رواية مابعد مر الرحيل إلا إنكسار /بقلمي؛كاملة 2024.

السلام عليكم ورحمة الله وبركاته

عدت لكم .. والشوق يدفعني لـ أقدم لكم روايتي الثالثة

رواية مابعد مر الرحيل إلا إنكسار

للكاتبة : أنفآس الهجر

أتمنى من الله عز وجل أن يوفقني وألقى بينكم الإحتواء لي ولروايتي .

(( أتقبل الإنتقاد قبل المدح ))

الدمام 1986 م .

بيت فخم جداً يتكون من طابقين ولا يحتضن سواء شخصان او بالاحرى عريسان .
بغرفة النوم .
جلست جوار زوجها على الاريكة وقلبها يرفرف بسعادة همست له بلهجتها المغربية : عندي ديالك مزيان (احلى) خبر .
ابتسم لها بحب : وش خبرة ؟
ابتسمت داليا وبفرح : انا حامل .
وقف بصدمة وغضب لايريد ابناء فهو قال لها منذ اول ليلة اصبحت بها زوجته : مو قلت لك مابي عيال .
وقفت بخوف وفرحها يتحول لصدمة : قدر الله وماشاء فعـ..
قاطعها بحزم وعصبية فهو غاضب منها بشدة كيف لها أن تخالف أوامره : داليا نزلي اللي ببطنك .
صرخت داليا وهي تبكي ففرحتها تحولت إلى حجيم تحولت إلى قهر : محال داك الشي (مستحيل) ابني بلاتي ( انتظرته ) من سنوات محال انزلو .
: خلاص بعطيك مليونين تكفيك الين تموتين بس مابي اشوف وجهك هنا مره ثانية وطيارتك العصر على طنجة ولا ابي ولدي اللي ببطنك .
انهارت وهي تسمعه يرمي عليها يمين الطلاق ويخرج ويتركها بين احزانها وبكاءها وفرحتها المبتورة التي تحولت إلى بكاء مستمر دون توقف .

********************

2024

الدمام ~
في ميدان الفروسية المخصص للفارس سعود السيف .
على ظهر حصانه بأناقته ورونقه الخاص بلبس الفروسية بنطلون بيج وجزمات تغطي نص ساقيه أسود مخصصة للفروسية .
قميص أبيض وجاكيت أسود وخوذة سوداء .
عكس معتز الذي يقف بجواره على ظهر الحصان الثاني يرتدي ثوب أبيض وشماغه ملتف بترتيب تحت ذقنه ومحكمه بعقاله .
معتز وهو يشد عنان الخيل : سعود والله تعب من اليوم وأنا أحاول بالخيل تهدا مو راضية كل شوي تصهل .
إعتلاء صهيل الخيل وأبتسم سعود : لأنك غبي وماتعرف تروض الخيل…عاد هذي الخيل للتدريب متعودة على كل الناس .
وصلو أخر المضمار نزل معتز وهو يقول : من جد أنا مالي بالخيول خلني بإدارة شركتك أحسن لي .
نزل سعود من الخيل ومسح على عنقها وشعرها البني الناعم .
مشى سعود جوار معتز وهو ممسك لجام الخيل التي تمشي خلفه : إلا على طاري الشركة الأوراق اللي إنت وقعت عليها عقد مع أي شركة ؟
ابتسم معتز لسعود : مع شركة أهلك أكبر شركة بالشرق الأوسط شركة السيف القابضة .
سعود عقد حواجبه وهو ينظر لحصانه الذي يشرب من الماء : أهلي ؟
معتز يريد أن يحرك مشاعر سعود ويجعله يبني حياته بين أهله : ولا نسيت إن أنت سعود السيف الى متى مو مقابل أهلك يعني بتعيش طول عمرك بدون أهل .
سعود يكره تلك السيرة ويكره المسمين بـ (آل السيف) : اهلي وناسي كلهم امي وامي الله يرحمها راحت ماخلت لي بالدنيا شي حلو – وأكمل بمرح يحاول يخفي حزنه – تصدق معتز لو ما انت موجود بالدنيا كان قتلت نفسي ؟
معتز بضحكه : لا تسمعك امي تقتلك من جد .
سعود بابتسامه وحب : الله يخليها لي خالتي منيره ولا يحرمني منها .
معتز اتسعت ابتسامته : لا تغير موضوعنا عمامك بالرياض وانت عارف مكانهم وسيف ولد عمك تعرفه ويعرفك من زمان .
سعود وهو يطلق عنان الخيل التي رجعت للاسطبل : لا ياخوي مو انا اللي اروح لهم انا مو بحاجتهم .
معتز بحده : كم مره وسيف يعزمك عندهم على زواج عيال عمه وانت معند وماتبي تروح .
سيرة آل سيف كفيلة بغضب سعود وجلعه غاضب : اروح لمين ابوي ميت وجدي ميت من لي هناك عشان اروح له تصير روحتي مقنعه .
اندهش معتز من عصبية سعود : لك عمامك وجدتك وبعدين ليش كل هالعصبيه ؟
سعود بهدوء جاهد لكي يظهره ويثبت لمعتز ان موضوع اهله من اخر اهتمامته : وانا مابي اروح ومابيهم خلني كذا مرتاح انت وخالتي منيره ونهى تكفوني عن الدنيا ومافيها .

********************

–

الجزء الثالث / مابعد مر الرحيل إلا انكسار

********************

الدمام ~
منزل نهى.
بعد صلاة العشاء جلسو في الصالة .
ونظرت نهى بأشقائها معتز وسعود .
قالت بإبتسامة : متى تتزوجون وتريحونا ؟
أبتسم لها سعود بمودة : انا تكفيني ميرا هي وحنتها .
ضحك معتز : ياليت ربي رزقني بوحدة مثل ميرا عشان أفتك من كلمة تزوج تزوج .
سعود بلهجة تحذير : معتز ترا ما أرضى على حبيبة قلبي .
نهى بإبتسامة : الخايسة لها إسبوع من جات هنا لاتمر ولا تسلم .
معتز بجدية : سعود تكفى قولها تروح للمغرب لأني بوديك لأهلك وغصب عنك .
سعود بعدم إهتمام : معتز أنا عندي بطولة مهمة أهم من أهلي اللي مايدرون عني .
نهى : سعود ترا الموضوع مهم وش فيك مرة مو مهتم .
سعود بسخرية : لأن أهلي يعرفوني مو مهتم للموضوع…نهى أهلي مايعرفون عني أي شي سيف ولد عمي يقول محد يعرفني إلا جدي وبس .
نهى : لا أكيد أهلك الحين عرفوك .
معتز برجاء : سعود ليش ماتروح سيف قالك خواتك محتاجاتك مالهم لا سند ولا عون .
سعود : لا لهم سند وعون عندهم عمامهم سندهم وعونهم .
نهى : طلبتك ياخوي روح لأهلك خالتي داليا أمنيتها إنك تروح لأهلك ويلتم شملكم ماتحققت أمنيتها وهي عايشه حققها وهي ميته .
سعود بحزن : أمي الله يرحمها ماتمنت الأمنيه هذي عشانهم .. هي بس تبي سعادتي وأنا سعادتي بعيد عنهم .
معتز نهض وهو يقول : خلاص موضوع أهلك علي وبتروح وغصب عنك ولا والله أن هذا آخر كلام بيننا .
شهقت نهى بصدمة : معتز وش هالكلام تزعل على أخوك عشانه مايبي أهله .
معتز بعصبية : نهى سعود مو صغير عشان مايروح لهم وهو لازم يروح ويقابلهم وياخذ حقه إلى متى وهو عايش بوحدة .
سعود وقف أمام معتز : أروح عشانك بس وعشان حلفك بس يوم واحد وراجعين .
معتز : نروح لأهلك ويصير خير…بعد ثلاث أيام نروح لهم .
سعود بعد إقتناع : إن شاء الله…بس خالتي منيره مين اللي يجلس عندها ؟
نهى بإبتسامة : أنا أجيب أمي هنا لاتشيل همها .
دخل وليد وقال بفرح : هلا وغلا بعيال عمي منورين البيت .
بعد الإنتهاء من السلام قال سعود بمرح : منور بوجودكم .
وليد بإبتسامة وترحيب حار : حياكم الله ياهلا ومسهلا .
معتز : الله يحييك ويبقيك .
جلس وليد بجوار نهى وهو يقول : عشاكم الليلة عندنا .
سعود بإعتراض : والله مشغولين .

********************

مستشفى دلة ~
مسحت منال دموعها وأعادت ترتيب نقابها ووقفت بسرعة ذاهبة لغرفة ديمة فمن المؤكد أن والدتها سوف تبحث عنها فهي تأخرت كثيراً .
وهي بطريقها ذاهبة إلى غرفة ديمة وتجري بسرعة حتى لا تراها والدتها خارجة من صالة الإنتظار وتعلم إنها كانت تبكي .
فإذا بها تصطدم برجل طويل القامة جسمه متناسق إبتعدت عنه فرفعت رأسها وكانت لها الصدمة بل الطامة .
رأت أخر شخص تتمنى رؤيته فهي بها مايكفيها من الضغوط وأيضاً يكفيها خجلاً .
أمسك حاتم بيدها فإذا به يقول بمرح وحب لزوجته التي لم يتبق سوا ثلاثة أشهر ويتحقق حمله وتصبح بين يديه وفي بيته : اليوم أمي راضيه علي وش هالصدفة اللي فوق الخيال .
سحبت منال يدها وهي تقول بصوت مرتجف هامس بالكاد ينسمع : أبعد عني .
حاتم صعق منها " لماذا كل هذا الخوف " : منال فيك شي ؟
منال بحشرجة وخجل : أبعد عن الطريق بطلع .
إبتعد حاتم وهي ذهبت بسرعة إلى السيارة تريد أن تبتعد عنه إلى أخر نقطة في الكون .
ركبت بالسيارة وأخرجت هاتفها وإتصلت على والدتها وهي تبكي : يمة يله بنمشي .
فاتن بقلق : منول حبيبتي وش فيك ليش تبكين ؟
منال بين شهقاتها : تعالي وتعرفين كل شي أنا أنتظرك بالسيارة .
وأغلقت المكالمة وركب السائق وبعد فتره ركبت والدتها بجوارها وهي تقول بخوف : منال وش فيك ؟
منال إرتمت بحضن والدتها : يمه مابيه مابيه .
فاتن إحتضنت منال بخوف : بسم الله عليك وش صار لك ؟
منال رفعت رأسها ثم قالت بصوت مبحوح : يمه مابي حاتم خلوه يطلقني والله مابيه أكرهه .
قالت فاتن بين اسنانها بغضب مكتوم : ياويلك وياسواد ليلك تجيبين طاري الطلاق على لسانك مرة ثانية زواجك مابقى عليه إلا شهرين وأنتي تبين الطلاق ؟
منال : يمه والله هو مثل حمد أنا مأبي أعيش مثل فاطمة .
فاتن بغضب : حاتم مثل ولدي اعرفه زين هو يختلف عن حمد مية وثمانين درجة .
منال بقهر : يمه الحقير شفته قبل شوي ومسك يدي الحيوان قليل الحياء .
فاتن بهدوء : منال لا تنسين انه زوجك ولو جاء وقال ابي منال ماحد يقدر يمنعه منك .
إنتفضت منال بجزع : يمه حاتم مثل حمد طلبتك ماتزوجوني حاتم والله مابيه كرهته .
فاتن بقهر إمتزج بغضبها : ودامك ماتبينه ليش موافقة عليه ؟
منال بإنكسار : خفت ابوي يزعل علي ويصير اللي صار لجميلة .
فاتن : والحين إذا تطلقتي أبوك بيزعل عليك أكثر من زعله على جميلة .
منال بحزن : لا أنا إذا تطلقت مامعاي عيال ولا جميلة رخصت بأبوي عشان هتان .
فاتن بتحذير : أخر مرة أقولك لاتجيبين طاري الطلاق على لسانك .
هزت منال راسها بأسى وهمست : مأحد بيعيش بشقا وذل إلا أنا بس نصبر وش ورانا .

********************

جناح فاطمة وحمد ~
دخلت فاطمة بالغرفة وخلعت عبائتها وسمعت صوت حمد المتمدد على السرير فإذا به يقول بكل سخرية : كان نمتي عند ديمة .
فاطمة " ياليت " وقالت بهدوء : حمد حرام عليك والله أنا فيني اللي مكفيني .
حمد جلس بغضب : حرمت عليك عيشتك إن شاء الله اللي أنتي فيه من حصد يدينك .
فاطمة لم تتحمل فهي متعبة ومرهقة جداً : حصد يديني لأني تحملت ضربك لي وتحملت عيشتي معاك ؟
حمد بين أسنانه : تحملتي ضربي لك وأنتي مابقى إنسان بالدنيا إلا وقلتي له ؟
فاطمة برجاء : حمد طلبتك بس أبي أرتاح اليوم .
حمد وقف وهو يقول : أنا طالع الحين ما أرجع إلا أنتي صاحية لأن عقابي لك مو قليل .
تملك الخوف جميع أطرافها وقالت برعشة : وش سويت أنا ؟
حمد صرخ بها وهو يقترب منها : وش اللي ماسويتيه أهلي مالك فيهم دخل لا ديمة ولا أمي…خليك بنفسك وبناتك وبس .
وخرج وأغلق الباب خلفه بكل قوته حتى أحدث ضجيج مزعج .
وفاطمة جلست على سريرها الوثير بوسط غرفتها البالغة بالرفاهية وكلن كل الأثاث الفاخر والأموال التي تصرف بالملايين عليها لم تسعدها .
إنطوت على نفسها وهي تبكي بحرقة " اللهم فرج همي وأبعث لي راحة يارحمن "
سمعت طرقات على باب جناحها نهضت وغسلت وجهها ووضعت كحل تحاول من خلاله إزالة أثر البكاء .
خرجت من الغرفه وفتحت باب جناحها وقال بإحترام : هلا عمي حياك الله .
دخل عمها نايف : الله يبقيك ويرفع شانك يابنتي .
فاطمة بإبتسامة : الله يطول عمرك…تفضل .
جلس نايف بالصالة الراقية : حمد هنا ؟
فاطمة : لا طلع من ربع ساعه…عن أذنك بجيب القهوة والشاهي .
نايف بإبتسامة : إذنك معاك .
وظل يفكر بإبنة أخيه العظيمة التي لن يكررها الزمن " الحزن واضح بعينيها وتحاول تسعد من هم حولها لو كانت غير فاطمة لم تجلس عند حمد دقيقة , مهما كان مشعل قاسي لست بأقسى من حمد والحياة عند مشعل تختلف عن حمد فمشعل أبيها يستحيل أن يمد يده عليها ومن معزة حمد عند مشعل لم يقول له أن يطلق إبنته "
تنهد واردف ( أنا كل ما طلبت من حمد أنه يترك فاطمة ولا يعذبها يقولي بكل وقاحة مالك دخل أنا أبوه يرد على كذا حسبي الله على من لعب فيه وخلاه كذا حمد من بعد زواجه وهو متغير ماعاد ولدي اللي أعرفه )
قطع عليه افكاره التي غالباً هي مصدر آلمه دخول فاطمة وهي تحمل صينية القهوه والشاي وتضعهم على الطاولة .
وسكبت لعمها فنجان قهوة : تفضل .
اخذه نايف وقال : زاد فصلك .
رشف منه وأنزله على الطاولة ونظر إلى فاطمة : أنا أبي أكلمك بخصوص حمد وحياتك معاه .
إنتفضت فاطمة بخوف وفزع " لا تفعل ياعمي أرجوك لا فأنا لا أريد أن أتحدث عن حياتي القاسية " : لا عمي خيرك واصلني تكفى أبعد عن حمد والله خايفة عليك .
مسح عمها على شعرها وهو يقول بحنان : وأنا خوفي عليك أكثر من خوفك علي…فاطمة حمد يعذبك وأحنا مو قادرين نسوي شي لو قتلك بيوم مأحد بيلومه لأنه ماكان عندك لاسند ولا عون .
فاطمة بعد ماقبلت رأس عمها وعيونها تغرق بالدموع : أنتم سندي وعوني وعصابة راسي وحمد ما راح يقتلني هو مهما سوى يبقى ولد عمي .
نايف : الله يرفع قدرك ويخليك لعين ترجيك أنا ما أدري وشلون تحملتي حمد كل هالسنين .
فاطمة : تحملته لأني عارفه إنه بيجي اليوم اللي أرتاح فيه ويمكن راحة أبدية .
نايف نهض وهو يقول : الله يخلي لك بناتك ويعز شانك .
فاطمة هي أيضاً وقفت لوداع عمها : ويخليك ذخر لنا يارب .
توجه نايف للباب وقال : تصبحين على خير .
جلست فاطمة ع الكنبة ( كل الناس شايلين همي ويتوقعون أني بيوم من ألايام بترك البيت وبروح لأهلي…حتى أنا مستغربه من نفسي لأني ماسويتها
شكل حبي لحمد هو اللي يمنعني )
أخذت نفساً عميقاً وهي تقول " لعن الله الحب الذي ذلني لحمد "

********************

الدمام ~
دخل سعود بيته وصعد لغرفته إستحم وثم عاد للغرفة .
تنهد وهو يتذكر أنه خلال هذه الأيام سوف يذهب إلى أهله " أعانني الله على تلك المواجهة "
رن هاتفه ورد بترحيب حار : هلا أبو عبدالعزيز .
سيف : ياهلا والله بولد عمي شخبارك ؟
سعود بإبتسامه : الحمدلله بخير…كيفك أنت وعيالك ؟
سيف : الحمدلله يارب عال العال…سعود أبي أتكلم معاك بموضوع مهم ممكن ؟
سعود بتوجس : تفضل .
سيف : سعود متى بتجي لأهلك ؟
سعود بحنين : جدي وأبوي ماتو الله يرحمهم من لي أروح له ؟
سيف بذهول : الله يرحم أبوك ؟ عمي مشعل عايش الى الحين .
سعود صعق للغاية كيف أبيه عائش إلى الآن ؟
والدته قالت له أن أبيه مات منذ زمن بعيد جداً
قبل أن تلده , ولكن الآن هاهو سيف يقول له أن أبيه ما زال على قيد الحياة إذ لماذا لم يأتي إبراهيم السيف عندما كان يزور سعود ؟
وقف وهو يشعر أنه مشوش عاجز عن التفكير عاجز عن الكلام .
سعود بصدمة وفكية يرتعشان : وش قلت أبوي عايش ؟
سيف بخوف : سعود وش فيك ؟ مين اللي قالك إن أبوك ميت ؟
سعود بضيقة الدنيا : من طلعت على الدنيا وهم يقولون أبوك ميت أبوك ميت…وأبوي يقول إني ميت بذمتك سيف هذي حياة ؟
سيف يريد أن يريح سعود يريد أن يبعث له ولو بسيط من السعادة : تعال وشوف أبوك وعيش عنده وبترتاح .
سعود بغضب : أرتاح عند واحد تركني من صغري ؟
سيف برجاء : سعود أذكر الله وإهداء ما يحتاج كل هالعصبيه…بكرة أو بعده إن شاء الله بنجيك أنا وأبوك…..
قاطعه سعود بحدة : لا لاتجون أنا أجيكم…ومن زمان وأنا بجيكم وكان جبر عزاي أني بشوف طيف أبوي اللي كنت متوقع إنه ميت بس للأسف تغير كل شي .
سيف بقلق : سعود إنت لاتفكر بأبوك وبس تذكر إن جدتك تبيك وخواتك إلى الحين مايدرون بأي شي .
فز قلب سعود : خواتي ؟
سيف : ايه خواتك علياء وفاطمة وجميلة ومنال كل وحدة محتاجتك أكثر من الثانية .
سعود بإستفسار : يعني كيف ابوي مقصر معاهم ؟
سيف بتردد : مممم لا بس مشاكلهم كثيرة حيل…لاتنشغل بمشاكل خواتك إن شاء الله إذا جيت وتعرفت عليهم أكثر تعرف مشاكلهم وكل مشكلة لها حل إن شاء الله .
سعود بتوتر : والله أقلقتني هذا وأنا ما أعرف ولا وحدة فيهم كيف لا عرفتهم .
سيف : أنا قلت لك عشان تعرف إن أهلك بحاجتك مهوب أنت اللي بحاجتهم .
سعود بثقه : بكرة العصر بإذن الله وأنا بالرياض .
سيف : حياك الله بين أهلك .
سعود : الله يعزك ويرفع قدرك…تصبح على خير .
أغلق المكالمة وهو يشعر بإحساس غريب لتلك الأخوات المجهولات كيف سيواجههم ؟
كيف سيكون لقاءه بأهله كيف سيستقبله أبيه الذي نبذه من صغره ؟
هو لاينكر أنه شعر بفرح عندما علم أن أبيه لا زال على قيد الحياة ولكن شعوره بالخذلان أكبر من فرحته .

********************

الرياض ~
منزل عبدالعزيز السيف .
جناح سيف وعلياء .
جففت علياء شعرها وتعطرت إنفتح الباب ودخل سيف : سلام عليكم .
وقفت علياء وهي تبتسم له : عليكم السلام .
جلست بجواره على الإريكة وهو لا زال صامت .
عقدت علياء حاجبيها بإستفسار : سيف فيك شي ؟
سيف بعد مأخذ نفس : لا مافيني شي…علياء فيه موضوع مهم وأنتي لازم تعرفينه .
علياء بخوف : سيف وش صاير ؟
سيف فجر القنبلة دون تمهيد : عمي مشعل من ثلاثين سنه تزوج مغربية ويوم حملت عمي طلقها وتركها ولا يدري إذا هو عنده بنت أو ولد منها…المهم قبل ست سنوات تعرفت على ولد اسمه سعود السيف ويصير هذا ولد عمي وهو اللي قالي قصته كاملة وسعود بكرة جاي .
شهقت علياء بعنف وهي غير متقبلة لهذا الكلام تشعر أنها لست على الأرض قالت بصوت مخنوق خافت جداً : سيف أنت من جدك ؟
سيف إحتضنها وهو يقول : علياء حبيبتي وش فيك ؟
علياء وهي تبكي بعنف : ليش أبوي يسوي فينا كذا ليش يعذبنا ؟
سيف بحنان بالغ وهو يزيد من إحتضانه لها : علوي ياقلبي أهدي والله ماله داعي البكاء خلاص أفرحي بأخوك .
علياء بضيقة وهي تشعر أن الأوكسجين أنقطع عنها تماماً : أنا وين والفرح وين ياخوفي بكرة يصير لي خوات من أبوي مرميات بالشوارع .
سيف بفزع : لا عمي مو حقير لهالدرجة يرمي بناته بالشارع .
علياء رفعت نفسها من حضن سيف ونظرت له وهي تمسح دموعها : لو جدي الله يرحمه ماكان موجود يوم طلاق جميلة جميلة وين بتروح ؟ أبوي والله ما بقلبه رحمه .
سيف : هو يبي جميلة بس مايبي هتان .
علياء بصوت مبحوح من البكاء : وهتان بعيون جميلة يسوى الدنيا ومافيها ماعندها مانع لو تعيش بجحيم بس أهم شي هتان عندها .
سيف : الله يخليه لها .
علياء : آمين يارب .

********************

الدمام ~
إستيقض سعود على صوت المنبه وتوضأ وخرج يصلي الفجر في المسجد المجاور لبيته .
إنتهى من الصلاة مع الجماعه وقابل معتز وهو خارج من المسجد : صباح الخير سعود .
سعود بإبتسامه : صباح النور والسرور…البارح أتصل على سيف ولد عمي وقررت نروح اليوم للرياض .
معتز بادله ألابتسامة : بنروح نفطر أمي مسويه لنا فطور وكنت بجيك بالبيت بس ربي جابك هنا .
وأتجهو إلى بيت الخالة منيرة ثم دخلو .
وقفت منيرة وسلمت على سعود الذي قبل رأسها ويدينها : صباح الخير يمة .
منيره بمودة وحب لأبن شقيقتها التي عرفتها عليها الدنيا : الله يصبحك بالرضا والعافية…عن إذنكم بجيب لكم الفطور .
وقف معتز ثم قال: أنا أجيبه .
أبتسمت منيرة : الله يرضى عليك وجعلني أشوفك عريس يارب .
معتز : آمين .
ذهب معتز إلى المطبخ ونظرت منيرة إلى سعود : معتز قالي إنك ناوي تروح لأهلك متى ناوي تروح ؟
سعود بابتسامة رغم قلقه وتوتره ولكن هكذا سعود لاتظهر على وجهه سواء معالم الثقة : إن شاء الله اليوم العصر .
منيرة بحنين ودموعها تتحجر بعينيها : الله يرحمك ياداليا كانت تتمنى تشوفك بين أهلك .
سعود وقف وقبل رأس منيره : الله يرحمها…عشان خاطري لاتبكين .
منيره وهي تمسح دموعها : غصب عني ياولدي داليا ألاخت والرفيقة اللي عرفتي عليها الأيام أنا ما أدري وشلون بقضي باقي عمري بدونها جعل قبرها روض من رياض الجنه .
سعود بحزن داخلي يقطع شرايين قلبه فمن ماتت هي والدته التي كانت له كل حياته وكانت له أوكسجين يومه فهل يعيش الإنسان طبيعي وأوكسجينه يتناقص شيئاً فشيئاً ؟ : آمين يارب…هذا الطريق اللي كلنا بنسلكه الله يغفر لنا ويحسن خاتمتنا .
منيرة : اللهم آمين الحمدلله اللي مصبر قلبي لأنها من أهل الخير .
دخل معتز ووضع صينية الفطور على الطاولة الصغير التي تتوسط المجلس : حياكم الله .
جلسو سعود ومعتز على الارض وبدوء يفطرون .
نهضت منيرة : عن إذنكم بروح أنام .
سعود ومعتز سويا : أذنك معاك .
وخرجت منيرة ونظر سعود بمعتز : ممم معتز أنا بقولك شي بس يمكن تنصدم .
معتز بتوجس وهو يعقد حاجبيه : قول .
سعود : يوم كلمت سيف يقول أبوي عايش .
معتز ألجمته الصدمة وبعد دقيقة تكلم بذهول : كيف يعني يكذبون هو ما مات ؟
سعود : لا ما مات وهذا اللي يخليني أتردد أكثر من قبل إني ماروح لهم يعني أبوي لو يبيني كان ماقال انه ميت لا واللي قاهرني شهادة وفاته موجوده عندي…معتز بذمتك هذا أب يعني هو متبري مني بالطريقة هذي .
معتز : لا هو ماتبرا منك بس مايبيك .
سعود : انا خايف اروح لهم وأشوف أبوي بس المشكلة وعدت سيف أجيهم اليوم هو من يوم قال خواتك بحاجتك ماقدرت أقوله لا .

********************

صباح الرياض ~
صباح نسمات الهوا الباردة التي تحمل التفاؤل والأمل في القلوب المحملة بالحزن .
اشرقت الشمس ليوم جديد بهيج بين ناطحات السحاب الضخمة .
دخل مشعل السيف شركة عائلة آل سيف إحدى أطول ناطحة سحاب في العالم العربي .
يمشي بهيبته وغروره المعتاد أو ربما ثقته الزائدة بنفسه يمشي بين ممرات الشركة وخلفه الحرس الخاص به والخدم سحملون حقيبة جهازه وحقيبة أوراقه المهمة .
دخل مكتبه بعد مافُتح له الباب .
أنزل البشت وعلقها على الشماعة وجلس على الكرسي الضخم الفخم .
رن هاتفه وكان المتصل سيف إبن أخيه رد بـ : هلا أبو عبدالعزيز .
سيف : هلا بك صباح الخير .
مشعل : صباح النور .
سيف بتوتر فهو يخشى مواجهة عمه : عمي اليوم ولدك سعود إن شاء الله بيجي .
مشعل بلهفة رغم جهله لمن هو سعود ولكن يعلم أن له ولد إسمه سعود : أنت كلمته ؟
سيف إبتسم " لو تعلم ياسعود بلهفة أبيك ماذا ستكون ردة فعلك ؟ " : ايه كلمته البارحة وقالي إن شاء الله العصر وهو هنا .
مشعل وقف وصوته يتهجد فهذا كثير عليه : سيف أنت متأكد انه جاي الحين ؟
سيف أستغرب من عمه : ايه إن شاء الله بيجي .
مشعل بفرحة : وش ذا الصباح اللي بدايته خير وبركة…سيف الليلة بسوي حفلة لولدي أبي الرياض كلهم يدرون إن ولدي بيجي لبيتي .
سيف بإبتسامة : من عيوني بعزم اللي أعرفهم .
مشعل يشعر أنه يحلق بين السحاب فهو سعيد للغاية : الله يفرح قلبك مثل مافرحت قلبي بهالخبر .
سيف : جعل أفراحك دايمة ياعمي…تامر على شي ؟
مشعل : ما أبي إلا سلامتك .
وأنزل هاتفه على الطاولة ونظر إلى مدير اعماله مروان المنهمك على الجهاز المحمول : مروان .
ترك مروان شغله ونهض بإحترام : هلا ياطويل العمر .
مشعل بإبتسامة : اليوم بسوي حفلة لولدي سعود خبر كل اللي بالشركة .
مروان : حاضر .
مشعل أخذ هاتفه وأدخله بجيبه ثم حمل بشته على ذراعه : أنا طالع للبيت أتصل على حمد يجي يمسك مكاني…حياك الله على العشاء الليلة .
مروان : الله يسلمك ويبقيك ياطويل العمر بس أنا اليوم عندي ضغط بالشغل .
مشعل بإعتراض : ما أسمح لك إلا تتعشى عندي الليلة ولازم تسلم على ولدي .
مروان : من عيوني أفرغ نفسي لأجلك ياطويل العمر .
مشعل : أنتظرك الليلة…يله سلام .
وخرج مشعل وركب بسيارته وأمر السائق أن يذهب إلى البيت .
كم هو سعيد الآن يشعر أن سعادته تفوق الكون كله " يا الله كل هذا كثير علي "
كيف أن يأتيه أبنه الليلة وفي بيته ؟ لم تأتيه حتى في أجمل أحلامه .
" سأعوضك يابني عن كل لحظة حزن
سوف أحتويك ولن أجعلك تشعر بالحرمان
فمن يحزن أو حتى يخاف وسنده مشعل السيف ؟ "
وصل البيت ونزل وهو يشعر إنه يرفرف من الفرح دخل البيت : سلام عليكم .
فاتن نهضت وهي تبتسم له : عليكم السلام .
جلس مشعل بجوارها وهو مازال مبتسم أتاه صوت فاتن : جعله صباح مبارك اللي أبتسامتك مافارقتك من دخلت .
مشعل بفرح : أي والله إن اليوم هذا أسعد أيام حياتي ولدي سعود جاي الليلة .
فاتن عقدت حاجبيها وهي تشعر بالغضب كيف يفرح أن ولد ضرتها سيأتي الليلة : مو تقول إنه مات ؟
مشعل مازال مبتسم فلن يكدر سعادته أي شيء : بس قلت كذا عشان أبوي مايزعل علي ويقولي أجيبه هنا .
فاتن شعرت بالغيرة تتملك قلبها تعوذت من الشيطان الرجيم : الله يحييه بين أهله .
مشعل : الله الله يافاتن بولدي أبي تصيرين له مثل ألام .
فاتن بهدوء : الله يخلي له أمه والله مايوصل قدري ربع قدرها عنده .
مشعل بحب : أهم شي قدرك عندي والله محد وصله ولا أحد راح يوصله .
فاتن بحزن : حتى المغربية اللي تزوجتها علي ؟
مشعل وهو يحتضن كتفيها : والله يأم علياء قدرك أعلى من قدرها وقلت لك والله محد يوصل قدرك .

********************

منزل الجدة علياء ~
بحديقة البيت الواسعة الشاسعة الخضراء بلون الطبيعية .
صوت العصافير تغرد بأجمل الألحان .
وشعاع الشمس المضيء الذي بعث الحياة للأشجار المثمرة .
جميلة وجدتها يتناولن القهوة الصباحية المعتادة وبعد السوالف العامرة بالمحبة .
الجدة علياء دون أدنى مقدمات : جميلة حبيبتي أبوتس من قبل 30 سنة متزوج مغربية وجابت ولد واخوتس بيجي اليوم للرياض .
سقط كوب الحليب من يد جميلة وقفت جدتها وهي تقول بخوف وهلع : أنكب عليتس ؟
هزت جميلة رأسها بالنفي وهي مازالت مصدومة .
مسحت جدتها على شعرها الناعم الذي يصل آخر ظهرها : بسم عليتس وش فيتس ؟
جميلة بين شهقاتها : والله حرام عليكم تفجعوني كذا…يعني بيجي اليوم كان قلتو لي من أمس أو قبل عشان أتقبل .
الجدة احتضنتها بحنان ودموعها تخونها وتنزل بغزارة كدموع حفيدتها المصعوقة من هذا الخبر : يابعد حيي والله تو قالنا سيف إن سعود جاي الليلة
جميلة مسحت دموعها ونهضت وهي تقول وأنفاسها تتسارع ودقات قلبها لا تهدأ : مادري بأي نفسية بقابله .
ودخلت إلى البيت وهي تشعر إنها تحلم " رباه ألطف بحالي كيف يظهر لي أخ فجأه "
دخلت بغرفتها وجلست على السرير تبكي بشدة .
سمعت همسات صغيرها هتان : ماما ليش تبكين ؟
مسحت جميلة دموعها وهي تقول بين شهقاتها : لأن…لأن..
هتان قاطعها وكأنه يعلم ماسبب دموعها المستمرة دوماً : عشان جدي مشعل عصب عليك ؟
جميلة إبتسمت بين دموعها وهي تحاول أن تنسيه موضوع بكاءها : حبيبي يله قوم بسوي لك شور عشان تروح تلعب مع عيال خاله علياء .
نهض هتان معها دون أي معارضة .
وبعد ماحممته جميلة و ألبسته ملابسه أمسكت بيده ومشت بجواره إلى الصالة : حبيبي أجلس هنا بروح أجيب لك فطور .
وذهبت إلى المطبخ وإستكملت بكاءها ثم أمرت الخادمة أن تحضر الفطور لهتان .
" ماهذه القلوب القاسية كيف سأقابل أخي الليلة
يستحيل أن أواجهه وأنا طبيعية فأنا مازالت أشعر بأني في حلم "

********************

جناح فاطمة وحمد ~
فاطمة تنتظر حمد منذ أن خرج البارحة الساعة العاشرة لم يعد ولم يتصل والآن الساعة الثامنة والنصف الصباحاً وهو لم يعد .
متوترة وقلقة وخائفة عليه وخائفة منه لأنه توعدها قبل أن يخرج .
هاتفها بيدها وهي تمشي ذهاباً وإياباً بالغرفة تشعر إنها ستنهار إن غاب مطولاً .
نفثت بـ اووف وهي ترى الساعة ( من بعد الفجر انتظره الى الحين ماجاء الله يستر بتصل عليه )
جلست على الإريكه تنتظر حمد فهي تعبت من الوقوف .
إتصلت عليه بخوف وتردد ورد عليها بعصبية : نعم .
فاطمة بإرتياح رغم عصبيته عليها ولكن مايهمها إنه بخير : حمد وينك تأخرت ؟
حمد بصراخ وغضب : لا يكون بتحاسبيني ياست فاطمة ؟ انتي آخر من يسأل عن تأخري عن البيت سمعتي ؟
فاطمة " الأهم إنه بخير " : إن شاء الله…بس خوفتني عليك .
حمد بغضب أكبر : مانيب أصغر عيالك عشان تخافين علي .
فاطمة بضيقة : هذا جزاي لأني مانمت وقلقت عليك ؟
حمد : فطيم ترا موب ناقصك أنا…يكفي أخوك اللي مادري من وين طلع لنا .
فاطمة بإستغراب : أي أخو ؟
حمد بغضب : أخوك سعود اللي طلع لنا بوقت الورث .
فاطمة بعدم تصديق : حمد أنت تتكلم من جدك ؟
حمد شعر أنها تجاوزت حدودها " هل تقل عني كاذب ؟ " : ومن متى وأنا أمزح معاك ؟ فطيم أنا الحين بالشركه ومشغول مع السلامة .
وأغلق المكالمة وظلت فاطمة مذهولة ( اي اخو اللي حمد يتكلم عنه ومن جد انا عندي اخو ؟)
اتصلت على والدتها : صباح الخير .
فاتن بمودة : صباح الورد ياهلا وغلا .
فاطمة : هلا بك…يمه صدق انا عندي أخو اسمه سعود ؟
ابتسمت فاتن : ايه واخوك سعود الليلة بيجي ان شاء الله .
شعرت فاطمة بسعادة " رباه إن كان حلم أجعله يطول ويطول ولا أستيقض منه " : يمه صدق ؟
فاتن ضحكت بخفوت : والله صدق .
فاطمة وقفت وهي سعيدة وسعادتها كبيرة جداً تشعر أن أرجلها سوف تخونها لا تحتمل الوقوف فكل هذا كبير عليها .
سعيدة جداً بأخيها الذي تجهل منه كل شي عرفت اسمه فقط .
لاتعلم كيف صفاته كيف شكله كيف اخلاقه ؟
ورغم كل هذا فرحت كثير بأخيها المجهول .
ربما لأنها أكثر معاناة من أخواتها محتاجة لسند وعون فرحت بسعود .
لأنها تشعر بالنقص عندما سمعت حمد يقولها : إنتي ماعندك أخوان وأبوك يفضلني عليك .
أخذت فاطمة نفس عميق وقالت : الحمدلله يارب .
فاتن : خليك أحسن من خواتك علياء تقول مو مصدقة وجميلة نفسيتها زفت ومنال منهارة بغرفتها مو راضية تفتح الباب .
فاطمة بإستغراب : وليش كل هذا المفروض يفرحون بأخوهم .
فاتن بألم : يمكن عشان مشعل حرمه منهم وحرمهم منه .

*********************

بعد المغرب .
تقرر اقامة حفل كبير احتفاء واحتواء بسعود إبن مشعل آل سيف .
بمجلس رجال آل سيف المكتظ بالرجال واغلبهم رجال أعمال معروفين .
مشعل يجلس بوسط المجلس ينتظر سعود على احر من الجمر .
نهض وذهب لسيف الذي يجلس بين أبناء عمه : سيف يأبوك إتصل على سعود شوف وين وصل الله يهديه لو جاي على طيارة كان الحين واصل .
اتصل سيف بسعود : الو .
سعود بإبتسامة : هلا أبو عبدالعزيز .
سيف : وينك تأخرت كلنا نتظرك ؟
سعود بإبتسامة : تو دخلنا الرياض…بس نروح نأكد الحجز بالفندق ونجيكم .
سيف بإعتراض : تنام بفندق وإنت بين أهلك بيتي وبيت أبوي كلهم تحت أمرك وإنت الداخل وإحنا الطالعين .
سعود : ماتقصر يابو عبدالعزيز بس أنا معاي معتز مايصير أحرجه وأخليه ينام عند أهلي .
سيف بإبتسامه : أفا عليك معتز واحد منا وفينا .
سعود يتهرب من سيف : الله يسلمك بس ما أدري يمكن هو ما يبي .
سيف بإصرار : أنا أقنعه ومباتك الليلة إن شاء الله ببيتي قول تم .
سعود إستسلم : تم…والله أحرجتني يأبو عبدالعزيز .
سيف : أنت أخوي وهذا أقل شي أقدمه لك….مع السلامة أشوفك على خير إن شاءالله .
سعود : إن شاء الله .
أغلق المكالمة ونظر له مشعل وهو يقول بلهفة : ها متى بيجي ؟
سيف بإبتسامة : الحين جاي .
وبعد 30 دقيقة سريعة عند البعض وبطيئة عند البعض .
دخل سعود برفقة معتز وسيف الذي إستقبلهم .

نجمة النهار … شكراً لدعمك ولازلت أنتظر المزيد من الدعم والتشجيع .

لا حول ولا قوة إلا بالله

إليكم البارت الرابع

الجزء الرابع / مابعد مر الرحيل إلا انكسار .

دخل سعود برفقة معتز وسيف الذي إستقبلهم .
وقف مشعل وهو يشعر بأن أرجله مبتورة تحامل على نفسه وتوجه لهم وأشار له سيف على سعود ( يعني هذا ولدك ) .
إحتضنه وهو يهلي ويرحب بكلمات شوق غير مرتبة كلمات تعبر عن مدى فرحته بإبنه : ياهلا والله بالغالي ياهلا بولدي تو مانورت الرياض .
سعود ببرود رغم صعوبة الموقف عليه إلا إنه وجد نفسه هادئاً بارداً : هلا بك .
أفلته أبيه من حضنه وقبل سعود رأس أبيه فقط مجاملة .
وإبتعد عنه وتقدم معتز لمشعل وسلم عليه ومشعل يرحب به ترحيب حار .
وبعد ما إنتهو من السلام على جميع من حضرو .
جلسو بصدر المجلس .
مشعل بفرحة : ياهلا ويامرحبا فيكم…سلامة الاسفار .
لكز سعود معتز بمعنى أن يرد على مشعل .
ورد معتز : الله يسلمك ياعمي ويبقيك .
مشعل بلهفة : وش أخباركم ؟
سعود ببرود عكس أبيه : بخير الحمدلله .
مشعل نظر إلى معتز وبفضول : عرفنا على خويك ياسعود ؟
سعود : هذا أخوي معتز .
شعر مشعل بزلزال يضرب قلبه بسرعه 7 ريختر " لا لا لست إبن داليا " وبإستفسار : من ولده ؟
سعود بهدوء : ولد محمد بن فهد .
مشعل إنبترت فرحته بسعود وإبتسم وهو يشعر أن قلبه ينزف وينزف بشدة : ونعم .
معتز رد بإبتسامة : ينعم بحالك .
مشعل " سامحك الله ياداليا هل تزوجتي من بعدي ؟
– وإنت يامشعل ترتجي منها ألا تتزوج بعدك وانت تركتها وهي حامل وبأمس الحاجة لك ؟"
سيف بإبتسامة : سعود تعال سلم على جدتي من اليوم وهي تنتظرك .
نهض سعود وداخله مشاعر متضاربة قلق توتر ترقب خوف : عن إذنكم .
وخرج مع سيف : الحين تروح تسلم على جدتي وخواتك .
سعود بشوق : جدتي وش إسمها ؟
إبتسم سيف : توك تسأل ؟ جدتي إسمها علياء وخواتك الكبيرة علياء أم عبدالعزيز وبعدها فاطمة وبعدها جميلة وأصغرهم منال .
سعود بتوجس : كيف خواتي متقبليني أو لا ؟
سيف : ما أدري والله…اللي متأكد علياء تتمنى شوفتك اليوم قبل بكرة .
وقفو أمام الباب الرئيسي لبيت الجدة علياء أمام البيت الضخم .
سيف أشار له : هذا بيت جدتي .
سعود بتوتر : متوتر .
سيف بإستغراب : ماتوترت وإنت بتسلم على أبوك وعمامك طوال الأشناب…تتوتر الحين ؟
سعود تنفس بعمق ثم أردف : إنت عارف البنات وعاطفتهم .
سيف : توكل على الله وإدخل من اليوم وهم ينتظرونك .
سعود " اللهم ألهمني الصبر لا أعلم كيف ستكون مواجهتنا " طرق الباب والتوتر يصل الذروة القصوى .

********************

منزل نايف السيف ~
بغرفة ديمة المليئه بألوان الحياة وأطياف السعادة عكس صاحبة الغرفة .
المنقطعه عن الدنيا منذ عامين وستة أشهر .
أدخلتها والدتها بالغرفة وهي تتسند على والدتها .
ساعدتها حصة حتى مددتها على سريرها : الحمدلله على سلامتك تو مانور البيت يانور عيني .
ديمة بوجع : الله يصبرك يمه يمكن ربي بلاك فيني يختبر صبرك يمه أنا مافيني أمل خلاص ماراح أعيش .
شهقت حصة ووضعت يدها على شفائف ديمة مانعتها عن إكمال حديثها : اششش الكلام هذا مايجوز…أنتي لاتحزنين على جارح إلى حد الجزع وربي حرام سنتين ياديمة مو راضيه تعيشين مثل الناس والخلق ؟ سنتين وأنتي حابسة نفسك بالبيت عشان أخوك مات ؟
ديمة قاومت ضعفها وجلست ومسحت دموع والدتها التي تجلس بجوارها : يمه لا تبكين علي وروحي لبيت عمي مشعل أفرحي معاهم وشاركيهم فرحهم بولدهم .
حصة بحزن : كيف أفرح وإنتي هنا حزينة وتبكين على أخوك اللي مات من سنتين أنا أمه قدرت أعيش بدونه وإنتي إلى الحين ماتقبلتي الخبر ومو مصدقة لا تجزعين والله حرام عليك…أذكري الله وصلي ركعتين وأدعي إنك تنسين أخوك .
ديمة وهي تسند ظهرها على السرير : مستحيل أنسى جارح أنسى نفسي بس ما أنساه يمه إذا تحبيني صدق روحي لبيت عمي مشعل .
حصة وقفت وهي تقول : أنا بروح لهم الحين وأنتي إذا تحبيني بعد روحي معاي .
هزت ديمة راسها بالنفي وقالت بإختناق : والله ما أقدر .
حصة قبلت رأس ديمة وبحنان أمومي : أتمنى أرجع من عندهم وإنتي بنتي اللي أعرفك اللي أبتسامتك ماتفارق وجهك…ديمة أقسم بالله من سنتين ماشفتك تبتسمين حرام عليك إنتي إلى الحين عايشة .
ديمة بحشرجة : أوعدك يمة إذا رجع جارح أصير مبتسمة طول الوقت وأنسى شي إسمه حزن .
حصة لم تحتمل هذا الكلام نزلت دموعها مجدداً : الله يسامحك ياديمة .
وخرجت من عندها وأخذت ديمة هاتفها من على الكومدينة وأخذت السماعة وشغلت انشودتها المفضلة في الأونة الأخيرة .

رحل منهو يسليني وصار اليوم في قبره
رحل عني وفارقني حزين وصرت في حسرة
ذكرته يوم يحاكيني وهالبسمات من ثغره
ذكرته يوم يواسيني إذا ما هلت العبرة
ذكرته يوم يشكي لي عن همومن ملت صدره
ذكرت وهلت دموعي وصار الفكر في أسره
حبيبك راح ياقلبي ولا حتى بتشم عطره
وظلك مات ياظلي سكن وإياه في قبره
ألا وينك تسولف لي تحت أنوار هالقمرة
وتنشدني عن أخباري ترا عقبك غدت مرة
ألا ياغايبن عني ترا قلبي فقد صبره
ولكن الأمل عندي لقاك بجنتن نضرة
ألا منصور يا غالي فقدك الكون من كبره
عساه بخلد يا ربي ويشرب عذب من نهره
*

أنزلت السماعة وهي تقول ( لا جارح مامات ليش أنا أصدقهم وأكذب إحساسي أخوي عايش إيه أنا أحس فيه ) .
طرق باب غرفتها ودخل أخيها حاتم : سلام عليكم .
ديمة بصوت أقرب للهمس صوت مليء بالحزن والتعب : عليكم السلام .
جلس حاتم على الكرسي بجوار سرير ديمة : الحمدلله على السلامة ديوم…من عرفت إنك هنا جيت دايركت من مجلس الرجال .
ديمة بمودة : الله يسلمك ويخليك لي يارب ولا يحرمني منك .
حاتم قبل رأسها ثم قال : ولا منك يارب…ديمة ليش مارحتي مع أمي لبيت عمي ؟
ديمة بألم جعل روحها تنشطر إلى نصفين نصف منها مات مع جارح والنصف الأخر بقي على ذكراه ويتجرع لوعة فقده : بيت عمي فرحانين بسعود وإذا رحت هناك قلبت فرحهم نكد أنا ما أبي أصير سبب بإنكسار فرحتهم .
حاتم يريد أن يضغط عليها فهي تنتهي يوماً تلو الأخر وهو مكتف الأيدي : وكيف ترضين تصيرين سبب بإنكسار فرحتنا أنا وأمي وأبوي ؟
نزلت دموع ديمة : والله غصب عني أبي أخوي موب قادرة أعيش بدونه .
حاتم بفزع وهلع : أنتي ماتخافين ربك والله حرام اللي تسوينه جارح مات خلاص إرضي بالواقع ياديمة .
ديمة بين شهقاتها وبكاءها المستمر دوماً : كيف أصدق إنه ميت وأنا أحس فيه ؟
حاتم مسح دموعها بحنان : ديمة ياقلبي إحساسك لأنك فقدتي نصفك الثاني حتى لو هو ميت تحسين بأحاسيس غريبة وهذا يصير بين التوأم .
ديمة : وش يضمن لي إنه ميت ؟
حاتم بهدوء : حمد وعامر مصلين عليه .
ديمة وهي تبكي : ليش هو حمد يعرف الصلاة عشان يصلي على ميت ؟
حاتم بحدة : ديمة عيب عليك هذا أخوك الكبير .
ديمة صرخت بكل قهر : أخوي الكبير ما إحترم أمه وأبوه عشان أحترمه…عامر صديق جارح مستحيل يتخلى عنه بس ليش تركه يتعذب ؟
حاتم : أقسم بالله ياديمة إنهم مصلين على جارح بلندن ودفنوه هناك .

********************

إنفتح الباب ودخل سعود ومشاعره متضاربة بين قلق وفرح .
مشى خطاء واثقة عكس داخله مرتبك وقلق بشدة .
أول مارأى هي جدته التي تقف بنصف الصالة بجمسها الممتلئ ويداها المجعدتان التي تمسك بهما عصاتها .
عاجزة عن المشي فأرجلها لم تعد تحملها .
حاولت أن تتقدم خطوات قليلة لحفيدها التي لأول مرة تراه .
ولكن هو توجه لها بسرعة قبل رأسها وهي إحتضنته وترحب به بحرارة وشوق وصوتها يتخلله البكاء .
قبل سعود رأسها مرة أخرى وقبل يدها وقال أخيراً : لاتبكين جعل عيني ماتبكيك .
الجدة علياء مسحت دموعها بطرف طرحتها : دموع فرح ياولدي…سلم على خواتك .
توجه سعود لأخواته الواقفات بإنتظاره بشوق ورهبة وتردد وفرح .
أولهن علياء سلمت عليه بهدوء وحذر عكس جدتها فالموقف صعب جداً أن تسلم على رجل لأول مرة تراه .
حتى سعود أثار أستغرابه هدوءها وأستغرب أكثر من رجفتها الغير طبيعية .
علياء بصوت مرتجف حاولت جاهدة أن يخرج طبيعي : أنا علياء .
سعود بإبتسامة : ياهلا والله وش أخبارك يأم عبدالعزيز ؟
علياء شعرت إنها لا تستطيع أن تتكلم لإنها عندما تتفوه بكلمة سوف تنفجر ببكاء غير مبرر .
هزت راسها بإيجاب فهي لا تستطيع أن تنطق بكلمة كل هذا يكفي فهي مضغوطة للغاية تريد أن تذهب من هنا حتى تبكي .
تقدم سعود لأحد زهراته الأربع لأكثرهم حناناً وعطفاً .
سلم عليها وهي التي بادرت بإحتضانه وقالت وصوتها يتخلله البكاء وكان صوتها مؤلم على قلب سعود فهو شعر بحب أخوي تجاههن فالله سبحانة هو من فرض هذه الفطرة فإحساس الأخ بأخيه أكبر من كل شيء : ياهلا والله بأخوي ياهلا بالغالي .
سعود بحب ومودة بعد ماقبل رأسها : هلا بك أكثر .
فاطمة بإبتسامة صافية وبمودة وأخوة : أنا إختك فاطمة? – ثم أشارت على بناتها – وهذولا بناتي .
سلم سعود على الصغيرات بمحبة : الله يخليهم لك وتشوفينهم عروسات إن شاء الله .
إبتسمت له فاطمة : شخبارك ؟
سعود إرتاح لها إن لم يرأ قبول من أخواته الأخريات هي تكفيه : الحمدلله بخير…إنتي شلونك ؟
فاطمة بسعادة : الحمدلله بخير دامني شفتك .
جميلة بمرحها المعتاد رغم إنها لأول مرة ترا سعود فهي مصرة على أن لاتكون بينهما رسميات منذ البداية : خلاص ماصار سلام حتى أنا بسلم على أخوي .
إبتسم لها سعود وإتجه لها وسلمت عليه : هلا وغلا بالغالي تو مانورت الرياض .
سعود بفرح : منورة بوجودك .
حملت جميلة هتان الذي كان يقف بجوارها وهي تقول : هذا ولدي هتان .
سلم عليه سعود وهو يقول : أجل إنتي جميلة ؟
إستغربت جميلة كيف عرفها : إيه.
وتقدم لمنال الخائفة المرتبكة لم تستطيع السيطرة على دموعها فأعينها مليئة بالدموع .
سلم عليها سعود وكانت قريبة للأنهيار لا تستطيع الوقوف أكثر من ذلك هي تماسكت كثيراً ولكن فشلت .
جلست على الكرسي ودفنت وجهها بكفيها وهي تشهق بعنف .
جلس سعود على ركبه أمامها وهو يقول بقلق : منال…منال وش فيك ؟
الجدة علياء بمودة : إتركها ياسعود هذي حساسة وأقل شي يأثر فيها من عرفت إن عندها أخو وهي ماكفت دموعها وتوها قدرت تمسك نفسها ومن شافتك ماقدرت تتحمل .
وقفت منال وخرجت إلى منزل والدها بسرعة .
ثم نهضت علياء وهي تقول برجفة : ع ع عن إذنكم ب بشوف مم منال .
وخرجت خلف منال وهي أيضاً تريد أن تبكي لكي ترتاح .
سعود جلس على الكنبة بجوار جدته سكبت له فاطمة فنجان قهوة وهي تقول : حيا الله من جانا .
سعود بإبتسامه وهو يتناول فنجانه : الله يبقيك .
الجدة علياء مسحت دموعها بطرف طرحتها وهي تقول : والله أني بشوفتك أسعد إنسان على وجه الارض الله لايخليني منك .
قبل سعود يدها المجعدة المزينة بالحناء الغامق وفص خاتمها الفضي العتيق التي مازالت متمسكة به رغم تغير الزمان وتعدد أطقم الفضة والذهب ولا كنها متمسكة بخاتمها : وأنا والله فرحان بشوفتكم .
طرقات خفيفة على باب المدخل .
ثم دخلت الطارقة فاتن مرتدية جلالها ولافته على رأسها يصل إلى أعلى ركبها فهي إن كانت خالة سعود زوجة أبيه وتعتبر من محارمه فهي لأول مرة تقابله وتخجل أن تقابله بمنظر غير ذلك .
تقدمت وسلمت على سعود : يامرحبا بالغالي زارتنا البركة .
سعود بإبتسامة : هلا بك أكثر .
ظن سعود إنها إحدى عماته فسلامها عليه يشعره إنها مهتمة به كثير وإهتمامها لايقل عن إهتمام شقيقاته به .
فاتن خالفت كل ظنونه وهي تقول : أنا فاتن زوجة مشعل .
سعود قبل رأسها بإحترام : ياهلا بك وش أخبارك ؟
فاتن بإبتسامة : الحمدلله بخير…سلامة الأسفار…وش أخبارك ؟
سعود بمودة : الله يسلمك…الحمدلله بخير .
فاتن : عن إذنكم بروح أشوف منال عجزت فيها علياء .
قلق عليها سعود بشدة تمنى أن يقول لهم ( بروح أشوفها , طمنوني عليها )
بالفطرة هي شقيقته ودمه ودمها واحد ولكن لايعقل أن يطلب منهم أن يراها فما زال هناك العديد والعديد من الحواجز في حياته بين شقيقاته , يشعر بالضيق عندما يسمعهم يقولون منال منهارة .
الجدة علياء شعرت بسعود : لا تشغل بالك يأبوي منال كذا .
جميلة بإبتسامة : عاد منال تستحي من ظلها وأكيد إنها مستحية منك وهي تعبر عن حياءها بالبكاء .
الجدة علياء بمرح : وأنتي وأختس وراكن ماتستحن ولا مابوجيهكن حيا ؟ الحيا زين البنت .
ضحكت فاطمة : هذا أخونا الله يرضى عليك ياجدتي ومايصير نقابله برسمية .
سعود بإبتسامة فهو أحب طريقة كلامها وأيد كلامها فهو ماكان يريده منهم هو البعد كل البعد عن الرسميات : من جد كلام أم كادي أنا أخوهم مانبي الرسميات اللي مالها داعي .
جميلة بذهول : وش عرفك بأسمائنا وأسماء عيالنا ؟
سعود إزادت إبتسامته التي زادت من وسامته الرجولية الطاغية الكثير : أبو عبدالعزيز ماقصر قالي كل شي عنكم .
وهكذا يدور الحوار بينهما أخوة تحابو وترابطو منذ أن رأو بعض رغم ذهول الجدة كيف لفاطمة وجميلة أن تأقلمو معه وبدؤ بالكلام معه هي ظنت أنه سيمر أسبوع وهن لم يحادثن سعود ولكن حدث مالم يكن متوقع .

********************

منزل مشعل آل سيف ~
غرفة منال .
علياء تجلس بجوار منال التي تبكي بشكل مستمر يذيب القلب .
همست علياء بحنان : منول ياقلبي ليش كل ذا البكاء ؟
منال بين شهقاتها : تخيلي بين يوم وليلة طلع لي أخو كذا وبدون مقدمات يقولون أخوك سعود جاي الليلة كيف بأستقبله ؟ وهو من سلم علي ماقدرت أمسك نفسي رجال غريب أول مرة أشوفه .
علياء إحتضنت منال : الله يهديك يامنال والله مايحتاج كل ذا البكاء أنا صح مرتبكة وخايفة بس مو لهالدرجة .
طرق الباب ودخلت ملك التي تحمل بيدها اليمين كوب عصير .
ناولته منال : منول عشان خاطري أشربي هذا إنتي من الصباح ماكليتي شي .
منال بإعتراض : ما أبي والله مالي نفس أكل شي .
ملك برجاء : إذا لي خاطر عندك أشربيه والله حرام عليك تهلكين نفسك كذا .
مدت منال وناولتها ملك الكوب ثم رشفت منه وشعرت إنها تبتلع حجر أو أقسى من الحجر .
نزلت دموعها بغزارة : الله يسامح أبوي هو السبب .
نهضت علياء وهي تقول : الله يسامحه…عن إذنكم بروح لبيت جدتي بجلس مع أخوي شوي .
ملك بإبتسامة بمرح فهي بهذا المرح تحاول إزاحة الحزن المخيم على الغرفة : مو تجلسين عند أخوك وتسحبين على حماتك .
علياء بمرح مماثل وهي تتجه للباب : مالت على حماتي اللي أربعة وعشرين ساعة ناطة بوجهي .
مسحت منال دموعها ولفظت " اعوذبالله من الشيطان الرجيم "
جلست ملك بجوارها وهي تقول بعفوية : كل هالدموع يوم قابلتي سعود أجل كيف لا قابلتي حاتم .
تحول ذبول منال ووجهها الباكي إلى غصب هادر حاولت أن تخفض صوتها : ملك لا تجيبين طاريه أكرهه ما أطيقه .
إستغربت منها ملك ومن ثورتها : أبي أفهم إنتي وش شايفة بحاتم عشان تكرهينه ؟
منال بين أسنانها وغضبها يتصاعد : إذا كان أنتي شايفة فيه صفة زينة والله أنا متنازلة عنه وتهني فيه .
ملك بغضب وهي تبتعد عن منال : منال وش هالكلام ؟ لاتصيرين سخيفة وتكلمي معاي زين .
منال شدت من أمساكها لوسادتها حتى تخفف من عصبيتها : أنتي لاتجيبين طاري حاتم عشان أتكلم معاك زين .
ملك : والله مو حلوة بحق ولد عمك تبهتينه عاد كيف وهو خطيبك ؟
منال بتحذير : ملك إنتي رفيقة عمري لاتخليني أخسرك عشان إنسان مايستاهل .
ملك بإستفسار : منال أسألك بالله شايفة عليه شي ؟
منال هزت رأسها بلا : بس الكتاب باين من عنوانه حمد وحاتم أخوان أكيد نفس بعض .
ملك : وليش حاتم مو مثل عمي أو عمتي ؟
منال : أنا متأكدة إنه مثل حمد .

********************

الدمام ~
منزل نهى .
بعدما إنتهت منيرة من صلاة العشاء خرجت للصالة .
ونظرت إلى نهى التي تجلس مع أم وليد وأخت وليد الكبرى نوف .
سلمت عليهم منيرة وهي قلقة على سعود .
جلست معهم قرابة عشرة دقائق وعقلها مشغول تريد أن تتطمن على سعود فقلبها يؤلمها بشدة تشعر أن والد سعود سوف يطرده من بيته فهذا سيكون قاسي على الجميع هي من تتحمل الخطأ وهي من أصرت على سعود أن يذهب إلى أهله وكل هذا من أجل الغالية الراحلة .
قطعت صمتها وهي تقول : نهى يمه إتصلي على أخوك شوفي وش صار معاه .
نهى إبتسمت لوالدتها : يمه أكيد هو الحين بمجلس رجال أخاف أحرجه أو أزعجه بأتصالي .
منيرة دقات قلبها تخبرها بأنه حصل مكروه هناك : قلقانة عليهم أبي أعرف وش صار لسعود…طيب إتصلي على معتز .
أخرجت نهى هافتها ثم إتصلت على معتز : هلا نهى .
نهى : أهلين…وش صار لكم ؟
معتز : وصلنا الرياض والحين إحنا ببيت أهل سعود .
نهى بإهتمام : وكيف إستقبال أهله له ؟
معتز بإبتسامة : تطمني والله من كثر مايرحبون فيه أحس إنهم بيشيلونه بعيونهم…شايلينه على كفوف الراحة .
نهى بإرتياح : الله يطمن قلبك والله أمي قلقانة عليه من يوم عرفت إنكم وصلتو الرياض .
معتز : طمنيها سعود مرتاح بين أهله .
نهى من إعماق قلبها : جعله دوم يارب…متى ناوين ترجعون ؟
معتز : ما أدري والله إلى الحين ماقررنا من المفترض إنه واحد من عمام سعود يعزم على العشاء بكرة بس إلى الآن ماصار شي .
نهى بمودة : ترجعون بالسلامة إن شاء الله متى مافضى سعود قوله يكلمني .
معتز : من عيوني .
نهى : جعلني فدوة عيونك…مع السلامة .
ونظرت إلى والدتها وهي تقول : يمه يقول أهل سعود شايلنه على كفوف الراحة .
منيرة بإرتياح : الله يسعده ويخليه لهم .
أم وليد بحزن : الله يجبر مصاب سعود من بعد وفاة أمه وهو مهموم وماعاد سعود اللي نعرفه .
منيرة قالت بألم ووجع من فراق الأخت والصديقة داليا : الله يرحم داليا والله فقدتها بقوة مكانها فارغ أحس بكتمة من بعدها .
شعرت نهى بحزن يخنق روحها لأول مرة تسمع والدتها تتحدث بهذا الكم من الألم وهذه أيضاً المرة الأولى التي تسمع بها والدتها تعبر عن حزنها على خالتها بل والدتها الأخرى ( داليا ) .
نوف ( شقيقة وليد الكبرى ) : تكفون لاتقلبون جلستنا حزن كنا مبسوطين وش حليلنا .
إبتسمت منيرة : الله لا يجيب الحزن .
أم وليد : أمين يارب بس أم سعود لها حق علينا الله يرحمها برحمته ويجعلها برايد عليها .
نوف ونهى : أمين .

********************

مجلس رجال آل سيف بعدما عاد سعود من عند جدته وشقيقاته جلس في مكانه بجوار معتز .
معتز بهمس : شفت جدتك ؟
سعود إبتسم وبحب : حي ذا الطاري وراعيته .
معتز بأبتسامة : ها كيف إستقبالهم لك تقبلوك مبدئياً أو باقي ؟
سعود بإرتياح : الحمدلله جدتي وخواتي متقبليني وكأنهم يعرفوني من زمان خصوصاً جدتي وإختي فاطمة .
معتز إبتسم : يعني ماندمت إنك جيت هنا ؟
سعود بتردد : ممم إلا ندمت وبنفس الوقت أحس إنها أكبر خطوة بحياتي أدخل عالم ناس يربطني فيهم النسب فقط .
معتز : نأجل الكلام بالموضوع هذا إذا طلعنا من مجلس الرجال مو حلوة نتساسر بينهم .
مشعل هتف بلهجة أمره : سليم صب قهوة لعمك سعود .
أخذ الرجل المكلف بصب القهوة دلة القهوة وعدة فناجين مصفوفه فوق بعض وصب لسعود فنجان : تفضل .
سعود بإبتسامة : زاد فضلك .
ودار بالقهوة هو ومساعد على جميع الرجال بالمجلس الضخم الكبير الذي جمع الحشود المدعوة على إحتفال آل سيف بإبنهم سعود .
حمد همس لعمه مشعل الذي يجلس على يمينه : عمي بكرة الصباح توزيع الورث…سعود من الورثة اللي لازم يحضرون ؟
مشعل بهدوء : بدون شك هو ولدي يعني وريث لأبوي .
حمد بضيق : وماتشوف إن موقفه سخيف يعني جاي قبل قرأة الوصية بيوم عشان يشوف وش حقه وش له من الورث .
مشعل بعد تفكير : صدقت يأبوك أنا إستغربت أنه وافق يجي من قاله سيف…بس وش يعرفه إن الوصية والورث بكرة قرأتهم ؟
حمد بثقة : سيف خويه وأكيد إنه قاله على كل شي…بس إنت لاتقوله على شي وشوف إذا هو جاي عشان الورث بكرة الصباح هو أول من يحضر هنا وإذا هو من جده جاي عشان أهله ماراح يقط وجهه بينا بكرة .
مشعل : إيه صح أبوي مايعرفه ولا يدري عنه شي وأكيد إنه ماله أي أحقية بالورث ولا تخاف هو ماله أي نصيب .
حمد بغضب مكتوم فهو يحترم عمه جل الإحترام : وشلون ماله نصيب وإنت تقول إنه من الورثة ؟
مشعل : أبوي قالي قبل وفاته تقريباً بخمس سنوات إن الورث هو الوصية يعني كل شخص محدد له كم يستاهل…أنا وإخواني بالتساوي بس عيالنا هم اللي كل واحد يزود عن الثاني يعني كل واحد وغلاته عند أبوي .
حمد بإستغراب : وماتشوف إنها راح تسبب مشاكل كثيرة ؟
مشعل بإبتسامة : أكيد لا…كل واحد منا عنده الخير اللي يغطي بلد يعني مو محتاجين كم ريال من أبوي .
حمد بقهر : لا ياعمي فلوس جدي ملايين الملايين يعني إذا هو بيعطينا على قد غلاتنا الرخيص عنده بياخذ تقريباً 60 مليون .
مشعل : يعني وإنت بحاجة الستين مليون هذي ؟
حمد : لا موب حاجتها بس مهوب من العدل إن الورث يتوزع كذا لازم بالتساوي .
مشعل بثقة : هذي وصية أبوي وإحنا مالنا حق نفتح فمنا بكلمة وحدة نرضا باللي هو أعطانا وإحنا ساكتين .
إبتسم حمد بسخريه : إلا لنا كل الحق والمحاكم هي اللي تعدل بيننا .
مشعل بصدمة وحاول يخفض صوته على الأخر : من جدك إنت بتدخلنا بمشاكل مالها أول ولا تالي يأبوك اللي إنت محتاجه أنا بأعطيك إياه بس لاتتسبب بمشاكل مع عمانك وعيالهم .
حمد بثقة : حقي أخذه أخذه سوا من عماني أو من عيالهم .

********************

منزل مشعل السيف ~
مجلس النساء الذي لم يكن به أحد سواء نساء آل سيف .
علياء : هاا فطوم كيف أخوك معاك ؟
وضعت فاطمة يدها على قلبها وهي تقول : آآه أخوي يجنن ماشاء الله رجولة وحنان مافيه مثله .
علياء رفعت حاجب وأخفضت الأخر وهي تقول بإستنكار : هذا وإنتي ماجلستي عنده إلا نص ساعة .
الجدة علياء بدفاع : والنص ساعة هذي أثبتت لها إن أخوها مافيه مثله .
فاتن بنبرة محايدة : مبدئياً أشوفه يختلف عن عيالنا كثير كثير .
الجدة علياء بفخر : جعلني فدوته هو الزين كله وأزين من عيالنا وطبايعهم الشينة .
علياء بإعتراض مازح : لا لا لا ياجدتي ماسمح لك كذا ترخصين بعمامي وعيالهم عشان سعود اللي تو عرفتيه ؟
الجدة علياء بحب : قدرهم محد يوصله ومارخصت فيهم بس طبايعهم ماهيب زينة ولا أبوتس يطلق بنته من رجالها عشان فلوسه ماهيب واجد ؟ وحمد يطول لسانه على الكبير والصغير حتى أنا جدته مايحترمني ؟ ومنال شالة سيفها على حاتم من ذا الحين ؟ وديمة حارمتن نفسها من الدنيا عشان أخوها ميت…والله إنها ماهيب سوات أوادم .
علياء إبتسمت وهي تقول بإرتياح تمثيلي وهي تضع يدها على صدرها : الحمدلله جات على كذا ولا إنتقدتي سيف بشي .
الجدة علياء بإبتسامة : الله يرفع قدر أبو عبدالعزيز والله مافيه مثله من عيالي ولا عيالهم .
جميلة بضحكة : إنبسطي ياعلوي جدتي تمدح زوجك .
الجدة علياء نظرت إلى جميلة وهي تقول : وما أنسى أم هتان جعل يومي قبل يومها هي بنتي وأقرب الناس لي يكفيني إنها هي اللي عايشة معي الله يعينني على فراقها لاتزوجت .
جميلة بذهول : ومن اللي قالك إني بتزوج بيوم من الأيام .
الجدة علياء بغضب : أنا إلى الحين ماخرفت عشان تلعبين علي وعدتيني إنتس تفكرين بموضوع خالد جالي يومين أحتري ردتس وإلى الحين ماعطيتيني جواب . ( أحتري = أنتظر ) .
جميلة وكأنها تذكرت شيئاً قد غاب عنها لعدم إهتمامها به : إيه صح والله نسيت بس ولا يهمك الحين أعطيك الجواب وأقولك ما أبي خالد .
الجدة علياء بحزم : كلامي معتس لارجعنا للبيت مهوب ذا الحين .
فاتن شعرت بالكثير من الحزن تشعر بحاجة ماسة للبكاء .
" كيف إبنتي تخطب وترفض من خطبها وأنا لا أعلم بشي
تقرر الكثير من الاشياء بحياة جميلة وأنا ليس لي أي دور من إشراكي معها
وكأني بحياة جميلة كممثل كومبارس على هامش حياة إبنتي "
" سامحك الله يامشعل حرمتني من إبنتي… ليس مشعل بل هي الذي حرمتني من نفسها…رباه وفقها وأكتب لها الخير "
دخلت منال بهدوء كشخصيتها الهادئة تماماً : سلام عليكم .
الجميع : عليكم السلام .
جلست منال بجوار جدتها بعد ماقبلت رأسها : جدتي فديتك أبيك تعتذرين لي من سعود .
الجدة علياء برفض : سعود أخوتس وعيب أصير بينكم وسيط إتصلي عليه أنتي وأعتذري منه .
منال بخجل : أنا أتصل عليه ؟
الجدة علياء : إيه أنتي تراه أخوتس ماهوب غريب عنتس .
منال بحدة : إلا غريب عني هذا أول يوم أشوفه أشلون أكلمه ؟
فاطمة أنهت الجدل وهي تقول : خلاص أنا أتصل على سعود وأقوله .
الجده علياء بإعتراض : ماهي زينة بحقه أنتي تعتذرين نيابة عنها إلى متى وحياها مانعها من كل شي ؟

********************

مجلس رجال آل سيف ~
بعد إنتهاء العشاء وقبل أن يغادرو الرجال المدعوين تكلم عبدالعزيز : سعود ياولدي بكرة عشاك عندي وحياكم الله .
سعود بإعتراض : لا ياعمي أنا بكرة العصر ماشي للشرقية .
عبدالعزيز بثقة : والله ماتمشي للشرقية إلا وإنت متعشي عندي ياكبرها عند الله تجي للرياض وماتتعشى عندي .
نايف بإبتسامة : وبعد عشاء أبو سيف عشاك عندي قول تم .
سعود بحرج : تم .
وبعد ماخرج الجميع ولم يتبقى سوا أبناء آل سيف ومعتز .
نظر حمد بسعود وهو يقول بسخرية : ممكن نعرف يالفارس سعود مين اللي رباك وكيف عشت بدون أب ؟
سعود لا يطيق حمد ولا يحب أن يتحدث معه رد عليه بسخرية مغلفة بالكراهية : والله مو من حقك يا إستاذ حمد تعرف .
مشعل لا يريد أن يغضب حمد وهو في مجلسه : من حقي أنا أعرف مين اللي رباك ؟
سعود قبل يرد على أبيه تذكر الآيه ( ولا تقل لهما اف ولا تنهرهما وقل لهما قولا كريما ) : تربيت على يد رجال من مناعير الرجال والحمدلله إنه هو اللي رباني ولا هو غيره .
إستغرب مشعل رد سعود : وممكن أعرف منهو ذا الرجال اللي ما إنخلق مثله ؟
سعود : عمي محمد أبو معتز .
مشعل ألجمته كلمة سعود وهو علم وعلى يقين أن داليا تزوجت " لمذا تتزوجين ياداليا حتى وإن طلقتك فأنا أحبك "
وقف سعود وهو يقول : أرخصو لنا بنروح للفندق ننام ونرتاح .
حاتم نهض وقبل أنف سعود : والله ماتروح يأبو مشعل للفنادق وبيوتنا موجودة .
حمد نظر إلى حاتم وقال بسخرية : إيه إفزع لنسيبك وسوي نفسك رجال عند المواقف والحمية .
نهض نايف وهو يقول لحمد : تراك زودتها ياحمد إحترم نفسك وأحشم المجلس ماهوب كل ماتكلم واحد تستصغره .
مشعل تكلم قبل حمد : ماعليه يأبو حمد أمسحها في وجهي وحمد مضغوط شوي أرفق عليه وماراح يكررها إن شاء الله .
حمد ( صدقت ياعمي والله القهر ذبحني مانيب قادر أفكر فاطمة الحين وراها اخوها هذا اللي واضح إنه مايرضى أحد يدوس له على طرف وجاي عشان الورث والورث جدي هو اللي موزعه بيننا ومهوب بالتساوي ولا العدل ) .
تكلم حمد بحقد والقهر ينهش قلبه : لا راح أكررها وماهيب علي ياسعود إنت جاي عشان ورثك وعمامي مستقبلينك بحسن نيتهم .
سعود صعق من حمد كيف يتحدث عنه هكذا .