السلام عليكم ورحمة الله وبركاته
بيت ابو سعد :
ابو سعد رجال كبير في السن يلبس نظاره .. اذا ضحك سنونه الي قدام ذهب .. ملابسه شتويه لو الدنيا قايله .. يلف راسه بشماغ احمر .. ونعوله زبيريات … سيارته صالون … ابو سعد شايب دمه خفيف وصدره وسيع .. ويحب اهله كثير …
سعد : ولد ابو سعد .. نحيف وطويل وخشمه سلة سيف .. عيونه مكحله .. سكسوكه.. اسمر .. << مايحتاج احط قلوب بتشوفونها فالردود .. يحب اهله كثير ومهتم بدراسة اخوانه ….
نوره : تشبه مرام الكويتيه .. دمها خفيف .. سمينه .. وهذا الشيء الوحيد الي منكد عليها .. امنيتها فالدنيا تلبس مخصر .. شعرها دائما فالته … تحب تسمع عزازي .. فلة شعرها وانتثر كأنه الليل .. هوايتها الجلوس فالمطبخ ..
صويلح : وجهه مدور .. طيب مررره .. دائما يشحن لخوياته ويسحبون عليه … ميزته اهتمامه بدراسته .. واجتهاده فيها .. يحب السباحه …ولعب الكوره …
طبعا ام سعد مايحتاج اعطيكم مواصفاتها .. لأنها راح توضح في تفاصيل القصه …
مع اذان الفجر ومع عبق النسيم يشدو ابو سعد بنشيده اليومي .. وحث اهل بيته على القيام لأداء صلاة الفجر ..
لا اله الا الله اصبحنا واصبح الملك لله .. ياسعد .. ياصويلح .. يانوره .. قوموا صلوا الله يخليكم لي
قوموا ياعيال هداكم الله … .. ام سعد وراتس ماتقومين ماعليتس صلاه .. .. ماتترك سواليفك يبو سعد .. راح شبابي في مقابلك ياعساك فدوه .. ايييييييييه يا ام سعد كبروا العيال وكبرنا معهم …تذكرين اول يوم في عرسنا .. يومتس متنقعه في سدر … الظاهر عهدتس فيه ذاك اليوم .. اياام مافان زينها ياعساي ماخلى … يوم دريت انك خاطبني من ابوي بغيت ارمي نفسي فالبير .. لدرجه هذي شفقه الا والله خوف .. يوم قالوا لي اني ابعرس وانا اطيح بين مواعيني تذكرت فاتن حمامه يوم درت انها حامل ( هنا حامت تسبد ابو سعد من التشبيه وسحب عصاه وراح يصلي ) …
نوير : الله يصبحك بالخير يالغالي .. وراك يابوي جايب فطور معك.. مسوية لك مراهيف وقرص يحبه قلبك … ثواني والسفره جاهزه …
على السفره :
سعد : يبه ودي اكلمك في موضوع واخاف يضايقك انت والوالده ..
ام سعد وابو سعد : خير ياولدي وش فيك ,,
سعد : انتم عارفين ان باقي سنتين واتخرج من كلية الطب .. والحمدلله معدلي ممتاز .. وادارة الجامعه رشحتني اكمل باقي الدراسة في امريكا .. ومنها اكمل تخصصي في جراحة المخ والاعصاب .. تعرفون هناك الطب متطور والاجهزه تخدم الطالب على التميز والابداع …
ام سعد ودمعتها على خدها : ياوليدي اذا قصدك اتعلم على جراحة المخ .. عندك راس ابوك تعلم عليه وهو مو بقايل شيء .. واذا قصدك اجهزه .. ماكثرها الله عندنا .. كل يوم اسمع فالتلفزيون الاجهزه الامنيه تسقط عصابه ارهابيه …. خذ لك حداها ومحدن قايل لك شيء دامك تدرس …
(بو سعد قفلت معه وطلع من الموضوع … يقول صعب اكمل معها لنهاية القصه دام هذي اول جملة حوار لها ..)
ابو سعد : شوف ياسعد ياولدي .. اذا استخرت الله توكل عليه .. ونا ياولدي ماعندي الا راتب التقاعد يفداء رجولك ..
ام سعد وهي تبكي : ماعندك رحمه .. ماتخاف الله في ولدك .. تبيه يروح هناك .. ومنت معطيه الا راتب التقاعد .. وش بيسوي له هناك .. ولا قيمة التنقيط .. ( ام سعد خلطت بين الي يروح سوريا ويروح امريكا ) .. دبر عمرك يبو سعد ولاتترك ولدنا لو تبيع سنونك الذهب وان ماجابت شيء خذ لك سلف من البنك .. وقول لهم لارجع ولدنا بالسلامه بيسددكم على الجزمه …
ابو سعد : جبتيها يا ام سعد … خلاص بتوكل على الله ومرهم الصبح اّخذ الدراهم …
سعد بعد جهد لقى له فرصه يتكلم : يابوي يا امي الله يخليكم لي الدراسه على حساب الجامعه .. ما احتاج منكم ولا شيء غير الدعاء بالتوفيق ..
صويلح : خلاص ياسعد توكل على الله .. ونا بحاول ارسب فالانقليزي عشان اجيك اتعلم .. بس حاول تتأخر هناك .. ولاوصيك بالكتب الشقر .. تراها دسمه علميا ً .. ومريحه فالنظر خطها واضح ..
نوير وهي جايه من المطبخ : كأني سمعت امريكا وش الطاري …
ام سعد : شيلي الصحون يانوره ولايكثر ….
في بيت ابو ناصر :
عائلة ابو ناصر غنيه مادياً .. بيتهم على اربع شوارع .. مساحة بيتهم 3000متر مربع .. عدد عيالهم 7 اربع بنات وثلاث عيال … طبعا مايتقابلون الا بالصدفه عند باب البيت .. ويادوب يتذكرون اسامي بعض .. التواصل بينهم مسن وبيبي بلاك بيري …
ابوهم وجهه ابيض وله شنب وسكسوكه ويشبه ابو عبداللطيف في هوامير الصحراء … يلبس غتره بيضاء .. دائماً فالمغرب .. عشان يعقد الصفقات والسهرات …
ام ناصر : مافيه مكان فالعالم الا جاته .. تحب السفر والسوق .. وجمعات الاستراحه والمطاعم والكافيهات .. وعمرها 50 سنه … تهتم في لبسها كثير وابو ناصر لاهي فالمغرب …
مهتمه بالماركات والموضه بشكل خيالي .. ماتدري عن حياتها الزوجيه الا اسامي عيالها ..
نوف بنتها الكبيره مدمنة نت بشكل خيالي لدرجة اذا انفصل النت تروح تشم المودم من الادمان
وطبعا نوف لاشغل ولا مشغله .. والي تبيها يوصلها برسم الخدمه عن طريق الخدم …
سهام البنت الثانية من عائلة ابو ناصر .. شييييييييييينه ومن النوع الي ماخذ مقلب في نفسه .. تدرس فالجامعه .. وتصرف على خوياتها الي يمدحونها بس .. اعداءها كثير .. وخشمها كبير .. وحلمها كبير .. طموحها يخطبها سعود الدوسري .. ولا اسامه العشماوي .. ومادرت ان مستقبلها ينتظره طرش بحر … راعية مغازل ورضاعه اخر الليل …
نجوى البنت المدللـه للعائله دوبها متخرجه من ثالث 3 ثانوي من مدارس المملكه … بعد معاهد ومدرسات خصوصي تخرجت بنسبة 84 ادبي …
بدى يتغير سلوك نجوى للأسوأ .. صارت راعية سهرات مع صديقات .. وبويات .. وفيه فودكا واستلجاج على بعض … وعلى الصبح ترجع للبيت تطلع غرفتها ….
جابت لها زميلتها الي بتسافر برى المملكه قطوه عشان تهتم فيها … القطوه راعية حركه واجد اخر الليل ماغير تدحوس تدور شي تاكله او تلحسه من الجوع ….. الخدامه انتبهت للقطوه وعلمت السواق سونار .. وعلى طول اقرب بيطري .. بعد مافحصوها طلعت القطوه ماكله حبة كبتاجون كانت طايحه في غرفة نجوى …
سونار اخذته الشهامه ,, وهو من اصل حبشي … وقرر انه يعلم نجوى بالي صاير وانه بيعلم ابوها..
نجوى جوها عالي .. وعرفت لو درى ابوها عن فعايلها بيسوي لها زحمه كأي اب سعودي ماعنده حكمة التصرف .. وعرفت ان خيارات ابوها معقده يا اما بيمنعها من المصروف او بيمنعها من البيت وفي كل الحالتين خسرانه …
بعد تفكير طويل .. ونظرات سونار الحبشي الحاده .. قررت ابتزازه .. اااسف هو الي ابتزها …
قال لها يا اما اعلم ابوك او تزودين راتبي 300 << ابو ابتزازك يالخال …
عيال ابو ناصر وقفوا في وجهي وقالوا يكفي .. صدقنا كل الي صار مالنا علاقه فيه .. حياتنا مجرد دوامه رمتنا على الشاطئ الي انت تشوفنا فيه الحين .. اب وام كأنهم منفصلين .. محد يدري عنا .. اتصالاتنا باقاربنا مقطوعه بناء على رغبة امي …
بعد سنتين :
سعد جاي من السفر ومعه شهادة الدكتوراه في المخ والاعصاب … وشايل هدايا لابوه وامه وماعلمهم انه بيجي عشان تكون مفاجئه لهم … لكن المفاجئه انه وهو جاي من السفر صادف وفاة امه وابوه في غرق سيل وادي الرمه … الي فارقوا الحياه في نفس اليوم الي جاء فيه …
بعد ماهملت عيون سعد بالدموع الي ساوت سيل وادي الرمه من الحزن ,,, راح يزورهم بالمقبره وكانوا جنب بعض … مثل حياتهم كل يوم .. تنهد سعد وقال هالقصيده :
ياموت ليتني انا لهم موت **** من عقب فرقاهم عيني حزينه
فارقت انا عالي الصوت **** الي له في كل مسجد رنينه
وجلال امي على الارض منحوت **** كأنه عابد ينشد خليله
————————————————
في مجتمعنا بشكل عام .. يكون فيه ناس معينه من المجتمع عندها اساليب النجاح فالحياه مع ذلك تفشل .. مثال .. واحد من الشباب ماشاء الله عليه تخرج من الثانوي اشترى له ابوه لكزس عشان يدخل الجامعه … جلس فالجامعه 7 سنوات وهو من قسم في قسم .. لدرجة اعضاء هيئة التدريس يحسبونه زميل لهم من كثر مايشوفونه .. طبعا خوينا هذا ماناقصه شيء بالعكس حتى الاستراحه يأثثها بدون ماندري من باب انها مفاجأه << اهم شيء … واذا الشباب عاقت معهم بعض الامور مايطلبون الا هو لانهم يدرون ماعنده الا تـــم …. لكن مع ذلك الرجل في انجازاته الشخصيه فاشل .. مو راعي مسؤوليه .. اهم شيء الوناسه .. الزواج اخر شيء يفكر فيه .. الوظيفه ماهيب هامته يقول متى ماطفش مني ابوي بيوظفني بطريقته …
واحد ثاني اعرفه شخصيا .. كان يجي من منفوحه للجامعه .. مره يلقى له احد بالطريق ومره يذب وجهه على الي بالطريق .. تكاسي الرياض كلها تعرفه … ساكن في غرفة هو ومعه اربعه شباب … عشان يساعدونه في اجارها 800 ريال شهريا ..
مع ذلك الوقت ممتاز جدا ومعدله عالي .. طبعا تخرج وتوظف في المستشفى العسكري براتب لايقل عن 10 الاف ريال …
الي ابي اوصل له .. هل معناه اذا معي فلوس خلاص ماني في حاجة بناء مستقبل …
انا عندي مبدأ في حياتي .. الي مايكون مثابر ومجتهد في دراسته ماراح يكون راعي مسؤولية في زواجه ..
لأن هذا شيء مبني على اخر …
نفس الشي لو ناخذها على مستوى اكبر .. دولتنا الحبيبة تمتلك منشات نفطية كبيره .. فاذا ما استفاد منها في انجازات البنية التحتية من صحة وتعليم وتوظيف ومشروعات عمرانية … متى راح نستغل هالامكانات في النجاح …
عندي بعض النقاط ودي نتناقش فيها ..
1- متى تكون ناجح ؟
2- هل فكرت بعد 10 سنوات وش بتكون ؟
3- هل مريت بنوعية من عائلة ابو ناصر ؟ خصوصا البنات منهم ؟
4- وش رايكم في ام سعد
| 1- متى تكون ناجح ؟ |
اذا حققت احلامكـ وطموحاتكـ
| 2- هل فكرت بعد 10 سنوات وش بتكون ؟ |
اكيد و إن شاء الله يتحقق حلمي
| 3- هل مريت بنوعية من عائلة ابو ناصر ؟ خصوصا البنات منهم ؟ |
لا الحمدلله لكن اتوقع فيهـ منهم بس بنسب قليله
| 4- وش رايكم في ام سعد |
وهـ ياحبيلها تجنن .. الله يرحمها
بليز ياليت تكمل الروايه اخوي
انت الكاتب ؟
تحياتي