عيدها بشويش يانبض المحبة / بقلمي 2024.

بعد اسبوع مر على ابطالنا مرور الكرام

وصار وقت طلعت امينه من المستشفى
وكان يوم السبت واجازه ..
والبنات قاعدين بالصاله
صالحه:يا بناتي اليوم بتجي امينه الله الله بالركاده لا تفشلوني
المها:اكييد يمه امون بعيوناا
ميثا وهي رافعه حاجب:امون بعد!!
حمده وهي تمصخر عليها:اقول اكرمينا بسكوتج لا الحين بالقلاص بويهج هو بروحه مفعوص
شمه وهي تضحك :وااي يا حمود جبتها صح هههههه
المها وهي ساكته محترمه امها:يمه انا بروح اجيب القفاش والسويتز من المطبخ
حمده اللي حست انها ضايقت المها
,,,,,,,
بالمطبخ ..

حمده توها داخله:لا تكون الحلوه زعلت

مها :ساكته عشان ما تنفجر من معاملتهم لها :……………..

حمده وهي متضايقه من اللي سوته :والله سوري يا مها انتي تعرفين انه اسلوبي شوي دفش بس ما كان قصدي اضايقج

المها بصراخ وهي مقهوره: يا ريته على هالموقف كان سكتت دايما اعاملكم احسن معامله وانتوا تخسسون فيني قايمه قاعده

ترررررررررررررررررررررررررررن

صالحه وهي تصارخ:يا مهوووووي اطلعي اكيد هذي امينه
المها:انشالله يممممه
بعد خمس دقايق دخلت امينه وهي مرتبكه من نظرات البنات لها

صالحه :حيالله ببنيتنا بنات وحده منكم تنادي الخدامه تشيل اغراضها

جات الخدامه وخذت اغراضها وحطتها بغرفة تماضر اللي كانت مقهوره منها ومن جمالها واللي غطى عليها
اما اذا عن خواتها فكانت كاسره خاطرهم لا أم ولا اب وحالها من حالهم

شمه وهي مخنوقه:خالتي انا رايحه ارتاح بغرفتي

حمده بنفس الاحساس :وانا بعد يا خالتي

صالحه عورها قلبها وحاسه فيهم وبابتسامه صفرا:زين يا بناتي روحوا

———————————————————————–
ببيت عبير الفخم
وفي سريرها المريح كانت نايمه ومسكره جوالها
:طق طق طق
عبير:نعمم
ميري:يله ماما قومي انتي ماما تهت عشان ريوق (يله ماما قومي امج تحت عشان الريوق)
عبير بصوت مبحوح وكله نوم :زين جايه
بعد نص ساعه نزلت عبير بفستان وصابغه شعرها وفالته ورافعه قذلتها بطوق ولابسه عدسات بدال النظاره
العنود بصدمه من التغيير المفاجأ:عبير!! ماشالله عليج وين خاشه كل هالزين
عبير:مدري انا مليت من نظرات الكل لي واني وحده بوحمص و مو اجتماعيه
العنود بخوف لا تكون بنتها تمشي بطريق غلط:اكيد بس هذا السبب ؟!!انا امج لا تخشين علي صارحيني يا بنتي
عبير وهي تضحك ع امها :فديتج يا يمه الله يخليج لي انا تربيتج
العنود بعد ما خذت نفس عميق :ريحتيني يا بنتي الله لا يحرمني منج
:ترن ترن
العنود:يا بنتي ردي شوفي من!!
عبير بعد ما امسكت الفون شافت رقم المها وابتسمت:يمه هذي مهوي عن اذنج
العنود :اذنج معاج
,,,,
المها:هلا بالقاطعه اخبارج؟
عبير:تمام يا قلبي وانتي؟
المها:تمام المهم انا ابي اقول لج انه اختج امينه طلعت من المستشفى وساكنه عندنا بتجين تشوفينها ؟؟
عبير:اممم اكيد بس نطري استاذن من امي وارد لج خبر
المها:زين يله اجل مع السلامه
عبير :باي
وطبعا نزلت عبير واستاذنت من امها ووافقت
,,,,,,,,,,,,,,,,,,,,,,,,
بالصاله "
صالحه:شلونج يا بنيتي وشلون امج
عبير بعد ما فسخت العبايه وصدمت الكل بشكلها الجديد :الحمدلله يا خالتي تسلم عليج
صالحه:الله يسلمها من كل شر
امينه بعد ما دخلت وسلمت بس ما عرفت عبير لانها تذكرها كانت صغيره
امينه بصوت خافت :خالتي من هالبنت
صالحه :اي هذي عبير اختج
امينه بعد ما سلمت عليها ولمتها وصارت تصيح :والله وكبرتي يا عبير وصرتي مره
عبير وهي مستانسه وموب عارفه شتقول: تسلمين حبيبتي
وصاروا قاعدين ويسولفون ومستانسين
وقطع حديثهم دخول حمده وصفقها للباب بعصبيه سلمت على عبير
وطالعتها بنص عين :اووه والله وصرتي تعرفين الكشخه
امينه وهي معصبه من اسلوب حمده معاهم :احترمي نفسج وتكلمي عدل لا اربيج الحين
حمده بعصبيه:تخسين الا انتي ما بقى الاا المجنونه تجي تربينا شكلج نسيتي عمرج يا ال…
ما وعت حمده الا بكف حار خلاها تطيح :انا تصفقيني كف !! انا اعلمج يا المجنونه هيين حسابنا بعدين وطلعت برا
امينه ركضت لغرفتها بسرعه وصارت تصيح
اما عبير طلعت لبيتهم فرحانه انها قدرت تقرب لوحده من خواتها وبنفس الوقت متضايقه من اللي صار
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,
نرجع لحمده اللي ردت الساعه 3 بعد ما اتصلت بحنان وجات خذتها
حمده بعد ما دخلت وشافت شكل اختها ووجهها التعبان :اخ يا ريت اعرف شاللي قلب حالج وخلاج شبه ميته وصارت دموعها تنزل غصب عنها ,وعت على هالدنيا وهي معاها ومتعلقه فيها ودايما يشكون حق بعض وصار ضميرها يأنبها على اللي سوته اليوم مهما كان هذي اختها الكبيره
وبعد تفكير غفت من التعب
————————————————————————————————
صالحه كالعاده تصرخ والبنات لا من مجيب بس هالمره قامت معها امينه وساعدتها وصحت البنات وجهزت الفطور وكلوا وطلعوا للباصات وكانت تلبس عبايتها تبي تطلع تشوف لها وظيفه محترمه
صالحه :يا بنتي زين شلون بتروحين انتي عارفه احنا ما عندنا الا سيارة ميثا وتروح فيها الشغل
امينه:بروح بكروه
صالحه:وي وي وي يا واخزياه انتي بنت ال… تركبين كروه!!
امينه:الله والعايله يا خالتي شفادتنا فيه نستحي نركب كروه لو احنا موب بحاجتها
صالحه بقلة حيله:براحتج يا بنتي
—————————————————————————————
ببيت بوفهد
فهد,سالم ,محمد ,شريفه ,ام فهد,ابو فهد

العايله مجتمعه على طاولة الاكل
محمد وهو متضايق ومخنوق :يبه انا طيارتي بعد ساعتين
بوفهد:الله يوفقك يا ولدي
ام فهد ودموعها اربع اربع :تو الناس يا ولدي ما تهنينا فيك
محمد باس راس امه وسلم على اخوانه واخته وطلع

محمد بعد ما وصل للمطار وركب الطياره صار يفكر:انا ليش انبني ضميري على هالبنت وحسيت بغيره عليها ,,لا لا هي اللي ركبة معاي وتستاهل لو غيري كان سوى فيها من زمان وخلص
————————————————————————————————–
الساعه 2 ونص الظهر

:صالحه صالحه
صالحه وهي تركض :هلا يا بنتي
امينه وهي تصررخ :باركي لي باركي لي لقيت وظيفه !! حمدلله
صالحه وهي تلمها وتبوس فيها:الف مبروك يا بنتي الف مبروك يعطيج خيرها ويكفيج شرها وانشالله تزوجين ونفرح فيج بعد
امينه بانكسار وحزن :امم خالتي وين البنات ابي ابشرهم
صالحه استغربت من ردت فعلها :البنات داخل 🙂
وبعد ما راحت امينه صارت تفكر فالكلام اللي قبل سنين اذا كان صح ,لا لا امينه مره مصليه مسميه مستحيل تسوي هالشي ااخ يا خبر بفلوس بكره ببلاش
قطع تفكيرها دخول تماضر وبايدها ساعه رولكس
صالحه:تماضر من وين لج هالساعه
تماضر:هاه!!هديه من رفيجتي
صالحه وهي رافعه حاجب:بمناسبة شنو
تماضر:عربون محبه وصداقه
صالحه :ليش انتي قاصرج شي عشان رفيجاتج يعطونج هدايا
تماضر وهي تضحك:قصدج شنو مو قاصرني وصلنا 2024 وللحين عايشين على الضمان الاجتماعي وساكنين ببيت شعبي ويا ريت لحالنا مجمعين بنات الشوارع والمجانين وحاطينهم بيتنا ياكلون ويشربون ويلبسون بفلوسنا واهما من دونج امهم حاطه لهم حساب وفلوس كل شهر
صالحه وهي مقهوره:كل هذا شايلته بقلبج وساكته !!مشكوره
ودخلت غرفتها تصيح ..
————————————————————————————————–
الساعه 3 بجامعة قطر
حمده:حنون بدش الحمام دقايق وراجعه
حنان:اوكي بس لا تطولين
حمده:انشالله عمتي ههههه
:طااااااااااااااااااااااخ
حمده:وجع انت ما تشوف !!
الدكتور فهد:سوري يا اختي
حمده بدفاشه :وين اصرفها يالطيب
الدكتور فهد وهو معصب:احترمي نفسج انا دكتور هني
حمده:الله والدكتور مالت بس
الدكتور فهد وهو ثار الدم بعروقه :مسكها من قميصها الرجالي وريحة عطرها القويه دشت بخشمه
دزها باحتقار ومشى
اماا حمده اللي كانت معصبه وتسب دشت الحمام وصارت تدخن وعيونها مليانه دموع وتكابر غسلت وجها وزفرت بقوو وطلعت

حمده:……………………
:حمده حمده قومي يا ناااس ساعدوني ماااااااي
: شفيها حمود قوووووووم
: قوووووم
:اه اه اه اه اه حمودي قووم لا تعور قلبي
الخ الخ الخ
حمده اغمى عليها وخذوها المستشفى
——————————————————————-
شركة احمد ال…. للمقاولات
بوفهد:اسمع يا تركي الملفات تكون جاهزه لانه انت عارفه هالشركه شنو مهمه ولازم نخلصها باسرع وقت
تركي:تامر طال عمرك وما يصير خاطرك الاا طيب ساعتين بالكثير الشغل خالص ومسلم لهم
:ترن ترن ترن
بوفهد:نعم
:انت احمد ال…..
بوفهد :اي من معاي
:معاك الدكتوره فوزيه من مستشفى حمد
بوفهد:هلا امري ؟
د.فوزيه:بنت اخوك حمده ال… حالتها شوي حرجه ومحتاجين حد من اهلها يكون موجود
بوفهد :انشالله دقايق واكون موجود
,,,,,,,,,,,,,,,,,,,,,,,,,,,,,,,,,,,,,,,,,,,,,,,
:ااه ااه ااخ
د.فوزيه:الحمدلله ع سلامتج
حمده:انا وين
د.فوزيه:انتي بالمستشفى
د.فوزيه:اممم حمده؟
حمده:هلا
:انا ابي اسالج سوال وموب عارفه من وين ابتدي
حمده:اسالي هي خربانه خربانه
د.فوزيه:انتي تدخنين؟
حمده بارتباك:لا؟ليش
د.فوزيه :لانه الرئه عندج شوي تعبانه ومحتاجه علاج وانا شفت فحوصاتج وما اظن انه رئتج اكتسبت هالقد دخان من دون سبب لحد ما اتلفت
حمده بقلة حيله :اي ادخن صار لي ثلاث سنين ونص
د.فوزيه :ليش!! انتي بنت ال… تدخنين؟
حمده وعيونها مليانه دموع وحطة راسها ع المخده وعطت الدكتوره ظهرها:بنت ال… ما فادها العايله عشنا عيشة الكلاب
د.فوزيه:لا لا محشومه
:طق طق طق
حمده :ادخل
بوفهد:السلام عليكم
حمده باستغراب:وعليكم السلام من انت؟
بوفهد :شلونج يا بنتي عسى انتي مرتاحه
حمده بتعب:تمام,هه ع الاقل عايشه!!
امينه اللي كانت مثل المجنونه تركض ودشت حتى ما طقت الباب ركضت ولمت اختها وصارت تصيح
بوفهد بابتسامه:والله وكبرتي يا امينه
امينه اللي انتبهت له :ممكن اعرف شجايبك!!
بوفهد:عيب يا بنتي الناس تسلم تسال عن الاخبار
امينه :مو انت اللي بعتنا عشان زوجتك وعيالك ووصخ دنيا احنا موب بحاجتك ولا حاجة اخبارك
بوفهد وهو ياشر على حمده:اسمعي يا بنتي انا عمج وابيكم ترجعون تعيشون معاي ومعززين مكرمين
:لو سمحتوا اتفضلوا عشان المريضه ترتاح
بوفهد,امينه:انشالله
وطلعواا
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,

(هل بوفهد حس بالمسؤليه تجاه بنات اخوه او انه ناوي على نيه ؟؟!!)
(عبير وشمه وامينه وحمده شمصيرهم؟؟)
(فهد شنو بتكون ردة فعله لما يشوف حب حياته صارت بويه؟ )
(صالحه وبناتها حياتهم لاي مدى بتوصل؟)
(بوغايب وشيخه وينهم عن بناتهم؟ معقوله ما يسالون عنهم!!؟)