شخباركم ؟
اليوم حبيت حط لكم رواية بحرانية تتحدث عن الواقع
أول شي بعرفكم بالشخصيات الرئيسية:-
فاطمة: عمرها 16 سنة .. حبوبه و خفيفة دم بس طايشة وعصبية زيادة عن اللزوم .. و إذا حبت تبيع الدنيا للي تحبه بس مشكلتها أنها تفكر بقلبها قبل عقلها و هذا يسبب لها مشاكل ..تحب تعبر عن مشاعرها بطلاقة ..عنيدة.. تحس إن مافي احد يفهمها..!
مريم : حبوبه وهبله ..يحبونها اللي حولها .. تحب تكون صداقات .. طيبة القلب تحب الضحك والمزاح وماعندها شي جدي أبدا .. تحب تستنذل على صديقاتها واجد بس يا ويله اللي يستنذل عليها .. ماتحب الدراسة ومو مهتمة لها كلش ..!
حنان: أهبل وحدة في البنات.. خصوصا لما تأكل مربى تستجن واجد :p .. لها شعبية كبيرة .. طموحة تحب تنمي مواهبها .. وتتعامل مع الناس بطيبة قلب.. مخلصة.. رزينة صبورة .. ذكية بس غامضة ..!
نورة : مجتهدة وشاطرة .. رزينة.. خدومة.. طيبة على نياتها .. تفكر بعقلها في الأمور العاطفية .. وتفكر مليون مرة قبل ما تقول أو تسوي إي شي .. بس مشكلتها ما تعرف تعبر عن حبها اجتماعية بس اجتماعيتها هذي ساعات تسوي لها مشاكل ..!
سارة: شخصيتها قوية.. مغرورة بس طيوبة .. دلوعة لكنها مزعجة .. غيورة.. إذا حبت شي تحب تمتلكه لحالها .. اللي يحبها تحبه .. طموحة دائما تفكر في المستقبل البعيد وما يهمها شنو بصير باجر .. صريحة ماتعرف تجامل أبدا ..!
زهرة : حلوة ومزيونة بس تتعامل مع الشخص مثل ما يعاملها .. تحب المزاح …. لسانها طويل تعلقه على كتوفها ولسانها دائما يخونها.. تحب الحرية والتجديد .. تحب المغامرات وبناء الصداقات في بعض الأحيان تكون مزعجة
محمد: له شخصية قوية.. وجريء زيادة عن اللزوم .. يحب المزح والغشمرة واجد .. طيب بس ياويله اللي يتحجج فيه (( يوريه نجوم الظهر :p ))
حيدر : ذكي ومحبوب .. عاطفي بس مشكلته ما يعرف يعبر عن مشاعره ألانه خجول.. واضح وصريح مايحب اللف والدوران
البارت الأول :-
كانت فاطمة فرحانة واجد ألانها بتروح ثانوي وحست روحها أنها كبرت وهالسنة بتتغير لكن كان في نفس الوقت حزينة الان صديقتها مريم ما بتكون معاها في نفس المدرسة الانها كانت واجد مقربة منها وما تقدر تتخلى عنها .. من التفكير ما قدرت تنام وظلت سهرانة مع مريم في التلفون للساعة 5 الفجر وبعدين تعبت وغفت عيونها وكان باقي ساعة علما تروح المدرسة .. جا الصبح وجت أم فاطمة تقعد فاطمة من النوم حق تروح المدرسة
أم فاطمة : يلا يا بنتي قعدي له بسش نوم قومي غسلي وجهش وتريقي حق تروحين المدرسة (( تريقي يعني فطور بس هذا باللهجة البحرانية يقولون ريوق :p ))
فاطمة : أوه ماني .. أماه خليني أنام شوي عاد بس شوي شوي بس وبقووم تعبانه حدي
ام فاطمة : والله محد قالش تسهرين امس .. جا امس ساعة جم نمتين ياحظي ؟
فاطمة : نمت عقب اذان الصبح يعني تقريبا الساعة 5 طول الليل ما قدرت انام من الخوف بس كل من مريمو نامت وخلتني انام وياها على الخط ههههه
ام فاطمة : الانش طايحة حظ له .. احد ينام قبل ساعة من المدرسة ! .. انزين يلا قومي اليوم أول يوم ليش في المدرسة الثانوية ماتبين تتأخرين في أول يوم في المدرسة صح .. يلا قومي
فاطمة : أماه بسش طحنه بس خلاص بقوم أوف ياربي (( طحنه كلمة بحرانية تعني الكلام الزايد وبعد حطمة لها نفس المعنى :p ))
ام فاطمة : بطيب ما تقومين .. بس تدرين شلون بتقومين بالماي البارد .. بتقومين لا اجيب الماي البارد واجبه فوقش !
فاطمة : بل بل ماي بارد عاد لالا خلاص بقووم .. اكوا قمت اووف ياربي ما يخلون الواحد ينام
ام فاطمة : اي هذي بنتي الشاطرة .. يلا قومي غسلي وجهش وغيري ثيابش ونزلي تحت عشان تتريقين بسرعة وتروحين المدرسة لا تتأخرين
فاطمة : أنزين أنزين بس بغسل وجهي وبغير ملابسي وبعدل شكلي وبنزل
طبعا تعرفون حركات البنات لازم تتعدل وتتكشخ .. لكن فاطمة تحب تتعدل وتتكشخ بس بحدود يعني تحط لها مكياج بس خفيف .. حطت لها بودرة وكحل على الخفيف وامها كانت تناديها الانها خايفة تتاخر على المدرسة من اول يوم
ام فاطمة : يلا فطموا نزلي تريقي بسرعة عشان لا تتأخرين على المدرسة
فاطمة وهي تنزل على الدرج : انزين انزين اكوا نزلت له
فاطمة : سلام عليكم جميعا .. صباح الخير
رد عليها الجميع : وعليكم السلام
امل اخت فاطمة : اخيرا يالبرنسيسة نزلتي .. صارلنا ساعة واحنا ننتظرش تنزلين عشان نتريق
فاطمة : محد قالش نظريني .. واني تدرون بي لزما اعدل شكلي حق اطلع حليوة في عيونهم الان اليوم اول يوم وابغي اخلي انطباع حليو عني بكل شي
امل : اعصابش بس مسوية روحش كشخة يعني مالت بس واصلا اني لولا امي جان ما حارستش .. امي مو راضية ناكل قبل ما حضرتش تنزلين وتجين تقعدين يلا خلنا ناكل جوعانة حدي
ام فاطمة : حارسي اخوش بعد هو ما نزل له وش فيش كانش مجوعة (( مجوعة يعني محد يعطيها اكل هع ))
امل : ياربي يعني لزما نحارسهم كلهم .. كل من احمدوو
هو نايم فوق واحنا هني ميتين جوووع اووف ياربي
احمد سمع اسمه وهو ينزل من على الدرج فقال : اكوا احمد جا وش فيه ليش قاعدين تتلحطمون علي بعد وش مسوي انا
فاطمة : بل بل عمرك طوييل تونا قاعدين نحش فيك هع هع
احمد : يالله صباح حسد من عيونش .. الله يطول بعمري زيادة يصير عمري 100 سنة هع
ام فاطمة : اعتقد اول شي يسلمون مو يقعدون يتلحطمون ويتفلسفون على اللي قاعدين قدامهم
فاطمة : اي سلم اول بعدين اقعد تفلسف عليها مالت عليك
احمد : وعليش فوقي وعلى املوا هع .. صباح الخير جميعا
رد عليه الكل : صباح النور
ابو فاطمة : وش فيك ياولدي اعقل له .. ليش حاط دوبك ودوب خواتك اعقل عنهم له
احمد : انا اللي اتحجج فيهم لو هم اللي يقعدون يحشون فيني قليلات الادب ما يحترمون اخوهم اللي اكبر منهم !!
ابو فاطمة : انت اكبرهم واعقلهم له اسكت عنهم واذا حشوا فيك على قولتك ياخذون ذنوبك له
احمد : وناسة .. عجل بسكت عنكم عشان تاخذون ذنوبي
فاطمة : عقب ويش ياحسرة عقب ما سبيتنا ويعني تقاسمنا ذنوب بعض هع هع وطلعت لسانها اليه
ام فاطمة : اقول عن الهدرة الزايدة وسموا واكلوا بسرعة حق تروحون دواماتكم وما تتاخرون
فاطمة : اني لو على بدي ما اداوم الان صديقاتي مو وياي في نفس المدرسة بس شسوي غصبنا عني
امل : اي طبعا غصبنا عنش
ام فاطمة : اسكتوا له .. يلا سموا واكلوا بسرعة حق تروحون دواماتكم
الكل : يلا بسم الله وقعدوا يتريقون
بعرفكم بعائلة فاطمة الكريمة :-
ام فاطمة : عمرها 35 الانها تزوجت من يوم هي صغيرة وجابت منى وهي في اخر سنة في الثانوي .. طيبة وحنونة لكن عصبية .. وفاطمة ماخذه العصبية من امها وابوها .. متساهلة مع اولادها لكن تراقبهم من بعيد لابعيد ويا ويلهم اذا واحد منهم فكر يسوي شي غلط
ابو فاطمة : عمره 39 وهو جامعي لكن ما كمل دراسته بس الحاح امه عليه في الزواج وتزوج وحملت ام فاطمة وما قدر يتركها مع طفلته .. حنون عاطفي ولكن شغله يخليه ما يقعد مع اولاده واجد الانه يشتغل شغلتين.. يحب فاطمة اكثر وحده ويدلعها دلع مو طبيعي من يوم هي صغيرة لين ما كبرت وما يحب يرد لاولاده طلب واي شي يبونه يشتريه ليهم .. لكن بين فترة وفترة يحاول يقعد معاهم ويطلعهم طلعة حلوة كل اسبوع
امل : اكبر من فاطمة بسنتين وكل هواش ويا فاطمة .. بس تخاف على فاطمة واجد ودايما تحاول تنصحها .. طيبة .. رزينة .. خدومة يحبونها اللي حولها .. دلوعة وتحب الازياء والموضة والمكياج
احمد : عمره 22 سنة .. حنون وطيب .. لكن غيوور ما يحب احد يكلم خواته ابدا .. وعنده عزة نفس كبيرة والواحد يقدر يعتمد عليه .. كلمته وحدة وما يغيرها .. شخصيته قوية
منى : عمرها 23 اكبر منهم كلهم .. تعامل الناس بطيبة قلب محبوبة .. اجتماعية .. تحب تثبت نفسها .. ذكية ورزينة ومخلصة .. هي اكثر وحدة في خوانها تحب فاطمة وتدلعها مثل ما يدلعها ابوها
امل عقب ما اكلت وخلصت : يلا اني بروح الكلية اخاف اتاخر وما الحق على المحاضرة .. يلا مع السلامة
ام فاطمة : الله يسلمش ويوفقش يا بنتي .. تحملي في روحش
امل : انشاء الله .. يلا مع السلامة جميعا
رد عليها الكل : الله يسلمش ويحفظش
فاطمة : يلا اني بعد بقوم بروح لا اتاخر
ام فاطمة : قعدي تريقي ما اكلتين شي يا بنتي .. توها الناس ما بتتاخرين انشاء الله
فاطمة : بسي اكل لا اصير فيلة هههه .. وين اماه توا الناس الحين الساعة سبع علما اوصل واحصل صفي جت سبع ونص اذا مو ثمان بعد .. يلا احمدو قوم وصلني
ام فاطمة : استحي على وجهش يابنت جا هو اصغر عيالش تنادينه احمدو !!
احمد : وش دراني عنها شفتي شلون مافي احترام كلش
فاطمة : خليت الاحترام ليك يا بو الاحترام .. خلصني يلا قوم وصلني بسرعة
احمد : اولا اسمي احمد مو احمدو وثانيا مانة قايم الى اذا عدلتين كلامش واسلوبش وياي
فاطمة : انشاء الله يا احلى اخوا بدنيا كلها .. حموود حبيبي لو سمحت قوم وصلني المدرسة تراني تاخرت (( حيالة من الدرجة الاولى :p ))
احمد : اي جذي تعجبيني فطووم هذا الاسلوب الزين هع
ام فاطمة : صدق ام وجهين ثنينكم .. توكم تسبون بعض الحين قمتون تدلعون بعض .. يلا قوم وصل اختك بسرعة
فاطمة : وش اسوي في هالولد ما ينفع وياه الى الحيالة هع احمد : يلا مشينا فطوم
فاطمة باست امها وابوها على راسهم
ابو فاطمة : تحملي في روحش يابنتي وانتبهي لدراستش ولا تخلين اي شي ياذر على مستواش الدراسي
فاطمة : انشاء الله بابا .. احبك حبيبي وباسته مرة ثانية على راسه وهي ماشية
فاطمة واحمد : يلا مع السلامة
ام فاطمة : الله يسلمكم ويحفظكم من كل شر .. تحملوا في روحكم
وطلعوا من البيت وركبوا السيارة ومشوا .. احمد وصل فاطمة لمدرستها وراح هو دوامه
(( احمد طالب ومقدم طلب في جامعة برى البحرين وينطر قبولها لكن حاليا يشتغل في البحرين علما يقبلونه في الجامعة))
ام فاطمة : يلا يا بو فاطمة قوم انت بعد له لا تتاخر على دوامك ويخصمون من معاشك مال تاخيرك بعد
ابو فاطمة : انزين اكوا بقوم بس بشرب الشاي مالي
ام فاطمة : انزين يلا كمل بسرعة وقوم
ابو فاطمة يحب يتحجج في مرته ام فاطمة قبل لا يروح شغله : يؤ تصدقين يا ام فطوم ما بقينا الى احنا في البيت الاولاد كلهم راحوا دواماتهم
ام فاطمة تقول في خاطرها : يضرب لي نغزات حسباله بعطيه وجه هههههه .. خلني اطنشه واشوف وش يسوي
ابو فاطمة : افا الغالين مطنشينا شكلهم زعلانين علينا وش فيش يالغالية مضايقة من شنو
ام فاطمة وابو فاطمة يحبون بعض من يوم تزوجوا وحتى بعد ما جابوا اولاد وكبروا ظلوا يحبون بعض .. وابو فاطمة هو السبب الانه رومنسي ويحب يدلع ام فاطمة واجد :p
ام فاطمة : لا ما فيني شي بس الان عندي اشغال واجد ابغي اسويها الحين حق انام لي شوي واقعد اسوي الغدى قبل لا يجون الاولاد من دواماتهم له
ابو فاطمة : وابو الاولاد ماليه رب يعني نسيتينه .. ما تفيسينه ؟!
ام فاطمة وهو تبتسم : لا هذا الغالي شلون انساه !! .. بس شسوي مشغولة حدي وماعندي وقت حق السوالف اعذرني يا ابو فاطمة
ابو فاطمة ابتسم وقرب منها وهمس في اذونها : معذورة يالغالية .. احبج يالبزي
ام فاطمة استحت وجهها صار احمر من الخجل وابو فاطمة لما شافها جذي قام يضحك ويقول من صدقش استحيتي مني انا ابو عيالش هههههه وكمل كلامه يلا انا ماشي تبغين مني شي قبل لا اروح ؟؟
ام فاطمة : امممم لا ابغي سلامتك بس يالغالي
ابو فاطمة : الله يسلمش ويحفظش لي يالغالية .. يلا مع السلامة
ام فاطمة : الله يسلمك ويحفظك .. تحمل في روحك
وهذا البارت الأول .. وهذي البداية.. إذا أعجبتكم بحط لكم لبارت الثاني .. وأبي تعليقاتكم وانتقاداتكم .gif "New Graaam (235)")
مرحبا بنووته … البارت قصير كله تعريف بالشخصيات …. ياليت تطوليه شوي
وتنتبهي لكتابة كلمة " ان شاء الله "
القوانين / الإطلاع هام و الإلتزام ضروري
وتطلعي على هالموضوع اكيد بيفيدك
بالتوفيق ان شاء الله
بعد ما طلع أبو فاطمة وأولاده وكل واحد راح دوامه.. أم فاطمة قعدت تكمل أشغال البيت لين ماتعبت وجتها نومة طالعت الساعة طلع الساعة 10 فقررت تريح لها شوي عشان تقدر تقوم بعدين تسوي الغدى قبل لا ما يجون ابو فاطمة والأولاد من دواماتهم .. وراحت على سريرها وراحت عليها نومه للساعة 12 الظهر ..وقعدت على صوت تلفونها يرن وكان أبو فاطمة متصل لها
أبو فاطمة: سلام
أم فاطمة : وعليكم السلام والرحمة
أبو فاطمة : وشفيش ؟ تعبانة ؟
أم فاطمة : مافيني شي
ابو فاطمة : ليش عجل صوتش جذي ؟؟ شكلش تعبانة !!
ام فاطمة : لالا بس توني قاعدة من النوم
ابو فاطمة : بل توش قاعدة من النوم .. وانا متصل اسالش وش مسوية الغدى ههههه .. شكله من تعبش راحت عليش نومة عدلة !!
ام فاطمة : جا جم الساعة الحين دقيقة بشوف وقامت تطالع الساعة اللي في الطوفة .. وفزت من مكانها بسرعة وهي تقول بل صدق راحت علي نومة وما سويت غدى !!!!!
ابو فاطمة : هههه زين اتصلت فيش وقعدتش جان الحين كملتين نومش واحنا جينا وما عندنا شي ناكله على الغدى بعدين جت على باله فكرة وقال : شرايش اليوم ادلعش واريحش واسوي مفاجاة للاولاد !!
ام فاطمة : جيفه ؟ وش ناوي عليه حضرتك ؟ قول بسرعة
ابو فاطمة : بطلع من الشغل من وقت وبعتذر عن شغلي الثاني وبجيب وياي غدى من برى وبرجع البيت وبسوي قعدة عائلية حليوة ورومنسية شرايش ؟!؟!
ام فاطمة : اممم والله فكرة حليوة بس مو عدلة تترك شغلك الثاني عشاننا احنا لاحق علينا
ابو فاطمة : والشغل بعد لاحق عليه واهم شي عندي اشوف الابتسامة على وجوه عائلتي .. بخلي هاليلة ذكرى حليوة وما ننساها .. وشرايش بعد نتعشى برة واودي الاولاد عذاري عشان يستانسون ؟
ام فاطمة : اممم فكرة رووعة .. لا صدق احسها بتكون الليلة ما بنقدر ننساها ابدا .. الله يحفظك ويخليك لينا ولا يحرمنا منك يالغالي
ابو فاطمة : اي طبعا افكاري جهنمية هههه .. ويحفظج لي وللعيال يالغالية
ام فاطمة استحت وحبت تغيرالموضوع الانه تدري بيقعد يتحجج فيها وقالت : متى بترجع البيت حق نجهز المفاجاة ؟
ابو فاطمة : اممم بس بخلص اللي في ايدي .. يعني يبغي لي تقريبا ساعة مسافة الطريق تدرين بعد الزحمة بتاخرني
ام فاطمة : ماعليه اوكي عجل اني ببدي في التجهيز علما تجي .. يلا بخليك الحين عشان اكمل شغلي .. تحمل في روحك
ابو فاطمة : انشاء الله من عيوني وانتي بعد تحملي في روحش
ام فاطمة : انشاء الله بس اني في البيت ما بصيدني شي
ابو فاطمة : ماعليه بعد تحملي في روحش تدرين بعد انتي الغالية اخاف يصيدش اي شي .. يلا مع السلامة
ام فاطمة استحت : اممم الله يسلمك ويحفظك ربي
وصك الخط وراح يكمل شغله اللي في ايده عشان يطلع بسرعة .. وكان ابو فاطمة متحمس واجد ويبغي يشوف ردة فعل أولاده للمفاجأة .. واليوم راح يقعدون معاه بعض قعدة طويلة وهذا اول مرة يقعد معهم قعدة جذي من جذي كان متحمس واجد ومستانس والدنيا مو شايلتنه من الفرحة الانه كان متاكد ان اولاده وام عياله بيستانسون واجد .. وام فاطمة ماكانت تتدري ان اليوم ذكرى زواجها من ابو فاطمة (( كانت ناسية وما جا على بالها كلش )) .. طلع ابو فاطمة من دوامه بعد ما خلص شغله وراح طلب الغدى وقال لهم انه بيروح وبيرجع علما يبرز وقالوا له اوكي وراح اشتري لزوجته ولكل واحد من عياله هدية بمناسبة ذكرى زواجهم
والانه اول يوم عياله يداومون في دواماتهم .. بعد ماخلص من الهدايا رجع المطعم واخذ الغدى ومشى حق يرجع البيت وحق عياله وام عياله .. وبعد زحمة وتعب وازعاج وصل البيت بسلامة وقام ينادي ام فاطمة حق تجي تاخذ منه الغدى لكن الهدايا خلاهم في صندوق السيارة عشان لحد يشوفهم وعقب الغدى يطلعهم .. وقعد هو ويا ام فاطمة يجهزون الغدى وابو فاطمة حط مزهرية فيها ورود في الوسطة والشموع حول الطاولة استغربت ام فاطمة وسألته ليش هالورد والشموع اللي حول الطاولة ؟
ابو فاطمة : عشان نعيش جوا رومنسي انا وياش له وغمز لها بعيونه
ام فاطمة استحت وعلى طول غيرت الموضوع : انزين وش باقي بعد ما جهزناه ؟ خلاص مافيه شي له ؟
ابو فاطمة وهو يضحك الانه يدري انها تحاول تغير الموضوع بأي طريقة : لا خلاص ما باقي شي وقام يطالع الساعة باقي ربع ساعة علما يجون الاولاد من دواماتهم خلنا نقعد نسولف ويا بعض شوي من زمان ماقعدنا انا وياش ويا بعض والحين ماعندش حجة بعد ماعندش شغل تسوينه كل شي سوينها وياه بعض وبالعمالة ساعدتش حق انخلص بسرعة ونقعد نسولف ويا بعض شوي علما يجون الاولاد
ام فاطمة : امم انزين وش عندنا يلا افتح موضوع وخلنا نسولف فيه
ابو فاطمة : اممم تصدقين وحشتيني من زمان ما قعدنا ويا بعض هالقعدة الرومنسية .. مسك ايدها وكمل كلامه وحشتني حبيبتي وزوجتي وام عيالي صار خاطري كل يوم اقعد وياش هالقعدة حق نسولف الان واحشتني واجد بس شسوي شغلي ما اقدر اهده
ام فاطمة استحت وظلت ساكتة : ___________
ابو فاطمة : وشفيش حبيبتي ليش ساكتة ؟
ام فاطمة : مافيني شي .. بس تصدق اني بعد وحشتني هالقعدة .. ذكرتني بأيام الملجة والخطوبة كنت كل اسبوع تفضي روحك عشان لا تكسر بخاطري ونقعد هالقعدة الرومنسية فجوا هادىء ورومنسي ونقعد نسولف وناكل ونستانس
ابو فاطمة : اي والله صدق صدق وحشتني هالايام وكان بكمل كلامه وبزل لسانه وبقول عن ذكرى زواجهم بس في اللحظة الاخيرة سكت عشان لا يفضح روحه ويخرب كل شي سواه
ام فاطمة : وشفيك حبيبي ساكت ؟ سولف له
ابو فاطمة : انشاء من عيوني ما راح اسكت انتي تامرين امر يالغالية
وقعدوا ام فاطمة وابو فاطمة يسولفو .. واخذتهم السوالف ونسوا عمرهم الانهم من زمان ما قعدوا هالقعدة مع بعض
وجت فاطمة من المدرسة وشافت البيت هادىء وامها ماليها حس على غير العادة .. كانت ام فاطمة من تسمع صوت الباب يفتح تعرف ان فاطمة جت من المدرسة وتناديها وتعطيها محاضرة لكن اليوم ما نادتها فستغربت فاطمة فراحت بطلت الباب مرة ثانية وصفعته الباب بقووة عشان يطلع صوت قوي وتسمعه امها (( العن ابو الهبالة اللي في هالبنية :p)) وفي نفس الوقت ام فاطمة وابو فاطمة انزهقوا من صفعة الباب
ام فاطمة : اكوا جت بنتك .. شفت جيفه تشدخ بالباب الغبية
ابو فاطمة ابتسم وقال : لا تقولين عنها جذي مسكينة يمكن مو قصدها .. وسمع صوت فاطمة تنادي امها فكمل كلامه وقال : انا بنخش ورا الباب وانتي نادي فطوم وانا بزهقها بشوفها وش تسوي لما تشوفني هني ههههه
ام فاطمة : ههههه صدق مو صاحي بس مو منك من بنتك اللي مجننتنك من حركاتها وهبالتها الزايدة .. الحين صرت اهبل مثلها هههههه
ابو فاطمة : شسوي بعد جننتني من حركاتها وهبالتها وياي انزين يلا انا بنخش وانتي ناديها اوكي
ام فاطمة : اوكي .. ونادت فاطمة .. فطموو تعالي اني في المطبخ
فاطمة وهي على الباب : سلام .. شخبارش اماه انشاء الله زينة ؟ وش سويتين الغدى اليوم ؟ تراني حدي جوعانة بموت من الجووع
ام فاطمة : وعليكم السلام .. اني زينة .. بل بل دويه وش فيش يابنية صبري شوي وبنحط الغدى على ويش مستعجلة كانش مجوعة روحي بدلي وصلي بعدين نزلي وبشوفين الغدى جاهز على الطاولة في الصالة
فاطمة دخلت وهي تتحلطم : اوف ياربي الجوع قاتل ما اقدر اصبر .. من الصبح للحين مو ماكلة شي جوعانة حدي بموت من الجوع اماه حطي لي غدى بتغدى عاد
ام فاطمة : وصمة تصمش قول آمين .. قلت لش الغدى جاهز لا تقعدين تتدلعين لي يلا روحي بدلي وصلي ونزلي تغدي .. علما تبدلين وتصلين بجون اخوانش وبنتغدى جميع يلا دلفي عن وجهي لا سطرتش وعن الدلاعة الزايدة
وابو فاطمة منخش ورا الباب وقاعد يضحك بدون صوت عشان لا تحس فاطمة بوجوده
فاطمة : انزين انزين خلاص اكوا بروح ابدل ياربي على هالام نحيسة .. اوف ياربي وقعدت تتلحطم لين ما وصلت من الباب وهي تتلحطم طلع ابوها وزهقها وقامت تصارخ الانها انزهقت وخافت في نفس الوقت وابوها يضحك على هبالتها
عقب ما شافته قالت : بابا وحضنته بقوة .. وكملت كلامها وش جيبك هالحزه ؟؟عادتا انت تجي عقبي وساعات ما تجي بالمره !!
ابو فاطمة حضنها بقوة وقال : اليوم انا وامكم مسوي ليكم مفاجاة حليوة بس ما بتعرفينها الا اذا بدلتين ثيابش وصليتين ونزلتين حق تتغدين
فاطمة : دام فيها مفاجاة .. انشاء الله تامر امر الحين اروح ابدل واصلي بسرعة واجيكم وقامت تراكض وصعدت غرفتها وهي متحمسة تبي تعرف المفاجأة وتبي تعرف وش اللي يخلي ابوها يجي من وقت اليوم !!
ام فاطمة : شفت شلون الحيالة .. متى الحين قاعدة وتتحطم علي وتبغي غدى بسرعة وميتة جوع من قلت لها مسوين مفاجاة وما بتعرفها الى اذا بدلت وصلت سيده راحت غرفتها عشان تبدل بدون ما تتحلطم .. صدق ام وجهين بس مو منها من دلعك الزايد لها واجد مدلعنها حتى خوانها وخواتها قاموا يغارون منها
ابو فاطمة : شسوي احبها هالبنية .. احبهم كلهم وكلهم اولادي ومتساوين عندي بس هذي البنية غير عنهم كلهم يعجبني فيها هبالها وجنونها وحبها واحترامها وتقديرها لي وهذا يكفيني ..!
ام فاطمة : اي عجل احنا مالينا رب .. من حقهم الاولاد يغارون بصراحة واجد واجد مدلعنها .. مدلعنها وناسي البقية مساكين كانه ماليهم رب يعني
ابو فاطمة : الاولاد يغارون منها الانها اختهم وانا مدلعنها ازيد منهم .. وانتي بعد تغارين ؟!؟!
ام فاطمة استحت ونزلت رأسها وسكتت : _______
ابو فاطمة وهو يضحك : السكوت علامة الرضا وسكوتش والخجل اللي بين عليش اكبر دليل انش تغارين منها وتبين حبي وانا بكبري بس لش
ام فاطمة : لا عاد شدعوه اغار من بنتي .. ما اغار بس اخوانها اللي يغارون
ابو فاطمة : وانتي ما تغارين علي يعني ؟
ام فاطمة نزلت راسها وقالت : بلى جيفه ما اغار عليك بعد انت الغالي .. واكيد ابغيك حقي بروحي مو انت زوجي وحبيبي له
ابو فاطمة مسك ايدها وهو يقول : فديتش يا ام عياالي يالغالية الله لا يحرمني منش ويخليش لي .. وانا ليش ومحد يقدر ياخذني منش يالغالية
فاطمة : ها طبيت عليكم .. وش قاعدين تسوون ها اعترفوا بسررعة .. اوه اوه وش هالحركات الرومنسية بابا .. طلعت رومنسي من ورانا .. الله لينا بس نبغي من هالرومنسية شوي ههههه
ام فاطمة استحت وشالت ايدها من ايد ابو فاطمة وقالت : استحي على وجهش يابنت جا احنا اصغر عيالش تكلمينا جذي احترمينا شوي ترا احنا امش وابوش مو من ربعش
فاطمة : اوف بدت في الحطمة اني وش لي اتكلم لو سادة بوزي احسن لي من حطمة امي اللي ما تخلص هههههه هع
ابو فاطمة وهو يضحك : ههههه عيب فطوم احترمي امش لا تقولين عنها جذي له
ام فاطمة : محد خربها الى دلعك الزايد ليها
فاطمة : وانتين ليش غيرانة كيفه ابوا يبغي يدلع بنته وش اللي يمنع يعني
ابو فاطمة : فطوم عيب له احترمي امش لا ازعل عليش
فاطمة : لالا كل شي ولا زعل الوالد والوالدة علي وراحت باست امها على راسها وقالت : اسفة اماه مو قصدي كنت قاعدة امزح وياش والله مو قصدي سامحيني
ام فاطمة : مسموحة يابنتي عادي مازعلت بس مرة ثانية لا تمزحين هالمزحة الخشنة
فاطمة : انشاء الله من عنووني يالغالية وكملت كلامها : انزين ما قلتون لي وش المفاجأة ؟ اكوا بدلت وسويت كل شي تبونه يلا قولوا بسرعة ترا الفضول ذابحني حددده
ام فاطمة : صبري اخوانش يجون من دواماتهم له لا تصيرين انانية جذي .. ما يصير نقولش بروحش لزما نكون مجتمعين كلنا وبعدين نقول ليكم كلكم
فاطمة : اوف ياربي ما اقدر اصبر الفضوول ذابحني عدل
ام فاطمة : الانش فضولية له وانانية كل شي تبينه لروحش
فاطمة : يلا عاد بدينا في الحطمة .. ما تسوا علي قلت ابغي اعرف وش هذي المفاجأة ! .. انزين يلا عاد عاد قوولوا لي
ابو فاطمة : امش صادقة لزما تحارسين اخوانش لين يجون له مو عدلة اقول ليش قبلهم .. لا تصيرين انانية فطوم له
فاطمة : ياربي انزين خلاص بصبر .. اني بركب حجرتي اذا جوا نادوني اوكي يلا باي
عقب 10 دقايق وصل احمد من شغله ودخل البيت وما لقى احد وكان البيت حده هدوء قام يناديه على امه وامه كانت قاعدة تسولف ويا ابو فاطمة .. يوم سمعت احمد ينادي قالت لابو فاطمة يلا انخش ورا الباب ولا تطلع لين ما اقول ليك سالها : ليش يعني ؟!؟ خليني ازهقه له مثل ما زهقت فطووم
قالت له : لا خلك منخش واذا طلع من المطبخ ورا حجرته بقول ليك ليش ماخليتك تتطلع يلا انخش بسرعة .. وراح ابو فاطمة انخش ورا الباب ونادت ام فاطمة على ولدها احمد ام فاطمة : اني هني ياولدي
احمد : السلام عليكم .. وباسها على راسها
ام فاطمة : وعليكم السلام والرحمة ..الله يحفظك ياولدي ويطول بعمرك
احمد: اجمعييين يارب .. شخبارش يالغالية ؟!؟!
ام فاطمة : اني بخير ياولدي انت شخبارك ؟ وش سويت فاول يوم ليك في الدوام ؟
احمد : دوم مو يوم يا اغلى واحلى ام فدنيا كلها .. انا بخير دام انتي بخير .. كل شي ماشي حسب الاصول .. واجد ارتحت صدق معاهم
ام فاطمة : روح بدل ملابسك وصل على النبي وبعدين انزل عشان نتغدى وقول لي وش صار ليك في شغلك ووش سويت !
احمد : انشاء الله .. بس خليني ابدل وبنزل واحنا نتغدى بقول ليش كل شي .. الى تعالي بسالش اماه اليوم ابوي بيتغدى ويانا ولا مشغول ؟
ام فاطمة : لا اتصل لي من مساعة وقال لي ما بيقدر يجي الان عنده شغل واجد ضروي
احمد : خسارة .. كنت ابغي نجمع كلنا وكل واحد يقول وش صار ليه في دوامه اليوم بس يلا خيرها في غيرها .. بقول ليكم واذا جا ابوي مرة ثانية بقول ليه
ام فاطمة : انزين يلا ياولدي روح بدل وصل على النبي وانزل ترا اختك فطوم تقول حدها جوعانة فبسرعة لا تتاخر
احمد : انشاء الله .. يلا ربع ساعة بس علما ابدل واصلي وبنزل عشان نتغدى
وطلع احمد من المطبخ وراح غرفته اللي في الطابق الثاني فنادت ام فاطمة ابو فاطمة وقالت له : يلا الحين اطلع وبفهمك اني وش مخططة !
ابو فاطمة : ليش قلتين ليه اني مو موجود ؟؟!؟
ام فاطمة : عشان تصير مفاجاة حليوة له ويستانسون الجهال انك بتغدى ويانا اليوم .. بس المشكلة ان فطوم درت انك موجود وش نسوي الحين ؟
ابو فاطمة : اذا جت سالت اني قول ليها ان انا اتصلوا لي الشغل وطلعت واعتذرت وعدتكم اني بقعد معاكم مرة ثانية وانا الحين بروح الصالة بقعد وبطفي كل شي بخلي بس الشموع وانتي لميهم كلهم وكلكم تعالوا الصالة ويا بعض اوكي ؟
ام فاطمة : اوكي صار
وراح ابو فاطمة وقعد في الصالة على ضوء الشموع وجت منى من الجامعة وراحت تبدل ملابسها في غرفتها وراحت ام فاطمة وسوت تمثيلية على فاطمة وقالت لها إن أبوها جاه اتصال مهم وطلع بس وعدها ان بيتغدى معاهم وبيقعد معاهم مرة ثانية وفطوم الانها تحب ابوها فحزنت الانها ما تحب تتغدى بدونه ودايما
بعدين نادت ام فاطمة على اولادها ولمتهم كامل وقالت لهم يلا نروح الصالة حق نتغدى ويا بعض
فاطمة : بس خسارة مو ويانا بابا جان بنستانس ويا بعض
ام فاطمة : يلا خيرها في غيرها
ودخلوا الصالة __________________
تتوقعون شنو بتكون ردة فعلهم اذا شافوا ابوهم والاجواء اللي مسونها لهم ؟؟
ابي تعليقاتكم واراائكم بلييييز .. واذا عجبكم البارت الثاني بحط لكم البارت الثالث
.gif "New Graaam (203)")
كانوا كلهم حزينين .. وكانت فاطمة اكثر وحدة فيهم .. كانت حزينة واجد وكانت تتمنى ان ابوها يكون معاهم عشان يقعدون ويا بعض ويستانسون .. الان من زمان ما قعد وياهم ابوهم واتغدى معاهم وجذي
وراحوا الصالة حق يتغدون وهم كانوا حزينين لكن لما دخلوا انصدموا بوجود ابوهم .. وفاطمة من زود ماهي كانت فرحانة قامت تركض ووصلت لابوها وحضنته بقووة وقالت
فاطمة : بـــابــــا احـــــــبـــــــك
ابو فاطمة : وانا بعد احبش فطووم .. وش فيش منزهقة جذي
فاطمة : منزهقة الاني ما توقعتك هني وانصدمت واستانست لما شفتك هني قدامي قاعد
امل : ويلي ما اقدر على الدلع بس .. اقول خفي علينا الدلع ها بلا دلع واجد على ابوي ترا مثل ما انتين بنته اني بعد بنته
احمد : بل بل بدت الغيييرة بدت .. رحت فيها يالوالد الحين املو غيرانة وياويلك اذا ما دلعتها بتروح فيها ههههههه
امل : اي من حقي اغاار ليش يدلعها جذي واني ما يدلعني مالي رب يعني ما يصييير جذي احتج صراحة .. اي اكوا سمعت احمدو وش قال ياويلك مني اذا ما دلعتني ها
ابو فاطمة : بل بل لالا بدلعش بس اكفيني شرش
امل : نعم نعم .. شايفني وحش عشان اكفيك شري ؟!! والله اني مو وحش .. خلاص اني زعلت
ابو فاطمة : بل بل انا وش لي اتكلم .. لالا كلش شي ولا زعل اموول حبيبة قلبي
فاطمة : لا والله اذا هي حبيبة قلبك عجل اني وش اطلع اي الحين عرفت قيمتي عندك بابا اني زعلانة منك خلاص ما احاجيك
ابو فاطمة : افا لالا كل شي ولا زعل فطومتي الحلووة .. انتي موبس حبيبة قلبي انتين عمري انتين قلبي انتين هبولتي ههههه يلا عاد بابا بلا دلع له خوانش يغارون اذا ادلعش واجد
فاطمة : احم احم احرجت تواضعي شكرا باباتي الغالي .. خلهم يغارون ماني مكلفة بهم اني هههه .. اوف حتى حبيبي يبون ياخذونه مني والله حالة وياكم ماتخلون واحد يستانس
ام فاطمة : هي هي انتون ويش اشوفكم تقاسمتونه ترا هذا رجلي قبل ما يصير ابوكم .. وثاني شي فطمو استحي على وجهش شنو حبيبش ! جا قاعدين في امريما احنا ! صدق ما تستحون على وجهكم
امل وفاطمة : اووه اووه بعض الناس غاروا :p
فاطمة : الحق بابا اكوا ماما غارت الانك دلعتنا وما دلعتها مسكينة جذي تكسر خاطرها بابا :p
ابو فاطمة : لا عاد هذي الغالية العزيزة اللي ما نقدر نستغني عنها ومحد يقدر يحتل مكانها لو مهما صاار .. هذي حبيبة قلبي زوجتي ولا اقدر ازعلها وما ادلعها انا من عندي غيرها
ام فاطمة استحت عدل ووجهها صار احمر وسكتت وامل وفاطمة يوم شافوا أمهم جذي طبعا ما سكتوا وقعدوا يعلقون
امل وفاطمة قالوا ويا بعض : اووه اووه استحت ما نقدر على اللي يستحون بس .. شعليش بعد اكوا دلعوش اكثر منا ثنتينا وتخلوا عنا عشانش وش تبغين بعد
ابو فاطمة : بس عاد بنات احرجتون امكم بس كفاية احراج وطبعا بدلعها اكثر منكم الانها حبيبتي وزوجتي وكل شي واصلا وهي اللي تعبانة عليكم حملتكم في بطنها 9 اشهر وتعبتونها المفروض حتى انتون تدلعونها له
امل : اي اكييد هذي الغالية ولولا ماكنا موجودين في هالدنيا
فاطمة : الله يخليش لينا ولا يحرمنا منش يالغالية
ام فاطمة استحت زيادة : ويخليك لي يا اولادي ويحفظكم ويخلي لي زوجي الغالي الانني بدونه الدنيا ما تسوا شي
امل : اووه اووه الله لينا بس
فاطمة : ترا نحن هنا ها يعني واذا دلعتون بعضكم واجد بنغار !!
ابو فاطمة : والله ما ينعرف ليكم .. توكم تقولون لي ادلع امكم الحين تغارون منكم بس شره مو عليكم يالهبلان ثنتينكم الشره علي قاعد اطاوعكم
ام فاطمة : اقول بلا هرار واجد وكلام زايد يلا خلنا نحط الغدى .. وشكله بعد برد .. كله منكم ومن هدرتكم اللي ما تخلص بروح اسخنه وبجي وراحت ام فاطمة المطبخ
وكانت فاطمة متحمسة انها تقول لهم شنو صار لها اليوم في المدرسة ونفس شي امل تبي تقول لهم شنو صار لها في الكلية وثنتينهم هدارين لابعد حدوود وطبعا اذا تكلموا ما راح يسكتون كانهم مسجلة مشيرة هههههههههه
وابو فاطمة كان قاعد يفكر شلون يعتذر من فاطمة الان هو تعمد احراجها قدام اولادهم .. ومنى كانت حاملة رواية وقاعدة تقراها اما احمد كان سرحان ويفكر في بنية شافها في الدوام وان هو حس انها غير عن كل البنت وقعدت يفكر في الموقف اللي صار معاها اليوم (( طبعا بتعرفون الموقف اللي صار ويا الإحداث اللي بتصير عقب شوي ))
ابو فاطمة واحمد ذابحهم التفكير وكل واحد في شي شاغل باله في شي يخص بروحه .. ابو فاطمة قام فجأة وقف وقال لاولاده عن اذنكم بروح بساعد امكم يمكن تحتاج مساعدة او شي .. قالوله لا احنا بنساعدها قال لهم لا ما يحتاج احنا بروح اساعدها وابغي اكلمها في موضوع في نفس الوقت
وراح وتقرب منها وقال : لها اسف حبيبتي مو قصدي احرجش قدام الاولاد والله مو قصدي .. والاولاد بعد يبون الحجة من شافوش استحيتين قاموا يدلعون وجيفه يسون واذا تبين ازفهم بزفهم بس اهم شي ما تزعلين مني يالغالية انا همي رضاش بس
ام فاطمة سكتت ونزلت راسها :_________
بعدين قالت : لاعادي حبيبي ولا تخاف ما زعلت ولا راح ازعل منك الانك الغالي وما يطاوعني قلبي ازعل عليك .. بس صراحة واجد احرجتوني خصوصا الاولاد ما قصروا فيني ماسوا سوايا فيني ماخلوا كلام ما قالوه فشلوني عدل ..!
وقعد ابو فاطمة يساعدها ومسك ايدها ومسكت ايده وتصالحوا وابتسم ابو فاطمة الانه كان وااجد فرحاان ويحمد ربه انه حصل زوجه جذي .. والبنات (( امل وفاطمة )) كالعادة ما يسكتون من الهدرة .. ومنى بعد هي تقرا اما احمد كان مازال يفكر بالبنت اللي شافها في الدوام وانتبهوا ليه البنات وقالت فاطمة : الاخ سرحان وعايش في عالم ثاني مدري في شنو يفكر .. املو املو خلنا نتحجج فيه شوي عن الملل هع هع .. امل : من عيوني ما طلبتين شي يلا نتحجج به احنا فاضين ولا عندنا شغلة ههههه
وقامت فاطمة تنادي احمد بس احمد كان سرحان من جد وعايش في عالم ثاني .. قامت امل وضربته على وجهه بقوة وانتبه ليها وقعد يطالعها باستحقار وقال : هييي انتين ليش سطرتيني انا وش مسوي لش انشاء الله ؟ صدق غبية !!!
امل : ضربتك الان اني وفاطمة كنا اناديك وانت سرحان وعايش لينا في عالم ثاني فقلت خلني اعطيك سطار يمكن تصحصح ههههههه .. الى تعال في شنو كنت سرحان وتفكر ها يلا بسرررعة اعترف
احمد : ما يخصش ويلا قلبي مناك لا قمت سطرتش يالحمارة مو كفاية اني حاقرنش وماقمت سطرتش بعد رازة وجهش ليش !!
فاطمة : حموود وشفيك معصب جذي ؟ ما عليك من هالهبلة هذي .. قول لي وش فيك من شنو مضايق وفي شنو كنت تفكر وسرحان ؟ فضفض لي اني اختك عادي ترا
احمد : اممم مدري وش اقول بصراحة مستحي منش وما اقدر اقولش الانش اختي واخاف تفهمين غلط
امل : لا والله الحين اني صرت هبلة .. ماني ماني اذا بتقول لفاطمة اني بعد تقول لي مالي خص
فاطمة : اي انتين هبلة ونص بعد وغمزت حق امل (( حق تفهمها وتسكت )) لكن امل غبية وما طاحت ربيتها ههههه
امل : لا والله .. اي هبلة طالعة عليش يالغبية .. مالي خص تقول لينا ثنتينا الحييين لا اروح اشتكي عليكم عند ماما
فاطمة قامت تسحب ثيابها وتغمز ليها بس أمل غبية ما تفهم بسرعة بس بعدين طاحة ربيتها وفهمت وش قصد فاطمة
قالت ا ياي اني غبية انزين ماقلت لينا في ويش تفكر عفر ويش اللي شاغل بالك لهدرجة وخالانك سرحان ها اعترف
احمد : مدري وش اقول ليكم صراحة مستحي منكم
فاطمة : افا يا اخوي تستحي من خواتك لاعادي لا تستحي ولاشي احنا خواتك واذا عندك شي تبغينا نسويه لك او نساعدك فيه ترا احنا حاضرين للغاليين
احمد : انزين بقول ليكم بس اوعدوني هالشي يظل بيني وبينكم خصوصا امي وابوي وحتى منى ما ابيها تعرف
امل وفاطمة : انشاء الله من عنوني يا بعد قلبي
وضحكوا الانهم قالوها ويا بعض كانهم توأم .. بعدين احمد قال لهم : انا اليوم رحت الدوام انزين وقابلت ناس واجد ودلعوني الان هذا اول يوم لي في الدوام وجذي عاد عطوني اوراق قالولي ودها للمدير واقعد معاه وحاول تتقرب منه طلعت من مكتبي وانا حامل الاوراق وامشي وانا مفهمي ودعمت في بنية انا انحرجت عدل وماقدرت اقول شي البنية حست بالذنب وقامت تتاسف قلت لها لا تتاسفين المفروض انا اللي اتاسف مو انا .. قالت لا عادي
وقعدنا نجمع الاوراق من على الارض .. قلت لها شكرا ورفعت عيوني وهي رفعت عيونها في نفس الوقت
وقعدت اطالع في عيونها وسرحت فيهم تقريبا 5 دقايق بعدين اوتعيت اني سرحت وخفت تفهم غلط وتحسبني صايع وجذي قلت لها انا اسف مو قصدي بس عيونش واجد حليووين من جد رووعة قالت لي شكرا وابتسمت
يوم قمنا من على الارض لقينا ان الكل كان يطالع وكانوا غريبين اللي مستغرب واللي يضحك واللي يبتسم واحنا ما ندري وش صاير .. بعدين هي ركبت اللفت وانا ركبت بعد عشان اروح للمدير وطول ما احنا في اللفت انا منزل راسي وهي منزلة راسها ومستحين من بعض
بعدين طلع ان احنا في النفس الطابق ولا بعد شوفي الصدفة مو انا بروح غرفة المدير له .. طلعت هي سكرتيرة المدير بعدين دخلنا للمدير وعرفنا على بعض وطلع اسمها ابتسام بس صدق ما شاء الله عليها واجد جميلة اول مرة اشوف بنية بهالجمال !!
امل : لا والله عجل اني وش اطلع .. اصلا اني اكنسل عليها
فاطمة : العن ابو الثقة بس بدينا في الغرور .. اقول انجعمي وخليه يكمل .. اقول حمود اوصفها لينا عشان نتخيل شكلها
احمد : املو انجعمي وبلا غرور واجد .. امم هي طويلة ورشيقة وخلوقة ومؤدبة ورزينة وعيونها عسلية .. ثيابها محتشمين وتلبس شيلة وشكلها كلش ما يلفت الانظار
فاطمة : وااو رووعة يبين عليها واجد محترمة .. كمل
احمد : عرفنا على بعض وقعدنا وشربنا قهوة بعدين هي استاذنت حق تروح حق شغلها وراحت وانا قمت اطالعها كاني اهبل .. حتى المدير قام يقولي من حقك تطالع فيها بنية محترمة وخلوقة وجمالها ماينوصف قلت له : اي اكيد بصراحة هذي محظوظ واجد اللي بياخذه واجد واجد بعد وبس هذي السالفة ومافيها !!
فاطمة : انزين كنت سرحان في شنو بالضبط ؟ تفكر في اللي صار يعني ؟ لو تفكر فيها ؟
احمد : افكر في كل شي صار وافكر في شكلها وعيونها العسلية اللي جت في عيوني .. صدق صدق جميلة وخلوقة بمعنى الكلمة
امل : ويلي عليك احمدو شكلك حبيتها واحنا ماندري
احمد : بلا قلالة ادب وانجعمي .. انا اعرفها عشان احبها هذا اول يوم اشوفها فيه بس ماشاء الله عليها الكل يتكلم عن اخلاقها وطيبتها مع الكل .. بصراحة مو قادر اشيل صورتها من بالي ابدا .. احس صورتها انحفرت بخيالي مدري ليش !
فاطمة : يمكن الانك ارتحت ليها وخصوصا عقب ما جت عيونك بعيونها وعقب ماسمعت الكلام والمدح عنها فيمكن انك انعجبت فيها او شي جذي
احمد : ما ادري يمكن
منى توها مصحصحة : هي انتون عن ويش تتكلمون ؟ وليش تتساسرون جذي ؟ وش خاشين عنا ها اعترفوا
خب فاطمة وامل ما جيبون الى المصايب !!! :p
امل: خلينا المصايب حقش حبيبتي احنا ما سوينا شي غلط
فاطمة : اي احنا ماسوينا شي غلط وما يدخلش إحنا عن ويش نتكلم وبليز يعني لا ترزين وجهش واجد الان ما يدخلش
وطبعا احمد بعد هو سرحان ويفكر في البنت (( ابتسام اللي شاغلة تفكيره وهو مايدري شنو السبب ))
شنو تتوقعون يصير بين ابتسام واحمد ؟ تتوقعون يتقابلون مرة ثانية او لا ؟ وشنو السبب اللي يخلي احمد يفكر في ابتسام بدون توقف ولما يذكرها دايما يبتسم ؟!!
وهذا البارت الثالث .. اذا عجبكم بحط لكم البارت الرابع
ابي تعليقاتكم وانتقاداتكم .. عادي ترا اتقبل الانتقادات
| 3 / يتم إغلاق الروايه في حال طلبـ ..الكاتبــ ــة…إغلاق الـرواية..أو…لـتأخرها…أهمالها ..أو..لـتجاوزات في الردود او في حال تأخر الكاتبة لـ أكثر من عشرة أيامـ وتفتح حين جاهزية الأجزاء.. |
تغلق الروايه