طبعا الروايه عجبتني وحبيت انقلها لكم للكاتبه سراب الصحراء…..
اعتدنا جميعا أي قصه تحمل احداث يكون ابطالها من الجنس الناعم وتدور القصص عليهم ماذا لو كانت روايه تحمل سبع شباب من مختلف الاعمار والافكار والتصرفات يجتمعون بظروف غامضة ويكون كيد النساء شريك لهم …اول رواية لي لو شفت انطباعات جيده بعد هذا البارت ابشرو بتكمله ترضي اذواق القراء اتمنى تعجبكم الروايه ويكون لها طابعها الخاص….
خالد شاب شاعر رومنسي وعطوف وبنفس الوقت قوي شخصيه لانه كان وحيد لامه وابوه ماتوا بحادث سياره لما كان عمره اربع سنين وعاش عند عمه بذل ومهانه ولما صارعمره 15 طردته مرة عمه علشان عندها بنات دبر له عمه شغل ياكل منه لانه يحس بتأنيب الضمير بسبب انه اخذ ورثه ماكان ورث كبير لكن الطمع فيه وفي زوجته عاش بعدها وحيد يدرس ويشتغل لما خلص الثانوي وكمل بكالوريس قانون وماجستير ويعتبر من اكبر المحامين المعروفين مايمسك قضية ويفشل فيها اخذ له شقه في الرياض وعاش فيها
عبد العزيز شاب ترك الدراسه لانه هو الوحيد اللي يصرف على اهله بعد ماتخلى عنهم ابوهم وهو شخص عصبي جدااا وقاسي بسب تحمل المسؤليه صغير
فهد شاب مهزوز الشخصيه يشتغل مع ابوه في محل بيع العطورات ودايما ابوه مسيطر عليه ورافض انه يكمل دراسته
نايف شاب مدلع لان ابوه متوفي وامه ماعنده إلا هو فكانت تخاف عليه من الهواء الطاير فاشل من الدرجه الاولى في دراسته
سعود جراح قلب كبير ومعروف طيب لابعد الحدود ولايحب يتعدى اخلاقيات مهنته يساعد الغير بحدود مقدرته
ناصر فاشل بالحياة بشكل عاام صغير بالعمر ولكن ذكي بدرجه اولى وخلينا نقول شاطر في حل المسائل الرياضيه رغم انه توقف عند المتوسطه بنفس الوقت راعي فزعات وهب ريح مثل مايقولون
تركي ظابط ومحقق جنائي عكس سعود بمئة وثمانين درجه ودائما يتعدى مهنته عشان يطلع ناصر من مشكله معينه
سبع شباب اجتمعوا بظروف مختلفه لهم مغامرات وقصص محزنه ومضحكة وهموم ومشاكل
تركي وهو يحاول يبعد ناصر عن العامل:خلاص مامداك تطلع من الحجز يابن الحلال
ناصر وهو يعدل ياقة ثوبه:ماتشوفه وشلون يناظر فيني
تركي:وانت كل واحد يناظر فيك بتضربه خلاص جلدك يحكك تبي ترجع الحجز
ناصر يفتح باب الجيب من الطراز القديم ويرمي الفروه داخله :انت عارف ان هالمره السبب مو مني
تركي:ليه ان شاء الله الرخصه والاستماره لي يعني
ناصر :لا بس نسيت وبعدين انا كنت بالحجز مايمديني اسويها
تركي:ايه يجيب الله مطر انا عندي دوام الحين روح ياناصر بيتك على طول بدون أي مشاكل ولاتلحقني كالعاده
رفع ناصر حاجب:سلامات ماني مسوي شي بس لاحد يتعرض لي
تركي:ماودك طال عمرك بموكب ملكي بعد
ناصر:لاتسلم يللا نشوفك على خير
ركب ناصر السيارة وتوجه لبيت شعبي في احد الاحياء البسيطه وهو سكنه طبعا وقف عند باب البيت وشاف ابو حمد جارة ثقيل الدم متوجه عنده ابتسم غصب:هلا ابو حمد
ابو حمد والخوف بعيونه:هلا ولدي ناصر
ناصر وهو مستغرب ولدي:نعم وش تامر فيه توني طالع من الحجز ابي انام واذا عندك أي مشكله ناوي تدخلني فيها خلني بعد ماصحى
ابو حمد:لاوالله ياولدي بس انا جاي بسالك ومستحي منك
ناصرحس السالفه فيها فزعه:امر ياعم رقبتي سداده لك
ابو حمد وهو منزل راسه ويبلع ريقه الجاف :بنتي
ناصر:وشفيها
ابو حمد:لها حوالي يومين او اكثر مختفيه من البيت
ناصر وهو يحاول يستوعب الموضوع:طيب مابلغتو الشرطه
ابو حمد:بيني وبينك هي من سمعة بسالفة خطبتها من ولد عمها وهي تتهدد وتتوعد وشكلها هربت عشان تحطني قدام الامر الواقع
ناصر:طيب مادورت عليها في بيت اقرباكم او صديقاتها
ابو حمد:قلبت الدنيا عليها ماتقول الاالارض انشقت وابلعتها
ناصر:لاحول ولاقوة الابالله طيب وش اقدر اساعدك فيه ياعم وانا حاضر
ابوحمد مامداه يفتح فمه يتكلم الا عبس ناصر بوجهه ومسكه من ثوبه:والاقصدك انا اللي خاطفه ومخبيها عندي شوف انت ياشايب النار مثل ماقلت لك توني طالع وماشفت احد ولااحد شافني ولاادري ان لك بنت بهالاسم او عندك عيال اصلا
ابو حمد وهو يتنفس بضيق ويرفع وينزل صدره بسرعه:وشفيك انا ماقلت شي بس
قاطعه ناصر وهو ينزل يده عن ثوبه ونظرات الشك لحد الان في وجهه:بس وشو
ابو حمد:بس انا قلت تعرف صديقك الشرطي قلت يمكن يساعدنا بدون ماحد يدري
ناصر:اهاا ماعليه ان شاء الله بقوله واشوف وش يقدر يساعدك فيه بس اعذرني انا تعبان الحين وابي انام اول ماصحى ان شاء الله اكلمه
ابو حمد:خلاص على راحتك بس طمني الله يخليك
ناصر:ان شاء الله مع السلامه
ابو حمد وهو مازال بمكانه :الله وياك الله يحفظك ياولدي
خالد في مكتبه بالبيت ويدور في عدة قضايا جاه اتصال من تركي :هلا والله تركي
تركي:هلا خالد شخبارك
خالد:تمام وينك ماتنشاف
تركي:والله ابد ترا نويصر طلع اليوم من الحجز
خالد بارتياح:دفعت الكفاله
تركي:ايو مثل ماوصيتني وبدون لايدري
خالد:مشكور تركي ابتسم قبل مايقفل وصل بيته بدون مشاكل
تركي:ههههههههههه لاتخاف عليه سوى مشكله بسيطه اول ماطلع وشكله الحمدالله ارتاح نفسيا عشان يقدر ينام بس
خالد بعد ضحكه طويله:اوكي زين اجل
تركي:اوكي اخليك الحين فمان الله
خالد:الله وياك
رجع خالد للاوراق اللي بين يديه دق جواله برقم غريب رفع الجوال وهو يكلم نفسه :غريب هالرقم يتصل فيني باستمرار ضغط الاخضر وبصوته الجهوري:الو
قفل الرقم قبل مايتكلم
خالد رجع الجوال مكانه وحطه على وضع الصامت شكله اطفال يلعبون بالتلفون
ام زياد:ها وش سويتي
ردينا وهي تبكي بصمت:مثل ماقلتي لي لما سمعت صوته قفلت
ام زياد:الحين على وشو تبكين ماكانك انتي اللي حطيتي نفسك بهالمشكله
دعد وهي واقفه عند الباب بموقف المتفرج:بس مو بالهطريقه تعالجين الامر يمه
ام زياد:انتي اخر وحده تتكلمين وانتي ساس البلاء وش تبيني اسوي في هالمصيبه يعني
تبين كل اللي اعرفهم بكره يتشمتون فيني
في هاللحظه دخل زياد لابس بنطلون جينز سكيني وبلوزة سودا عليها علامات فيراري وهو يضغط بجواله البلاك ولاانتبه لبكي ردينا:ماما انا طالع تبين شي
ام زياد وكل القهر من ردينا طلعته في دلوعها :خير ان شاء الله وين بتطس في هالوقت
زياد:ماما اشفيك قايلك بطلع مع ربعي
ام زياد:ودني لخالتك قبل وبعدين روح وين ماتبي
زياد:ان شاء الله ماما ليه كل هالعصبيه انتظرك بالسيارة
ام زياد:وش سيارته هذاني بطلع معك سرياني روحي جيبي عباتي من الغرفه
زياد وهو يقرب من اخته دعد:وشفيها ماما اليوم
دعد وهي تضغط على اسنانها وتطلع بدون ولاكلمه
زياد:الحمد الله والشكر يارب نفسيات بهالبيت
رفع جواله ودور في الاسماء طلع رقم مكتوب عليه بالانجليزي فريندز
ضغط الاخضر وتحرك للصاله الثانيه :الو هلا يالغلا
:هلا فيك وينك انت امس ماترد
زياد:خلاص الحين بمر بيت خالتي وابي اشوفك اوكي
:بانتظارك
دخل ناصر البيت بتعب وكان ناوي يتوجه مباشرة لغرفة النوم لكن لاحظ ان انوار المخزن الخلفي مشتعله :معقوله نسيت اطفي الكيبل الرئيسي دخل بهدوء اطفى الانوار ودخل الغرفه بدون مايفتح ولا لمبه يبي ينام بهدوووء بس رمى نفسه على السرير
صوت مخنوق:اااي
قام ناصر مفزوع :بسم الله الرحمن الرحيم مين انتي وكيف دخلتي هنا؟!
وهي متغطيه بالغطاء وبصوت مخنوق:انا …انا دلال
وقف ناصر لحظات يستوعب الوضع:مين
لكن لامجيب ناصر:مين دلال
دلال:بنت ابو حمد
ناصر:ايش
دلال:داخله على الله ثم عليك ياخوي ماتخبر ابوي ولاتسوي لي شي
حس ناصر بالخوف ولاول مره بحياته بنت معه بنفس البيت وعلى سريره نايمه :يابنت الناس انا مالي بالمشاكل انتي مين دخلك هناا
دلال:تكفى لاتردني
ناصر حس بالضعف ولاول مره يمكن من صوت البنت او النوم اللي يحس فيه او مشاعر غريبه بلع ريقه:طيب وش المطلوب مني
دلال:اسمع سالفتي واحكم بعدها
ناصر وهو معطي السرير جنبه :اسمعك وارفعي الغطاء لاتنكتمين وابتلي فيك
دلال ودموعها شلال على خدها:ابوي زوجني غصب عني لولد عمي متزوج وعنده عيال وبيطلعني من الجامعه وبيهدم حياتي كلها انا مابي تصير حياتي نفس خواتي اللي قبل انا ابي ادرس واتخرج واتزوج شخص متعلم
ناصر ومو عارف وش يرد عليها :طيب انا يعني اقولها لاتزوج بنتك وبعدين حسب ماعرفت ابوك ملكك لك على ولد عمك خلاص يعني انتي الان بحكم الشرع زوجته
دلال:والله مو انا طلع اختي بدالي وقعت عني وقال اني موافقه عشان كذا هربت وجيت عندك
عقد ناصر وحواجبه وتغيرت لهجته لشويه عصبيه:وانتي كيف دخلتي البيت مو خايفه ابلغ عنك الشرطه
دلال:انا عارفه انك شهم ورجال من ظهر رجال وماراح تسويها فيني عشان كذا لاجئ تلك بعد الله
ناصر غلبته بهالنقطه:طيب وش عرفك ان البيت مافيه احد ؟!
دلال:انا ادري انك ماتبات في البيت اكثر من يومين وسمعت انك ماكنت موجود فيه فدخلت عليه من سطح بيتنا
ناصر وهو يحاول يغلب النعاس ويتثاااوب:طيب يابنت الناس ابوك طالب يدخل الشرطه بالامر ولو درى انك عندي هذي فيها عمر بالسجن
دلال:تكفى وبعدين خلي خويك يساعدك في هالامر
ذاب ناصر على صوتها ونعومته خاصة انه ماله احتكاك بالجنس الناعم ابد من فتره طويله:امري لله انا بطلع المجلس وانتي خليك داخل البيت ولو مهما صار يتفجر البيت ماتفتحين الباب ولاتطلعين لما اصحى واشوف وش بسوي
دلال وبصوت كله خجل ونعومه:ان شاء الله
قام ناصر مستعجل قبل مايتاثر بصوته ويفكر مين يساعد فيهم هل يوقف بصف دلال ويطنشه ابوها او يوقف بصف الاب ويسلمه دلال استسلم للنوم على ارضية المجلس اللي ماكان فيها غير بساط خفيف وهو متلحف بفروته
وصل زياد وامه عند بيت خالته نزلت ام زياد وهي تكلم زياد:انزل سلم على خالتك عيب وش تقول عنك
زياد:ان شاء الله يمه وشفيك تراني اعرف الاصول
ام زياد وهي منخنقه من سالفة ردينا:لو تعرفون الاصول انت وخواتك ماتسوون فيني كل هذا بعد تربيتي لكم
زياد كان ساكت ويسولف بجواله ومعطي امه طاف دق جرس البيت وكان بانتظارهم نورا :هلا خالتي تو مانور البيت
ام زياد:منور باهله امك فيه
نورا وتناظر زياد:ايه في الصاله
دخلت ام زياد بدون ماتناظر وراها تقدمت نورا وضربت زياد على كتفه
زياد:أي عورتيني وشفيك
نورا:انا اللي وش فيني وجع ان شاء الله ليه ماترد من امس انت وجهك
زياد وهو يقفل باب الشارع:وش اسوي كنت بالبر ومافيه سيرفر
نورا:يالنذل وليه ماقلت لي انك طالع البر
زياد:سلامات يابعدي بتطلعين معي هناك
نورا وتسوي نفسها زعلانه عطت زياد ظهرها وتتوجه لداخل البيت :لامن زين وجهك اقابلك في البر بعد بس بغيت اقولك اني نزلت لك البرامج اللي تبي على جهازك وكنت ابيك تمر تاخذه يمكن تحتاجه في البر
زياد:لبى قلبك نواري اقول انا مايجيبها الا نورا
وقفت نورا عند طاوله صغيره على المدخل وحاطه جهاز الاي باد على الطاوله شالته ورمته على صدر زياد:خذ ولو سمحت انا مو مصلح كل يوم والثاني جايب لي جهاز اصلحه لك
زياد:افا بس زعلت نواري يابعدي انا مايهون علي زعلك
قرب زياد منه وهي كانت معطيته ظهرها في هاللحظه دخلت اخت نورا ابتسام فتحت عيونها وحطيت يدها على فمها وبصوت اشبه بالهمس:نورا
اتوقع الجزء كذا كافي… ابي توقعاتكم وش مشكلة ردينا ؟!
ناصر بيوقف بصف مين ؟!
وش علاقة خالد بناصر يدفع كفالته ؟!
هذي الاحداث واكثر تعرفونها ان شاء الله بالاجزاء القادمه المليئه بالمغامرات والتشويق
واقفه عند الشباك الكبير اللي ماخذ نصف الجدار والقزاز العاكس يخليها تشوف وتراقب تحركات من حولها ومايشوفونها مكتفه يدينهاوتشوف تحركاته بهدؤء تنهدت وتكلم نفسها: متى انساك بس
فتحت الجوهره الباب بقوه:توقعت القاك هنا
الجوري:ياربي منك خوفتيني متى بتبطلين حركاتك هذي وبعدين الف مره قايلة لك لاتفتحين بابي بهالطريقه
الجوهره:طيب اسفين ست جوجو بس حبيت أقولك ان الوالد عازمنا على العشاء تحت عشان الفارس المغوار عندنا اليوم
ابتسمت الجوري:قولي والله
الجوهره:كيفك لاتصدقين وبقولهم جوجو اليوم معتكفه عند الشباك تراقب التحركات من بعيد
الجوري:الجوهره وجع ان شاء الله مين طلب منك
الجوهرة:مساعدات خارجيه ياناس وبدون خارج دوام
ضربت الجوري اخته على كتفها بخفه توجهت لوحده من الخزائن سحبت بلوفر اسود خفيف:بسرعه لانتاخر على العشاء
دخل تركي المكتب نزل السلاح عن خاصرته:السلام عليكم
احمد:وعليكم السلام متاخر اليوم سلامات
جلس تركي على المكتب وهو ينزل البريها(القبعه)عن راسه ويخلل اصابعه داخل شعره :ابد والله مريت البيت قبل ماجي وتاخرت ها جبتو ملفات الشباب اللي بالحجز
احمد:ايه وجهزته لك بس تدخل تحقق معهم
تركي:راكان ليه ماسكينه هذا قضيته غير
احمد:ايه لكن كان في الموقع وقت الحادث ولازم ناخذ اقواله
تركي:طيب والمتدربين وصلو
احمد:ايه بس بكره ان شاء الله يبدى دوامهم لو قدمت شوي لقيتهم
تركي:ماعليه جيب لي ملف راكان نبدى فيه
أحمد:على فكره من ضمن المحتجزات فيه مراءة
تركي:طيب
احمد:انت لازم تحقق معها
تركي:يالله اكره شي عندي تحقيق مع الحريم خلها اخر وحده
زياد:افا بس زعلت نواري يابعدي انا مايهون علي زعلك
قرب زياد منها وهي كانت معطيته ظهرها في هاللحظه دخلت اخت نورا ابتسام فتحت عيونها وحطيت يدها على فمها وبصوت اشبه بالهمس:نورا
زياد ابعد شوي ومد يده يصافح ابتسام:هلا بسبوسه كيفك
ابتسام:انتم وش تسوون هنا
نزل زياد يده:ولاشي تعطيني جهازي
ابتسام:انت وياه ماتستحون في الممر عند اللي رايح واللي جاي
نورا:ابتسام انتي بعد عيالك عنك لف لك مخك
ابتسام تغيرت ملامحها:لو دخل ابوي ولا فواز ماراح يرضون
زياد:وش يرضون عليه انا ماسويت شي غلط قاعد مع نورا بنت خالتي وحسبت اختي
ابتسام وهي تلتفت :بكيفكم انا طالعه غرفتي مابي اتعشى
زياد:وشفيها
نورا وهي تحط يدها على كتفه:ماعليك منها دايم تقولي ان وقفتنا هذي غلط وحنا كبرنا وماله داعي اشوفك او اكلمك
زياد وهو يتكتف:سلامات وش فيها غلط
نورا:انت خلك عنك الكلام اللي ماله داعي انت وعدتني تطلعني تمشيني
زياد:ياربي الحين بطلع مواعد ربعي الخميس ان شاء الله اشوف
نورا:موتشوف بذبحك زيادوه لاتخليني اهكر جهازك
زياد: شف النذاله تسوينها والله ماتستحين
ابعد يدها عن كتفه :مو تحسين عطيتك وجه بتصل الليله بعد متخلص سهرة الشباب اوكي
نورا:من زينك وش ابي فيك اذا مانت مشيني
زياد ونظرات تهديد:ردي احسن لك
بعد ماتاكدت ان ناصر نام في المجلس واخذ الغطاء اللي عند دلال وفرشه تحته وتغطى بفروته بدت دلال تسوي رحله استكشافيه بالبيت خاصة انها من دخلت هنا كانت خايفه من دخلت ناصر عليها باي لحظه لكن الحين اخذت الامان وتاكدت ان ناصر نام بدايه دخلت المطبخ دخلته قبل طبعا ولكن ماشافت كل ركن فيه فبدت تفتح الادراج والثلاجه والخزائن وتفاجات ان المطبخ مافيه ولا حتى زيتونه او خبزة يابسه بالغلط كانت الثلاجه مفصوله ومافيها الا قراطيس كاتشب وباين عليها قديمه كتمتها الريجه وقفلت الباب بسرعه وهي تكح :باين ان الثلاجه مقفله لها فتره وش ياكل هذا ماياكل مثل الناس جبن بيض أي شي عايش على المطاعم طيب طيب
فتحت بعض الدروج لكن مالقت فيها الا صحنين وبعض الملاعق مختلفة الاحجام كاس حديدي والصداء بدا يظهر عليه :اهاا شكله ياكل بالمطعم ويرجع البيت
رفعت الكاس تتفحصه عن قرب ووووووصرخه مدويه هزت اركان البيت رمت الكاس على الارض وطلعت تمسح يدينها في بلوزتها :يع يع يع تذكرت لما ضربت وهي تتراجع للخلف تجوري قديم انه مو في بيتها حطت يدها على فمه وجلست بالارض خافت ان ناصر يصحى ويقولها شي يهاوشها او يطردها لان حذرها ماتسرح وتمرح بالبيت بكيفه وصاها ماتطلع من الغرفه وش بتقوله الحين شافت حشره غريبه داخل كاس وهي تفتش بين اغراضه لكن مرة ثانيه ثانيتين ثلاث ساعه ومابين ناصر قامت بهدؤ للغرفه اللي نايم فيها لقتها فاضيه الامن اثاث بسيط جدا وشعبي وهو نايم بكل راحه في نص الغرفه ولما سمع صراخ دلال توقعه حلم وانقلب على الجهه الثانيه
دلال:شكل نومه ثقيل هذا لو اصرخ عند راسه مادري عني وش هالبلوى اللي بليت نفسي فيها هدي هدي دلال بعد احسن لك خلني بسرعه اكمل بحث
طلعت لغرفه ثانيه ولقتها مقفله تحبت ورجعت قعدت في الغرفه اللي قبل وهي ضام نفسها من البرد :لادفايات لااثاث ولااكل وشلون عايش هذا
راحت فيها الذكرى لما كانت عند ابوها وكيف مدللها ومايرد لها طلب هذا غير الاثاث اللي كل سنه يتغير صحيح انهم في حارة بسيطه بس بيتهم وتصميمه مايدل على كذا تنهدت:شكلي بعيش ايام مره
(يمكن البعض يقول كيف كانت تاكل دلال طول الفتره اللي فاتت هي كانت طالعه من بيتهم وحاسبه حاسبها بمبلغ بسيط مايتجاوز الميتين ريال وبعض الاكلات الخفيفه والجاهزة وغيار ثاني لو اضطرت تبدل)
على طاوله عشاء فخمه واثاث الغرفه يدل عليها جلس نايف بهدوء على احد الكراسي وجلسو الجوهرة والجوري قدامه مباشره وابوهم على راس الطاوله :حياك ياولدي لاتستحي اعتبر البيت بيتك والجوري وجواهر خواتك
نايف ابتسامه صفراء على محياه ماتوقع يوصل لهاالمكانه عند ابراهيم ابو الجوري والجوهره خاصه بعد مادخل هو وياهم الشرطه وصارت مشاكل كثيره
قطع تفكيره صوت الجوهره وهي تبتسم:تبي شوربه عدس ولافطر
نايف:أي شي عادي
الجوهره:هههههههه وشلون أي شي حدد يعني عندك انا ماحب الفطر
ابراهيم:خلاص يالجوهره عاد خلي الرجال يتعشى براحته
(طبعا أبراهيم شخص بطران من المال جمع هالثروة لما كان في الخارج تزوج وجاب الجوري بعدها طلقها ورجع تزوج ام الجوهره برضو جاب الجوهره وطلق امها عشان كذا عادي عندها بناته يقعدون مع شباب ويكشفون يعني بالحفلات والعزايم الرسميه اللي تطلب ذلك)
رجع سعود من المستشفى وهو تعبااااان ودايخ مره دخل سيارته الفله وقف بالمواقف الخاصه ونزل منها كان حاب ياخذ كوفي امريكي ودش دافي بهالاجواء ويتابع برنامجه المفضل the doctor دخل البيت ولقاه هدوء جدا:غريبه شكلهم طالعين
نادى وحده من الخدم:وين امي والبنات
الخادمه كانت لبنانيه:طلعو
سعود:طيب رانيا
سوزان:المدام رانيا طلعت لعند اهل
سعود:زين اجل صلحي لي كوب كوفي على مزاجي مثل ماتعرفين وطلعيه لغرفتي
سوزان:حاضر استاذ سعود
طلع سعود غرفته بدل ملابسه واخذ له شور سريع ودافي عشان يلحق على برنامجه جلس على كرسيه الهزاز ورفع رجلينه على الطاوله اللي قدامه ومسك كتاب خاص في الطب انجليزي يقراء فيه اندق باب غرفته بهدوء
سعود:تفضل
انفتح الباب بقوه ودخلو خواته بسرعه رغد وغيدا كانو توأم وبعمر العشرين بس اشكالهم تدل على انهم طالبات في الثانوي
رغد:سعود انت هنا ولاتقولنا
غيدا:ليه ماتصلت فينا
سعود وهو ينزل النظارة عن عيونه:وعليكم السلام وبعدين انتو متى رجعتوا سالت سوزان قالت انكم برا البيت
غيدا:ايه تونا راجعين وجت معنا غاده
سعود:طيب ممكن تطلعون الحين عشان اتابع البرنامج
رغد:اوف منك سعود مانصدق نشوفك وتبخل علينا نقعد معك
سعود:مو كذا بس بشوف البرنامج
رغد:يللا يللا ياغدو شكلها طرده دكتوريه خلينا نطلع
غيدا:ماطلع لين مايوعدني يتعشى معنا
سعود ويطبع بوسه خفيفه على خد غيدا:ان شاء الله وانا اللي عازمكم بعد وش تبون
غيدا:هي بروح اتجهز اجل نبي عشاء وايسكريم بعد
طلعت غيدا التفت سعود لرغد اللي كانت واقفه على ركبته جنبه:وشفيك انتي بعد
رغد:وانا بعد ابي بوسه ليه هي اختك لحالك
سعود:افا بس وهذي احلى بوسه لاحلى رغوده ولاتزعلين روحي تجهزي بسرعه اول مايخلص البرنامج نطلع
غيدا وهي واقفه عند الباب :انتي دايما تغارين مني
راحت له رغد:سلامات اساسا سعود مايحب الطلعه الا معي
طلعو البنات وكملو مناقرتهم خارج الغرفه
وصل نايف عند باب صديقه دق الجرس طلع له عبدالله:هلا والله نايف
نايف وهو مبتسم وين اخوك عزوز بسرعه ناد لي اياه
عبدالعزيز وهو يعدل ياقة ثوبه:عزوز اصغر عيالك انا
نايف:وش اقولك عن البيت ولا السيارات ولابناتهم حتى بناتهم غير ياعزوز
عبدالعزيز:صدق ماتستحي انت وجهك حتى البنات هناك ماسلمو منك
نايف:اوما عزيز وش شايفني بس كانو قاعدين معنا
عبدالعزيز:ياسلام عشان كذا بيطلع احلى عشاء في حياتك
عبدالله:عبدالعزيز انا بطلع شوي وارجع قبل الساعه عشر
عبدالعزيز:طيب وجيب معاك خبز ولبن خذ من بوكي عشره وخذ الباقي
نايف:سلامات عزيز وش بيبقى للولد ماودك بعد يعشيك في مطعم ايطالي
عبدالعزيز وهو يتوجه للمجلس:والله هذا اللي عندي وراي التزامات اهم
نايف وهو يطلع بوكه ويمد ميه :خذ انا اليوم مستانس وابيكم كلكم تستانسون معي
عبدالعزيز:الله يزيدك وناسه ان شاء الله بس سولف لي كيف كانت العزيمه
نايف:اه ياقلبي ابد ك من العشاء والا الخدم والحشم ولاوش بعد
عبدالعزيز:من جدك نايف قاعدين معك بناتهم
نايف:أي والله كذا (وياشر على خده) وحده شقراء سبحان الله وملامحها اوربيه والثانيه ملح نجد ودلع الغربيه حتى اني بصراحه افكر اخطب وحده منهم
ابتسم عبدالعزيز على توصيف نايف للبنات
بعد مرور يومين وفي بيت ناصر بالتحديد كانت ضربات على الباب قويه لدرجه ان ابواب البيت كلها تهتز خافت دلال وتراجعت لورى:اكيد هذا ابوي درى اني هنا ياربي وش هالمصيبه اللي انا فيها
مين بيكون خلف باب ناصر ؟
هل فعلا نايف بيخطب وحده من بنات ابراهيم؟
مع خالص حبي واحترامي :ـ خَوّآطرَ عَشُآقٌ