ترى الكويت من بعد عينك ياغالي ورب الكعبه ياجابر يتيمه

أشوفك حلم وتسأل كيف حالي !
تقول شلونها كويتنا القديمه

عساها بخير مع أهلي وعيالي ؟
عساها تحيا في عيشه كريمه

ترى إنتوا فيكم الخير وبدالي
وفيكم حب عسى ربي يديمه

سكّت ودمعه في عيني تلالي
وعبره في قلبي بأقصى صميمه

أخاف أشكي وأقول اللي في بالي
وأخاف أحكي وأزيد الجرح قيمه

وجيته خطوتي تسبق خيالي
أجر حزني و بسمات سقيمه

وأنا أضحك بكذب وصوت عالي
أبشرك خير !! وأمور أهلك سليمه

كلنا أخوان وحبنا شي مثالي
ولا أحزاب ولا في أي ظليمه

وفجأه يقول جاوب عن سؤالي
وقول الصج بلا كذوب لئيمه !

وأنا في حضرته ولا أقوى الكذب تالي
وتصرخ عبره من قلبي عظيمه