روايتي الاولى :من أشوفك تقلب الدنيا فهاوة وأنهبل ويضيع الثقل 2024.

بسم الله الرحمن الرحيم
السلام عليكم ورحمة الله

حبايبي كل الغراميين وكل من يمر بمنتدى غرام وعلى اعتاب عالم الروايات …حبيت انقل لكم روايتي الاولى بقلمي انا موناري ويشرفني اني احط سطورها بين ايديكم اتمنى انكم تستمتعون فيها وتتحمسون معها وكل الشكر لأشخاص ساعدوني ودعموني من البدايه الله لايحرمني منهم يارب اكييد فضل كبير على راسي بعد فضل الله سبحانه وتعالى علي"الحمدلله"…طلب خاص مني انكم ماتحرموني من رايكم عن الروايه بكل مصداقيه ووضوح لاتنسون كل كلمة تكتبونها هي بمثابة تقييم للروايه من حيث الصيغه والكتابه وتجسيد خيالي المتواضع ورجاء خاص محد ينقلها غير باسمي "موناري" ماني مطوله عليكم اكثر من كذا… وبسم الله نبدأ الروايه

الجزء "1"

اشتاقك

ايتها الساكنة على ضفاف القلب والروح

عند بوابة حبنا المميزة

فتح المحبون دفاتر عشقهم وطووها

وغدت اثرا من بعد عين

وطُويت في صفحات النسيان

وبقيت انت وحدك

أحـــــلى دفــــــــاتر حبي المدهشــة

في حديقة الفلا الفخمه كانت ليلة بارده واجواءها تنذر بهطول المطر على مدينة الرياض 4ونص الفجر حاولت تنام عقب رجوعهم من صالة العرس لكنها عيت تنام,,, كيف بتنام وهي تفكر فيه؟؟! كيف تهدء افكارها وهي تمووت على شوفته؟؟! متى ياترى رح يحس بحبها ويبادلها نفس الشعور؟؟!
صوت من وراها نادى باسمها والتفتت بلهفه وهي تشوفه واقف قدامها بقميصه المفتوح وكل عضلات صدره القوية بارزه قدامها,,, اقترب منها بابتسامته الساحره وهمس قريب من اذنها "أحبك"
كانت متنحه وهي تسمع يقول كلمته بكل حب,,, ارتفعت بوجهها لوجهه لانها كانت اقصر منه والتقت عيونهم ببعض,,, كانت قدامه مثل اللعبه وملامحها البريئه تفجرت مع كلمته,,, ردت هي بنفس الهمس,,,
جود: وأنا كمان احبك
شارو ابتسم: ليتني دريت عن حبك من زمان,,, من اليوم رح نعيش مع بعض ومافي شي بيفرقنا ياجود
كان تاثير اسمها على لسانه واضح لدرجة انها ضمته ودمعت عينها,,, رفع وجهها بهدوء شارو: ليه الدموع ياجودي؟؟!
جود: كنت مستنيه اللحظه هاذي من زماان,,, احساسي يقولي بيجي اليوم اللي تعرف فيه ان حبي لك أكبر حب بالعالم…
شارو: مااحب اشوفك تبكين… وهو يمسح دموعها بطرف اصابعه
هالحركه خلتها ترجع ترفع راسها لعيونه وتلصق ذقنها بصدره العاري وفرحة الدنيا مو سايعتها… ارتعشت مع قطرات مطر بارده تسقط على وجهها غمضت عيونها واستسلمت … الجو رومانسي وشاروخان قدامي اعترف لي بحبه .. واخيرا!!!
لكن توقفت قطرات المطر عن السقوط…
""وفجأه""
صحت مفزوعه وهي تشهق شهقه شفطت فيها كل الاكسجين في الغرفه
جود وانفاسها رايحه: مويه مويه … مويه
وبدت تكح بألم … تبغى تستوعب وينها فيه بالضبط
سمعت ضحكه مو غريبه عليها ملت الغرفه

صرخت بكل مافيها: يــالــــحــــقــــــــيـــر.. يالنــذل.. تعــــال وربي مااخليك تفلت مني يالغبــــي
طلع طلال يركض من غرفتها وهو ميت ضحك من منظرها…
استوعبت من جديد موقعها الاعرابي هاللحظه… كانت واقفه عالسرير من اثار الفزعه ووجهها وبجامتها متسبحين بمويه باردة … حركه نذله من اخوها طلال كالعادة اللي يحب يحارشها ويطلع قرونها بس هالمرة زود العيار حبتين..
جود وللحين انفاسها متسارعه ورعشة جسمها من المويه البارده,,, عاد هالساعه طلع فرعونها يتفاهم معها بكم كلمة خلتها تنزل وراء طلال ركض.. ذابحته ذابحته لايعوقها بشر… نزل يركض وهي وراه بس كان اسرع منها وطلع من باب الفله بكبره للشارع يضحك بطريقه هستيريه من منظرها المبهذل,,, يقسم انها مارح تعديها له هالحركه وبتردها باقوى ماعندها لو بعد 1000 سنه ببساطه اللي سواه فيها مو شوي وفوق كل ذا هي جود اللي ماتسكت عن حقها لأحد.. صار يضحك بطريقه هستيريه وهو يتخيل شكلها المعصب عليه…

جود ادركت انها مارح تلحق عليه كتمت كل كلمة سب وشتم في صدرها وغضبها للحين ماهدء رجعت للفلا وعيونها تلمع بالشر ونيران تشتعل داخل جوفها ,.. ماكانت زعلانه على مقلبه فيها وتخريعته لها قد ماكانت مقهورة انه قطعها احلى حلم بحياتها كلها,.. تتوعد في قرار نفسها"هييــن طلول يالزفت والله لأوريك",.. دخلت وكانت ناويه تطلع وتبدل ملابسها وتستعد للجامعة لكن استوقفها نداء ابوها لها من طاولة الطعام,.. التفتت تشوف ابوها وامها واختها العنود يفطرون وهم مستغربين من صراخها قبل شوي وشكلها المبهذل,.. توجهت لهم بكل هدوء,..
جود: صباح الخير بابا "حبت راسه"
صباح الخير ماما "وحبت راسها"
:
:

#(هاذي اول عائلة تصادفنا وهي عائلة ابو سعود
افراد هذه العائلة هم عبد الرحمن الاب "ابو سعود" مثال عن الاب الحنون والمحب لزوجته وعياله مايفرق بينهم وكلهم عنده سواء,
الجوهرة زوجته "أم سعود" امراءة راقيه بتعاملها وكلامها مع الكل , تموت بعيالها واكثرهم طلال اخر العنقود وتحب زوجها وتغار عليه موووت , متزوجه عبد الرحمن من سنين وكان ثمرة هالزواج عيالهم الاربعه:
– سعود 27 سنه:… الكلمه الوحيدة اللي ممكن توصفه هي "عاشق سندس منذ الصغر"
وله دوور كبير في الرواية وبخليكم تتعرفون على شخصيته وشخصية كل فرد من روايتي بنفسكم
– العنود 22 سنه: بنت هادية ومسالمه من نوع اخر … بتعرفون وش اقصد ^ـــ*
– جود 21 سنه: مرجوجة العائلة , مغامراتها حد الجنون وعليها هبال ورجه بدونها ماتكمل الرواية , طولها مسببلها مشكله يعني اللي يشوفها مايفكر انها بسن 21 وبالجامعه ابد ممكن يفكرون انها بالتوجيهي لكن جامعه مستحييييل , عربجيه وبعيدة كل البعد عن النعومه والرومنسيه…… ركزوا عليها زين هالجود مغناطسي الفشايل والمواقف المحرجة ومركز تحطيم الجبهات بجدارة… وهي وجدّها وجدّتها حكاية لاتنتهي……..
– طلال 19 سنه: اخر العنقود يوووووه ماتنتهي كلماتي عنه بس باختصار فلّة.. دشرة.. مقالب.. مجنن اللي حوله.. مغازلجي.. حائز على المرتبة الثانية بالترقيم.. بالشكل نسخه طبق الاصل عن اخته جود.. يعني كلمة وسيم قليل فيه.. طيب القلب.. راعي فزعات في كل شي.. غيـــّور.. يعتبر من أهم مفاتيح بنك العائلة"الجد+ الجدة"….. ^ــــ^
وهاذي اول عائلة والباقي جايين بوقتهم)#
:
:

أبوسعود: صباح النور,.. يا بابا وش فيه شكلك مبهذل كذا؟؟ وصوتك واصل لين اخر الشارع؟؟ خير وش صاير ؟؟؟!!
جود بتفاعل: هذا ولدك التبن طلــوول,.. مخرعني من نومتي بابا, وهو اللي بهذلني كذا
أبوسعود: هههههههههه هالولد مايجوز عن مقالبه!! وهو وينه الحين؟
جود بحنق: روحه بلا رده ان شاء الله , هالغبي فحّط ومالحقت عليه
العنود كاتمه الضحكه على شكل اختها بالحيييل,..
وقالت:زين منه صحاكي وسبحك بنفس الوقت علشان لاتتأخرين كالعادة
خزتها جود بنظرة ناريه تقول فيها "أنــطــمــي احسن لك"
أم سعود: لاحول ولاقوة الا بالله , متى تكبرون وتتركون عنكم المبزرة انتي وياه؟! اعنبو داركم واحد في الثانوية يوصل طولي والثانية بالجامعة وللحين على شطانتكم؟؟!!! بالله قولي لي متى تعقلون هاه؟!!!!!؟؟؟؟
جود وفيها الصيحه: مــــامــــــــا ! وليه تحاسبيني انا على حركاته الغبية معي؟ وشدخلني انا بالله وشدخلني؟؟ هذا بدال ماتحاسبينه وتعصرين اذنه الكبيره هاذي ؛ علشان يتأدب ومايعيدها جايه تهاوشيني انا ؟؟! ليه كذا ماما ليه؟؟
أبوسعود: انتي وياه الله يصلحكم بس,.. محد فيكم بريء كل واحد وشطانته تجري بدمه, مااقول الا الله يهديكم بس
جود تمسكت بذراع ابوها وعنود تضحك عيها من قلب
جود وهي تتمسكن: بابا حبيبي الله يخليك انصرني انصر المظلوم,.. يابعد كل الدنيا انت
أبوسعود ابتسم وهو فاهم عيلها: طيب وش المطلوب؟؟!!
جود: ابيك تعاقبه على سواته الشينه فيني,,..
احرمه من المصروف,,..
احبسه بالبيت,,..
اطرده من البيت,,..
سوي فيه اللي تبي, اللي تبي اهم شي تاخذ حقي منه هالغبي
أبوسعود قام من السفره بعد مخلص فطوره وهو يضحك على شكل بنته المرجوجه يخليك تستانس باسلوبها
قال: بكيفك انتي واخوك تفاهموا طلعوني انا برع الموضوع
وقام عنهم وهو يبتسم على خبال بنته
جود وعيونها طايرة من ردة فعل ابوها وراحت تلحقه وتتمسكن وتمثل البراءة لعلها تلين قلبه عليها وينفذ اللي في بالها

أم سعود: لا بالله ماهيب صاحيه هالبنت,.. اجل تبي ابوك يطرده من البيت؟
العنود ضحكت بنعومه: هههههههههه شدعوه يمه صدقتيها هي بس من حرتها تقول هالكلام والا صدقيني تراها تحب طلول اكثر واحد فينا,.. ههههههههههه
أم سعود: زين منه صحاها علشان تروح جامعتها بدري ,.. مايصير كل يوم تروح متأخره وعلى مزاجها … بجد ملعوزتني معها
العنود قامت من الطاولة مبتسمه: ان شاء الله بيتصلح حالها يمه لاتحاتين
أم سعود: ان شاء الله
وسلمت على امها وكانت بتطلع بس انفتح الباب ودخل بهدوء وهو يتسحب
طلال بهمس خافت: وينها أم كشه؟؟!
العنود: انت ماتتوب من مقالبك السخيفه؟ صدقني لو تشوفك الحين بتسلخ جلدك …
طلال: هههههههههههههه وربي لو تشوفين شكلها كيف كان,,.. ههههههههههههههههههههههههههههههههه للحين متحسف اني ماصورتها
العنود: طليّــل اقلب وجهك من هنا قبل تقوم قيامتك,,.. اشهد انها مسطّرتك اليوم, وبعدين تعال ليه مارحت مدرستك للحين؟!! ناوي تتخلل هالسنه بعد؟
طلال: مالي خلق اليوم للامتحان,.. ماقلتي وينها الساحرة؟؟!!!!
العنود: امتحان؟؟… عندك امتحان وانت مقضيها سوالف ومقالب من الصبح؟!
العنود: بالله قولي كيف بتنجح مع وجهك هذا… "راحت لعنده وسوت حركتها اللي يكرهها"
طلال: آآآآآآآآي عنودووه فكيني يالسخيفه , بس خلاص قطعتي اذني "وفكته"
طلال: حشا مو ايد الا تقول عصارة " وانحاش بعيد وهو يضحك قبل تمسكه"
عنود: انا سخيفة؟؟؟ "وتحولت عيونها تلقائيا للي واقفه وراء طلال وابتسمت بوجه اخوها بمكر,..
عنود: زين شوف مين يفكك الحين
طلال مستغرب من ابتسامتها الخبيثة: بسم الله وش فيك؟ ليه تناظريني كذا؟
وكأنه قرأ اللي في عيون اخته وفهم… بهاللحظه مرت جود من جنبه بكل هدوء خلته ينقز فزعان من ظهورها المفاجئ… "ياويله"… مامداه يفكر بالهروب الا واستغرب هدوءها بذا الموقف, بعد اللي سواه فيها قليل لو نتفته وهي شرسه لكنها توجهت لطاولة الطعام بهدوء… وش ناويه عليه هالمرة؟؟

طاآارت عيون العنود وهي تشوف اختها ولاكأنها اللي تصارخ قبل شوي, استغربت وتبادلت النظرات مع طلال اللي هو كمان مو مصدق ردة فعلها,..
العنود تكسر الصمت المهيب بالصالة وبابتسامه: يلا جودي استناكي لاتتأخرين زي كل مره السواق من ساعة مستنينا
جود: ……….. "ساكته"
العنود: منتي مداومة اليوم كمان؟
جود بدون ماتطالعها حركت فمها على جنب بانت غميزتها واختفت تقول "لا"
العنود: …… عاد بكيفك, يلا مع السلامة سســي يــأ قايز
طلعت للسيارة بعد ماعدلت شيلتها واللثمه واخذت شنطنتها الكلاسيكيه الكبيره على كتف وباليد الثانية مذكرتها وكتاب ادب انجليزي
العنود: يلا حرك كومار,اوووف حدي متأخرة
كومار ويهز راسه: زين ماما

,,… داخل البيت…,,,
طلال بمرح: أقول جود زين انك مابتداومين اليوم.. وانا بعد, البارح حيلي انهد مع العيال تدرين عاد اخو المعرس وضروري ابيض الوجه "وبابتسامة عبيطة شاقة وجهه" : هاه تلعبين بلاي ستيشن؟!
وقفت جود اكلها وناظرته بكل برود وكأنها تقول "من انت؟" قامت وطلعت الدرج بسرعة
أم سعود جاية للطاوله مع الخدامه تلم باقي الاكل: وش فيها اختك مبوزه؟ للحين ماجهزت؟؟!
طلال: تقول ماهيب مداومة اليوم
أم سعود: وشوو؟ مو على كيفها.. لها اسبوع كامل ماتروح وعذرناها بتجهيزات العرس, بس الحين وش عذرها؟؟!
طلال: مدري يمه بنتك وتفاهمي معها
ام سعود: لا حول ولاقوة الا بالله.. الله يصبرني عليكم بس..
طلال وهو يقرب من امه ويبوسها بخدها كالعاده وكأنه بزر وماكبر وصار 19
طلال: افاا يأم سعود لاتزعلين نفسك ولاشي , الحين اسحبها لك من كشتها للجامعة لو تبين,,…
أم سعود: لاتسحبها ولاتهبب انت خليك في حالك وماعليك انا بتفاهم معها
طلال: هههههههه اشك انها في موود احد يتفاهم معها الحين, اقول يمه خليها لبعدين
ابتسمت ام سعود وهزت راسها لولدها

,,,…بعد ساعة في غرفتها ..,,,

كانت معصبة من مقلب اخوها السخيف لكنها تناست بسرعة واجلت فكرة الانتقام لين الوقت المناسب… طار النوم من عيونها كيف بيعدي علها هاليوم الطويل؟! , اخذت شاور تصحصح ولبست بجامتها البيتية برمودا بنطلونها احمر عليه قلوب بيضاء وبلوزه كت بيضاء برسمة ميكي ماوس على الصدر .. ناظرت شكلها بالمراية واطراف شعرها المبلل تلامس كتوفها معطيها براءه خيالية عكس العربجه والدفاشه اللي متصورها الكل عنها,,.. رن جوالها
جود: هلا وغلا
نورا: ياهلا بهالصوت عاش من سمع صوتك
جود: تسلمين ياقلبي شخبارك؟
نورا: بخير الله يسلمك… ليه منتي مداومه اليوم كمان؟
جود: لاتساليني
نورا: صايرة وايد تتغيبين , مولمصلحتك
جود: اووووف والله مالي خلق شي اليوم
نورا: باين.. انا قاعدة اسالك ليه؟ وش صاير؟!!
جود: مو شي مهم بعدين اقولك
نورا: طيب لين متى على هالحال تراني مليت بالحالي… تدرين مااستغني, يومي مايكمل بدونك
جود: هههههههههه شدعوه اندومي انا؟؟؟!!
نورا: هههههههههههههههههههههههههههههههه ههههههههه هههههههههه
ياحبي لك يأحلى اندومي بحياتي
جود: عن العيارة انتي ووجهك, الا تعالي مو المفروض الحين بالمحاضرة؟ خبري فيك دافورة ماتتأخرين ثانية وحده
نورا: قل اعوذ برب الفلق , تصكيني عين هذا وانا رفيقتك؟
جود: الا بجد ليه منتي بالمحاظرة
نورا: لان موظي غايبه اليوم اعتذرت عن المحاضره وعندي وقت قلت اتطمن
حود وعيونها مبققه: موظي غايبة ؟ مااصدق.. وش صاير!! خبري فيها ماتغيب ابد
نورا تشهق: ماتدرين شصار؟؟؟؟
جود وحدها متحمسه: لا والله مدري ليه وشصار؟؟!
وكملو سوالف وخذلك على اخبار زي كل مره مايتعبون……

خلص البارت الاول اتمنى يعجبكم
ودّي لكل قارئ ^ــــ^

رنــيم كانت واقفة مع روان منتظرين السائق وطبعا معهم باقي الشلة …
والسوالف ما تخلص حتى بــ آخر الدوام,,..

رهف: بنات تتخيلون وش يسوون الحين؟؟؟؟ "خزتها روان بعيونها"
رهف: شدعوة مخكم يروح بعيد, اقصد شهر عسل بباريس تتخيلون هما الحين عند برج ايفل
ريم: ووآآآآآي والله احسه رومنسي
رنيم: عقبالكم يالمخفات, مع اني اشك هـــــع
ريم ضربتها: ووجــــع , توفّي من بؤك يا بعيده
رنـــيم صرخت : ريموووه يالسفاحة خفي ايدك شوي ترى يوجع ياحمارة
رهف بدلع: ههههههههه تستاهلين انتي اللي بديتي,..
روان: اووووف وهذا بعد تأخر , وقسم مو وقته
رنــيم والانبير ضاارب: خل يجي هالغبي وانا اعلمه شغله,.
""ههه متوعده فيه لان مو اول مرة يسويها فيهم""

بهالوقت مروا من جنبهم شلة بنات ياشرون بأيدهم "مع السلامه" ابتسموا مجامله لانهم هالاربع (رنيــم+روان+رهف+ريم)
لهم شهرة كبيرة بالمدرسه , مو مخليين احد بحاله,..

رهف: الا صحيح روان , هم ما جاو يودعونكم قبل السفر؟؟
رنيــم +روان يناظرون بعض بمحاولة استيعاب السؤال وفجاءة وكانهم تذكروا شي : ههههههههههههههههههههه هههههههههههههههههه
هههههههههههههههههههههه ههههههههههههههه هههههههههههههههه

ريم بحاجب مرفوع: وش اللي يضحك؟
رنــيم +روان غرقوا بهستيريا ضحك
وتصفيق ……
وتدعيس ……..
ماقدروا يوقفون …

رهف : ابي افهم … قايله نكته انا؟
ريـــم : مدري عنهم… لا بالله شكلهم استخفوا
رهف تصارخ : هاااي انتم وش فيكم علقتوا ومافكيتوا !!!!!
رنـــــــيم وهي تاخذ نفس عمييق وتطالع في رهف بعيون مدمعه من كثر الضحك,..
رنيـــم: الله يخس ابليسك يارهيّــف ذكرتيني وانا ناسيه هههههههههه

روان تحاول توقف ضحك وتقولهم السالفه,,,…
روان: هذا سلمك الله سعود حالف يمين ثلاثة انه من يطلع من قاعة العرس
مايرجع البيت الا بعد مايخلص شهر العسل… "تسبل حواجبها" ناوي على سندس شكله هههههه
ريم باستخفاف : عابالي عندكم سالفه
رنيـــم: انتي ماتدرين وش كثر انتظر ذيك الليلة.. وخصوصا انها مع سندس
رهف مستغربة: ليه كان منشن عليها من زمان؟؟!
روان: ايه هو يحبها من زمان وهي تموت بترابه,,…
رهف بحالميه: وووه بس وووه, ياحليلهم… الله يطعمنا من عنده .
كلهم بصوت واحد ورجاء من الخاطر : آآآآمــــــــيـــــــــن
ريم: ايه كملي متحمسة اعرف قصتهم
رنـــيم: والله كان ودي اكمل لكن مارح يمدي.. ترى السواق وصل, يلا روان

سلموا على بعض وركبوا السيارة وانطلقوا للبيت,, وطول الطريق ورنيم تفكر بحال اخوها عامر مع أسيل,,… "الله يسامحك ياجدي … ليه سويت كذا ؟ مااقول الا الله يعينك يااخوي انت واسيل" وتناست موضوع السواق تماما لان اللي شاغل بالها كان اكبر وأهم ,,..