قبل اطلع من البقاله وركبت السياره ومشيت
واسرعت مو عشانهم لاوالله بس مليت من الطريق ولنا تقريبآ ثلاثه ايام بالخبر وبصراحه طفشت من الشرقيه واشتقت وابغى الرياض ,,المهم وانا مع الطريق قلت يالله هذي فرصتي اكلم ابوي يغير السياره لي خصوصآ انه ربحان في روحتنا هذي خير والحمدلله واكيد مبسوط وهذي فرصه انا وليده اللي رايح معه من ثلاث ايام وانا واياه لين خلص شغله<< ياولد هذي فرصه ولازم تستغلها!!
المهم وش الحل؟؟ وش الطريقه؟؟

قلت مالي الا اقول له طلبي في ابيات عشان اقصّر عليه الوقت وينبسط بعد وتصير الجايزه كبيره هههههههـ
فقلت له ولو اني ناسي بعض ابياتها بس ياليت تتقبلونها:

يابـــــوي انا نفسي بلكســـز جديده _-_ ماني بطالب حــــــــوت اولا بانوراما
تر مطلبي يابوي قطعـــــــــة حديده _-_ وانا ابنك اللــــي على الشدة احزاما
ويابوي انا عــــــنيد ونفسي عنيده _-_ وماارضى بنظره مابها الاحــــــتراما
وش ردكم ياأهل النـــــوايا البعيده _-_ شايب ولك بالجــــــــود بصمة إبهاما
يوم ان غيري لابغــــى تقصر ايده _-_ وانااعتزي ياعســــى عمرك اعواما
وانا اتخــير جيد من قالـــــوا جيده _-_ تكفــــى ياشوق اللي زهاها الوشاما
شـــامت عن الغيروقالت لك اريده _-_ خطبهاغيرك وقالت وش ذا لخمـــاما
لو للكرم سيـد وشعــب ٍ انت سيده _-_ ولشوفتك تفرح مجـــــــــــالس نشاما

المهم كتبتها واعطيتها لأبوي معه

المهم واصلنا الطريق والوالد كل شوي يقول استغفر الله العظيم لااله الاالله ومثل كذا واللكزس مالها طاري قلت ياابوي ماسمعت لك رد ولاصوت والطريق يبغى وناسه!!!
قال كل شي وانا ابوك بيتيسر بس خلنا نوصل للبيت ولأهلنا ويكون خير!!!!!!!!

المهم مريت به على شركة عبداللطيف وعلى طريق خريص الا والوالد مايطالع للوكالات<< افا هو وش فيه تغير بعد القصيده؟؟
المهم
وصلنا للبيت ووقفت السياره عند الباب طبعآ مو باب السيارات ,,يعني البوابه اللي في الواجهه !!
قال لي وراك ماتدخل السياره داخل المواقف؟؟؟
قلت له لا ياابوي انا بروح قريب وبرجع!!
قال لي لا لا السياره واصله من طريق بعيد وخلاص ماعاد ابغاك تروح عليها ,دخلها ورح على غيرها قلت خلاص ابشر
المهم دخلت السياره وهو باقي راكب معي ونزل وقال عطني المفتاح,,المهم اعطيته اياه !!
قال لي يالله انقلع انقلع فارق عن وجهي …. قال ابغى سياره جديده قال!!
ياابوي خلاص ماعاد ابغى الاسيارتي قال والله مااعطيك ولاسياره لين تصير رجال مثل الرجاجيل اما مدام ان تفكيرك كذا فوالله ان تبطي ما ركبت السياره من عندي
المهم يا يا يا يا
قلت خلاص اللي تبيه يايبه
المهم وراحت تقريبآ سته اوسبعه شهور وانا مامعي الا سياره كأنها سيارة طرار << ماني قايل وش السياره خخخخخخخخخخخخخخ
وفي يوم من الايام كنت صايم وماني ذاكر مناسبة صيامي المهم صليت الفجر الا وابوي من يميني ويطالع فيني!! صليت ورحت البيت ولقيت العمال بالملحق مسوين القهوه وشابين النار بالمنور جلست شوي اضحك مع القهوجي ,, الا وابوي داخل جاي من المسجد سلمت عليه قال ماشالله اليوم صاير رجال ومصلي معنا قلت انا دايم رجال ومشيت منّه ابغى ادخل للبيت داخل قال لاتروح الا بعد الفطور لأني ابغاك بكلمتين!! قلت له انا صايم يايبه لكن تبيني اجلس معك ابشر والله قال خلاص مادمت صايم انشالله على الأفطار اتناقش معك في موضوع يدور براسي قلت له سم اللي تبيه الله يحييك!! رحت ونمت وفي وقت الافطار صلاة المغرب لاوالله الا بعد صلاة المغرب طلعت لهم بالديوانيه ولقيت ابوي وواحد من اخواني اسمه سعود جالسين ويوم دخلت عليهم الا يوم غيروا الموضوع وسكتوا المهم سلمت عليهم كلهم وحبيت راس ابوي وجلست ,,شوي الا يوم اذن العشاء وراح ابوي للمسجد وجلست انا وسعود !!
قال لي سعود يافلان انا عندي لك خبر حلو وراح تفرح له مره!! قلت وشو ياسعود؟؟
الا ويمد يده علي وفيها ظرف!!
قلت خير وش اللي صاير؟؟؟؟؟
قال شوف افتح الظرف واقرأ اللي فيه!!
فتحت الظرف ولقيت فيه ورقتين
الاوله
قصيده من ابوي وهي رد على قصيدتي اللي قبل سته شهور والثانيه مجاراة سعود لأبوي ولي انا
المهم
ابوي يقول:

عطــــوه مايبغى جيبــــــوا مايريده _-_ عطــــــوه مايبغى ولاابغــــــــى كلاما
ياسعـــود مابــي جرحتـه ياعضـيده _-_ وياسعود اناماارضــــى عليكم ملاما
وياسعــود خافـوا من يروف بعبيده _-_ دنيـــــآ تجي وتروح وكلــــــها حطاما
وياعيالي الرجـّــــــــال يعرف قعيده _-_ ياعيالي خافــــــوا من عيال الحراما
اللي مماشيهم ممـــــــــاشي زهيده _-_ عليكم باهل الطيب نســــــــل الكراما
اللي لهم بالوقت وقــــــــــفه سديده _-_ وتفرح بهم لامن غشـــــــاك الغماما
وياعيالي مابي لي نفـــــــوسٍ بليده _-_ آذان ماتوحــي ومع قلوب صمــــاما
أخذوا وصاتي الوصــــــــاة الوكيده _-_ شهـــــادة واوســـام كفـــــو الوساما

هذي بالنسبه لقصيده الوالد..
اما بالنسبه لأسعود فيقول/

لبيـــــــــه ياعـــود ٍ قرينا قصيده _-_ لبيــــــــــه من قلب ٍ يكــــن احتراما
لبيـــــــه ياراعي اشوار ٍ سديده _-_ لبيـــــــــــه وقبلها بأبـــــدأ بالسلاما
افراحي بنشرها بداخــــل جريده _-_ مبروك يا……………بوقت الزحاما
وياليتها ثنـــــتين وماهي وحيده _-_ والخير الى من جـــــأ يوزع اقساما

المهم ان الوالد ماقصر واشترى لي اغلى مما طلبت وسعود كان يبغى الوالد يشتري سيارتين لي وله ولكن سبقك بها عكاشه

اخواني مشكورين على سعة الصدر اللي وطول الوقت الذي اخذته منكم وياليت تعذروني على الاطاله
<< وتوبه اذا عاد كررتها خخخخخخخخخخخخخخ

طبعآ عشان خاطر اخوي
المتــ القلم ـميز
بقلمي وبقلم ابوي وبقلم اخوي<< صارت قطه هذي بقلم العايله كلهم خخخخخخخخخخخخخخخخخخخخخخخخخخخخخخخخخخخخخخخخخخخ
تحياتي للجميع

أســــ الغنج ــــير

بوح رائع

خاطره جميله

كجمال حضورك

الله يعطيك العافيه

/

/
دمت بود..

عيون ابوها..

ماشاء الله العائله كلهم فنانين …

وتستاهل السيارة

وصح السانك والسان الوالد وسعود كمان ….

يسلمووووووووووووووووووووووووووووو اخوي العزيز

أختكـــ

غــــــ لا ي إنــــتـــــ

أسير الغنج

صح لسانك والله والمهم أن اللي تبيه جا

أما العود

صح لسانه مليون

سلم راسه والله

والله يطول بعمرهـ وبأعمار والدينا جميعاً

والله أنهم عزوتنا وسندنا

وصح لسان أخوك بعد

أستمتعت بمروري بس ما عاد لقيت طاري للكزس

تحياتي وتقديري

اخي الغالي اسير الغنج

ومشاركة جديدة

ولكنها بنفس الوقت فريدة

مبروك يالغالي السيارة

وان شاء الله تكون

فأل خير عليك

بصراحة نهنئك

على اسلوبك الجميل

الذي دائماً تمتعنا به

واكيد الشعر عدكم وراثة بالعائلة

وصح السانك والسان الوالد

والسان سعود …

الله يخليكم البعض يارب

ويزيدكم في الخير ونعيمه

شكراً لجمال المشاركة

ولاتحرمنا جديدك

دمت بخير

اجمل الامنيات

من سيد الامنيات

تحياتي
نشوان/سيد الامنيات

اختي الغاليه عيون ابوها
يعطيك العافيه على مرورك العذب
وتعليقك الراقي
ودمتي بكل الود
وتقبلي تحيات
وتقدير اخوك
أســــ الغنج ــــير

لاهنتي لاهنتي
تعليقك حلو ووافي
وهذا اللي تعودنا عليه من اختي
غلاي إنت
لاعدمتك اختي وتأكدي ان مرورك اسعدني وزادني سرور
وبصراحه قعدت اضحك من كلمتك((العايله كلهم فنانين)) خخخخخخخخخخخخخخخخخخخخخخخخخخخخخخخخخخخ
ايه حنا نخطط بعيد
فاالاب يخطط يمسك موقع محمد عبده وانا خالد عبدالرحمن وسعود راشد الماجد وبقية اخواني يفكرون في فنانين ثانين ماعدا اخواني الصغار مره تفكيرهم غير لأن فيهم واحد يخطط يمسك مكان مايكل جاكسون والثاني يقول انا خجلان والا كان حليت مكان شكيرا خخخخخخخخخخخخخخخخخخخخخخخخخخخ
<< اختي طلبتك لاتزعلين من الغشمره والمزح !! ترى انا مزحي كثير وماافوتها خخخخخخخخخخخخخخخخخخخخ

لاعدمتك والله انك غاليه
وتقبلي تحيات اخوك
أســــ الغنج ــــير

صح بدنك
ولاعدمتك اخوي غيثان
<< حسبي على بليسك ودي اضحك من سالفتك يوم تقول اللكزس خخخخخخخخخخخخخخخخخخخخخخخخخخخ
احم احم
لالا الشايب قال لي الا وش رايك تبيع السياره هذي اللي كنها سيارة طرار وتاخذ السيكل هذا واذا احتجت لزوم ضروري اطلع مع جلال << السواق خخخخخخخخخخخخخخخخخخخ

لاوالله ابشرك عاوضني العود بشي ماتوقعته لعنبو اللكزس وطاريها
لكن الاهم من هذا كله انك انبسطت والاخوان على السالفه
وعسى الله يخلي لنا والدينا جميعآ الاحياء ويرحم الاموات

لاعدمتك اخوي
مرورك اسعدني
وتقبل تحيات اخوك
أســــ الغنج ــــير

اخوي نشوان
هلابك والله وهلا بمرورك
الاكثر من مشرف
والاغلى من غالي
وانت عارف هالشي
وعارف وش يعني لي مرورك
وفعلآ اغلب العائله شعار او شعراء
ولكن فيهم الذي لايفهم بالشعر حرف واحد
انا اذكر لك مره كنا رايحين انا وثنين من اخواني ماسكين خط وطفشنا من طول الخط قلنا نلعب محاوره بيننا وبدأت اللعب انا وكانوا ثنينهم يتساعدون علي وفيهم واحد وهو اكبرنا مايعرف وين الشعر رايح وكل شوي جايب له بيت شعر قلنا ماهو صاحي الليله صاير شاعر قوي !! المهم اكتشفنا انه كل مااقول بيت يرسله لأخوي الرابع في البيت وهذاك يرد على بيتي ببيت في رساله وكان الجوال على الصامت وبعدين يقراها هذا اللي معنا ويقولها والمشكله ان اللحن عنده صافي مره وصوته جبلي

عالعموم اخوي نشوان
الله لايهينك ويعطيك العافيه
تحيات اخوك
أســــ الغنج ــــير

ماشاء الله انعم واكرم والله العايله كلهم شعار الله يخليهم لك ويخليك لهم

اما بالنسبة للموضوع فكرته روووعه وجديده عجبتني بصراحه <قصه وقصيده> والسالفه اروع

والشعر اللي فيها عاد ماعليه كلام ماشاء الله عليكم…

سلملي على الوالد وعلى سعود<~ ميانه بعد ماتعرفت عليهم ههههههه

وبالمناسبة الف مبروووك السياره تشوف خيرها ويكفيك شرها يارب

تقبل مروري اخوي اســــ الغنج ــــير

..جـــــود الحــــزن..