أمطار فجر الخميس 22/5 على الرياض تهور أمة 2024.

كيفكم وش علومكم ؟؟؟؟
كيفكم مع الاجواء الطيبة والامطار والخير والرزق
اللهم لك الحمد والشكر .. واللهم اجعله سقيا رحمة لا سقيا عذاب يارب العالمين

في الامطار اللي نزلت يوم الاثنين اللي راح لو تعطوني وزني ذهب ما طلعت للشوارع ايه قامط الحمد لله اني بالدوام وقبل بداية العاصفة بدقايق كنت متوجه للدوام ونزل علينا البرد بالدائري بس خربتها وقمت اوزع ابتسامات على كامات ساهر بوصل الدوام بسرعة لأن السحاب اللي كان جاي واضح انه بيسبب أزمة سير
الامطار اللهم لك الحمد ما زالت متواصلة .. واللي عند الله ما يقضي .. أمس الأربعاء كنت راجع من استراحة متأخر وفي رواية اني زابن الاستراحة لأن المطر كان قوي ولا فيه مجال للمخاطرة بالطلعة بسيارات صغيرة بالمطر .. رجعت من الاستراحة الساعة ثلاث ونص .. وكانت تمطر بس خفيف .. المكان الدائري الشرقي .. يوم وصلت مخرج خمسطعش ويبدأ المطر القوي جداً جداً جداً ما ادري وش اسوي .. قلت مالي الا اني ادور بطريق المية لين يخف المطر لأن التصريف بذاك النفق بطل جداً امشي بشويش طبعا خلص النفق ووصلت اشارة لا للمخدرات بالستين وديورت وليتني ما ديورت .. الماء تجمع بشكل ما يوصف .. صار مثل اللي شفتوا بالصور .. بس هل أقطع او ما أقطع .. هنا صارت الحيرة .. فجاء القرار السريع اني بديور بنفس الشارع وبعكس الطريق .. يوم دقيت الريوس بنية المعاكسة يوم شفت سيارتين وراي ينتظرون اتقدم مهب ارجع الدنيا تمطر وتغرق وانا امخمخ بالريوس ما تجي واحد منهم شطفني وقطع واطقع ما يشوف الماء شفته راح وخلص .. مشيت وراه .. وضبطت الأمور مع العلم ان الماء غطى الكفرات لكن الحمد لله ..
المطر جلس حوالي ساعة الا ربع او ساعة .. وانا دايخ .. وبنفس الوقت باقي اقل من ساعة على طلعة الشمس .. وأكيد بعد هالمطر بيصير فيه أكشن بالرياض بس وين ما أدري قررت اروح للبيت آخذ الكام والعدسات .. وادشر بالرياض أدور كارثة
بعد ما وقف المطر تماماً على الساعة 4 ونص يمكن .. بدت الرحلة .. الكام جنبي وادور اي شي بس بصور
رحت لكبري العليا لقيته فاضي شافطينه ولا فيه مشاكل .. رحت لطريق الامام محمد بن سعود .. نفس الشي كان ماشي زي الحلاوة ولا كأن يوم الاثنين صاير فيهم شي
الدائري الشرقي والشمالي سالكين جداً ولا فيه أي أضرار عليهم .. تضارب الشعور عندي وقتها .. واكتفي بهذا القول .. تحطمت اني ما راح اصور شي .. فقررت العودة والخلود إلى النوم واكتشفت ان المطر القوي كان بس في شرق الرياض .. رجعت مع الدائري الشرقي .. وبطلع مع خمسطعش طبعاً .. يوم شفت الناس متجمعين وموقفين بنص الدائري من بعيد قلت هلا والله واوقف بالدائري نفسه واطلع الكام وانزل .. وعرفت وش هم متجمعين عليه إليكم المنظر ..

بركة من المياه متجمعة في مخرج خمسطعش ومقفلة المخرج للسيارات الصغار الا المتهورين طبعا وراعي التاهو المسكين طافي فيه موتره

ألقيت نظرة سريعة يمين ويسار .. وشفت تهريب ..

هذا هو المنفس الوحيد لتجمعات الماء اللي صايرة في المخرج

سمعت الناس يشجعون ومتحمسين .. شوفوا ليش

هلّي معطيهم على جوهم ويقطع المخرج بالريوس خخخخخ

تهيضوا العالم والسيارات الكبار .. فجاء القرار السريع من راعي اللاندكروزر

راعي السطحة كان عند راعي التاهو بيحاول يسحبه أو يسوي شي .. بس بدري عليه لازم سيارة أكبر شوي ..

لقطة للتاهو عن قرب ..

مشيت بروح لآخر المخرج .. ويوقفني واحد شاف معي الكام وقال تكفى انشرني في كل مكان لو تبي بالبلوتوث بس خلني أشتهر قلت سمعاً وطاعة .. وكابتشر

طبعا هو اللي يسار .. وقال خل ناخذ صورة تذكارية مع التاهو خخخخخخخخخ

اشتهر ياعمي

مشيت وقمت آخذ كم صورة على الطاير .. ولفت نظري هالمسيكين ..

مدري وش يسوي أو مدري وش يفكر فيه ؟ وش ينظف ؟!

على الأقل هو يمشي وانت واقف ياتاهو خخخخخخ

التفت وقربت اكثر للمخرج .. واشوف فيه حادث ..

ولقطت وحدة ثانية أكثر تعبير من اللي فوق ..

هنا جت الدورية ونشبت للعالم اللي واقفين بالدائري وانا منهم طبعاً ..

وانا رايح للسيارة وقفوني ذولا يبون الشهرة .. ولهم ذلك بإذن الله

امزح معك

الله يعطيك العافية

مجهود رائع

الصور حلوة بس المصور احلى