السلام عليكم ورحمة الله وبركاته
اليوم كتب الله اني اكتب لكم مشاركه ولو ان مناسبتها مو حلوه عندي بس يالله نوينا عاد نشارك بها!!
والمشاركه هذي عباره عن قصيده ومناسبتها انه في يوم السبت الموافق 1/7/1428هجري حصل علي حادث ودخلت المستشفى بالرياض ولكن الحمدلله على كل شي ,, المهم اني بالمستشفى تعرفت على واحد اسمه سعود وكان فيه دكتوره الله يستر علينا وعليها ولكن لاأحد يعتب علي في كلامي او على قولتهم ينقد علي ,,كانت البنت او الدكتوره هذي حلوووه مررره وكانت ملثمه فكنا مرضى وكانت تزيد المواجع اذا شفناها وكانت الله يستر عليها على درجه من الوسامه والجمال واخلاقها احسن اخلاق يعني كامله والكامل الله وكان سعود هذا وناس معه يقولون انها(الدكتوره) انها تحبني ويسمونها حبيبتك وكانوا ظالمينها لأن مابيني وبين الاجوديه<<<< يمديكم على هالكلمه خخخخخخخ شي,, ولكن يبون يضحكون ويقصرون الوقت ,,,المهم ان سعود كان اقوى مني يقدر يروح ويجي فطلبته يجيب لي دفتر من تحت او يدبر نفسه فقال لي ابشر وماقصر جاب لي دفتر وقلم !!
فكنت اكتب في الدفتر قصايد وغيرها من اللي يطري على بالي بوقته لان الطفش والزهق وانواع الحسرات كانت تمر علي تسعه وتسعين مره في اليوم ولكن الحمدلله على كل شي!!!!
المهم وانا نايم قام سعود ومر علي بغرفتي وأخذ الدفتر وصار يقرا من الدفتر وبعد ماصحيت قال لي يافلان هل هذي القصايد لك؟؟
قلت له نعم
قال ياخوي البارح جلست طول الليل اقراها بس اسمح لي قلت له لاعادي!!!
المهم
في يوم من الايام جاتني الدكتوره وصارت تتكلم معي ونضحك مع بعض وانا كنت تعبان وكانت هي حبوبه لأبعد الحدود وتبغى تنسيني بعض همومي فكانت تجلس عندي فتره يعني طويله بعكس الباقين حيث كلنت ماتطول عندهم عشان كذا قالوا انها تحبني وترى هذا السبب بس لاأقل ولااكثر
المهم بعد ماطلعت من عندي الاوسعود يدخل علي قال اشوفك رايق اليوم عشان بعض الناس تاكي معك و بس لازم تغني لعيونه قلت له ليش ماأغني ؟؟؟؟
فقلت هذي القصيده ولكن تدرون وش سوا لي سعود؟؟
راح واخذ القصيده ووداها لها وقال انها من عندي انا يعني كب العفش الله يهديه!!
وفي يوم من الايام دخلت علي وقالت الرساله وصلتني ,, وانا مافهمت وش تقصد !! قلت اي رساله؟؟ قالت اللي انت ارسلت مع سعود وربي انها تهبل وتجنن واعجبتني بس ابغاك تقولها انت على لسانك وانا مستعده انشرها بالمجله وعلى حسابي مع العلم ان القصيده فيها كم طرف غيرها بس يالله !!!!
شوي الا وسعود يدخل قلت سعود شسالفه؟؟
قال القصيده اللي انت قلت في الدكتوره ترى انا وصلتها لها وكانت هي تسمع,,
قلت اي قصيده واي موضوع انت تتكلم عنه وكنت اتمنى الموت عندي عشان اعطيه سعود بوقتها خخخخخخخخ
قالت الدكتوره بذمتك وفيه احد يهدي هديه ويتمنن عليها؟؟؟
المهم اني رفضت انها من عندي حتى انها اخذت صوره من الدفتر وقالت لي خذ طيب اقراها علي لأن سعود صوته مو عاجبني وانا ماعرفت اقراها زين وابغاك انت تقراها لو سمحت حتى لوكانت مو من عندك فقلت لها اوكي اقراها اقراها وكنت اتعتع واقطع عشان تقول انها غريبه علي<<< الولد ملكع خخخخخخخ
ولكن آخر يوم وانا اوادعها طلبت مني ان اقول الحقيقه فقلت لها الحقيقه واعترفت لها بكل شي !!!!
والقصيده هي:
[frame="4 80"]ياســـــعود ماني مجبورٍ على الشعر ياخوك
لكن جبرني ملثـّــــــــــم يقبل علي بسكاكينه
بيدينه السكاكين وبعيونه كـــــــــــــل هالوك
عـــذابي لا واهني من ضمه وحضنه بيدينه
حلـــو نطق اسمي بفمه لامن قال(……….)
لامن قام ايتبــــــــسّـم والغنج واضح ابعينه
ادخـــــــــل بغيبوبه والغيبوبه مافيها شكوك
بقسم الانعـــــــــاش وقلبي عســى الله يعينه
متســــــــلقي على السرير الابيض ومتروك
وقولة الآهـ توحيها من شمال ومــــرٍ يمينه
وجسمه ثقــــيل وبالبنج مطـــــــلي ومدعوك
وياوجد حــــــــالي على فرحة القلب وسنينه
يقولها منه على السرير مسمّـــــر ومشبوك
وحالته اصـــــعب من حالة السجين الرهينه
حظـــــــــك يالسجين لو دونك الباب مصكوك
تحتري الفرج بــس العافية مــــــــــنك مكينه
يالله طلبتك والي الملك يامســـــــــــــيّر فلوك
تجــــــــــلا هموم قلبـي وتغسل عنه الضغينه
وافرح بباقيك ياسنيني والعمـــــــــــر مبروك
ونزورعقب التعــــــــــــب اللي فراقها ياشينه
طــــــــــرّاها علي دكتـــــورةٍ والحال مربوك
ياخوك خلني اســـــج وانســـى كل شي لحينه
وياخوك جسمي مرضوضٍ وبالــــــهم مفروك
تكـــــــفى طلبــــتك خلـــني ترى جروحي دفينه
يالله يالله ودعوتي لك تتّـــــــــــــجه بليّـا مكوك
إنك تصبر وتعين عــــــزيز قـــومٍ زمانه يهينه
لامن بغيت اقوم كــــــــن مالله خلق لي وروك
وأليّـا بغيت اضــــــحك ويني انا والضحك وينه[/frame]
بقلمي <<<== عشان المتـ القلم ـميز
اللي شاعر اكيد راح يعرف اسمي الحقيقي بدون تعب :110103_mad_prv: بس لاأحد يكتبه في التعليق خخخخخخخخخخخ
تقبلوا تحيات اخوكم أســــ الغنج ــــير
حيث أترك لك بصمة أعاود تقفيها لاحقا ..
محجووووز
رجة ،،
قلمه لا يعرف المجاملة .. !
قوي كالسكين
حديد .. !
متين
أسير الغنج
الله يعطيك العافيه
لك ولسعود .. !
التحيات وابعدك الله عن السرير الابيض مدى الحيات
اسمك حلو لانه يدل على الفرح وقافيه متقنعه اسجل
اعجابي واقف احتراماً وتقديرا لنص وتقبل مروري
المتواضع ولي عوده الى بيت الجوده
لك شكــــــــــــــــــــــــــــــــــــــــــــــــ ـري
ثانيا_ الحمد لله على السلامه:066ddddddf:
ثالثا _ من حسن حضنا حصلنا على قصيده مميزه فيها من الوصف الذي نحتاج له ومفرادات جديده لي
رابعا_ من حصل الزين سيتاهله .
واخيرا عسى هذه اخر مايجيك يارب من المصايب والأحداث الشينه
(( اليوم جمعه وساعة اجابه ان شاء الله ما ترد))لنا ولك وللمسلمين اجمعين
وعيون شافية لكل من يمرض
…………………………………
اخي الغالي اسير الغنج
نقول لك حمدالله على سلامتك
اجر وعافية ان شاء الله
ومشاركة رائعة منك ومتميزة
تسلم يالغالي
ودام عطاؤك
وسلم نبضك واحساسك
ولا تبخل علينا بجديدك
دمت بسعادة
اجمل الامنيات
من سيد الامنيات
تحياتي
نشوان/سيد الامنيات
صح لسانك ولاهنت
والحمد لله على سلامتك ..
حاولت اعرف اسمك من القافية وعجزت:think2:
تحيتي
زهرة التوليب
ألف حمدلله على السلامة يا ….أسير الغنج
لابأس طهور إن شاء الله …
الله المستعان ….
بالرغم من التعب والإصابة تبقى الأحاسيس متقدة
لكل جميل …
أبيات معبرة من شاعر هواوي …والأجوديه تستاهل
منك ها الأبيات الجزله ….
تقبل من أخوك أجمل الأمنيات واعذبها بالشفاء العاجل
أما أسمك فهو (( ……….))
صح والا ………..لا
الحمدلله اولآ على كل شي وثانيآ الحمدلله على ان الشخص يثق فيكم ويثق انه كوّن له اصحاب وحبايب بهذا الكم الهائل
ويالله خلونا نشوف وش راح نقدر نرد على تعليقاتكم الحلوه
اخوكم أســــ الغنج ــــير
|
المشاركة الأساسية كتبها رجة بس رزة
 اسجل حضوري الأول يامبدع ..
حيث أترك لك بصمة أعاود تقفيها لاحقا .. محجووووز رجة ،، |
اختي الغاليه هلابك وببصمتك اللي ماني قايل حلوه وبس لأنك انتي تعرفين وش قد انا اغليك واغلي بصمتك
ثانيآ يشرفني ان تكونين انتي اول وحده ترد على موضوعي المتواضع<<< هيه لاأحد يصدق عاد ترى مايكفي هالمرور السريع خخخخخخخخخخخخخ
لاوربي انكم كلكم غالين
تقبلي تحيات اخوك أســــ الغنج ــــير