فرحتي بالإجازه 2024.

السلام عليكم
يسعد مساكم …ممادار في خاطري ..اتمنى ينال إعجابكم

ماينوصف فرحي ولا بالهرج ينقال
ياسعد قلبي والسعد ماله حدود

اليوم تبدى عطلتي وراحت البال
وتتجدد افراحي مع ماضي عهود

ويطيب خاطر من الهم منشال
والكتاب والدفتر على الرف مجحود

سفره وطلعه ورحله وترحال
ونصبة خيام(ن)جمرها دوم موقود

والليل نسهره ونطربه موال
والصبح لصبح ينقضي وكلنا رقود

العلم ديره ربت اجيال جيال
ومنقود من يرخص العلم منقود

متمسك(ن)بالعلم من صغري ولا زال
بس لا شك للإجازه حب موجود

بقلمي

صح لسانك واعتلا شانك
الفكرة وصلت بوضوح
تملك موهبة يالغالي ولكن تحتاج لزود اهتمام وصقل بالاطلاع وكثرة القراءة والاحتكاك ولو بالنشر والمشاركات واهم شي الحرص على تقبل وتلقي الملاحظات والاراء .
ومنها ان الوزن في هالقصيدة بالذات في الشطر الاول من البيت الاول والبيت الثاني والاول من البيت الرابع والبيت الخامس والثاني من السادس والبيت السابع هذاي حسب رايي الشخصي كمتذوق اللي فيها خلل ومعناته عندك بيوت مستقيمة وجيدة دلالة على ان عندك مقدرة لطرح الافضل فاستمر لاهنت .

صح لسانك أخوي غريب وبيض الله وجهك استمر فديتك وحاول تحسن انا قايل لك اوزن الابيات على لحن شف لك اي لحن وغن الابيات عليه واذا صار ما فيه تكسير في اللحن خلاص تعتبر موزونه وترى ماهو عيب انك تخطي عادي كلنا صار له نفس الموقف وبتتعلم مع الوقت ونحن هنا لمساعدتك وللأخذ بيدك الى الأفضل
وأسأل الله لك التوفيق والسداد وشكرا.

صح السانك
ويعطيك العافية
بنتظار جديدك

ياهلا وغلا اخي ابو سيف ..يسعدني وجودك بموضوعي..ويسعدني نصحك لي وملاحضاتك …
بالعكس انا اتقبل الاراء لاني متأكد إن إلي يوجه لي ارئه شخص يبي يشوفني دائمآ للافضل
لاحرمت مرورك وردك
لك إحترامي
..

صح لسانك اخوي غريب
تسلم والله لاهنت
احترامي

صح لسانك ودام ابداعك
تحياتي