روايتنا الأولي : إحترت من يكون حبيبي وتشيله العيون 2024.

►Ṭђĕ Ťώĭиŝ◄

البـــآرتـ الأولـ…♥~

أنا ابتهال عمري 18 سنة اعترف إني وحدة هبلة البنات يقولو حلوة بس محمد يضحك علي و يقولي ((أم كشة منتفشة)) محمد أخوي عمره 16 سنة مكيسري يعني مال مشاكل و كل أحد يعرفه فالحارة أما أبوي عمره 45 سنة عنده من المزارع اللي يسد جوع بلد لمدة سنة كاملة يعني بالعماني ((هنقري)) أمي تزوجت لما كانت صغيرة و عمرها 36 و طيبة و ما شي مثلها بس فيها عيب واحد تحب فراس اللي بنات المدرسة معذباتني يرسلن معي رسائل حب و غرام حاله و هو واحد فشار صح و دايم يتسكع فسوق مطرح و البنات لازقات فيه و هو وسيم و عمره 20 سنة سنة ثانية فجامعة السلطان قابوس و قبلوه لأنه شاطر و يدرس هندسة كمبيوتر و احسن شي فيه إنه طيب على الآخـر معي يعني أنا وهو حلوين مع بعض مو مثل محمدوه و العائلة الكريمة بتعرفوها بعدين لاحقين المهم اليوم آخر يوم فالفصل الأول و راجعة فرحااااانة مخلصة الامتحان و الحمد لله عدى الفصل على خير لأني انا و المدراسات مغناطيس متنافر يعني لا أطيقهن ولا يطيقني و متمشكلة معهم طول السنوات من كثر ما أعمل مشاكل و من كثر الشغب و أول ما وصلت حصلت عند الباب أصدقاء محمدوه و كانوا أكبر منه بكم سنة و هو ما يصادق اللي مثل سنة يصادق ناس أكبر منه سلموا علي و قالوا لي نادي محمد دخلت البيت قابلني محمدوه النحيس
محمد: خلصتي؟
أنا: إيش تشوفني مخلصة أو لا؟
محمد:ما أدري
أنا: فراسوه فالبيت؟
محمد: لا مواعد
أنا: لا والله أذكر إن فراس ما مثلك
محمد: مواعد صديقه عندك مانع؟
أنا: لا ما عندي
محمد: انزين إيش تبي له؟
أنا: ما يلك دخل
محمد: لا يلي
أنا: روح مع ربعك ينتظروك برى
محمد: انزين روحي داخل وصلحي كشتك
أنا: عالأقل أحسن من القفير اللي فوق راسك
محمد: روحي أقول (طلع برى مع أصحابه)
اوووف من هالمحمد ما عنده إلى سؤال وجواب ،، دخلت البيت و سلمت: السلاااااااام عليــــــكم
أمي: وعليكم السلام ها ابتهال بشري كيف الاختبار؟
أنا: زين دامني أنا اللي أحل
أمي: روحي ارتاحي فغرفتك
أنا: رايحة لا توصي حريص
أمي: الله يوفقك
أنا: آمين و يخليني أدخل هندسة علشان فراسوه
أمي: وليش عاد فراسوه؟ أخوك العود هذا ولازم تحترمي
أنا: طيب طيب (طلعت فغرفتي قلت طيب لأني عارفة إذا رديت على أمي المحاضرة بتبدأ عن فراس المدلع ما كأنه رجال طول و عرض ،، ما حسيت إلى بصوت محمد اللي يصم اذني
محمد: ابتهاااااالووووه
أنا: نعم إيش تبى؟
محمد: تقول أمي قومي صلي بدل هالنومة كأنها ما أعرف إيش
أنا: قايمة روح من هنا
محمد: وعلى فكرة صلحي كشتك قبل لا تنزلي تتغدي علشان أبوي ما يروح من البيت
أنا: ليش ان شاء الله يروح؟
محمد: بيخاف من كشتك سبحان الله ما كأنك بنت
أنا: ليش إيش شايفني ان شاء الله؟
محمد: جنية
أنا: بسم الله علي
محمد: أقول روحي صلي ونزلي تغدي ترانا ما ننتضرك
أنا: روح و بس،، الا أقول فراس فالبيت؟
محمد: ايوة
أنا: زين والله
محمد:أقول روحي صلي بسرعة جوعان
أنا: انزيييين برووح بس انت انقلع من هنا
محمد: جالس فوق راسك لين تخلصي مصلية
أنا: زين (رحت و توضيت و صليت ولما خلصت التفت وراي و شفته يفتش فأغراضي): محمدووه إيش تسوي؟
محمد: إيش هذا اللي فالورقة؟؟ و من هذي سمية؟؟ و متى كانت صديقتك؟؟
أنا: أقول انقلع من هنا هذي الورقة من عندها علشان توادعنا بعد ما خلص الفصل و هي بنت فالصف و ما صديقة زمييييييييلة فهمت؟
محمد: اها على بالي وحدة من الأشكال اللي كنتي تصادقيهم
أنا: تريد تتغدى انزل بسرعة وخل كل شي مكانه ولا تفتش أغراضي لو سمحت
محمد: على راحتي (نزل تحت)
أنا: يا الله من هالمحمد اللي يعذبني دوم (نزلت تحت و حصلت أبوي و أمي و فراس على طاولة الأكل سلمت على أبوي و فراس اللي ما شفتهم و جلست جنب أمي)
فراس: بهولة خلصتي امتحانات؟
أنا: ايوة و أخيرا الحمد لله
أبوي: ابتهال شوي أبي مرقة
أنا: حاااضر (صبيت لأبوي مرقة شوي)
محمد: و أنا بعد أريد
أنا: عندك يدين
محمد: أبوي شوف ابتهال ما تبى تصب لي مرقة
ابتهال (محمد يعرف ان نقطة ضعفي أبوي و بسرعة قلت أغطي عليه): لا بصب لك كنت أمزح معك هههههه (صبيت له و غرقت الصحن مرق)
محمد: دامك كبيتي مرق كأنه بحر أريد عيش زيادة
أنا: انزين يا ولد أمي و أبوي (مسكت المغراف و غرفت له شوي شوي لين حسيت بصوت التفت على قدام و كان فراس واقف)
فراس: يالله أبوي أنا خلصت بروح لأني شوي مشغول
أنا: لا تروح فراس أريد أعطيك شي
فراس (فهمني): اوك بانتظرك بس قبل تغدي
أنا (غرفت بسرعة لمحمد و جلست آكل و فراس يناظرني لين خلصت و انتظرت أبوي و أمي لأن أبغض ما عند أبوي أقوم و الكل ياكل)
أبوي: الحمد لله (الكل قام من الأكل إلا محمد و لما كنت بقوم رجع أبوي مغسل إيده)
أبوي: ابتهال انتظري أخوك لين يخلص و ساعدي الشغالة (الخدامة) فشغل البيت
محمد (استغلني و صار ياكل شوي شوي على راحته و أنا فاير دمي و فراس ينتظر محمد يخلص علشاني)
فراس: ابتهال أنا بروح الحين مشغول
أنا: محمدوه خلص بسرعة لو ما أبوي اللي قال لي انتظرك كنت ما انتظرت
محمد (ما زال ياكل ببرود)
فراس: محمد خلص بسرعة،، ابتهال تعالي و ما عليك منه
محمد: بخبر أبوي
فراس: تعالي و خلاص
أنا (مديت لساني لمحمد و رحنا أنا و فراس غرفتي)
فراس: لا تقولي
أنا: ايوة مرة ثانية هلكووووني البنات و اليوم (طلعت كيس فيه تقريبا 10 رسائل او أكثر) هذا لك
فراس: لا حول ولا قوة إلا بالله
أنا: والله ما أقدر أردهم ما أحد قالك كون حلو
فراس: أي وحدة تعطيك مرة ثانية قولي لها بيتزوج
أنا: نسيت انك تدرس؟
فراس: تعبت والله
أنا: اقرأ الرسائل قبل
فراس (مسك الرسائل كلها و رماها فالزبالة)
أنا: حرام مخسرات حبر
فراس: مرة ثانية لا تجيبي رسائل أبد ما أبيهم
أنا: انتظر فراس لا تطلع (جبت له هدية من عند وحدة من بنات المدرسة و مغلفة بغلاف أحمر حلو)
فراس: هاتي الرسائل من الزبالة و هاتي الهدية
أنا: وع وصاخة ما أقدر
فراس: زبالتك فاضية ما فيها شي نظيفة
أنا (شفت للزبالة كان ما فيها شي إلا الرسائل جمعتها كلها و حطيتها فغرفة فراس و فراس طلع برى و متكشخ و متعطر ما أدري إيش فيه الأخ؟ أشك إنه يواعد بنات خخخخخ والله بنات المدرسة عاقدات معي صداقات و لما أصادقهم يقولو لي أخبار أخوك فراس؟ حتى تصدقوا إن معلمتي لما عرفت إن فراس أخوي زادتني درجات و صارت تحبني؟ و الله حلو إن معك أخو حلو لكن لما عرفت المديرة إن محمد هو أخوي هزأتني و للحين تقول لي دام أخوك محمد لازم تكوني راعية مشاكل خخخخخ يا حليلة حمودي مع إنه يضايق بي أحيانا و يزعجني لكن مو مشكلة حبوب خخخخ إذا سمعني الحين شيقول عني؟ بيهزأني قدام الناس والله ما كأنه صغير عقل كبار حتى أصدقائه الواحد منهم عمره 18 و 20 و حتى منهم اللي عمره 25 و هو صغير يا حليله و هو أصغر واحد فشلتهم و كلهم أكبر منه و يقول أنا أعقل واحد فالشلة الله يعين أصدقاءه عليه و الله يعيني أنا منه ،،، اوووه تذكرت أروح أشوفه خلص غدا أو لا علشان أغسل الصحون قبل لا يشوفني أبوي و ألاقي تهزئة ولا عمركم شفتوها ،،، نزلت شوي شوي و شفت محمد طالع فوق الحمد لله يعني الحين بس مخلص غدا)
محمد: بهلوه
أنا: تناديني؟
محمد: ايوة أبوي ينتظرك فالمطبخ
أنا: احلف (تصدقوا خفت و جمدت مكاني)
محمد: إي والله و غضبان عليك
أنا: لا تقول محمد بلييييز قول كذب
محمد: و من متى أنا أكذب؟ أبوي ينتظرك فالمطبخ روحي أحسن لك
أنا: محمد أرجوك غطي علي أخاف من أبوي بيهزأني و بيوريني الليل
محمد: ما دخلي لما قلت لك انتظري أبوي قال ما بغيتي و طلعتي مع فراسوه
أنا: محمد خدمة وحدة بس روح عند أبوي و قول له انك انت اللي قلت لي أطلع مع فراس ولا انتظرك
محمد: ما دخلي روحي وحدك مشكلتك و حليها
أنا: محمد بليز بس هالخدمة
محمد: طيب بروح بس انتي اطلعي فوق بس بشرط
أنا: اشرط بس أبوي ما أبيه يهزأني
محمد: تنظفي غرفتي
أنا: يا سلام أمي قالت انت موصخها و بتنظفها أو ما تطلع من البيت
محمد: طيب أنا طالع فوق
أنا: طيب بنظفها (طلعت فوق و انتظرت 5 دقائق تقريبا و دق الباب و بسرررعة فتحت له)
محمد: خلاص روحي أبوي طلع فوق و نظفي الصحون و العصر نظفي غرفتي علشان أبي أطلع
أنا: انزين بس أهم شي أبوي (رحت و نزلت تحت و نظفت الصحون ما شاء الله محمد منظف الصحن كله ولا حبة عيش باقية فيه فجعااااااان،، نظفت الصحون و طلعت فوق و نمت فالسرير و ما حسيت إلا بأحد يكب الماي على وجهي و صرخت): آآآآآآآآآآآآآآآآآآي
محمد: أنا قايل لك بسرعة نظفي غرفتي
أنا: انزين خلي الخدامة تنظفه
محمد: بخبر أبوي
أنا (خفت لأن محمد اللي يقوله بيسويه مجنووون):لااااا بروح يا الله المذلة
محمد: انتي الغلطانة و ما دخلني بك
أنا (ما تكلمت و رحت غرفة محمد و هو سوى خير لما كب الماي على وجهي لأنه راح النوم عن وجهي نظفت غرفته كلها وع وصخة بشكل مما تتخيلوه الأكل كله تحت السرير حتى المزبلة ما بهذا الشكل استغرقت تقريبا ساعة أنظف الغرفة وهو فوق راسي و أول ما خلصت طلع بسرعة تحت و طلع برى و شافته أمي)
أمي: محمد وين طالع؟
محمد: مع الشباب
أمي: و غرفتك؟
محمد: نظفتها
أمي (طلعت فوق و شافت الغرفة و نزلت تحت و أنا كنت أراقب بصمت)
أمي: ما شاء الله أحلى غرفة صراحة حتى غرفة ابتهال ما تجي نصها روووعة متأكد انك انت اللي نظفتها؟
محمد: اي والله تعبت بس مو مشكلة
أنا: يكـــــ(ما قدرت أكمل إلا محمد مقاطعني)
محمد: أبوي هنا؟
أمي: لا من بعد الغدا طلع و ما جا
أنا: من بعد الغدا ،، متأكدة؟
أمي: تكذبي أمك؟
أنا: لا بس (شفت حصلت محمد شرد و أنا أريد أحط حرتي كلها فيه الغبي واحد كذب علي ييييييييه صراحة بغيت أسوي له شي بس ما عرفت إلى إني طلعت غرفته و كان معلق صورة كريستيانو رونالدو فالجدار وهو يموت فيه و أنا ما سويت شي بس حطيت لمساتي الجميلة عالشنب و اللحية هههههه أتخيل ردت فعله ههههههههه أبرد حرتي فيه يستحق راح يكذب علي يستغل خوفي من أبوي بوريه بس اللي سويته خطير بس ما عليه خله يتأدب ،، رحت اتصلت على مزون صديقتي علشان انسى رونالدو خخخخ)
أخو مزون: ألو
أنا (فديته أخو مزون الصغنون ترى مزون بنت عمي): هلا والله عبودي أخبارك؟
عبود: بخير من معي؟
أنا: آفاااا ما عرفت بهولة عبودي فديتك نادي مزون
عبود: طيب
أنا: انتظر شوي
عبود: نعم؟
أنا: أريد تسمعني اسمي أحبه مرة لما تقوله
عبود: ابتهال
أنا: فديييييييييتك والله ،،، الحين بسولف معك و خلني من مزون
عبود: احم سوري ما عرفتيني؟
أنا: عبودي و حد ينساك يا قلبي (بدأت أشكك فنفسي عبودي ما يتكلم كذا عمره 5 سنوات بس)
عبود: من عبود حددي
أنا (حسيت إن عبود متغير ما ادري إيش فيه و اختصار للموضوع): نادي لي مزون
عبود: طيب
(ما انتظرت الا و أسمع مزون)
مزون: هلا والله بهولة
أنا: هلا مزونوه
مزون: أقول إيش عندك تسولفين انتي و أخوي
أنا: حرام علي و حلال عليك
مزون: و أنا أقول ليش هو جالس على السماعة ساعة انتي اللي تكلميه
أنا: فديته والله
مزون: تؤ تؤ تؤ تتفدين أخوي لا والله
أنا: فديت عبودي أنا
مزون: ههههه الله يصرف ابليسك هذا عبود الكبير
أنا (انصدمت يمه هذا عبد الرحمااااااان يمااااااه و الصغير عبد الله الخوف رقعني و سكرت التلفون بالقوة ما قادرة أتحرك يمه حد يحركني من الصدمة و ما حسيت إلا بصوت التلفون و شلته و أنا أرتجف واااااي خااايفة): ألو
مزون: هههههههههههههههههههه ما شاء الله طلع عند عبد الرحمن معجبات
أنا: اسكتي خايفة و قلبي يرجف
مزون: ههههههه خبلة و بتضلي خبلة
أنا: أدري والله
مزون: تعالي بيتنا بكرة ما أحد بيكون فالبيت عبد الرحمن بيطلع و أبوي و أمي بيروحوا السوق من الصباح و عبودي الصح (ضحكت أنا على هالكلمة) بيروح مع عمي سيف و ما أحد بيكون فالبيت أبدا)
أنا: طيب بجي بس بقول لأمي قبل
مزون: انتظرك
أنا (سكرت التلفون و قلت لأمي و وافقت بعد ما انقطعت انفاسي و تعبت من محايلتها و جاء فراس تعبان وشكله واحد سكران طلع فوق بلا كلمة و انا بسرعة لحقت عليه)
أنا: فراس إيش فيك؟
فراس (ساكت وما يتكلم)
أنا: فراس تكلم قول شي إيش فيك
فراس: ابتهال سكري الباب و الستارة و اطلعي
أنا: ما أروح لين تقول لي إيش فيك
فراس: ابتهال اطلعي
أنا: عارفة إيش صاير حنان صح؟
فراس: إيوه
أنا: قلت لك من البداية وحدة بوية إيش تريد فيها
فراس: هي الوحيدة اللي عجبتني
أنا: وع بوية و ما أدري إيش و مسترجلة صدق ذوق معفن الحين تارك بنات مدرستنا الكيوووت و رايح حال هذي المسترجلة؟
فراس:خلاص ابتهال
أنا: نام و انساها وحده مثلها مدري كيف شكلها إيش كنت تبي فيها وع حتى شكلها أستغفر الله
فراس: زيدي علي و قولي لي سلبياتها
أنا: أبشر لو من الحين أقولك لين بكرة ما أوفي
فراس: بس عيب الكلام عن الناس
أنا: ما بتكلم عنها بس بقول لك شي بوية يعني ولد نص و بنت نص تدري إيش تسوي؟ بصراحة ما فكرت في هذي النقطة؟
فراس: إي والله صدقك
أنا: دومي صادقة
فراس: أحلى يالواثقة
أنا: أعجبك
فراس: خلاص أصلا ما دخلت مخي بس كنت بضحك عليها
أنا: و لما دخلت كنت تعبان و حالتك حالة و تقول أضحك عليها؟ أضحك على غيري
فراس: لا ابتهال بصراحة كنت أبي ألعب عليها و بعدين قلت ليش ما أجرب فيها يمكن تتحول بنت
أنا: تبي أحد يلعب علي؟؟ عيب
فراس: لا والله بس تدري ليش كنت معصب و زعلان و كذا؟
أنا: لا ما أدري لييييش؟
فراس: ما توقعت إني باثر عليها
أنا: صدق تغيرت؟
فراس: ههههه جاتني و لابسه لبس وع
انا: و بدون عباة؟
فراس: خخخ إيوة شكلها أول مرة تلبس دراعة
أنا: لابسة دراعة ههههههههههههههه ما أصدق
فراس (مد لي بشي و فتحته و)
أنا: ههههههههههههههههههههههههههههههههههههههههههههههههه
فراس: حلوة صورتها
أنا: هههههههههههههههههههههههههههههههههههههههههههههه حرام عليك يا ولد أمي و أبوي
فراس: صورتها ما فوت الفرصة
أنا: ههههههههههه بس حرام عليك (مسحتها من تلفونه و الا كنت أريد أرسلها على تلفوني) أقول عادي أحد يصورني؟
فراس: إيش فيك انتي اليوم
انا: لا صح فراس يعني انت صورت حنان و أنا عادي أحد يصورني؟
فراس: بلا مصاخة بس سوري غلطان و خلاص
أنا: تراني مسحتها الصورة
فراس: لااااااااا
أنا: إيش كنت تبي تسوي فيها؟
فراس: بروح سوق مطرح و بفتح بلوتوث
أنا: يا سلاااام حرام عليييييك
فراس: وحدة مسترجلة إيش أبيلها؟
أنا: هههههه بادية تتغير
فراس: ههههههه أدري
أنا: بروح أسوي لك شوربة تنسيك حنان و ربعها
فراس: فديت أختي اللي تسوي بدون ما يأمروها
أنا: أنا أصلا انت أسوي لك عادي بس محمدوه يحلللللللللللللللللللللللللم
فراس: هههههههههههه روحي جوعان
أنا: طيب (رحت و سويت شوربة لي و لفراس و طلعتهم غرفته و فالطريق ما حسيت إلا أحد ياخذ الشوربة عني و يجرني لغرفة محمد كنت على صدمتي و لما شفت على فوق حصلت محمد شكله شاف رونالدو الجديد خخخخخخ)
محمد: ليش هذا؟ (أشر لي على الصورة)
أنا: ما قصدي بس أنت عصبت بي لما قلت لي أبوي و ما أدري أبوي و كذبت علي و نظفت غرفتك
محمد: أنا ما صغير تلعبي علي روحي تو و اشتري لي
أنا: لا والله من وين ان شاء الله؟ من عند جارتنا أم سلمى اللي تبيع الأقمشة؟
محمد: لا والله شايفتني مصخرة؟ روحي إن شاء الله حتى ظفار أهم شي أبي نفس هذي الصورة
أنا: انزيييييييين بشتري لك غيرها
محمد: بكرة آخر فرصة لك والا والله ما تشوفين تلفونك مرة
أنا: انزييييييييييييين (طلعت و حصلت فراس و أخذ الشوربة غرفته و دخلت أنا و هو الغرفة و عرف مني قصة رونالدو وأعطاني صورة كانت معه نفس الصورة اللي مع محمد)
فراس: تفداك الصورة دام مسوية لنا شوربة
أنا: مشكوووور فراس و ما تقصر بروح له بسرعة قبل لا ياكلني
فراس: ههههههه مرة ثانية لا تعبريه ولا تنتقمي منه
أنا: حااااضر تامر على شي؟
فراس: أبي شوربة ثانية
أنا: خذ شوربتي سد نفسي عن الأكل
فراس: ههههه مشكورة (أخذ الشوربة و أنا رحت غرفة محمد و قابلته)
أنا: جبت لك وحدة حلوة خذ
محمد: علقيها
أنا: انزين (جبت تيب ولزقتها فالجدار مثل الأولى بالضبط)
محمد: زين طلعي برى غرفتي
أنا: من قبل لا تقول طالعة
((اليوم مر بسلااااام بعد كل هذا اقول بسلااااام لأنكم ما شفتوا اللي القاه من المكيسري محمدوووه و فراس و المعجبات ما أدري متى يخلصوا؟ أوووه تذكرت بكرة بروح مع مزون اخخخخ مدري إيش بيصير هناك من سوالف خخخخخ تعشيت ومر العشا بسلااااام ما في شي و الحين أبي أنام طفيت الليت و شغلت ليت النوم تصبحو على خير))

ولآ تحرمــونــآ من ردودكمـ وتعليقآآتكمـ.. وتوقاعتكمــ..♥~

بننزل البآرت الثآنـــي ..
بوكرآآ الصبآآح وإذا شفنــآ تفــآعــل بالليل بننزلهـ
ودنـأأَ

بدايه موفقه قلبو
ولي باك بعد ما اقرا

تسسلمين يالغلآ..
بانتظار تعليج

يسعدني اني البي دعوتكم

لي رجعه بعد قراءة البارت

بصراحه الروايه بدايتها حللللللللللوه ياليت تكملونها

محمد عصبت عليه يرفع الضغط
وابتهال حلوه شخصيتها

وبانتظار البارت الجاي

ربي يسعدكم وينور قلوبكم ويفرج همومكم

تسسلمين محد يسمعني فرحتينا بوجودج..!
البارت الثآني بالطريقــ…

البآرتـ الثانيـ بالطريقـ……~

حبيبتي الروايه تجنن انا شي اسمه روايه اموت علييه بليز نزلي البارت الثاني وانا لا اوصيك روايتي دوريها في قسم الروايات الطويله اسم الروايه حبيبي غير حياتي ماني منزله البارت الثاني ليييييييييييييين تعلقين