الرجولة يا عزيز الروح ما هي بثوب و شماغ الرجولة إنك تقول أحبك وأنت تعنيها / بقلمي 2024.

طــــــــــــق … طـــــــــــــق .. طـــــــــــــــــق ..
أمل : و الله صاحية .. جاية .. دقايق بس و نازلة ..
منيرة : هههه صدقتك لا تحلفين ..الحقي على أبوك و أخذي مصروف اليوم قبل ما يطلع تراني مفلسة هههه .
و تفتح امل الباب بقوة و فجأة …
أمل : قولي و الله بيمشي ألحين ؟!!
منيرة : هههه بشويش أكلتيني الناس يصبحون بالأول و بعدين أبوك قاعد يقرأ الجريدة و ماخذ راحته ع الآخر.
و مشوا مع بعض علشان ينزلون يفطرون و اسمعوا صوت في الممر.. طلع صوب مضارب سعد و عبدالله ع باب الحمام و دور من اللي يدخل أول..
منيرة : يالله صباح خير أحد يتضارب هالحزة؟!!
سعد : أنا الكبير لازم يسمع كلمتي.
عبدالله: و أنا الصغير ولازم يعطف علي و يقدمني قبل .
أمل : و الله ما خارب عقولكم إلا تركي اللي يسمونه أخوكم الكبير هذا هو كلما بيفكم عن بعض يقص عليكم بهالجملتين ..
و يطب عليهم تركي فجأة (كاشخ حده):: سمعت أسمي وش عندكم؟!! احد يحش فيني اكيــــد.
عبدالله: و الله مو انا ما جبت طاريك أصلاً هاذي أمول .
و شرد عبدالله لغرفته و الكل يضحك على حركته السريعة..
منيرة : أنا مدري وش مسوي لهالبزر يخاف منك و يسمع كلمتك و ما يثنيها ابدههههه.
أمل : أنا اقولك بسيطة ..بالرشاوي كل شي يصير و عبادي أكبر مرتشي بهالبيت ههههه .. و شوفي عاد هالمرة بشنو راشيه ..
تركي : ههههه اللي يسمعك يقول فلوسي مالية بنوك الراجحي كلها 10 ريال و هو عاد مسكين قنوع ياخذ اللي تعطيه اياه هههههه.

أما سعد من زمااااااااان دخل الحمام مستغل فرصة خوف عبدالله و هروبه .
نزلت منيرة و عيال اخوها أمل و تركي و باسوا راس أبوهم (ابو تركي) و صبحوا عليه و نزلوا على راس امهم (ام تركي ) و صبحوا عليها ..
أبو تركي : صبحكم الله بالنور و السرور يا عيالي 
أم تركي: يلا يمة تعالوا افطروا .
تركي : أمل بسرعة ترى الباص ما راح ينتظر سموك .افطري بسرعة وراك مشوار يلا توصلين المحطة
أمل : و لا تنسى بنمر سارة بعد ..
غلبت الابتسامة ملامح تركي كأنه قال اللي قاله علشان يسمع اسم سارة 
أم تركي : منيرة و اللي يسلمك يمة قومي روحي شوفي هالبزارين ما نزلوا الى الحين ..!!
منيرة : من عيوني يا ام تركي.
راحت امل لعند راس امها و قال لها بأذنها بصوت مررررة واطي : يمة قلتين لابوي عن المصروف ؟!!
ام تركي: يووه ذكرتيني ذكرك الله بالشهادة .. الحين اقول له. و التفتت تنادي ابو تركي
ام تركي :: ابو تركي
ابو تركي: سمي
ام تركي : سم الله عدوك .. بس أمل تبي المصروف حق الجامعة
ابو تركي :: يووه و ليه هي ما تتكلم و تقول و إلا تستحي ؟!! احد يستحي من ابوه يا بنيتي؟!!
و هو يناظر أمل : يا بنتي مرة ثانية تعالي و قولي لي انتي .
أمل و هي تهز راسها من الخجل :طيب يبه ابشر
قاطعهم صوت تركي :: يبه يبه لا تعطيها أنا اعطيها و لا يهمها كل شي و لا أمول .
رد عليه : عندك اللي يكفيك؟
رد تركي:ايه الحمدلله و أنا وش عندي يعني عزابي ما اصرف كثير..
منيرة : الله ينولك اللي في بالك و تتزوج وحدة تحبك و تحبها.. << و هي كاتمة ضحكتها و تركي يناظرها بنظرة تهديد
و انزلوا عبدالله و سعد و هم يتضاربون كالعادة شافوا تركي و ابوهم و سكتوا ..!!!
ابو تركي : يلا يبه سعد بسرعة ما يمدي خذ اخوك و تعالوا انا في السيارة انتظركم.
سعد و عبدالله :إن شاء الله يبه جايين
تركي و هم يلم اغراضه جواله و مفاتيحه و نظاراته و هو يناظر امل : يلا قومي وش تنتظرين ؟!!ورانا مشوار للمحطة و قبلها بنت عمك بعد !!
أمل شالت شنطتها و لحقت أخوها و هي تقول ::يلا يمة مع السلامة
و بعدها كلهم مشوا و سلموا على امهم و عمتهم منيرة و بقوا ام تركي و منيرة بروحهم في البيت ..ام تركي تدعي لعيالها بالتوفيق و منيرة تلم مواعين الفطور ..
……………………………

بيت أبو تركي::
ابو تركي: فهد موظف بأحدى الشركات المعروفة حاله على قده يعني عايش و الحال مستور  شخصيته قوية و كلمته ما تنزل الأرض في بيته. بس حنون على عياله و خصوصاً عبدالله أصغر عياله .
ام تركي : اسماء ربة بيت متزوجة من ابو تركي صار لها اكثر 26 سنة حنونة كثير ربت عيالها و اخت زوجها (منيرة) مع عيالها و ما فرقت بينها و بين بنتها (امل).
منيرة: أخت فهد عمرها 28 سنة الى الحين ما تزوجت<<لها قصة بنعرفها بعدين.تحب عيال اخوها كثير خصوصاً امل دايما مع بعض و تاخذ بالها على سعد و عبدالله و تعاملهم كأنهم عيالها.أما شكلها فهي طولها حلو و جسمها نحيف بزيادة اشوي.ملامحها حادة بس جميلة بشرتها بيضاء.
تركي: الولد الكبير عمره 26طيب وعلاقته كثير قوية مع اخوانه الصغار يحترمونه مررة .موظف في ارامكو الدمام .طويل و جسمه رياضي و ملامحه عذاااب .أبيض و ستايل لحيته و شنبه (ديرتي)دايماً… نادراً ما يغير ستايله.وقته يقضيه في شغله و باقي يومه مع اخو دربه و صديقه و لد عمه عادل.
أمل:البنت الوحيدة لأبو تركي .عمرها 21 تدرس تربية خاصة (احتياجات خاصة) ..علاقتها طيبة مع امها و عمتها منيرة و مع ابوها فهي تستحي منه كثير و تحترمه مرررة لدرجة انها نادراً ما تتكلم قدامه.اخوانها الصغار يحبونها مررة . طويلة اشوي و رشيقة يعني جسمها حلو و ملامحها ما شاء الله جميلة مرررة بيضاء و عيونها واسعين و خشمها سل السيف و شفايفها فيهم لون وردي طبيـــــــعي و شعرها اسود خيااااال طويل و ناعم مرررة.صديقتها سارة و هي بعد بنت عمها اخت عادل صديق تركي اخوها .الاثنتين يدرسون مع بعض و رايحين جايين مع بعض.الله لا يفرقهم قولوا آمين
عبدالله و سعد : اخوان عبدالله عمره 13 سنة و سعد عمره 9 سنين دايما يتضاربون بس يخافون موت من تركي اخوهم الكبير حتى انهم يمزحون مع ابوهم اكثر من تركي 

بيت أبو عادل ::
أبو عادل: حمد و اخو اخو فهد (ابو تركي)اللي اصغر منه.ساكن في نفس الحي اللي فيه بيت ابو تركي س بآخر الحي .أبو عادل عنده شغله الخاص فاتح له مؤسسة عقارات صغيرة حالته المادية افضل من حالة أخوه .حمد شخصية شبابية على الرغم من سنه و عاااادي مرة معاهم اللي يشوفه يقول اخو عادل مو ابوه.
أم عادل : اعتدال شخصيتها اقوى من زوجها بكثير و كلمتها هي الفاصل في بيتها .قاسية اشوي أو تمثلها اوقات بس هي بداخلها طيبة مررة .
أم فهد : (مزنة)اللي هي جدتهم و امهم كلهم ام (ابو تركي + ابو عادل +منيرة +سلطان)حنونة كثيــــر و لامة عيالها كلهم بحبها لهم و عايشة عند ولدها ابو عادل مع انه اصغر من ابو تركي لأنها بداخلها ما تبي تضايق على ابو تركي لأنه على قد حاله و بيته على قدهم بس منيرة تربت عند ام تركي من صغرها لأنها كانت كثير متعلقة بعيال فهد اخوها و اكثر بام تركي علشان كذا تعيش معهم 
عادل : الولد البكر لمحمد أكبر من تركي بسنة و اللي روحه فيه دلوع البابا لو يطلب لبن العصفور جاه.مزوح من الدرجة الأولى و دايم يضحك .طبيب أسنان .عمره من عمر صديقه و ولد عمه تركي .حنطاوي بجمال مو طبيعي يعني حلاوته في سماره طووويل مررة اطول واد بالعايلة كلها 
سارة : تدرس مع بنت عمها امل و بنفس عمرها و في نفس التخصص فولة و انقسمت نصين !! جميلة لونها بين الابيض و الحنطاوية بس ابيض من اخوها عادل و لها غمازة في خدها اليمين من تضحك تبان بقوووة ..

بيت سلطان::
سلطان (ابو روان) : الاخو الصغير لابو تركي اكبر من منيرة بسنتين يعني 30 سنة توه متزوج من سنتين و عنده بنت صغيرة تهبل الكل يحبها عمرها سنة.سلطان يحب عيال اخوانه و كأنهم ربعه بحكم انه طبعاً و متربي طول عمره بين بيت فهد و محمد .جسمه معضل و طويل و وسيم من الدرجة الاولى اللي يميز وجهه شيئين الاولي الخال اللي قريب من خشمه على خده اليمين و الغمازتين اللي ورثتهم من عنده سارة بنت اخوه و بنته روان.
نوف (أم روان): عمرها 26 سنة .. مغرورة مررة و ما احد يقدر يكلمها .. ما تواطن منيرة بعيشة الله عدوتها الكبرى . و امل و سارة طبعاً لانهم بس أحلى منها ..

………………………………………

و ألحيــــن نرجع لأمل و تــركي في السيارة
وصلوا بالضبط على باب بيت عمهم محمد أبو عادل و عطت أمل سارة مس كول عشان تنزل و اخذوا دقايق ينتظرونها و الأخت ما نزلت إلى الحين ..استغربت أمل يعني هاذي مو عادات سارة بالعادة هي تجهز قبلها و تتصل فيها بعد تسألها وش بتلبس للكلية و يطقمون اوقات <<حركات بنات
تركي: انتي امول دقي لخويتك مرة ثانية
امل : طيب ..طيب الحين
و توه يرن و إلا الست سارة نازلة محيوسة يد تحمل الشنطة و يد ثانية فيها مفاتيحها و جوالها و كتابين تحاول تشيلهم يعني حالتها حالة .. و هي بحالتها تبي تفتح باب السيارة ما عرفت .. نزل تركي يبي يفتح الباب لها و امل فاطسة ضحك على خويتها ..
نزل تركي يفتح الباب و هو يقول بداخله:يا بعدي و الله ..مستعجلة ..افتح لك القفص الصدري مو بس باب السيارة ههههه وش دخل القفص في السيارة وش قاعد اخربط انا ؟!!
و وصل لعندها و هي بعدت كم خطوة عشان يفتح هو الباب..فتح الباب و رفع راسه بيقول لها تفضلي..توه بيفتح فمه بيقولها و تطيح لثمة سارة صوب و تنحاس اكثر و تركي ابتسم لا إرادياً على حالتها و على وجهها اللي بان لها و لو صوب واحد مو كل الوجه بس على الاقل شاف منه اشوي .. و هي من شافت ابتسامته بغت تصيح حست انه يضحك عليها بس بنفس الوقت خقت على وجهه و هو يبتسم ..
مشى تركي لكرسي السايق <<مكانه يعني .. و سارة حطت اغراضها بالأول بالسيارة و ضبطت لثمتها و بعدين ادخلت السيارة..
سارة و هي ميتة من الفشيلة:السلام عليكم
تركي + امل: و عليكم السلام
سارة و راسها في الأرض: آسفة تأخرت عليكم
امل و هي تضحك: لا؟!!زين حسيتي هههههه
تركي و هويخز في اخته :: امل استحي هاذي بنت عمك .. يناظر في المرايا و صورة سارة معكوسة فيها و يوجه كلامه لسارة :: و لا يهمك و انا اخوك و كمل سواقة.
سارة حست بأنها ودها تصفقه بالشنطة و تقول بخاطرها و هي وجهها بالدريشة:: قال ايش قال اخوك..اوووف و تنافخ بروحها
امل حست عليها بس سكتت ما كان ودها تحرجها قدام تركي و تسألها عن اللي مضايقها.
و وصلوا للمحطة(محطة باص الجامعة) و نزلوا من السيارة بعد ما عطى تركي اخته المصروف و سلم عليها و وصاها على نفسها..و مشى لشغله..
…………
و في بيت ابو تركي أسماء و منيرة ينظفون و يرتبون لأن ما عندهم شغاله يعني حالتهم المادية ما تسمح لهم ..
ام تركي: اقول منيرة ..وش قلتي عن الموضوع اللي فاتحك فيه سلطان امس؟!
منيرة تمثل انها ما تدري وش تقصد ام تركي: أي موضوع؟
ام تركي:موضوع الزواج..يعني الرجال ما شاء الله عليه مثل ما قال سلطان ما عليه كلام و يمدح فيه.يا بنيتي و الله ودي افرح فيك و هي ترسم ابتسامة على وجهها الحنون.
منيرة ما قدرت الا تبتسم في وجه ام تركي مع ان اللي بداخلها عكس ابتسامتها:و الله يا اسماء انا مدري.يعين انتي تدرين القطار و فات .و بعدين الرجال متزوج
قاطعتها ام تركي:مطلق مو متزوج
منيرة:و عنده عيال اثنين و انا قلبي ما يطاوعني آخذه و تطلع مني كلمة و إلا حتى حرف و اضايق بهالعيال و هم امانة برقبتي ..مدري ما ابي يصير بذمتي شي .. يعني حرام اخاف اقصر بحقهم.
سكتت ام تركي فترة و قالت : على راحتك يا منيرة هاذي حياتك و انتي حرة الاهم انك مرتاحة
منيرة بقلبها تحمد ربها ان ام تركي اقتنعت و سكرت الموضوع لأن الزواج آخر شي تفكر فيه .
ناظرت ام تركي الساعة و شهقت:يوووو تأخرت ما يمدي.
تروعت منيرة على ام تركي:وش فيك؟تأخرتي على وشو؟عسى ما هو شي كايد؟!!
ام تركي و هي تضحك:خوفتك؟ههههه لا بس الحلقة التركية هالحين يعيدونها خبرك ابو تركي ما يحب هالمسلسلات هههههه اقوم اطالعها اذا تيسر و راح شغله الله يحفظه.
منيرة :ههههههه تصدقين خفت؟هههه يلا و انا جاية معك ..مدري وش مسوين فينا هالاتراك خبلوا فينا.
و راحوا ثنتينهم و قعدوا بالصالة يتابعون حلقتهم التركية 
………………………..

ابو تركي في شغله من اول ما وصل و الكل يسلم عليه لأنه علاقته طيبة مرررة مع كل الناس كلهم يحبونه. و توه قاعد على مكتبه و يرن تلفون المكتب
سكرتير المدير: فهد
ابو تركي:هلا معاك
السكرتير:المدير طالبك في مكتبه ضروري لا تتأخر.
ابو تركي يضحك على خفيف:هه و انت خابرني اتأخر؟
السكرتير :حشى و الله .يا ريت موظفين هالشركة ياخذون منك هالالتزام و الذمة في الشغل.بس بو خالد(المدير)مستعجل مرة وراه مواعيد برة الشركة و يبغيك ضروري.
ابو تركي:ابشر يا مشعل الحين جاي.
و سكر السماعة و مشى لمكتب المدير (بو خالد)و هو يتسائل و راسه يضرب اخماس باسداس وش يبي المدير منه الحين؟!!
…………………………..
و في كلية التمريض::
أمل و سارة يتمشون مع بعض طبعاً بعد ما خلصت أول محاضرتين أمل كانت نعومة مررة اليوم لابسة جينز و بلوزة طويلة لونها ابيض و بالوسط فيها قلب كبير و اكسسواراتها مررة ناعمة و صغيرة أما الميك آب فأمل ما تحب تثقل كانت حاطة كحل خفيف و قلوس وردي .. و شعرها فضلت أنها تسرحه و تسوي لها باف صغير من قدام … و سارة كانت لابسة تنورة طويلة حريرسودا و بلوزة حمرا و ما لبست اكسسوارات غير ساعة كريستال و خاتم نعوم .. و شعرها لمته كله بمشبك شعر كريستال صغير على شكل فراشة و خلت خصلات صغيرة تنزل على وجهها.. كانوا ملفتين بنعومتهم .
و سارة إلى الحين بالها مشغول بكلمة تركي ::و لا يهمك و انا اخوك..
و كل شوي تقول بقلبها:يعني طول الوقت انا افكر فيه و هو يعتبرني مثلي مثل امل .. يا خسارة سهرك يا ساروه هالليالي كلها ..اقول بس مالت على حظي
دخلت امل على الخط::اقول اختي سارة ..يا اخت
عصبت سارة بدون سبب:لا تقولين اختي ..صرت اكره هالكلمة افكر اتبرا حتى من اخوي عشان ما اسمعها
فقعتها ضحك امل هالحزة :ههههههههههه من جدك انتي؟انخبلتي؟!! بالله ما تقولين اشفيك انتي اليوم؟انا ملاحظتك من يوم احنا في السيارة و انتي متضايقة و مادة برطومك..
سارة :برطوم في عينك ..بس مو نايمة من البارحة تعبانة ..اموت و الاقي سرير انام و لا اسأل فيك
أمل ترفع كفوفها للسما:يــــا رب ما نلاقي سرير في الكلية هههههههه
سارة:ههههه هذا اللي هامك تبين احد ينكت و انتي تضحكين ..اقول خلينا نروح الكافتيريا للبنات تلاقينهم ينتظرونا و ميتين جوع ..
أمل :عاد انا اتخيل وجه مها هههههههه اقتليها و لا تحريمها من الأكل .. مفجوعة ههههه
و مشوا ثنتينهم للكافتيريا و كل العيون متعلقة في امل و جمالها و شعرها الأسود ..كل وحدة شافتها طالعتها من فوقها لتحتها ..
……………………………..
و في مكتب من مكاتب المحاسبة في ارامكو قعد تركي على مكتبه و هو يناظر بهالأرواق و الملفات المكدسة و يقول بقلبه : و انا الحين كيف باخذها ؟!!يعين لازم اخذها أو اني انتحر..انتحر؟!!استغفر الله وش هالكلام..بس كيف آخذها و انا الحال العالم الله..دراسة امل من عندي هذا غير اني اساعد ابوي في المصروف و مصروفي انا و اعطي منيرة عمتي و امي بعد يعني الحال الله وحده العالم فيه و الراتب يا دوب يكفي ..يلا الحمدلله و إذا هي مكتوبة لي باخذها ..و إذا مو مكتوبة لي .. الله يسر امرها
و تنهد بضيقة خلق و قعد يتأفف و يرجع بعدها و يذكر الله و يحمده ..لاحظه زميله بالعمل (أحمد)و شاف علامات الضيق على وجهه..
أحمد:وش فيك و أنا اخوك؟وش مكدر خاطرك؟؟
تركي و هو يمثل الضحك ::هههه و الله يا اخوي الى الحين ما شربت برميل الكوفي اللي يعدل مزاجي!!
أحمد::ههههه بس ؟هذا اللي مكدرك و لا يصير بخاطرك شي و انا خويك
رفع احمد سماعة التلفون و طلب لهم كوفي و بعدها ناظر بتركي:الحين الكوفي جاي
تركي:وين اودي جمايلك بس؟كوفي مرة وحدة؟
احمد:تتريق حضرتك ؟تدري إن ما حرمتك من الكوفي اليوم بطوله ما اكون احمد بن ابوي.
و قعدوا يضحكون و هم يشتغلون يعني <<ساعة شغل و دقيقة ضحك او العكس ممدري يسويها تركي
……………………………

في بيت أبو عادل::

أم فهد (الجدة) و هي تطق الارض بعصاها:: اعتدال .. يا اعتدااال
و لا حياة لمن تنادي ..ما في رد
أم فهد :: ميري .. ميــــــــــري و وجع
و لا ميري ترد
و وصلت أم عادل (اعتدال) :: هلا يمة آمريني
أم فهد : وينك؟ما تقولين لي وين رحتي؟صار لي ساعة اناديك
اعتدال:: انا بالمطبخ يمة .آمريني
ام فهد:ما آمر عليك يا بنيتي بس هاك (عطتها التلفون)دقي على ام تركي شوفيها ليش ما جت اليوم صارت الظهر و ما بينت و اسأليها عن منيرة بعد
اعتدال :ههه ان شاء الله ..بس هذا؟ما دريت ان ام تركي اغلى مني
ام فهد:لا لا حشى و الحشى عن الف يمين انتي و ام تركي بناتي انتوا و منيرة واحد و الشاهد الله
اعتدال:هههه ادري و الله عارفة يمة بس امزح معك
ام فهد : يلا دقي
اعتدال اخذت التلفون و دقت و رن التلفون
….
…
ام تركي::منيرة شوفي التلفون
راحت منيرة للتلفون و ردت
اعتدال :السلام عليكم
منيرة :و عليكم السلام ..هلا هلا بأم عادل ..اشلونك؟اشلون امي؟و الله اني مشتاقة لها مووت
اعتدال::ههههه شوي شوي علي هههه حشى اكلتيني؟!! المهم احنا الحمدلله كلنا احوالنا تسرك بس امي مزنة تسأل عنكم تسأل ليش ما جوا الى الحين؟!! عسى ما شر يا منيرة؟
منيرة : ما شر حبيبتي بس تعرفين انشغلنا في شغل البيت و الحين ما يمدي نجيكم ..تدرين الغذا و العيال على جية و اخوي …ان شاء الله العصر نمركم.الشاي عندكم اليوم..
اعتدال : حياكم الله تشرفونا و تنسونا يو نسيت الغذا على الفرن ذكرتيني فيه و هالميري ما تعرف للطباخ..اخاف يحترق و هالخبلة ما تدري عنه..يلا مع السلامة و سلمي على ام تركي كثير و على امولة.
منيرة ::هههههه الحقي عليها تراها مخبولة تسويها و تحرقه.. يوصل السلام و انتي بعد امانة سلمي على اخوي و العيال و بوس لي راس امي مزنة.
اعتدال :ههه يالله مع السلامة.
منيرة:الله يسلمك حبيبتي.
أم فهد :: هــاااااااا وش قالت؟
اعتدال:صبرك علي يمة .. ما قالت شي و لا فيهم شي انتي بس الله يهداك يمة دايم تفكرين و تحاتين الدنيا كلها..شوي شوي على قلبك
ام فهد:عيالي و اشلون ما احاتيهم؟!!وش قالت لك؟
اعتدال:و لا شي بس اخذهم الوقت و هم ينظفون و يرتبون بالبيت بيمرون العصر ان شاء الله.و يسلمون عليك بعد و هاذي بوسة على راسك من عند منيرة.
ام فهد:: و سلطان ما اتصلتي فيه؟
اعتدال:يوووو يمة مزنة الغذا بيحترق و سلطان اكلمه انا يعني؟ و الحين هو في دوامه اكيد.
و طلعت بسرعة من غرفة الجدة و ام فهد تتحلطم و اعتدال تسمعها و تضحك على خفيف خايفة تعصب اذا سمعت ضحكتها..
<<<< نكتة هالجدة من قلب

هذا كان البارت الأول
أتمنى يعجبكم و يلاقي منكم المتابعة 
أنتظر منكم توقعاتكم و رايكم 

يـــــا ترى
وش اللي بيصير في الكلية مع امل و سارة و لقائهم مع صديقاتهم؟!!
وش يبي مدبر الشركة (ابو خالد) من ابو تركي؟!!
وش حقيقة شعور سارة اتجاه تركي ؟!!
تتوقعون ام تركي بتابع الحلقة التركية لنهايتها ؟<<<ههههه هذا من عندي السؤال

ملاحظات::
**إذا لاقت الرواية اعجابكم راح اكملها  اكيــــــــــــــــد
** في بعد شخصيات اكثر و اكثر راح تظهر في الاحداث الجاية 

الساعة ثلاث إلا عشر بشبة الشمس و الجووو حار بقوووة و باص الكلية طبعاً كالعادة المكيف خربان و البنات كل وحدة تتأفف و تسب بروحها و تهوي بوجهها بكتابها العريض اللي اساساً مو قادرة تشيله من التعب ..

مها::وش هالحالة يا بنات؟!!خلاص انا قررت قرار نهائي لا رجعة فيه

البنات بصوت واحد: و وشو هالقرار ؟!!

مها بكل ثقة و خشمها رافعته لفوق: قررت اجيب سايق و ليموزين مو حالة هاذي!!

و ما امداها تكمل اللي قالته و إلا هي تلقط الكتب اللي انرمت عليها و الشنط هههههه و هي تضحك

مها:تراكم مستهزئين فيني كثير ..اصبروا علي ..ترى حظي بيطق السما مرة وحدة و يومها تعالوا

بوسوا يدي عشان اسامحكم و اسكنكم بملحق بملاحق فلة من فللي ههههههههه

ريماس:و بالله من مين بتجيك هالاملاك مرة وحدة؟و إلا بتورثين مرة جدك على غفلة؟!!

الجوهرة :انا عن نفسي استبعد احتمال ان مرة جدها تموت قبلها ..إلا اكيد بتموت عقب البشرية كلها ههههه

سارة:هه استغفر الله العظيم ..انتوا انخبلتوا؟وش تقولون؟!!

امل:انما الاعمار بيد الله..يا مطفوقة انتي و ياها

الجوهرة:استغفر الله بس هي الحقيقة من متى عايشة ذي؟

ريماس :يؤيؤ انا بسكت اخاف انا اللي اموت و انا بعدي ما اعرست ههههههه

مها:اخذوها مني انا اقول لكم ان مرة جدي ما رح تموت إلا إذا حضرت عزا العايلة كلها و بعدين بتفكر تموت او لا..استغفر الله ..استغفر الله .

سارة ::من جد مخابيل ههههههههههههه.

**هنا راح نتعرف على شخصيات البنات و هـــــــــم :::

(مها : صديقة أمل مرحة موووت و حبوبة و دايم تضحك و مطيحة الميانة ويه العالم كله هههه يعني مرجوجة هالبنت..هالبنت تجنن دوووبة و وجهها ما شاء الله مليان خدود و بيضاء مرررة ابيض وحدة في الشلة و وجهها يحمر بسرعة في الحر و اذا زعلت أو فرحت كثير يعني البنات يعرفون وشو بخاطرها من خدودها هههههه)

(الجوهرة:وحدة من الشلة بعد بنت هادية و الشلة يحبونها مرررة .و تلعب دايم دور المصلحة بين البنات اذا لا سمح الله صار سوء تفاهم .بيضاء و اطول وحدة في البنات و جسمها حلو رشيقة يعني دايما لبسها كلاسيك ما تحب الأوفر في شي و احلى ما في وجهها عيونها واسعة و لونها غريب رمادي خطيـــــر وارثته من جدتها من امها اللي اصلها من سعودية )

(ريماس: كمان بنت من الشلة ..بنت مررررة رقيقة و ناعمة 24 ساعة تضبط أظافرها و شعرها و ثيابها تحب الكشخة و الفاشن بس طيوبة و قلبها أبيض.اما شكلها فهي اشوية قصيرة و نحيفة بيضاء شعرها يوصل لكتوفها مسوية فيه غرة طالعة عليها خبال ..ملامحها قاسية تبان انها مغرورة مع انها مو كذا)

ملاحظة:البنات كلهم بنفس العمر و يدرسون بنفس التخصص

::::
::
:

نرجع للبــــــــــــــاص

ريماس:اقول بنات انا من جد طفشانة اللي عندي في البيت ما تنطاق و ربي اختنقت منها ..يعني انا قنبلة موقوتة اذا ما اطلع دخيل الله الراشد يمكن اخذ دستة حبوب بندول و اروح بعدها للباري

البنات ::هههههههههه استغفر الله ..

امل:اذكري ربك انتي.بعد وش تسوين مرت اخوك و إلا ناوية تسمينها؟!!

مها::ههههه و الله فكرة انا و انتي نسويها في يوم مرة جدي و مرة اخوك ونااااسة ههههه بس ان شاء الله ما يموتون حرام ناخذ ذنبهم

البنات فاطسين ضحك ::هههههههههههههههه

سارة:اجل بتحطون لهم السم ليه؟!!تلعبون معهم ؟و إلا الكاميرا الخفية ؟ههههههه

ريماس :اقول لا تغيرون الموضوع مرة اخوي و انجبرت فيها صدق انا مقهورة ان اخوي يصدقها في كل شي حتى امي إلا هي امي ما يصدقها و يكذبها عشان خاطر ام العيون الخضر

الجوهرة:ما ادري صدق من وين جايبة مرة اخوك العين الخضرا اكيد امها مو سعودية

مها:اسكتي انتي بالذات اللي يسمعك يقول عيون الرمادي هذي اللي بوجهك سعودية هههههههههه انتي و هي الظاهر من نفس القرية

الجوهرة:يا كلبة ههههههههههه و انتي ما عندك إلا عيوني تترقين عليها؟

سارة :من الغيرة ههههههههههه

امل :اقول مها

مها:سمي يا قلبي

امل :سم الله عدوك..بس ابسألك

مها:اسألي يا نن عيني من جوه <<المرجوجة تحب تتكلم مصري

امل و هي تضحك على المصري: و انتي ما ودك تغيري لون عيونك يعني تلبسي عدسات ع الاقل
مها:يووو سويتها مرة ..و عيونكم ما تشوف إلا النور .. انا اتذكر ان اختي مدت صبعها في عيني بعدها لقيت نفسي بالطواري عيني حمرا و صبع اختي مأكول ..الظاهر و الله اعلم انها ضيعت عيني و حطتها بسنوني ههههههههههههههههه

البنات::هههههههههههههههههههههههه

الجوهرة ::تسوينها و تاكلين يد اختك يا مفجوعة هههههههههههههه

ريماس بصوت مرتفع اشوي::اقووووول لا تغيرون الموضوع ودنا نغير جو لا افطس

امل تناظر سارة :: و حنا ما عندنا مانع بس بنسأل اهلنا و بنرد عليكم

ريماس تناظر مها و الجوهرة تنتظر ردهم

مها بصراخ : انا مواااااافقة و ما رح اسأل احد ..يعني لو بسأل مرة جدي ما رح تسمعني
ما تسمع إلا شخشخة الريالات

ريماس تضحك و تلتفت للجوهرة

الجوهرة:انا يعني انتوا تدرون ابوي و عقيلته ما بيرضى انا عارفة بيقول وشو الراشد و وشو طلعات و ما اعرف ايش..طيب..ليه ما تخلوها جلسة وناسة بنجلس في البيت تعالوا عندي

سارة تضايقت بداخلها على الجوهرة و على حظر التجول اللي فارضه ابوها عليها بس تذكرت آخر موقف صار لها في بيت الجوهرة و اندفعت بالكلام::اقول بنات تعالوا بيتنا حنا .. تعرفون عندنا ملحق خاص و ما عندنا شباب كله اخو واحد و طردته من البيت ما هيب صعبة..ها وش رايكم؟

البنات::حلوووووو

الجوهرة :ايه اذا بيت ما عليه ما اظنه بيعترض انا جاية ..

سارة :اجل اتفقنا بكرة الخميس الساعة 4 العصر

البنات:اتفقنا

…………………………………….

يمشي بخطوات واثقة و راسه لفوق و شموخه و حضوره طااغي بقوة .برغم الاعاقة اللي برجله اليسار اللي مرافقته من ولادته و حاولوا اهله ان يعالجوه بس دايم يقولون لهم الاطباء:انها من ولادتها يعني ملازمته ما ترح ابد ابد..
بس رغم هالاعاقة إلا إن كل العيون تنجذب له لا إرادياً وسيم لدرجة أن اللي قباله يتوه فيه و هو يتكلم ..
له اسلوب و طريقة مميزة في كل شي حتى في مسكة القلم و كيف يناظر بالساعة الفخمة اللي بيده ..
و الادهى طريقته في تضبيط الشماغ خوقاااقي ..
طول و عرض و جسم رياضي حلوو يطيح الطير من السما شعره اسود اسود اسود ناعم و مطوله اشوي بس لعند رقبته مو اطول يعني يبان من شماغه من الصوبين ..
ابيض و ملامحه رجولية مررة عيونه و حواجبه حادين تدل على شخصيته القوية و الثابتة و خشمه سل سيف و مربي له سكسوكة مرتبة مرسومة بطريقة رووعة..
ريحة عطره القووية مررة مالية المكان و صوت عكازه يكسر الصمت اللي ساد المكان بعد دخوله..
يمشي في ممرات شركة عمه اللي له نصيب فيها من الاسهم اللي كانت لأبوه الله يرحمه

(ابوه توفى من يوم عمره 13 سنة يعني بداية المراهقة و من يومها و عمه ماخذ باله عليه و مربيه احسن تربية و طلعه رجااااال و لا كل الرجاجيل.. و هو الحين عايش مع امه في بيت لحالهم بس جيران بيت عمه)

و طول طريقه لمكتبه و الكل يوقف له و يسلم عليه بكل احترام و هو يرد بابتسامة و اوقات يهز رقبته هزة خفيييفة حيل ..

و

وصل لمكتبه اللي هو جار مكتب عمه (بو خالد) و فتح له السواق الباب اللي من الليموزين مرافقه و شايل بيده شنطة اوراقه ..

لما وصل لعند المكتب بالضبط و استقر و جلس وراء الطاولة الفخمة و قدامه يشوف هالاثاث الفخم و حواليه اوراق و ملفات تعود انه يشغل كل وقته فيهم حتى في البيت الشغل ما يفارقه ..

رفع راسه للسواق بابتسامة :شكراً محمد خل الشنطة عندك و روح البيت يمكن الوالدة تحتاجك.
رغم مركزه الاجتماعي المرموق و مكانته بين الناس إلا إنه متواضع و دايماً ذوق مع الموظفين و العمال اللي يشتغلون عنده .

و رفع سماعة التلفون و حطه على اذنه : مشعل

مشعل (سكرتير المدير) :سم طال عمرك

………. :: عمي وصل؟

مشعل: ايه وصل من قبل تقريباً نص ساعة و قال لي اناديك طال عمرك للاجتماع بعد عشر دقايق .

……… بعد سكوت لحظات:: امممم طيب يا مشعل انا انتظر قهوتي مثل كل صباح.

مشعل ::ههه ان شاء الله طال عمرك ..ما نسيت توني موصي محمد (الفراش للشركة) على القهوة تلاقيه بطريقه لمكتبك طال عمرك

عبد العزيز بضحكة خفيفة مثل عادته (لأنه ما يضحك كثير و اذا ضحك يضحك على خييييف):: زين سويت هههه تدري الصباح ما يكمل عندي إلا بشوفة محمد و شرب قهوته اللي ما تتعوض .

عبدالعزيز:وصل محمد … ويوجه كلمته لمحمد:تعال يا محمد حط القهوة ..

ويرجع للسماعة اللي ناصر فيه ينتظر على الخط::طيب يا مشعل شكراً

مشعل :العفو طال عمرك ..

………………………….

ســلطان في مكتبه في احد البنوك المعروفة يراجع بعض الحسابات و يحط و يشيل بهالاوراق و يرن جواله فجأة على صوت عبدالمجيد عبدالله

و الله فاضي ..
جاي تحكي همومك .. و انت تحسبني من الهم فاضي
بس تدري اشلون انا ما رح الومك .. ما حد في عيشته يا عمري راضي

و على طول عرف سلطان من اللي داق (زوجته نوف ام روان)

يعني حان وقت الغثاثة و طولة اللسانة

رفع الجوال: الو

نوف:اقول سلطان تعال البيت ضروري الحين

سلطان خاف و اضطرب :ليه؟عسى ما شر ؟روان بيها شي؟لا تكون مريضة بس؟

نوف:وش فيك؟انا ما جبت طاري روان بشي

سلطان بلهجة مستفسرة : توك تقولين تعال ضروري ..ليه يعني؟!!

نوف:يووووه انت ما في احد بحياتك غير هالبنت؟يعني امها مو في قاموسك ابد؟!!

سلطان يضحك بعد ما اتطمن على بنته الوحيدة:ههههه إلا امها لو تبغى روحي اعطيها إياه..آمري يا ام روان

نوف::ايه قص علي بهالكلمتين..المهم اخلص علي و استأذن من شغلك و تعال وصلني لبيت اهلي الحين .. امي اتصلت علي تقول ان اخوي و مرته اليوم يوصلون من شهر العسل ..الحين تجي يعني الحيــــــــــــن

سلطان ::طيب هم متى بيجون يعني؟!!

نوف:الطيارة توصل الساعة 7 المغرب

سلطان::يوووه في وقت..اخلص شغل و نتغذى و نقيل و نرتاح و بعدين آخذك

نوف بنبرة غاضبة::احلف بس؟اقول انا وراي شغل شعر و ميك آب و بنتك بتعيق حركتي و ما بتخليني اسوي شي و انا ما ابي اطلع للناس مبهذلة تخيلني بس .. انا كنت بخليك تاخذني بيت اهلي و تاخذ بنتك

سلطان: و هالبنت وين بتاكل ؟تبي تنام .. تبي تلعب..تبي احد ياخذ باله عليها.. انجنيتي انتي؟

نوف:: اووووهوووو قلت لك تجي الحين و تاخذ بنتك و تصرف روح بيت اخوك ……. انت طول يومك هناك عند المام جات على اليوم يعني؟و هي جدتها و بعدين عندك ذيك العانس منور عطها روان و فكنا من هالسيرة

عصب سلطان بس منحرج يتكلم بعد ما دخل زميله بالعمل المكتب و رد عليها بهدوء مصطنع:: طيب انا جاي ساعة بالكثير و انا بالبيت.يلا مع السلامة

زميل سلطان بالعمل::سلطان؟!!بتمشي الحين؟عسى ما شر ؟الاهل فيهم شي؟

سلطان::هههههه انت وش بلاك؟اهلي ما فيهم الا العافية بس عندنا عرسان يبون يجون من شهر عسلهم بعد اشوي و تدري هالعزايم اللي ما تخلص

الزميل بالعمل:ايه ههههههههههههه تصدق خفت .. اقول ما عدت ساعتين دوام و الا انت بتستأذن!!

سلطان و هو يشيل اغراضه ::يلا انا ماشي و بعوض الساعات بكرة اضافي.و الله يعين…في امانة الله

الزميل:في امان الكريم..

…………………………………

و الدكتور عادل منشغل في مكتبه في المشفى التخصصي و في معالجة المرضى و اصوات أنين المرضى من الآلام تملى المكان و أذنه تعودت على هالاصوات اللي تبط الراس عنده شي روتيني و يومي..لابس الروب الأبيض اللي معطيه وسامة اكثر و كلما تدخل بنت من المرضى تظل فاتحة عيونها و حلجها على ملامحه الأخاذة ..و ابتسامته الجذابة..

جا وقت استراحته اللي ما تتعدى النص ساعة ..رفع جواله و دق رقم خويه و ولد عمه (تركي)

عادل ::هلااااا و غلاااااا بهالصوت بالغالي

تركي و هو يضحك ::ههههههه هلا باللي ناسينا

عادل::افاا عليك بس انا انساك؟طيب و نسيتك من اين اجيب لي عروس انا مثلك يا حلو ..تدير بالها علي و تسأل عني؟!!

تركي::هههههههه اخسسسسس طلعت انا حرمتك..من ترضى فيك انت؟!!

عادل::تصدق؟اوقات احس اني بعنس

تركي::ههههه الله لا يقطع سواليفك..وشو بتعنس ؟!!

عادل::اقول لا تاخذني بالصيحة.. و انسى سالفة الزواج تراني عارفك زين ما احد مطفوق على العرس غيرك..

تركي (نغزه قلبه و حس ان عادل يمكن درى عن احساسه اتجاه ساره):و من قال لك اني مطفوق على العرس؟؟

عادل::ههههه مسرع خفت من جبنا طاري العرس يالمطفقوق

تركي (ارتاح يوم درى انها مزحة لا اكثر)::ههههههه اقول وش تبى مني داق اخلص علي

عادل::ايـــــه تصدق نسيت؟

تركي::هههههههه

عادل::ايـــــه تذكرت .اقول وش رايك بكرة الخميس يعني ليلة الجمعة نمشي مع الشباب مزرعة بيت أبو راكان..تراهم مضبطين كل شي باقي موافقة حرمتي يعني انت

تركي::هههه وش اوافق او لا؟؟ يالله نروح ..راكان ما تنمل قعداته

عادل::اجل صار ..يلا مع السلامة

تركي::الله يسلمك.نشوفك بالحي تتسكع عند البقالة

عادل:ههههه وشو قالوا لك اخوانك هالبزران؟هههه رح زين رح

تركي:مع السلامة ههههههههههه

و سكــــــــــــــــــــر.

……………………………….

في بيت ابو تركي

ام تركي::منيرة يمة جهزي الغذا ترى العيال و ابوهم على جية

منيرة::لا توصين انا في المطبخ

عبدالله و سعد:يمــــــــــــــــــة

ام تركي::وش بلاكم انتوا؟تزعقون

عبدالله:متى الغذا تراني ميت جووع

ام تركي:: الحين يوصل ابوك و اخوك و اختك بعد تجي من الكلية

سعد: انا ما اشتكيت يمة هذا عبدالله ..اصلاً مانيب جوعان

عبدالله:انت قلت قبل

سعد:انت اللي سألت عن الاكل قبل مو انا

عبدالله:طيب و مين اللي راح المطبخ يبي يعرف وش الغذا و خاف من عمتي منيرة؟بعد انا؟

ام تركي تسمعهم و هي تهز راسها و تضحك

و

وصل ابو تركي

ابو تركي::السلام عليكم

العيال يقومون و يبوسون راس ابوهم

العيال:و عليكم السلام يبه

ابو تركي :اشلونكم يا عيال؟كيف المدرسة؟

عبدالله:هههه يبه يبه المدرس اليوم عطانا اختبار سهل مررررة و انا اتوقع يعني اتوقع آخذ 15 من 10 اكيـــد

ابو تركي و سعد يضحكون ::ههههههههه

ابو تركي::يبه عبادي الـ15 اكبر من الـ10 يعني لازم تقول انك بتاخذ 10 من 15 مو العكس

سعد::حتى في الرياضيات ما انت فالح؟ههههههههه

عبادي و هو منزعج::ايه خليت الشطارة لك

و بدوا يتضاربون على خفيف كالعادة يعني ….

قاطعهم

صوت تركي :السلام عليكم

و ردوا كلهم عليه:و عليكم السلام

و جت امل ورا اخوها اللي جابها من محظة الباص هي و سارة بنت عمها<<حبيبة قلب تركي

و ردت امل و سلمت عليهم و ردوا عليها

أم تركي و هي طالعة من المطبخ:هلا و الله بعيالي حيا الله من جا

امل تبتسم و هي رايحة لامها:الله يحيك يمة

تركي::ههه هلا فيك يالغالية

ابو تركي::ايه التحية و السلام و الغزل و الكلام الحلو كله للعيال و إلا ابوهم طلع من حسبتك يا اسماء

تركي::هههههههههههه قوية هاذي بحقك يمة

ام تركي بخجل::و انا اقدر استغني عن ابو عيالي انت الخير و البركة يا ابو تركي عسانا ما ننحرم منك قول آمين

الكل:آميـــــــــــــــــــن

ابو تركي:و لا انحرم انا منكم آمين يا رب العالمين..

ام تركي و الابتسامة الى الحين على وجهها : يالله غيروا ملابسكم الغذا جاهز

عبدالله و سعد طبعاً من زماااااااان جاهزين ينتظرون الاكل

تركي و امل و ابوهم صعدوا غرفهم يغيرون و بعدها بنص ساعة نزلوا لقوا الاكل جاهز

امل:الله يهداك يا عمتي كنتي ناديتي اساعدك

منيرة:ههه و لا تزعلين المواعين عليك

امل:ايه و شرب الشاي و اكل السويت عليك ههههه

منيرة:ههههه لا توصين حريص ..

و التموا على الطاولة ياكلون غذاهم اللي غالباً ما تطبخه ام تركي اما باقي شغل البيت فتتولاه منيرة و امل ما كانوا يثقلون عليها بشغل البيت لأنها طالبة و متحتاجة وقتها للدراسة..

……….
….
..

في بيت ابو عادل و على طاولة الأكل

عادل:اقول يبه ..تراني بكرة بنام برة البيت

مزنة (الجدة)::وشو؟؟؟؟ لا يكون تزوجت من ورانا؟تسويها يا قليل الخاتمة

عادل و ابوه ::هههههههههههه

عادل:زين انتي اسمعيني للآخر و بعدها احكمي..انا رايح بكرة مع الشباب مزرعة بو راكان ما غيره مع ولده و بننام هناك و بنرجع الجمعة يعني يوم و ليلة

ام عادل متضايقة::ليه يا يمة مزنة تقولين كذا؟؟بسم الله عليه ولدي ما يتزوج الا بشور ابوه و امه و بينهم بعد

مزنة::و انا يعني بتطرديني و الا ما انتي عازمتني على عرسه؟تسوينها كأنك ولدك هالطويل الأهبل

ابو عادل و هو يضحك::يمة ههههههه الله يهداك ليه هالحكي؟هههه

عادل::ايه انا طويل و اهبل و تركي الزين كله فيه

هنا سارة تلون وجهها ألوان يوم طرى اسم تركي و اينمدح بعد

مزنة::فديته ابو فهد عسى عيني ما تبكيه كامل و الكامل الله

عادل و عيونه مفتوحة على الآخرررر:و انا يعني اللي ناقص؟زين يا ميزو تراني زعلت و ها (نزل الملعقة و الشوكة على الطاولة) عفت الاكل ما ابي

مزنة :: و ليه ناوي تسوي وش اسمه ذاك؟ضراب ؟؟ناوي تختفي..اقول كل احسن ترتوي .. و انتوا اثنينكم عيالي ..و إلا حد يقول لجدته ميزو؟!!اخسسسسس

الكل::ههههههههههههههه

سارة:يدلعك يمة

مزنة و هي تتنهد::الله يرحمك يا ابو فهد (الجد)

الكل رجعوا للضحك بس هالمرة باحترام لطاري الجد

و بعدها الكل :: الله يرحمه

ام عادل:ليه و هو الله يرحمه كان يدلعك؟

مزنة و هي معصبة:و انتي رجلك ما يدلعك يعني؟انا ما اشوف غير هالهدايا اللي ما توقف و ما يناديك إلا حبيبتي..حبه برص

الكل::هههههههههههههههههههههه

مزنة:يووو انا وش قلت؟بسم الله على ولدي من البرص..بس احد بهالعمر يقولن لها حبيبتي؟على وشو؟اذا انتي رجلك ناداك حبيبتي اجل سارة لا تزوجت وش بيناديها رجلها؟ ما اقول إلا أيا ليت الشباب يعود يوما و إلا كنت وريتك الحب

عادل:هههههههههههه وشو؟تورينا الحب؟يا عيني..اجل الله يرحمك يا جدي

و كملوا غذاهم اللي ما يحلى إلا بسوالف مزنة جدتهمو بعد الغذا

مزنة:::اعتدال

اعتدال(ام عادل) ::هلا يمة

مزنة ::اقول شوفي وش فيها منيرة و مرة اخوها و امول ما جوا ليه؟؟

اعتدال مستغربة و تناظر الساعة:يمة مزنة توها الناس ما امداهم يتغذون و يريحون اشوي .. اعطيهم ساعة بالكثير تلاقينهم عند الباب

و إلا برنة الجرس

,,طن
,,طن
,, طن

عادل:انا قايم بشوف مين على الباب

راح عادل يشوف الباب و رجع شايل بايديه روان و وقف عند المدخل للقاعة

عادل::يمة ترى عمي سلطان هنا

صرخت سارة ::رواااااااان يا عمري هالبنت

و راحت تركض و اخذتها بحضنها

ام عادل:قوله يتفضل لبست جلالي

عادل يرجع كم خطوة لورى :تفضل عمي حياك البيت بيتك

سلطان:السلام عليكم

الكل و عليكم السلام

مزنة ::هلا و غلا بالغالي

سلطان و هو نازل على راس امه يبوسه:هلا يا يمة و اشلونك؟كيف صحتك؟

مزنة :الحمدلله ابو عادل مو مخلي علي قاصر

ابو عادل:يمة وش هالحكي؟لزوم علي انت الغالية

مزنة و الدمعة بتغلبها بس حبت تغير الموضوع و التفتت على سلطان::و وينها ملكة جمال بيت ابوها ما جت معك؟

سارة وجهها احمرررررر من الضحك

و ام عادل تحاول تداري ضحكتها

سلطان ::ههه و على بيتي انا بعد

مزنة::ايــــــــــــــــــــــــه و هي تمد بوزها:زين وينها ؟ما جات؟

سلطان:لا ما جات اخوها المعرس جاي اليوم من شهر العسل و هي بيت اهلها تستقبله

مزنة::ايه الله يبارك لهم ان شاء الله ..ام مبارك تستاهل تفرح بولدها

و يقطع عليهم صوت جرس الباب مرة ثانية

و راح عادل يعد مرة ثانية

و فتح الباب لقى مرة عمه و عمته منيرة

عادل:يا حيا الله من جانا ..ام تركي و منورة عمري مشرفتنا

ام تركي::ههه الله يحيك و يبقيك يا ولدي

منيرة:و الله اني ما اقدر على لسانك و لا على بعدك تعال قرب لعمتك مشتاقة لك حيييل
و ضمت ولد اخوها و باسته على خده

عادل::يوووو ما دريت اني محبوب الى هالدرجة

ام تركي+منيرة:ههههههه

و هم داخلين سلموا
عادل يوجه كلامه لجدته::شفتي يا ميزو لقيت احد يحبني غيرك..انتي خلك على تركي

مزنة :: و الله ثم و الله لو تلف الدنيا كلها ما بيرضيك غير حبي لك يالهيس

الكل:هههههههههههههههههه

عادل ::و الله صادقة

و استأذن بيروح المجلس الرجالي لأبوه و عمه تذكر انه ما سكر الباب الرئيسي ..

رجع بيسكره..

و سكره بس هالمرة بوجه بنت كانت واقفة توها بتدخل او بتطق الباب

امل::يو هذا وش فيه؟لا يكون ما يبغاني ادخل بيتهم؟

سمعها عادل لانه كان عند الباب الى الحين ما وخر عنه و ضحك و رجع فتحه

عادل:سامحيني يا بنت العم ما انتبهت لك..تفضلي

امل و هي منحرجة ::لا عادي ..يزيد فضلك

و مرت من قدامه و هو يتأملها ويقول بخاطره: ايه متى الله يرزقني ببنت الحلال ؟!!

……………………

عند ريماس

……… ::اقول شوفي شغلك بسرعة ترى عندي ضيوف الليلة

ريماس و هي تكلم نفسها بشوويش::ياه وش عليك كل يوم عزيمة و انا الشغل علي انا

……. و هي تتريق:: وش قلتي .ما سمعت؟عيدي تكفين عيدي

ريماس::سلامتك يا زوجة اخوي..بس اذا ما عليك امر تخلين الشغالة تساعدني اشوي

نور:: نعم نعم؟؟ الشغالة ما هيب فاضية لك..عندها عيالي انا بروح الصالون..اذا محتاجة مساعدة عندك خواتك و إلا حتى امك

ريماس قامت من وسط المواعين و يدها كلها صابون::امي؟حتى هالحرمة العاجزة اللي على كرسيها المتحرك ودك تشغلينها عندك؟و إلا خواتي هالبزارين اكبر وحدة فيهم برابع ابتدائي تبينهم شغالات عند حضرتك

نور تغيرت ملامح وجهها و كأنها ما تعودت هالهجوم من ريماس:اقول لا يكثر لو تجيبين عيال الحي كلهم يساعدونك ما عندي مشكلة المهم الساعة 7 المغرب بالضبط انت بالمطبخ و امك و خواتك بالملحق الوراني..فاهمة؟!!

و رجعت ريماس لشغلها و هي دممعتها على خدها و تعاتب اخوها و تترحم على روح ابوها المتوفي من سنيــــــــــن …

………………………………………….. ..

تركي و أبوه في الصالة يتابعون التلفزيون و قدامهم طاولة جهزتها أم تركي قبل ما تطلع عليها انواع من الحلويات و الفصفص و البقلاوة و طاولة ثانية صغيرة تتوسطها دلة القهوة مع الفناجين .. و ضحكة تركي اللي تجنن مالية المكان كانوا يتابعون مسرحية كوميدية لطارق العلي اسمها (ابو سارة في العمارة)

و

يضحك و يضحك معاه ابوه

و فجأة

فجأة

و

بدون سابق إنذار

صوت سقوط شيء بقوة على الأرض

لا مو شيء

هذا جسم انسان

لحم و دم ..!!!

جسم منو يا ترى؟!!

تركي و إلا أبوه ؟!!

………………………………………….. …………..

فجأة

و بدون سابق إنذار

صوت سقوط شيء بقوة على الأرض

لا مو شيء

هذا جسم انسان

جسم منو يا ترى؟!!

تركي و إلا أبوه ؟!!

تركي و أفكار و صور مرت قدام عيونه المفتوحة على آخرها

ذكريات ..

خطط للمستقبل ..

لحظة الحاضر اللي كانوا فيها بس يضحكون ..

و بلحظة دخل عادل و صرخ بأعلى صوت ::
عمــــــــــــــــــــــــــــــــــــــي

و نزل لعند عمه يعاينه و يفحصه على الاقل بس يتطمن من دقات قلبه و من عيونه و إذا كان بوعيه و إلا لا ..لا سمح الله ..

رفع عيونه لتركي اللي كان واقف و عيونه على أبوه كأنه مومصدق هاللحظة

عادل::تركي..تركي

و ما لقى جواب .. و قام بسرعة و وقف قبال تركي

و

طااااااااااااااااخ

عطاه كف عشان يوعيه و يصحيه من اللي هو فيه

و صحى تركي و قعد يلف و يدور حوالي نفسه لما لقى مفتاح سيارته و جواله و التفت لعادل: يالله عادل خل نشيله ناخذه للمستشفى

رد عليه عادل بسرعة : يلا بسرعة ..دقات قلبه قاعدة تضعف ..بسرعة يا تركي

و شالوه و دخلوه السيارة بهمة و وصلوا المستشفى اللي يشتغل فيه عادل

شاف موظف الاستقبال لمح عادل قام له و سأله و قاله عادل و على طول بدون تأخير دخلوه بغرفة الفحص الأولية المجهزة و جاه الطبيب زميل عادل في المستشفى و فحصه بسرعة و حولوه على طوووول غرفة العمليات

كل هذا صار و تركي جالس على كراسي الانتظار محتار ينزل دمعته اللي وقفت على باب عينه و إلا يقوى و يجمد احساسه عشان بس يفهم اللي صاير حواليه و يدعي لابوه بالسلامة …

…………………………

و في مكان ثاني عمت فيه الموسيقى و الضحك و الفرفشة كانت الجوهرة بين خالاتها و بناتهم تغني و هم بعز الوناسة ..شي رقص ..

و شي غنى و صواني الأكل و الحلى تدور بين الضيوف و العيون ما فارقت الجوهرة و كل الآذان تسمع صوتها العذب ..

كانت بعيد ميلاد أختها الصغيرة (رهف) اللي توها كملت 5 سنوات .. كانت تغني الاغنية اللي اختارتها رهف ..

غنّوا لحبيبي وقدّموا له التّهاني
في عيد ميلاده عساها مية عام

افرح حبيبي واطلب أغلى الأماني

الليلة يا عمري تناديك الأحلام

ودعت عام وقابلك عام ثاني

تعال نتقضي العمر في حب وهيام

انسى الهموم اليوم واضحك عشاني

والله ابتسامة منك تسعدني أعوام

أحاول أشرح لك بقلبي معاني

والله الفرح نساني هموم والآم

وأجمع أفكاري ويعجز لساني

من فرحتي معذور والله ما الآم

احترت وايش أهديك غير الأغاني

ويهديك قلبي اللّي معك في الهوي هام

واطلب من الله ياحبيبي عساني

ما أنحرم من شوفتك طول الأيام

خالة الجوهرة :: الله يالجوهرة ما شاء الله على صوتك ..

الجوهرة و هي مستحية :: مشكورة خالتي من ذوقك

الخالة و هي ترفع صوتها كأنها توجه الكلام لأحد معين موجود معهم ::اللي يهنيه اللي بتصير الجوهرة من نصيبه و الله انه محظوظ ..

و الجوهرة و وجهها ما يبان من الخجل

و جى صوت مي بنت خال الجوهرة المقربة لها :: ايه و الله يا عمتي هذا صدق صدق محظوظ اسأليني انا ههههههههههه

الجوهرة و هي تدف مي (لأنها كانت جالسة جنبها) :انثبري انتي بس

مي بصوت ما تسمعه الا الجوهرة: اقول ما ودك ننادي لسويلم يجي يسمع هالطرب؟!!

الجوهرة و هي وجهها احمررررر و بعصبية :انكتمي

و صوت من الزاوية ما كان ود صاحبة هالصوت اللي قالته ينسمع لكن انسمع ::الله يهنيك يا سالم يا ولدي بهالجوهرة اللي هي صدق جوهرة ..

……………………………………….

و مكان مرررررررة بعيد عن السعودية (كندا) شمسة بين عيالها الصغار توكلهم أو تحاول توكلهم كبسة غصب ….

و ابوهم يناظرها و يضحك:: يا شمسة هذولي متعودين على الاكل الاجنبي

شمسة :لا مهوب على هواهم لازم يذوقون اكلنا السنع .. و إلا اذا ما ما اكلوا الكبسة و إلا ذاك المظبي يووووه و الله انهم ما هوب سعوديين.

ناصر :هههههههه اقول وش رايك بكرة تسوين لنا بكرة غذانا مظبي

شمسة :ما تبي فيليه و إلا فيتوشيني و إلا ما تبي ذاك اللي وش اسمه يا ربي .. و حطت يدها على راسها و تضرب غليه بخفة تبي تذكر

قطع عليها تفكيرها ناصر:بانييه

شمسه:هههههه ايه هذا هو ..تصدق يا ناصر ؟؟

ناصر:لا ما اصدق كذابة

شمسة::ههههههههههه الله و اكبر عليك

ناصر :هههه طيب قولي وش اللي اصدقه؟

شمسه:تصدق؟ان صار لنا بكندا ست سنين و أنا الى الحين ما عرفت لهم و لاني قادرة اتعود عليهم و لا على عاداتهم.. ما اعرف

ناصر::ايــــه أصيلة يا أم بندر .. الأصيل ما ينسى ديرته مهما بعد عنها ..

و يدخل بندر

بندر :هاي مامي ههه اقصد السلام عليكم <<يحب ينرفز امه دايم

شمسة:و عليكم السلام .. و بعدين تعال وشو هاي؟!! قطع هالحكي ما احبه و لا احب اسمعه ..

ناصر::هههههه يا بندر الف مرة قايل لك لا تكلم امك كذا ..تراها ما تفهم

شمسة باندفاع :و من قال لك اني ما افهمه؟انا لو اتكلم مثلكم تراك ما راح تلحق علي..اقول بس لقطوا وجيهكم عن الفضيحة و خلوني ساكتة..

ناصر و بندر يضحكون

بندر:يمة تكفين كلمة طيب لا لا جملة احسن

شمسة :جود مورنينغ ..هاو يو آر؟!!

بندر:هههه يمة اسمها هاو آر يو مو العكس؟!!

شمسة ::اللي هو..المهم وين اختك؟؟ما جبتها معك؟

بندر:جاية بالطريق مع خوياتها ..

ناصر :يا شمسة الف مرة قلت لك لا تخلينها تمشي كثير مع هذولي تراهم ما يعجبوني ..مايعات مرررة

شمسة ::..يعلم الله اني مكلمتها مليون مرة ما تسمع مني ..طيب كلمها انت تعرفها تخاف منك و تسمع كلمتك

ناصر::طيب صار انا بدخل المكتب اول ما توصل ارسليها للمكتب.

** شمسة أخت فهد (ابو تركي) اللي اصغر من أبو عادل بسنة..تزوجت من ناصر اللي هو يشتغل بالسلك الدبلوماسي و هو اغنى افراد العايلة .. طول عمره يشتغل بالسعودية بس قبل خمس سنين نقلوه السفارة السعودية بكندا لأن السفير كانت تربطه معه علاقة قوية مررررة فطلب السفير ناصر بالاسم يكون مع الطاقم الدبلوماسي اللي رح يسافر لكندا ..عنده 4 عيال:بندر..الهنوف..و بنت و ولد توأم عمرهم 4 سنين رغد و فيصل

بندر: عمره 25 سنة .ز انتقلوا لكندا و كان توه متخرج من الثانوية يعني درس الجامعة كلها بكندا و هم توه متخرج من الجامعة تخصص(تجارة)..بندر وسيم طوله و جسمه حلوين علي عيووون خوقاقي مو طبيعية اللي يميزه انه ما يحب اللحية و لا السكوسكة تلاقونه بشنب اشوي خفيف بس بصورة مرتبة و فن .. متمسك بعادات و تقاليد السعودية و يعتز بأصله و ما عمره همه هالمظاهر اللي بكندا و لا العادات الغريبة بحكم انه راح كندا و عمره 0 2 سنة يعني متعود شارب التقاليد السعودية شرررب.. بس لبسه كاجول يعني جينزات و بلوزات و …. يلبس الثوب و الشماغ في المناسبات بس..

الهنوف:قطعة من الجمال .. بس مصابة بمرض (الثعلبة )اللي يصيب الشعر بالجسم بس الهنوف تركز في شعر (راسها) فاضطر ابوها قبل 10 سنين ياخذها لندن و سووا لها زراعة شعر و هالقصة اللي ما زالت مؤثرة فيها ..الهنوف بنت طلعت من السعودية و عمرها 15 سنة و دخلت فجأة في عالم ثاني بسن مراهقتها دايماً تسبب مشاكل لأبوها ..
……………………..