.. السلام عليكم ورحمة الله وبركاته ..
هذه روايتي الآولى او مثل ما اطلقت عليها " لوحتي الاولى "
اسميتهـآ { بالعيون تغيـب لكن بالقلب اقرب قريـب }
.. أتمنى انها تنآل رضاكم وتعجبكم ..
عندما يقترب المساء وتتوارى
الشمس خلف الافق يحل بهدوء
ينتابني شعـور خفي ابحر به
بمخيلتي بلحظـات عـشتها
فا امسك القلم فـتعجز الحروف
والكلمات عـن وصف المشاعـر
ويعجز قلمي عن التعبير فتهرب مني
الحـروف و يخونني التعبير لماذا ؟
هـل مازلـت اجهل شعــوري
فا احاول جاهـده جمع شـتات
أفكاري لتتضح الرؤيـا امامي
آآه كم هو صعـب ان تجهل ذاتك
وان يخالجك احـسـاس لاتعـرفه
عندها اغمض عيني لانعم بالهدوء
فا اصحو مع إشـراق فجـر جديد .
~~~~~~~~~~~~~~
~~~~~~~
~~~
*ـ* نبدأ بتعريف ابطآل الروايـه *ـ*
الجد/ عبدالرحمن ابو سلطان عمره 72
الجده/ منيره ام سلطان عمره 69حبوبه وطيبه
~~~~~~~~~~~~~~~~
..عائله ابو عبدالرحمن ..
~~~~~~~~~~~~~~~~
الاب/ سلطان ابو عبد الرحمن عمره 51
الام/ منى ام عبدالرحمن عمره 48
عبدالرحمن/ عمره 26متزوج ولديه من الابناء تؤام "بنتين"
كادي و كيان عمرهم سنتين
زوجته/ هنادي مملوحه وحبوبه وتحب الكل
فيصل/ عمره 21شاب وسيم رومنسي جسمه كلاسيكي
وله سكسوكه شعره طويل شوي (يشتغل في الشركه)
انوار/ عمره23 بنت مملوحه بيضاء و نحيفه
شعرها اسود ( شلال) تدرس بالكليه ( رياضيات)
عبد الله/ عمره 15 نحيف يميل للبياض يدرس في( ثالث متوسط)
لينا/ عمره 9 بنت مملوحه ودلوعه شعرها أسود وقصته(كوري) تدرس في (ثالث ابتدائي)
~~~~~~~~~~~~~~
.. عائلة ابو راكان ..
~~~~~~~~~~~~~~
الاب/ عبدالعزيز ابو راكان عمره 49
الام/ فاطمه ام راكان عمره 45
راكان/ عمره 24 متزوج وله ولد اسمه عبدالعزيز عمر سنه
(ويشتغل في الشركه )
زوجته / تهاني بنت مملوحه وحبوبه.
رائد/ عمره 22شاب مملوح طويل وأبيض له سكسوكه
رومنسي ويحب الاشعار (يشتغل في الشركه)
ريناد/ عمره 21 بنت مملوحه وكله أنوثه بيضاء وجسمه حلو
عيونه عسليه وشعرها اسود لحد أكتافه تدرس(باالكليه حاسب)
ريهام/ عمره 18 مملوحه جسمه حلو لانحيفه ولاسمينه شعره أسود
ناعم طويل لحد ظهره عربجيه أشوي تدرس (بثاني ثانوي/علمي)
رامي/ عمره 14 ابيض جسمه مليان يدرس في( ثاني متوسط)
ُربى/عمره 9 حبوبه ودلوعه شعره ناعم تدرس في ( ثالث ابتدائي )
~~~~~~~~~~~~~~~
.. عائلة العمه ام معاذ ..
~~~~~~~~~~~~~~~
الاب / ماجد متوفي " منذ 12 سنه "
الام / ساره ام معاذ عمره 38
معاذ/ عمره 22 شاب مملوح طويل ابيض يميل لنحف
له شارب وعوارض خفيفه لون شعره بني (يشتغل في الشركه)
(متحمل مسؤلية امه واخته من وفاة ابوه يعني صايرلهم الاب والاخ)
مايا / عمره 19 بنت مملوحه وكله أنوثه بيضاء وعيونه عسليه
جسمه حلو "لانحيفه ولاسمينه" وشعره ناعم ولونه"بني فاتح"
لنص ظهره "مدرج" تدرس في (ثالث ثانوي/ علمي )
~~~~~~~~~~~~~~~
.. عائلة ابو فارس ..
~~~~~~~~~~~~~~~
الاب/ محمد ابو فارس عمره 43
الام/ نوره ام فارس عمره 39
فارس/ عمره 22 وسيم يميل لسمار طويل جسمه رياضي
(يشتغل في الشركه)
تولين/ عمره 21 بيضاء جسمه حلو شعره لحد أكتافه لونه"أسود"
تدرس باالكليه (حاسب)
مروان/ عمره 20 شكله جذاب وحلو يميل لسمار له سكسوكه
(يشتغل في الشركه)
تالا/ عمره 18 جسمه حلو بيضاء شعره بني ناعم لحد ظهره
"مدرج"وعيونه عسليه تدرس (ثاني ثانوي/علمي)
زياد/ عمره12 نحيف يميل لسمار يشبه أخوه فارس يدرس
في " سادس ابتدائي "
~~~~~~~~~~~~~~~~
.. عائلة العمه ام شادي ..
~~~~~~~~~~~~~~~~
الاب/ يوسف ابو شادي عمره 45
"شديد وعصبي عن اللزوم"
الام/ هدى ام شادي عمره 39
شادي/ عمره21طويل أبيض له شوارب خفيفه حبوب وعلى نياته
(يشتغل في الشركه)
شجون/ عمره 19 نحيفه بيضاء شعره ناعم لونه "بندقي"
هاديه وحساسه تدرس في (ثالث ثانوي/علمي)
شهد/ عمره 10 بيضاء شعره قصير"تشبه اخته شجون"
ودلوعه تدرس في (رابع ابتدائي )
~~~~~~~~~~~~~~
.. العم خالد ..
~~~~~~~~~~~~~~
خالد / العم الاصغر عمره 29
" ماتزوج " اسمر مليان أشوي و(يشتغل في الشركه)
~~~~~~~~~~~~~
.. ملأحـظـه ..
~~~~~~~~~~~~~
1/ الشركه موحده .. يعنــي :
( كلهم يشتغلون في شركه وحده اللي هي لبوهم اوللجد ابوسلطان )
2/ الشخصيات الباقيه نتعرف عليها في الروايه *-*
3/ احداث الروايه خيآليه .. لكن الاغلب حقيقيه .
4/ الروايه تحتوي على { الخيال .. حقيقه .. رومنسيه .. حقـد .. جريمه وقتـل .. انتقآم … و }
~~~~~~~
~~~
^ـ* بالعيون تغيب لكن بالقلب اقرب قريب ^ـ*
{ تغريـد الخآلد }
^ـ* البارت الاول ^ـ*
تطير بنا أحلامنا عند النجوم
ونعانق بسعادتنا الغيوم
نعيش بأحلى دنيا
وبأجمل أحاسيس
ليل وسعادة وشجون
ودنيا ننير جنباتها بعشقنا المجنون
لازلت غصنا مورقا في جنبات قلبي
مزروع بداخل روحي
أعرف أن الأيام قاسية
والانتظار مـر
والبعد جـارح
ولكن تلك هي حياتنا
وهـذه أقــدارنا…"
جالسه تكلم باالتلفون / والله صدق أنزين متى
دخلت عليه ريهام طايره وبصوت عالي
/ رينادووووه للحين مالبستي
ريناد بفزع / بسم الله الرحمن الرحيم وشفيك أتصارخين
ريهام /عمي ابو عبدالرحمن وصل وانتي للحين مالبستي
ريناد مطيره عيونه/ صدق والله نسيت خذتني السوالف مع ملاك
ريهام / طيب ياالله سكري السماعه وقومي لبسي
ريناد / طيب الحين بقوم
و طلعت ريهام من الغرفه…….
ريناد ماسكه السماعه/ اوكي ملاك عماني وصلو ياالله اكلمك بعدين
ملاك / اوكي باي قلبو
ريناد / بااااي
قفلت السماعه ريناد وراحت تبدل ملابسها ….
~~~~~~~~~~~~~~~~~~~~~
~~~~~~~~~~~~~~
: في الصاله عند الحريم :
30 : 6
ام راكان / ياهلا والله ومسهلا ياحيا الله من جانا
ام عبدالرحمن/ الله يحيك
نزلت ريناد وسلمت عليهم ..
..وجلسو يسولفون ويضحكون ..
~~~~~~~~~~~~~~~~~~~~~
~~~~~~~~~~~~~~
: في مجلس الرجال :
ابو راكان/ ياهلا والله ببوعبدالرحمن تو مانور البيت
ابوعبدالرحمن / منور بهـله
ابو راكان / اجل وين عبدالرحمن ليش ماجا معاكم
ابوعبدالرحمن / والله توني متصل عليه يقول هذاني في الطريق
ابو راكان / الله يستر عليه
ابوعبدالرحمن / إلا راكان وينه ماشوفه عندكم
ابو راكان / يعني ماتعرف راكان آخر واحد يجي
الكل / ههههههههههههه
ابو راكان / رائد قـم جب القهوه
رائد / أبشـر يبه
قام رائد وراح يجيب القهوه إلا سمع الباب يطق وراح يفتح الباب
رائد / هلا والله
….. / هلابك .. أخبارك
رائد /الحمد لله …. معاذ إلا وين الاهل؟؟
معاذ / هذاهم جايين وراي بس تعرف الحريم وحركاتهم
أبتسم رائد / أنزين تفضل البيت بيتك ..
بعدين راح عشان يدخلون ….
معاذ وهو يرجع للسياره / ياالله يمه وشفيك تأخرتي
ام معاذ / وانت وشفيك مستعجل
معاذ / لابس قلت يمكن فيك شي عشان كذا تأخرتي
ام معاذ / لا مافي شي بس تعرف أمك كعب وحركات
معاذ / هههههههههه
مايا/ معـاذ وشفيك تضحك على ماما خلها تدلع علينا
ام معاذ / هذي بنتي حبيبتي موهذا
"وهي تأشر على معاذ" ماعنده غير الضحك
معاذ / لا شكلنا بنجلس هنا
ام معاذ / وخر بس ………. "دفته ودخلت من عند الباب"
مايا وهي تقرب من معاذ / ما كأن الوالده زعلت منك
معاذ / شكله كذا …"وراح لحقه وهو يصوت له"/ يمه.. يمه
ماكانت ترد عليه كانت تمشي واللي يرد عليه صوت الكعب …
معاذ / سوسو( دلع لساره) ليكون زعلتي والله أمزح معاك ..
"وراح وباس راسه"
ام معاذ وهي تخفي ابتسامته/ ايه عاد خليك تعيده مره ثانيه
وش تحسبني تراني توني أصغيره
معاذ / خلاااص ما أعيده تـووووبه
مايا / سوسو رضيت هذا أهم شي …
"وبهمس".. معاذ مو اللي واقف قدامنا رائد
معاذ / إلا فشلتوني عنده ساعه واقفين عند الباب
رائد / هـلا والله بام معاذ
ام معاذ / هلابك يا وليدي وش أخبارك
رائد /الحمد لله بخير .. تفضلــو
دخل رائد ومعاذ عند الرجال وام معاذ ومايا عند الحريم …
^ـ* بالعيون تغيب لكن بالقلب اقرب قريب ^ـ*
{ تغريـد الخآلد }
~~~~~~~~~~~~~~~~~~~~~
~~~~~~~~~~~~~~
: في الصاله عند الحريم :
الكل قام يسلم عليهم " ام معاذ ومايا "
ام راكان/ عطيني عبايتك خليني اعلقها
ام معاذ / انا أعلقها عنك
ام راكان/ والله لاخذه انا … " واسحبت العبايه منه "
ام معاذ / ههههه تفضلي … " واعطته العبايه "
ام راكان وهي تلتفت/ ريهام قومي خوذي عباية مايا
ريهام وهي تقوم/ ان شاء الله يمه
وراحت متجهه لمايا اللي كانت تفصخ عبايتها
ريهام / ميمي عطيني عبايتك أعلقها
مايا / على الفرغات … " ومدت لها العبايه "
ريهام / بلا مساخه … " وضربتها على كتفها وأخذت العبايه منها "
مايا / هههههه آآآآي يا الدبا عورتيني
ريهام وهي تعلق العبايه / أحـســن
ريناد وهي داخله من برا / تفضلي ياهلا والله بجدتي
الجده وهي تدخل / الله يحييك يا بنيتي .. الا من جاء
ريناد / جاء عمي ابوعبدالرحمن وعمتي ام معاذ
"ريناد ماسكه يد جدته ودخلو الصاله" …..
الجده / السـلام عليكم
الكل / وعليكم السلام
… وقام الكل يسلم عليهـا … وبعدين جلسـو …
دقايق إلا ام فارس داخله مع بناته ….
ام فارس / السـلام عليكم
الكل / وعليكم السلام
… وقام الكل يسلم عليهـا …
الا دخلت وراهم هنادي/ السـلام عليكم …
"هنادي زوجت عبدالرحمن "
الكل / وعليكم السلام .. وراحو يسلمون عليها
الا ام شادي داخله / السـلام عليكم
الكل / وعليكم السلام .. وراحو يسلمون عليها
بعد ماخلصو سلام جلسو يتكلمون ويتقهون..وحلى جاي وحلى رايح
الا تهاني داخله / السـلام عليكم
الكل / وعليكم السلام ..
" تهاني زوجت راكان "
~~~~~~~~~~~~~~~~~~~~~
~~~~~~~~~~~~~~
: في مجلس الرجال :
الجد / صب قهـوه يارائد وخل عنك الكـلام الزايد
رائد / أبشـر … " واخذ فنجاله وصب له "
الجد وهو يأخذ الفنجال/الحين لو أنتم جايين عندي مو كان احسن
ابو راكان / الا أحسن لكن ان شاء الله المره الجاييه عندك
لكن انا قلت نغير جـو
الجد / خير ان شاء الله .. إلا وين راكان
ابو راكان/ هذا هو الحبيب عند طاريه
الا راكان داخل / السـلام عليكم
الكل / وعليكم السـلام … وقامو يسلمون عليه
الجد وهو يجلس / راكان يعني ماتخلي طبعك
راكان وهو يبعد المركاة ويجلس / أي طبـع
الجد / لابعد يتغيبى .. طبـع التأخيـر
الكل / ههههههههههههه
راكان / هههههههه ايه .. لابس كان عندي شغل
الجد / أي شغل هذا وهي عزيمة ابوك
راكان / بعد وش أسـوي أشغال
الجد بعصبيه / أسكـت بس أسكـت قال أشغال
رائد / جدي عطني فنجالك اصب لك قهوه
الجد بزعل / خــذ … " وعطاه الفنجال "
راكان بهمس / زين انك لحقتني
رائد بهمس / افـاا عليك اعرف اصرفه
معاذ / يعجبك رايدوه
راكان بهمس / ايه والله كان للحين يتكلم
الجد / راكــان
راكان وهو يلتفت / ســم
الجد / جبت زوجتك و ولدك
راكان / ايه جبتهم
راكان بهمس لـ معاذ / اشوى احسبه بيكمل أهواش
معاذ / شكـل جـدنا ناويك اليوم
راكان / الله يستر
معاذ ورائد / ههههههههههههه
(( الجد عصبي شوي هو كذا كلامه يعني حتى لو كان رايق
عليه بعض الكلمات لكنه طيب وحبوب من جواته ))
~~~~~~~~~~~~~~~~~~~~~
~~~~~~~~~~~~~~
: في الصاله عند الحريم :
ريهام / بنات خلونا نروح فـوق
تالا / اصبري اشوي خلينا نتقهوى
مايا / قومي بس يكفي
شجون / يا الله توته قومي
ريهام وهي تلتفت/ انوار تروحين معانا فوق
انوار / لا مالي خلق
ريهام / طيب اسألي ريناد وتولين
انوار/ ريناد تولين تبغون تروحون فوق
ريناد/ لا مو الحين .. كملي تولين وش صار << متحمسه الاخت مع سالفة تولين
انوار / يقولون لا بعد أشوي
ريهام / خلاص ابكيفكم
شجون/ ياالله أجل حنا نروح
بعدين قامو البنات وراحو على فوق ….
^ـ* بالعيون تغيب لكن بالقلب اقرب قريب ^ـ*
{ تغريـد الخآلد }
~~~~~~~~~~~~~~~~~~~~~
~~~~~~~~~~~~~~
: عـنـد الـشـبـاب :
مروان /هههههههههه والله انه مقطع
فيصل / لا بعد ماشفت شي .. شوف هذا
مروان/ خطيــــــر ارسله لي
وطلع جواله وارسله فيصل ……
رائد / خير انت وياه احترمو اللي جالسين معاكم
فيصل ومروان يناظرون بعض / وحنا ايش سوينا
معاذ / ههههههههه .. " يضحك لانه فاهم رائد زين "
رائد / احلف بــس كل ذا ولاسويتو شي
ورونا ايش تضحكون عليه
مروان/ اهـااا كذا .. والله انك نشبه
رائد / انا نشبه يالخايس
مروان / اندري عنك حاشرها بعد حتى في ضحكتنا
رائد / هين يامروانووه تجيلي في الاا اقوووول
مروان / خلاااص يالفضيحه لاتقول .. ياالله ابرسل لك المقطع
الشباب / هههههههههههههه
معاذ / والله وعرفت تلعبها صح يرايدوه
رائد / اجل ايش على بالك هين انا هههههه
معاذ / ههههههه ياشين الثقه الزايده
مروان / اخلص انت استقبل لااهون الحين
رائد / تهون هـااا " وبصـوت عالي " ياشـبــــــاب ترا مروان الخـاايس كان يــ…..
مروان طيرعيونه وقاطعه / خـلااص يالفضيحه طلع جوالك
اعوذ باالله مايعرف يمسك لسانه
الشباب / هههههههههههههه
رائد دخل يده في جيبه بيطلع جواله لكن مالقاه ….
رائـد / اوووه شكلي نسيته في غرفتي
مروان / فكـه
وقام رائد / لاتفرح راجع لك يالخايس
وطلـع راح يجيب جواله……….
~~~~~~~
~~~
^ـ* بالعيون تغيب لكن بالقلب اقرب قريب ^ـ*
{ تغريـد الخآلد }
~~~~~~~~~~~~~~~~~~~~~
~~~~~~~~~~~~~~
: عـنـد الـبـنـات :
ريهام / بنات خلونا نسوي شي
مايا / يعني وش انسوي
ريهام / أي شي
تالا / بنات وش رايكم نرقص
شجون / والله وجبتيها يا توته
ريهام وهي توقف/ يا الله بنات اتجهزو وانا ابروح اجيب الاستريو
مايا تروحين معاي
مايا / اوكي ياالله
وقامت مايا وطلعت مع ريهام …..
تالا / شوشو ترا تبغين ترقصين معانا
شجون / يعني ماتعرفيني ياتوته ماحب الرقص
تالا/ والله مو على كيفك راح ترقصين معانا وغصب بعد …
ريهام ومايا طلعوا من الغرفه " اللي هي غرفة ريناد و ريهام"
مايا / رورو وين الاستريو
ريهام وهي تأشرعلى الغرفه اللي قدامه/ بغرفة رائد
مايا / خلاص انتي ادخلي وانا انتضرك هنا
ريهام/ وش تنتضرين رائد مو فيه عند الرجال
مايا / متأكده طيب يمكن جالس بغرفته
ريهام تدفها مع ظهرها/ أقول امشي وراي وانتي ساكته أقولك مو فيه
مايا / خلاص أوكي بس لاتدفين عورتي ظهري
ريهام تسبقه وتفتح باب غرفة رائد وتدخل ..
ريهام / ياالله ميمي تعالي مافي أحد
بعدين دخلت مايا الغرفه ..
ريهام / هذا أهو الاستريو ….." وهي تفتحه " اففف شوفي
ايش حاط داخله شريط أشعار لحامد زيد
مايا / وانتي ايش دخلك منه يحط اللي يبغاه
ريهام/ بدينا با المدافعات على غفله يا " روميو وجوليت "
(( مايا ورائد يحبون بعض من يوم هم أصغار
والكل يعرف بحبهم العذري ))
مايا أتصرف/ خلصينا بس خلينا ناخذ الاستريو ونطلع
ريهام/ طيب نأخذه بدون شريط … أسمعي انا بدور هنا باالاشرطه
وأنتي دوري باالمكتبه يمكن نلقى شي
مايا وهي تتجه للمكتبه / طيب
وبدت ريهام ومايا يدورون على الشريط……..
فجأه الباب انفتح …. ريهام معطيه الباب ظهره
اما مايا التفتت وأنصدمت من اللي قدامه
لان رائد اهو اللي دخل !!
من زمان الطـفوله وانت والله الحبيب
مِستحـِل // قلبي // من حنا صغـار ~"
وقتها كنت طفـله .,. وضعها مريب .,.
داخلي شيء لك ؟؟ ماهو مجرد جوار
كان عندي شعور < لانظرت < لك غريب
تعتريني ) سعاده ( ومن الأطفال ) أغار (
كان هـذا شعـوري قبل :: سن الرقيـب ::
قبل ما يعـذبوني أهي // بلبس الخمار //
اختفيت وأنا "حافظتك" عن ظهر غيب
وما بقلبي }غيرك أنت{ من الطفوله تذكار
ريهام اللي على نفس الوضعيه ما التفتت لان على باله
اللي دخل تالا او شجون
ريهام / تالا وشجون تعالو دورو معانا
رائد اللي هو منصدم بعد من اللي قدامه و يناظره…..
"الله هذي مايا … والله وكبرتي … ومن زمان ماشفتك…و و …. طبعن هاالكلام يقوله في قلبه "..
اما مايا منصدمه فيه وما قدرت تتحرك او تتكلم …
ريهام لما مالقت أجابه صرخت/ تالا و وجــع ….
بعدين التفتت "إلا رائد قدامه ويناظر مايا "
ولتفتت على مايا " اللي وجه احمر وتناظره "
ريهام لما شافتهم كذا جتها الضحكه " بعدين راحت لم رائد"
ريهام / رائد .. رائد ……….. ( مارد عليه )
شافت مافيه فايده معاه دفته وطلعته برا الغرفه …
ريهام/ هييييه انت اشفيك أكلت البنت بعيونك
رائد وهو يصرفه/ هـا … إلا انتي وش اتسوين ابغرفتي
ريهام/ ما اسوي شي بس جايين نأخذ الاستريو إلا انت وش عندك جاي
رائد / ااااء نسيت جوالي وجاي أخذه
ريهام / طيب وين حاط جوالك عشان اجيبه لك
رائد / هااااه … مدري لاكن اظنه فوق السرير
ريهام / خلاص وقف عندك انا داخله اجيبه لك
دخلت ريهام الغرفه ولقت مايا على نفس الوضعيه ما تحركت من مكانه…..
ريهام وهي متجهه لسرير/ ميمي ترا رائد طالع من زمان
انتبهت له مايا / هــااه وش قلتـي
ريهام وهي تأخذ الجوال / لا سلامتك بس اقولك رائد طلع
مايا استحت اكثر من كلامه ونزلت راسه
اما ريهام طلعت وعطت رائد الجوال ….
رائد اخذ الجوال وراح للمجلس وطول الطريق يفكرفيها …
^ـ* بالعيون تغيب لكن بالقلب اقرب قريب ^ـ*
{ تغريـد الخآلد }
~~~~~~~~~~~~~~~~~~~~~
~~~~~~~~~~~~~~
: عـنـد الـشـبـاب :
) نظرة ولع )لمحتها في عيونك "
فيها معاني } فايقة{ كل توصيف ~
لا لا تكابري كل ^ نظرة تخونك ^
ترى النواظر صادقه مابها زيف
النشوة اللي فوق ) رعشة جفونك (
تحكي حديث //عذب// من دون تكليف
دخل رائد المجلس وهو مبسوط لاخر درجه والابتسامه ماليه وجهه
شادي/ خير وش مناسبة ها البتسامه
رائد وهو يجلس/ والله لو شايف اللي انا شايفه كان ما سألت
شادي ومروان / وش شفت
رائد والابتسامه شاقه وجهه / شفـت القـمـر
شادي ومروان يناظرونه ويناظرون بعض …
معاذ / تنكت انت و وجهـك (وحط يده على جبهة رائد) آآآح جبهتك حـااره
رائد يناظر معاذ وهو يبتسم ويقول في نفسه
(والله لو تدري ان القمر هي اختك كان عذرتني )
فيصل / لا لا الولد فيه شيئ
مروان ضرب رائد على كتفه / تبي تتكلم انت ولا اشلـون
رائد / وشفيكم منتم مصدقيني أقولكم شفت الـقـمــر
معاذ / الولد معذور بدى يهذي حرارته مرتفعه
الشباب / هههههههههههههههههه
مروان / جبت الجـوال
رائد / أي جـوال
فيصل وبصوات عالي / الحق ياراكــاااان على اخوك
التفت راكان اللي كان يسولف مع عبدالرحمن
/ وشفـيــه
مروان / حرارته مرتفه وبدا يهذي
راكان بقلق/ رائد وشفيك
رائد / ماعليك منهم مافيني شي
راكان / اكيـد
رائد/ اكيــدين
معاذ / كلامك ابد مو داخل مزاجي قول وشفيك
رائد / لالا والي يرحم والديك خل مزاجك على جنب
معاذ استغرب منه و ناظره ورفع حواجبه …
رائد حب يغير الموضوع لانه يعرف لوطولها معاذ راح يكشفه
" معاذ ورائد قريبين من بعض ويفهمون على بعض "
رائد وهو يمسك جواله / ارسل اللي عندك يالخايس
مروان / ياالله استقبل
معاذ كان شاك في رائد لاكن فضل انه يسكت …..
التفت رائد إلا معاذ يناظره / معاذ معوذي حبيبي انت
خلاص لاتجلس تناظرني كذا والله ماسويت شي
الكل بدا يناظرهم … وفجأه ضحكوا عليهم بصوت واحد
الشباب / هههههههههههههه
معاذ ابتسم و لف عنه ……
رائد / يقطع ابليسك يامروان هههههههههه
معاذ افتح جوالك واستقبل هاالمقطع
معاذ ببرود / لهدرجه عاجبك
رائد / وشفيك خلاص مولازم ارسله لك بس شوفه
وقام جلس جنبه وعطاه جواله عشان يشوفه …
~~~~~~~~~~~~~~~~~~~~~
~~~~~~~~~~~~~~
: عـنـد الـبـنـات :
ريهام ومايا أخذو الاستريو والاشرطه ورجعو عند البنات
ومايا كانت طول الوقت سرحانه
تالا / ميمي وشفيك منتي معانا
مايا / هـااا … لا معاكم
ريهام وهي ماسكه شريطين/ وشرايكم بنات نشغل هذا الشريط ولا هذا
شجون / والله بكيفكم وش رايك انتي ميمي
مايا سرحانه وماردت عليهم ….
تالا تلتفت على ريهام / رورو وشفيها ميمي من يوم ما رجعتو
وهي مو طبيعيه
ريهام وهي تضحك/ ههههه أعذروها شايفه حبيب القلب
تالا / صدق عاد .. والله عليك حظ
شجون / المفروض تفرحين انك شفتيه
مايا انحرجت من كلامهم وصار خدودها حمرا/ خلااااص بنات
البنات / ههههههههههههههههه
تالا /والله إني أحسدك ياميمي الكل يعرف إنك تحبين رائد وهو يحبك
مايا تضيع السالفه / ياالله قومو نرقص ولا ما تبغون
ضحكو البنات عليها لتغيرها السالفه وقامو يرقصون …
وشغلت ريهام الاستريو وطولتـه وبدوا البنـات رقـص واستهبااال
وفجأه دخلت ريناد وانوار وتولين عليهم وبدوا يرقصون معاهم
وخلـص اليوم رقص واستهبال وتعليقات على مايا ورائد
… وبعد كذا الكل راح على بيته …
*
*
*
*
*
*-* نهاية البارت *-*
.. البارت الاول خليته كاتعريف للعائلات ..
ابغى رايكم وتعليقاتكم بـ البارت
*
*
*
*
؟؟ ماهو رايك/ي ببداية الروايه ؟؟
؟؟ مارايك/ي باالشخصيات بشكل عام ؟؟
؟؟ من اللي لفت انتباهك/ي أكثر ؟؟ وليش ؟؟
؟؟ مارايك/ي بحب مايا ورائد؟ وهل تعتقد انه راح يكمل هاالحب ؟؟
؟؟ كلمه تحب/ين اضافتها ؟؟
*
*
*
*
*
وانتظرو البـارت الثااني ..
لكن بعد ما اشوف تعليقاتكم ولماساتكم على لوحتي
التي تضيف لها رونق وجمال الالوان
تحيآتي
{ تغريد الخآلد }
.gif "New Graaam (235)")
|
المشاركة الأساسية كتبها ضمني بين الاهداب
 |
منـووره يـ الغ ـلآآ
| 3 / يتم إغلاق الروايه في حال طلبـ ..الكاتبــ ــة…إغلاق الـرواية..أو…لـتأخرها…أهمالها ..أو..لـتجاوزات في الردود او في حال تأخر الكاتبة لـ أكثر من عشرة أيامـ وتفتح حين جاهزية الأجزاء.. |
تغلق الروايه