تباشير الفجر
كانت ايام ….ياجامعة قطر … قصة واقعيه ممزوجة ببعض الخيال راح ان شاء الله اسردها ..واضعها بين ايديكم …شخصيات لفتيات كانت جامعة قطر مرحلة مهمة من حياتهم ولا زالت لانها شكلت الكثير في نمط حياتهم وفي شخصياتهم ايضا …
شخصيات قصتنا … عباره عن مجموعه من البنات كل وحده فيهم مثلت شريحه من شرائح المجتمع القطري .. جمعت بينهم الاقدار واحلامهم اللي رافقتهم بدخولهم لجامعة قطر …. بنات ككل البنات لهم احلامهم وحكاياتهم واسرارهم واحزانهم وافراحهم واتراحهم ومستقبلهم اللي يطمحون لتحقيقه … لكن الجزء اللي فرقهم عن باقي البنات انهم بنات جامعه قطر …. نعم جامعة قطر اللي تخفي داخل دهاليزها واروقتها الكثير …
ولي ملاحظه هامه هنا …( ان الشخصيات والاحداث فيها الكثير ماهو حقيقي وواقعي وفيها القليل من الخيال الذي حبكته مع الواقع بواسطه قلمي الادبي الذي اصر الا ان يخط بحبره مايحتمه فكره وادبه ويضعه في معترك هذه القصه وفي محتواها …)ادعكم معها واتمنى ان تعجبكم …
""""" الفصل الأول """"
~~((…..لحظة انتظار …..))~~
في يوم شديد البروده من ايام شهر يناير من عام 2024 …جامعة قطر…… الساعه 7 ونص صباحا …في كافتيريا التأسيسي …
كانت قاعدة وتشرب الكوفي اللي على الرغم من سخونته الا انه ماقدر يدفي مشاعرها المتثلجه من كثرة التفكير ….جسدها متواجد في هذا المكان لكن تفكيرها في عالم اخر… عالم خذاها بعيد بعيد.. لدرجة انه نساها المكان اللي قاعده فيه او البنات اللي تنتظرهم يوصلون …
قاعده تفكر بالموقف اللي صار لها قبل يومين واللي خلها متضايقة وحالتها حاله ..
العنود وبينها وبين نفسها : آآآآآآه يالقهر انا اخذ هذا وليش ….. الله يسامحك يا بوي … لو تسمعني …وتشوف وجهة نظري …لهالدرجه انا رخيصه عليك علشان تزوجني ذا (( الاعرج)) يارب انا وش سويت في حياتي … بس مادروا اني مستحيل اقبل فيه ولو صار اللي صار …
…وفي هذا اللحظة قاطعتها …لطيفه .. اللي جايه من بعيد وشيلتها طايحه واهي تلهث …
حسبي الله على بليسكم ماصارت جامعه ساعه من البوابه للتأسيسي .. لازم تتخرب كشخة الواحد .اووووف .. آه تعبت مافيني حيل …
(( هيه أنتي هوووووه وينج ياللي ماخذ عألك يتهنا به…))
العنود: اووووه هلا لطيفه سوري الغلا ماحسيت فيج …. كنت افكر …
لطيفه : بشنوووووو يالله اعترفي ؟؟؟؟
العنود: ياختي خليها على الله افكر في حظي النحس …
لطيفه : افاااااا تتضايقين واخيتج هني … علميني من اللي مضايقج
العنود:اللي مضايقني السالفه ماغيرهاااا ؟؟؟ تصدقين ابوي مصر الا اخذه …. مادري وش اللي عاجبه فيه بس عشانه ولد عمي … اف ياربي … مااحبه غصب يعني …
لطيفه … عنودي تعوذي من الشيطان وموب صاير الا الخير … وبعدين انتي ليش رافضته ماتدرين يمكن تكووون سعادتج معاه .. ويكون لج مثل اللي تتمنينه … مثل مارزقني ربي بخالد الله يحفظه لي يارب ..بدووون مااعرفه ولاشفته من قبل مع انه من الاهل … ماتدرين وين الخيره ..
العنود: لاتقهريني مستحيل اخذ واحد اقل مني في التعليم وماعرفه زين … ولا واعرج ,,, كملت …
لطيفه: حرااام عليج ماله دخل في هالاعاقه ربي هو اللي بلاه استغفري ربج ..لاتحكمين على الشخص بشكله …..
العنود : انا ابي اخذ على كيفي اللي ابيه مو حد فارضه علي …
لطيفه : حبيبتي ماتدرين اهلج يمكن معاهم حق … يبون مصلحتج ويشوفون ان هذا الشخص اهو المناسب لج … شوفيني انا خذيت خالد الله يخليه لي يارب من ناحية الاهل يعني …. ابوي وخالي اهم المختارينه لي وشوفيني وش حلاتي معاه عايشه حياه حلوووه ..
العنود : يحليلج … انتي غير يا لطوووف وانا غير …. مو شرط اكووون مثلج وخصوصا هذا الشخص انتي ماتعرفين شنو صار لي معاه واحنا صغار احسه دايما مايطيقني …. ويناحسني في كل شي والمشكله واثق اني باخذه …. ياربي والله تعبت
لطيفه : انزين انتي صلي استخاره وشوفي يمكن يرتاح قلبج له …وبعدين لاتنسين انه ولد عمج وراح يحطج على راسه من فووق وبعدين انتي كبرتي وصار الوقت المناسب انج تفكرين تتزوجين الحين ….
سكتت العنود شوي ….تفكر ….بعدين قالت : خلاص ولا يهمج لطوفتي …( وهي بينها وبين نفسها فكرت بشي راح تسويه على شان تفك نفسها من هالسالفه بس حبت انها تسويه بشكل سري ) …ويالله خلينا انكلم الشله تعبنا واحنا ننتظر بتصير الساعه ثمان واهم ماشرفوا ….
نسيت اقول لكم …..من العنود ولطيفه …
} هم من الشخصيات الرئيسيه في القصه وهم صديقات من ضمن شله تتكون من خمس بنات وهم العنود / لطيفه / شيخه/ فاطمة/مريم…..راح نعرفكم على العنود ولطيفه والباقي راح تعرفونهم ان شاء الله بعدين ….
العنود:
– فتاه عمرها 22 سنه ,,,,طالبه بقسم علم اجتماع وبعد هي اخر سنه دراسيه لها ,,,,متوسطة الطول , حنطية اللون , ملامحها حاده , شعرها لوسط ظهرها متموج ولون كستنائي ..,,,,صفاتها الشخصية .. عندها كبرياء وبنت معتزه بذاتها وتفتخر بقبليتها بحكم انها من احد القبائل المعروفه في قطر., طموحه ,وعنيده جدا وواثقه دائما بنفسها ,,,,,,من ناحية الشكل ,,, طبعا الشيلة والعبايه ( والنقاب اذا كان الدكتور رجل) …مهتمه بأناقتها المعتدله ,, تحب الموضه بس على خفيف ,,,واهم شي عندها الميك اب
لطيفه:
– فتاه عمرها 22 سنه ,,,,متزوجه من 6 شهور من احد ابناء العايله وعن قصة حب ,,,, طالبه بقسم لغة عربية,,,,, مليانه وطويله .. جذابة ,, بيضاء البشره ,,شعرها مصبوغ اشقر ومدرجات ,,,,, صفاتها الشخصية :جذابة ,,مرحه وحبوبه تحب الضحك والوناسه … تجذب اللي حولها بسرعه ,,ماخذه كل شي بضحك وفرفشه ,,,,,,من ناحية الشكل : تهتم بالموضه وماتطلع الا بالميك اب وكل يوم بعبايه شكل ..
المهم نعود لمجريات قصتنا …..
واتصلت العنود على البنات ….وتجمعوا وفطرووووا وراحوا محاضرتهم الا شيخه وفاطمة اللي راحوا للمكتبه الكبيره علشان يطلعون لهم مواضيع لابحاثهم …
ولما كانوا في الممر اللي جنب قسم علم المعلومات رايحين للمكتبه ماشافوا الا اللي جايه من باب المبنى وقامت تشوووف فاطمة بنظرات غريبه …وفي شفايفها شبح ابتسامه ..
استغربت شيخه من نظرات هالبنت وقالت لفاطمة ….: فطوم اشفيها هذي ليش تشوفك كذا …تعرفينها …يمه نظراتها تخوووف ..
فاطمة وبإرتباك : هااااه ….مادري مااعرفها اصلا دايما تخزني بهالنظررررات مادري شنو تبي مني ..خليها تولي خلينا نرووووح ..
ومشوا وكل شوي فاطمة تلتفت للبنت اللي كانت وافقه وماراحت الا لما ابتعدوا …..
ولما صارت الساعه 10 … كانت شيخه ومعاها فاطمة مازالوا في المكتبه ..ومانتهبوا الا على اللي جايتهم من بعيد وتبتسم ….قالت فاطمة بصوت واطي واهي تنغز شيخه …اووووف شوفي اللي جايه من بعيد…وش جايبها هذي ثقيله دم من قلب الله يصبرنا عليها …
شيخه: حرااام عليك ياشيخه بالعكس تهبل ….استانس على سوالفها قومي خلنا انسلم …
فوصلت لهم جواهر واهي في كامل اناقتها وجاذبيتها اللي تلفت الانظار ….وبكل دلع : مرحبا بنات اخباركم …..ان شاء الله تمام وينكم ماتبينون في النشاط …لا يكون كله قاعدين في المكتبه …هههههه وبضحكه في منتهى العذوبه …اهني انقهرت فاطمة وقالت : وش دعوه فصفص لا حبيبتي الظاهر انتي اللي دايما اهنيي لان احنا دايما في النشاط وتقريبا يوميا …فاضربتها شيخه على خفيف وقالت لها …لا بس تعرفين الامتحانات على الابواب واحنا ماخلصنا بحوثنا ….انزين احنا خلصنا تقريبا وطالعين شرايك تغدين معانا احنا الشله كلنا ….هني فاطمه انقهرت اكثر وقالت لها …ايه بس اكيد جواهر تبي تتغدى مع ربعها لاتغصبين عليها خليها على راحتها واحنا راح انشوفها في النشاط …قريب ..
جواهر فهمت النغزه ….وقالت تسلمين شيخه بس كلام فاطمة صح وانا مواعده البنات ان احنا نتغذى برى ….مش في الجامعه اعذريني حبوبه ان شاء الله مره ثانيه ….(واهي في خاطرها تقوول انزين يافطوم يابنت الهنديه انتظري شوفي ان ماسنعتج ….مادري ليش شايفه نفسج علي ) يالله عيل مع السلامه رفيجتي تنتظرني في سيارتها تأخرت عليها ….يالله تشاووووو
مثل ماشفنا كان هناك تج بين فاطمة وجواهر …والسبب كان من ايام الدراسه في الثانويه …كل وحده ماتحب الثانيه …فاطمة ماتحب جواهر وتغار منها لانها دايما تسلب منها صديقاتها واحلى منها ومدلعه وكل شي متوفر لها …اما هي على انها جميله ماكانت تهتم بنفسها ودايما تعتمد على الاخرين في كل شي …. وزادت عقدتها من جواهر لانها مره من المرات لما كانوا في الصف ومن غير قصد من جواهروحده من البنات اسألت فاطمة وقالت لها :فطووووم ماشاء الله عليج فيج جمال هندي ماشاء الله على عيونج كبااار وشعرج غليظ فردت جواهر وبسرعه قبل ماترد فاطمه ايه اصلا امها هنديه …فقامت هالبنت وقالت وهي تتمسخر : الــــلــه ييعني الخوال هنووود تكفين فطوم وماعليج امر اذا سافرتوا للهند في الصيف لاتنسين تسلمين لي على شاروك خان وتخلينه يوقع لي على ورقه …..تعرفين تعرفين لهم وهني البنات اللي كانوا موجودين ماتووووا من الضحك …هني قامت فاطمة بسرعه وراحت ركض للحمامات تصيح جرحتها البنت واحرجتها عند البنات كلهم والفضل يعووود لجواهر ..اللي حست بفاطمة وراحت تعتذر لها بس فاطمة ماقبلت اعتذارها وقامت تتحلف فيها …لحد هاللحظة وفاطمة مانست هالسالفه كل ماشافت جواهر وتتوعدها ….
في هذي الاثناء كان الجو في الخارج مغيم والامطار تتساقط بغزاره ….طلعوا شيخه وفاطمة من المكتبه ولما شافوا المطر استانسوا ….وطلعوا لكنهم ارجعوا ودخلوا عند باب المكتبه ….
شيخه …والبخار يطلع من فمها ….فطووووم الجوووو موت تدرين وين خاطري اكون اللحين ؟؟؟
فاطمة اللي كانت تناظر حبات المطر اللي كانت تنهمر بسرعه على باب المكتبه …. وين ان شاء الله
شييخه : وين يعني آآآآآآآآه فديت الرياض واهلها …اشتقت لهم ولطلعاتنا في الربيع …لما نكشت ونروح للبر الجو خيال …فطوم تخيلي معي كنت انا وساره بنت خالي نقوم الفجر ونروح لبيت الشعر اللي يسهرون فيه الشباب ونقعد هناك نتقهوى … والمنظر خياااااااااااااال وصوت المطر رهيب لما ينزل على بيت الشعر ….آآآآآه الا ليت الايام تعود يوما …
فاطمةوبضحك : وخروا عن الرومانسيه اخر زمن حتى البدو يعرفون …
هني شيخه شافتها بنظرات وقالت لها بعد مادزتها لبرا: اقول مالت عليك ماحد يعرف لي الا لطووووف وعنودي ومريوم والا انتي الله يعين اللي بتاخذينه اقووول خلنا نطلع وحطي كتابك فوق راسك علشان ماتتبللين وخلنا نوقف لنا سياره من هالسيايير علشان توصلنا للنشاط ….ورحوا وهم ركيض ووقفوا لهم سياره …وركبوا فيها ….
شيخه واهي تلتفت لفاطمة : فطووووم تعرفين وش احسن شي اللحين مع ذا الجو الروعه …..افضل شي نسمع صوت ابو نوره …..يأبورني …وطلعت جوالها وحطت على غنيه واجد الناس لمحمد عبده ….وقامت تغني معها …
التفتت لها فطوووم :اقول فضحتينا سكريها اللي يسمعج يقول انج راكبه على ذاك الشاص ورايحه للبر ….مالت على حظي ومااخاوووي الا البدو ….ليش ياربي ليش …
وصلوا للنشاط وماشافوا الا اللي وراهم على طول وكانت نازله من السياره اللي كانوا راكبين فيها …
وتنادي عليهم ….فاطمة …..انتظري
ألتفت فاطمة لصوت اللي جاي من وراى…تغير وجه فاطمة وكانت الصدمه ؟؟؟؟؟
–
–
اذا اعجبتكم بكـمـــل ..
.
يآهلآ فيك عزيزتي
موفقه بآذن آلله
منوره آلقسم ^،^
سبق لي قرآئتهآ وآلقصه حلوه كثير 🙂
.
.
هلآ وغلآ
بالتوفيق ان شاء الله
قوانين قسم الروايات / تحديث جديد 23 / 1 / 2024 ~ الإطلاع هام و الإلتزام ضروري ~
,’
|
المشاركة الأساسية كتبها المرجووجة
 مشكورة حبيبتي وبسالج انتي من قطر ولا لا
|
العفو ..
انا سعوديه
بس قريت الرواية وعجبتني كثير ونقلتها لكمـ
غموض بنيه
يسلمـــوا على المرور
(( ~~ الخافي أعظم ~~))
بعد ماسلمت العنود على البنات واعتذرت لهم انها ماتقدر تقعد وتتغدى معاهم …بسبب أنها مصدعه ورايحه للبيت ترقد شوي قبل ماتقوم تذاكر للكوز اللي عليها…راحت تمشي متوجهه للبوابه واهي تمشي دقت على بنت عمها ..منيره واهي في بالها انها راح تبدأ تسوي الخطة اللي راح تنقذها من اللي هي فيه …
العنود : ألو مرحبا
منيره : هلاوالله وغلا بالزينات …انا في حلم ولا علم شيخه البنات العنود بنت محمد متصله علي …. لاأكيد أحلم
العنود : ههههه الله يقطع بليسج منور …خليتيني اصدق ..اخبارج وعلومج وحشتيني اعذريني الغلا …مشغوله واجد …انواع البحوث والكوزات …
ولا كان جيتكم او اتصلت عليج من قبل ..
منيره : أي صدقتج …انتي ماتتصلين علي الا اذا طايحه في ورطه ولا تبين شي …
العنود: افااااااا ماتصدقيني …المهم علشان تدرين بغلاتج انا الحين جايتكم اتغدى عندكم شرايج ….
منيره بفرح : كذابه قولي والله ….النوري ماراح تصدق …تعرفين جايه بايته عندنا من امس …زوجها مناوب واغتنمت الفرصه يالله أمانه قولي انج صادقه وماتكذبين علي علشان اروح انشر الخبر تعرفين من زمان مافيه اكشن انواع الممل …
العنود: ايه صادقه ومن متى وانا اكذب عليج بس صبر خليني استأذن من أمي …
سكرت العنود من منيره واتصلت على أمها …واهي تفكر في فكره تخلي امها تقتنع بالزياره المفاجئه …
ام جابر ( أم العنود ) : ألو ..
العنود : فديت ذا الحس وربي …شلون الشيخه أم جابر …جعلني فدى ثراها
ام جابر : من عنووود …ووينج مانتي بالمحاضره
العنود :…ماعندي محاضرات خلصت وكلمتج ابي استأذن منج أني اروح بيت عمي حمد ..فديتج يمه وافقي ابي كتاب ضروري للبحث اللي لازم اسلمه يوم الاحد وهو عند منور بنت عمي فديتج …
أم جابر : يافضيحتي تبين تروحين للعرب في ذي القوايل …ولا قلتي لهم كذا على غفله ..انتظري للعصر وانا بطرش احد خوانج يجيب لج الكتاب ..
العنود : لالالالا تكفين يمه ..انا اصلا متصله على منور وقلت لها اني بمر اخذ الكتاب بس هي اصرت اني اتغدى عندهم …فديتج ماراح اتأخر كلش ..اول ماخلص راح ارجع سيده ..
أم جابر .بضيقه: وش اسوي المهم اخلصي بسرعه ولا حد يثقل على العرب …
العنود :أموووواه خلاص ولا يهمج بس يمه لاتنسين تطرشين الدريول الحين المطر وكل ماله يزيد وانا خلاص تبللت عبايتي قولي له يجيني من موقف ثلاثه
أم جابر : يالله فمان الله وماوصيج عنووووود خبري بج مطفوقه
العنود :تم يأم جابر ..كم أم جابر عندي …وقبل لاتسكر …
أم جابر : عنود عنود صبر نسيت أقول لج مادامج رايحه لبيت عمج لاتنسين تاخذين من أم راشد البخور اللي قلت لها عليه
العنود :ان شاء الله يمه يالله في امان الله …
وطرشت مسج على منيره تقول فيه (( منور يالله زهبي الغدا انا جايه على الطريق ….))
في هالاثناء وفي مكان اخر عند احد ابواب مدخل النشاط ….
ألتفت فاطمة للصوت اللي جاي من وراها…تغير وجه فاطمة وكانت الصدمه ؟؟؟؟؟
شافت بنت جايه لها ركيض من برى وورى هالبنت كانت الصدمه …بنفس النظرات وبنفس الابتسامه ..هي هي نفسها البنت اللي كانت تنظارها عند المبنى …
فاطمة بإرتباك : نعم أختي تناديني أنا
البنت : أي انتي ..
فاطمة:هلا بغيتي شي
البنت : أي ممكن اابيج في شي ضروري
فاطمة التفتت على شيخه اللي قالت لها :خلاص فطوم أنا بروح للبنات ..وانتي اذا خلصتي تعالي لنا..
فاطمة :خلاص اوكي …وبعدين التفتت للبنت وقالت لها ..تفضلي اختي قولي اللي تبين تقولينه ..
البنت : فاطمة انا معاج في مقرر الدكتور يوسف العبدالله ..وحبيت اخذ منج اوراق المراجعه او كتابج علشان اخطط ….
فاطمة :اوكي حبيبتي بس اسمحيلي الكتاب مش معي الحين
البنت : لامومشكله شرايج تعطيني رقمج وانا اتصل عليج علشان ماتنسين تجيبينه ..او تحطينه في احد المكتبات برى
فاطمة : اوكي خلاص يالله سجلي عندج 55——
البنت : اوكي مشكوره فاطمة …وانتظري اتصالي يالله اخليج واسفه اذا اخذتج من رفيجاتج تحبيني اوصلج لهم …
فاطمة : لا مشكوره مايحتاج يالله مع السلامة …
ومشت فاطمة عن البنت واهي مستغربه ..( يارب احس فيها شي مريب … معقوله اهي ورفيجتها مايبون الاهذا والله شي غريب !!!!خليني احسن اروح للبنات تأخرت عليهم …)
ووصلت فاطمة للبنات اللي كانوا ينتظرونها ….
*** خلوني اللحين أعرفكم على باقي الشله ….ذكرنا العنود ولطيفه ….وبقى ..
فاطمة:
فتاه عمرها 21 سنه ,,,,,طالبه بقسم التاريخ ,,,,,قطرية ومن عائلة معروفه في الدوحه امها هندية الجنسية,,,,,طويلة . ضعيفه ,, سمراء ماخذه سمار الوالده وملامحها جميله جدا ,,,شعرها اسود طويل كثيف لكن مموج,,,,,,صفاتها الشخصية ..شخصيتها متزعزعه .. متسرعه .. كسوله ,, مالها طموح ,, اتكاليه ,,,,, من ناحية الشكل .. ماتهتم كثير بشكلها مع انها جميلة …
شيخة :
فتاة عمرها 22 سنه ,,,,طالبة بقسم علم المعلومات والمكتبات,,,,,قطرية تعود اصل عايلتها للسعودية من ناحية الاب والام يعني بس اهم اللي في الدوحه والباقي في السعودية ,,,,, طويلة وسمراء يعني على خفيف ..,,,,, صفاتها الشخصية .. حساسه للغايه يغلب عليها الحزن .. رومانسيه ,,غامضه .. ماتحب الاماكن المكتظة بالناس,,,,,, من ناحية الشكل لبسها هم بسيط العباية والشيلة ( وتلبس لثمة لما تقابل الرجال) تحب الموضه وتكشخ على حسب النفسية
مريم : ( مابينت لين الحين بس انتظروا قصتها )
فتاه عمرها 20 سنه ,,,,قطريه لكن خوالها من البحرين ,,,,,طالبه بقسم الاعلام وباقي لها سنه وتتخرج ,,,,,صغيرة الحجم ونحيفه .. مملوحه .. حنطية اللون ,,شعرها طويل جدا واسود اللون ,,,,,,,صفاتها الشخصية .. حنونه ,, حساسه ,, مرهفة المشاعر ,, عايشه في احلامها الخاصه ,, خجوله ,, ,,,,,من ناحية الشكل .. بسيطه في لبسها العباية والشيله بس تحب تحط اشاربات ملونه بعض الاحيان وماتحط ميك اب الا ماندر وخفيف
الساعه 2,15 قريب العصر …واغلبية البنات ارجعوا لبيوتهم الا شيخه اللي كان عندها عملي وراح تقعد في الجامعه لين الساعه ست المغرب …
أما باللنسبة للعنود .. مثل مامر علينا اهي الحين في بيت عمها بو راشد …
ام راشد : مرحبا هلا والله ببنيتي العنود وينج من زمان مالج حس ولا خبر …اشتقنا لسوالفج
العنود :فديتج يمه والله انا اكثر بس تعرفين الجامعه من الصبح للعصر واذا جيت حيلي منهد … حتى اليوم سفهت للمحاضره علشان اشوفكم اشتقت لكم …
ام راشد :فديتج واحنا كلنا اكثر ( ام راشد تموت على العنود ومن صغرها واهي تقول العنود ماراح تاخذ الا ولدي راشد … ومتمسكه فيها جدا)
وشوي الا منيره اللي داخله عليهم …واهي تهلي وترحب …
منيره :مرحبا اشهد اني صادقه بالعنود بنت محمد ..نور البيت
العنود واهي في قمة الخجل : بوجد اهله ( هني العنود حست بالذنب تجاه بيت عمها اللي مستانسين بوجودها ظنا منهم انها جايه مشتاقه مادروا انها ماجات الا علشان شي بتسويه علشان تفك روحها من زوجها على ولدهم ..
وشوي ونوره داخله : مرحبا بالعنود زين اني رقدت عند اهلي علشان اشوفج يالقاطعه ولا تقولين عندي بنت عم مسكينه ….ماحد يسأل عليها والكل نساها …
العنود: افااااااا كله ولا النوري …فديتج …
وشوي الا العنود تغمز لمنيره علشان يروحون داخل ففهمت عليها منيره وقالت …يالله العنود تعالي ندخل داخل …ل
الا امها تقاطعها وتقول :على وين خلي بنت عمج تقعد بعد شوي بنحط الغدا …
العنود: اوكي خلاص منور خلنا نتغدى بعدين ندخل …
وقعدوا يسولفون لين حطت الخدامه الغدا وقعدوا كلهم يتغدون …وشوي ماسمعوا الا صوت حلوووو مستطرب جايهم من برى يغني ….
الاماكن كلها مشتاقه لك …والعيون اللي نرسم فيها خيالك والحنين اللي سرى بروحي وجالك …ماهو بس انا حبيبي الاماكن كلها مشتاقه لك …
ودخل وشوي الا صدت العنود علشان تتغطى لانها تفاجئت ظنت انا مافيه احد في البيت الا البنات …واهو بعد تفاجئ بوجود ضيوف وقف …واهو منزل راسه …احم احم السموحه مادريت ان فيه احد …
واهو يمشي يبي يروح حجرته ..اللي فوق …
ام راشد : راشد فديت عمرك مافيه حد غريب هذي بنت عمك العنود …
وشوي الا يرجع ويلف راسه وكان يبتسم …ويقول …هلاوالله ببنت محمد شلونج عساج بخير …
العنود :يسرك الحال بخير …الله يسلمك ..
ونتظر راشد انها تسأله عن احواله لكنه نزلت راسها وماقالت شي …
فصد وراح على حجرته ….
والعنود في نفسها ..( اوووف يامغث دمك لا وراز وجهه ويسلم ….يحسب اني الحين ميته فيه ولا راح اعبره ..يالله مابقى الا الشي القليل وافتك …يارب صبرني )…
وخلصوا وراحت ام راشد علشان تقيل لها شوووي ..ونوره راحت تشوف مسلسلها المفضل …والبنات راح وصعدوا فوق ….وشوي والا مقابلهم راشد اللي كان نازل …وكاشخ …وريحت عطره ماليه الجو
منيره :وخروا عن الشيوخ …اف اف وشهالكشخه …يابخت اللي رايح لهم
راشد …وباستظراف : اقول ياشين اللقافه ….وخري خليني امر تأخرت ….
واهو نازل يلتفت : منور
اقول لاتنسين ترتبين حجرتي وتبخرينها …وتجهزين لي شنطة وتحطين فيها كذا ثوب لاني مسافر
منيره :على وين ان شاء الله..
راشد :يومين باروح البحرين وراجع ..
العنود بينها وبين نفسها ( انسان قمة الفشل والاتكاليه لا وبعد رايح يصيع ويبوني اخذه اخ يالقهر صبر جميل والله المستعان ….بس ابيه اخاف يسافر قبل لاسوي خطتي خلني اقول لمنور )
ولما دخلو الحجره :::
العنود لمنيره : منور أقول راشد متى بيسافر …
منيره وفي محياها ابتسامه : ليش من الحين بديتي تحنين له
وتضربها العنود بالمخده : ياثقل دمج لا طبعا بس كذا اسأل لااكثر ولا أقل …لاني افكر ابات عندكم اذا وافقت امي وابوي …
منيره : اهااااا ياليت والله بس صبر شوي بدق عليه وبشوف …
خذت منيره جوالها اللي كان مرمي على السرير ودقت على راشد
منيره :الو رشود تعال ابي اسألك متى بتسافر؟
راشد :رشود في عينج اصغر عيالج ….ليه تسألين ؟
منيره : لا بس علشان اذا بتروح بدري اجهز اغراضك بعد شوي
راشد :بسافر اليوم الليل على الساعه عشر …
منيره :اوكي خلاص باروح اجهزها بعد شوي يالله بااااي
منيره للعنود :عنودي قال انه بيروح اليوم في الليل شرايج ترجعين البيت وتاخذين اغراضج وتمسين عندنا ..
العنود وبإرتياك :هااااه ..اوكي خلاص انا اذا رحت البيت بستأذن واذا وافقوا برجع ان شاء الله …
العنود لمنيره :منور فديتج ماعندج بيبسي مشتهيته..
منيره اللي تفتح ثلاجتها : لاحبي ماعندي الا سفن اب …اذكر ان رشووود يحب البيبسي اكيد في غرفته بروح اشوف وبجيب لج ..انتظريني …
العنود : خلاص أوكي انتظرج ….
هني العنود اغتنمت الفرصة وقامت بسرعه وخذت جوال منيره وعلى طول على اخر المكالمات الصادره وشافت رقم بأسم ( عزوتي راشد) وعلى طول خذت قلم من الطاوله وكتبته على يدها ..وشوي ……
"""""" الفصل الثالث"""""""
(( ~~ ياترى ليش ؟؟؟؟؟~~))
الساعه 3 مساءاً , المكان جامعة قطر … حول المكتبة …كانت شيخه قاعده تنتظر العملي وهي في قمة الملل …والجو في قمة البرد ..خذت الكوفي وشربت منه شوي إلا وتلفونها يدق ..شافت الشاشه … الا ..
( كامل الزين يتصل )…فأبتسمت وردت بلهفه …
شيخه : مرحبا اشهد اني صادقه بكامل الزين ..
كامل الزين :هلاوالله شلونج حياتي ان شاء الله تمام ..اشتقتلج وايد اخبار الاهل ..
شيخه : الحمدلله أخبارك أنتي …وينك مانشوفك ماتزورينا ولااشوفك لافي المنتدى ولا في المسن اختفيتي نهائيا …
كامل الزين : انا والله ماقدرت ادش النت هالايام …كنت مشغوله بفرح بنت عمي …والحمدلله خلص وكنت فيه رووووعه خخخخ واثقه صح …وراح اوريج الصور قريبا
شيخه : ههههه اذا ماكنتي واثقه من اللي راح يكون واثق اصلا متأكده انك راح تكونين قمر ..راح تدشين المسن اليوم
كامل الزين : ان شاء اليوم في الليل كالعاده في نفس الموعد الساعه 12 … وراح تلقيني في المنتدى بعد …على الطاري اخبار دلوووووعة المنتدى تشوفينها في الجامعه ….؟؟؟؟
شيخه : أي شفتها اليوم صدفه وتسلم عليك …ميوي اخليكي الحين راح القاكي على المسن بدت المحاضره يالله باي
( كامل الزين : هذي بنت جيران شيخه واسمها مي واهل شيخه علاقتهم بجيرانهم جدا عميقه لانهم يعتبرون اقرب ناس لهم بسبب ان مالهم احد في الدوحه واهلهم كلهم في السعوديه ومي تعتبر صديقه مقربه لها وكانت معها ايام الدراسه…ومادشت الجامعه بسبب معدلها البسيط ..وصداقتهم عميقه لدرجة انهم نفس التفكير …ولهم اسرار خاصه بينهم ….راح نعرف الكثير عن علاقتهم لكن مو الحين )
سكرت منها شيخه ولبست لثمتها ودخلت ورا الدكتور اللي كان متأخر ….
في نفس هالوقت وفي منطقه الريان ..
كانت العنود ماسكة جوال منيره …واخذت اللي تبيه منه وشوي ..
شوي الا اللي داخل عليها بقوووووو…
مبارك ….اهااااا طبيت عليج …عنودي عندنا ..هلا والله
العنود وهي تخش جوال منيره وراها وهي في قمة الارتباك والخوووف من ان أي احد يكتشفهها ..: من برووووك حرام عليك روعتني ….
مبارك :ليش روعتج انتي كنتي تسوين شي ؟؟؟؟؟
العنود :انا لا يعني وش بسوي
مبارك : انزين وش اللي خاشته وراج
العنود :واهي تشوف يدها انا ماشي الا تلفون منور..كنت اشوف مسجاتها
مبارك وهو مو مصدقها :اهاااا انزين انتي ليش خايفه …اسرقي مسجااات على راحتج كل شي حلالج ..
العنود : خخخخ الله ياخذ بليسك …وع من زينها مسجاتها ….الا صدق وين كنت لما تغدينا مالك حس
مبارك : كنت ألعب بلاي ستيشن مع ولد جيرانا صلوح..
العنود : اهاااا
مبارك: انزين يالله اخليج باروح اصلي العصر تامرين على شي …
العنود: سلامت روحك مابي شي ..
وطلع مبارك …وهني العنود بسرعه نزلت جوال منيره وسجلت الرقم في جوالها …وراحت تطالع من الدريشه ..
( مبارك اهو اصغر واحد من عيال عمها ..وعمره 11 سنه …واهو يحب عيال عمه بس العنود سبشل يعزها حيل ويستانس على القعده معاها …عمها توفى واهي في الاعداديه ..ومايسكن في البيت الا زوجة عمها أم راشد وعيالها …راشد ومنيره ومبارك …أما نوره فهي الكبيره ومتزوجه من ولد خالتها محمد وعندها بنت عمرها 3 سنوات واسمها غلا وحامل في الشهر السادس )
رجعت منيره ومعاها البيبسي …
منيره : عنودي سوري حبي تأخرت عليج رحت ارتب اغراضه بالمره …علشان اقعد معاج ..
العنود : منور فديت روحج انا باروح البيت ارقد …وبكلمج اعلمج اذا امي وابوي وافقوا اني اجي ابات عندكم ..
منيره : مسرع حرام عليج اقعدي شوووي على الاقل لين تشربين البيبسي اللي حفيت لين جبته…
العنود: لافديتج بروح ارقد باموت تعب ….يالله انا رايحه السياره بره تنتظرني …
منيره : خلاص على راحتج …
رجعت العنود لبيتهم …
في مكان ثاني ..من دوحة الخير ….وتحديد في فيلاجيو ..كانت مريم تطلع من محل لمحل بسرعه ..ومعاها أختها الصغيره ..الريم وبنت عمتها هدى ….
هدى : مريوم شوي شوي تعبت وأنا ألحقج …خففي شوي
مريم : شوفي كم الساعه الحين ….
هدى واهي تشوف ساعتها خير تووو الناس الساعه 7 ونص ..
مريم : انزين يالفالحه عمتي شنو قالت ماقالت الساعه ثمان تكونون في البيت …حبيبتي زين ان امي وافقت اني اروح لفيلاجيو والله لو يشوفونا محمد أخوي وناصر أخوج والله لايورونا الويل تعرفينهم اربعه وعشرين ساعه هني مادري وش يبون ؟؟؟؟؟
هدى : ههههه يالخوافه ….يالله انزين صبر بس باخذ لي كوفي …خاطري فيه
مريم :والله ماراح يورطنا الا انتي
الريم وهي تشد عبايه مريم :مريووووم ابي جنغل زوووون قريب خلينا انروح شوي ونرجع امانه
مريم :والله احلفي قولي والله اكملت …حبيبتي احنا خلاص في الليل مانقدر انروح بنتأخر ان شاء الله مره ثانيه بنروح جنغل زووون العصر علشان تلعبين وايد شرايج …
الريم واهي ماعجبها الرد :لالالالامابي ابي ألعب
مريم : مااقدر فديتج شرايج في ايس كريم ماتبين ؟؟؟؟اول مانطلع بشتري لج من باسكن روبنز
مريم لهدى : هدووي يالله دقي على الدريويل قولي له يوقف عند البوابه بسرعه ….واهي تلتفت لها ورى ماشافت الا اللي واقف يكلم هدى …
مريم واهي في قمة الغضب من المشهد اللي تشوفه …وتمشي متجهه لهم
مريم :هدى ووجع من هذا اللي تتكلمين معاه ماتستحين …والله الشرهه مو عليج علي انا اللي جايبتج…
وهي تلتفت للشاب اللي واقف …
واهي تطالع فوووق علشان تشوف وجهه:
مريم : وأنت عسى ماشر ماتستحي …و ….
فجأه سكتت واهي في قمة الاحراج … ونزلت راسها
مريم : من ناصر … سوري ماعرفتك ..
ناصر وهو يبتسم: هههههه شدعوه ماعرفتيني ..وبعدين حرام عليج بغيتي تاكلين اختي وتراهي غاليه ومارضى عليها
مريم :. ايه بس تخرعت ادري فديتها انها اكبر من هالاشياء بس ظنيت ان احد يتحرش فيها وعمتي مأمنتني عليها …
ناصروشوي متغير وجهه : وتعالي لاتاخذيني بالحجي …تبووون تتهربون ليش جايين هني مومنبهين عليكم أنا ومحمد ان مانشوفكم هني ولا مالنا كلمه عليكم ..
هدى : والله مالي دخل مر…..
وتنغزها مريم: ايه جينا هني لان امي تبي غرض ومو موجود الا هني …وبعدين احنا من شوي جايين وبنطلع الحين يعني ماطولنا ..
ناصر : انزين خلاص انا اللي برجعكم البيت وانتي هدوووي كلمي الدريول قولي خلاص لاتجي ..
مريم وفي خاطرها ( اووووف ياربي ماراح يخليني اشتري اللي خاطري فيه
ناصر : مريم مريم وين رحتي اقولج تبين شي بعد ولا ارجعكم .
مريم : لا خلاص خلصنا …خلنا نرجع
ناصر وفي خاطره ( وأخيرا ..تكلمت معي وعطتني وجه ياكثر يارب تحس فيني )
ناصر : يالله مشينا
ورجعوا الدفنه اللي كان بيت عمة مريم فيه …
أم ناصر ( عمة مريم ): اشوى انكم رجعتوا في الوقت اللي قلته لكم ولا كان صارت علوووووم
مريم وأهي تبوسها الله يخليج لنا يااحلى عمه في الوجود ..أموووووووواه
ناصروهو يحاول يغث مريم : بس يابنت الخال ترى العقاب لازال ….وعقابي لج انتي وهدوووي انكم تروحون للمطبخ وتسوون لي بيض عيووون صراحه ميت جوووع وماتعشيت …فشرايكم قبل لا اغير رايي واقول لكم تغسلووون السياره .؟؟؟؟
هدى :أوووووف كله منج مريوووم
مريم :نعم نعم انا ماطقيتج على يدج انتي بعد تبين تروحين ….
ناصر : اقول ترى طووولتوا السالفه وهي قصيره يالله قدامي على المطبخ
مريم تقوم واهي تشعلل من داخل وتلحقها هدى ….
وفي المطبخ …
مريم : اه يالقهر ..أخر زمن الشيخه مريم تطبخ ولا لناصر الزفت ..
هدى : خخخخخخ احسن علشان تتعودين اذا تزوجتيه
مريم :نعم انا اخذ هذا وليش ان شاء الله بسم الله علي ..
هدى : وليش وش فيه أخوووي …ليكون حاطه عينج على حد ثاني
مريم : لاثاني ولاثالث بس انا مافكر في هالاشياء الحين وهدوي اذا سمعتج مره ثانيه تسولفين هالسوالف والله أقول لعمتي …( ومريم في داخلها تقول آآآآه ياهدوي والله انج يبتيها على الجرح أي احب ومبين في عيوني بس للاسف هذا الحب ماله امل ومو لناصر …لواحد أحبه مو داري فيني ..
وشوي تدخل عليهم الريم : هيه انتوا يقول ناصر ماصار بيض عيون خليتوه ذبيحه يقول خلصوا بسرعه وراه طلعه
مريم : انزين قولي له الحين بنخلص .اووووف
مادروا ان ناصر طول الوقت كان يراقبهم من فتحت الباب وسمع كلامهم كله ….وتضايق لما عرف ان مريم ماتفكر فيه …
مريم لهدى : الا اسألج هدووووي اخبار سيف متى بيرجع من برى ؟؟؟؟
هدى : أي فديته أمس كلمنا وقال يمكن يجي في عطلة الربيع ..واصلا اهو مابقى له شي ويرجع ..ياي اشتقت له موووت واشتقت لهواشه لي… ولقلبه الحنون الصافي
مريم : الله يرجعه بالسلامه …وتسرح لبعيد وتذكرت لما كانوا اهي ومحمد يباتون عندهم واذا جات حزة الفجر يروحون للسطح يلعبون ورقه ..لين تشتد حرارة الشمس وينزلون …وكيف كانت تحب تقعد معه وتسمع لسوالفه ولصوته الحلو وعزفه على العوووود
هدى وهي تضرب مريم بالعنب : هي انتي خلصي بياكلنا الاخ تأخرنا عليه
مريم :أي ابيه يالله
خلوني اعطيكم نبذه عن عائله مريم ….وعن حياتها …
( مريم مثل ماذكرنا قطريه بس امها بحرينيه وامها وابوها قمة في الطيبه.ومريم مرتبطه واجد مع اهل ابوها وخصوصا عمتها ام سيف ..وتحب انها تقضي اغلبيه ايامها عندهم .عندها .أخت وحيده وصغيره وبينهم 10 سنوات اسمها الريم وعمرها 9 سنوات واهي صف رابع ابتدائي وماعندها الا اخ واحد واسمه محمد وعمره 25 سنه ويدرس هو ولد عمته ناصر اللي هو رفيجه الروح بالروح في كليه شمال الاطلنطي وهم مغازلجين درجه اولى …اما عائله عمتها ام سيف فتتكون من سيف 27 سنه ويدرس في امريكا هندسه بترول …وناصر وعمره 25 وذكرناه قبل شوي .. ومي وعمرها 21 وتدرس تاريخ في جامعة قطر وسلمان 18 اخر سنه ثالث ثانوي والتؤام شوق وذوق واعمارهم 9 سنوات وصف رابع ابتدائي …) …
المهم طلعوا مريم وهدى من المطبخ متوجهين للصاله …ولما دخلوها مالقوا الا سلمان …قاعد يشوف مباراه ..وباين التأثر في وجهه بقوووو
سلمان : يالله ..ايه ..تكفى سجل هدف ….ايه . لالالالالالالالالالالالا
هدى : سلوووم وطي الصوت شوي بطيت اذونا
سلمان واهو يأشر بيده من دون ما يلتفت عليهم بمعنى اسكتي ..
مريم : سلمان …سلمان
سلمان : اووووف مايخلون احد يتابع نعم خير ..
مريم : اقول وين ناصر … ماشوفه ..ماكان هني قبل شوي ؟؟؟
سلمان واهو يشوفها : ايه صح ذكرتيني …يسلم عليج انتي وهدى ويقول عطوا البيض اللي سويتوه
0 واهو يأشر على نفسه) للشيخ سلمان …يقول خلاص مايبي بيطلع ياكل في مطعم معزوووووم..
مريم واهي منقهره وتلتفت على هدى ومبيين في وجهها علامات القهر :
اووووف شفتي اخوج السخيف … والله اوريه بس اشوفه …ومالي قعده هني كلش على اخر زمن مريم بنت احمد تشتغل خدامه …
وتمشي واهي مسرعه …وهدى تلحقها ..
هدى : مريوووم صبر اوقفي تعالي .ماعليج منه هالاهبل حركاته جي دايما … امانه لاتخربين علينا السهره ….بكره اجازه ونبي نخلي السهره صباحي …
مريم والعبره خانقتها : والله ماقعد في هالبيت ولا ثانيه …
وتمسك التلفون وتكلم أمها :
مريم وبإندفاع : ألو يمه وينج … لين الحين عند خالتي سميره
ام مريم : لاغناتي ..انا رجعت من وهل وبنام بعد شوووي
مريم : لاتقولين تكفين يمه خلي ابوي يجي ياخذني ابي ارجع
ام مريم : ليش غيرتي رايج ماراح تباتين عند عمتج
مريم : لا مابي ابي ارجع الحين
ام مريم : بس انتي ماطلبتي تنامين عندهم ..
مريم :أي بس خلاص غيرت رايي
ام مريم :أي بس ابوج دايخ وقاعد يشوف الاخبار ماظنتي يقدر اييبج
مريم : اوووف يمكن تكفين ماقدر اقعد كلش
ام مريم : حبيبتي ابوج اسمحيلي تعبان وما قدر اتعبه اكثر تبين ترجعين اتصلي على اخوج محمد ..
مريم :يمه مستحيل اييبني محمد الحين تو سهرته باديه واهو ماهمه الا نفسه ..
ام مريم : والله كيفج هذا المتوفر شوفي انتي اتصلي وشوفي شنو بيقول
يمكن يوافق واذا رفض مالج الا انج تباتيين عندهم
مريم واهي فاقده الامل : خلاص بحاول يالله يمه مع السلامه
وسكرت من امها واتصلت في أخوها محمد اللي كان شكله مشغوووول
محمد : ألو هلا مريووووم شنو تبيين متصله
مريم : محمد تكفى تعال خذني من بيت عمتي تعبانه وايد مااقدر اقعد ولا ثانيه …تكفى
محمد وشكله لاهي في شي : هااااه وش قلتي
مريم واهي تسمع الازعاج اللي عنده : اقووول تعال اخذني من بيت عمتي ابي ارجع للبيت تعبانه حيل
محمد : مريوووم سوري مااقدر انا في الدوحه الحين ومشغووول طالع مع الشباب بسيارتي ومااقدر ارجع ..وين ابوي
مريم : ابوي تعبان مايقدر يجي
محمد : خلاص شوفي انا يمكن ارجع عالساعه ثلاث او اربع الفجر اتصلي علي ذكريني علشان اخذج ولا اقووول مريوووم ….
مريم :هااااه
محمد : شرايج تباتين عندهم افضل لج ولي هههههههه ..
مريم : اقول الله لايحدني عليك مالت ….مامنك فايده ماعمري طلبت منك شي وتقول لي اوكي ..
وسكررت على وجهه وهو فاطس ضحك …
في هالاثناء ألتفت عليه ناصر : اقووول يالخايس من تكلم
محمد وهو يغايظ فيه : من بعد رفيجتي المزيوووونه زعلانه علي لاني مسفه لها هالايام اللي رايحه تقول لي اكيد طايح على وحده ثانيه …
ناصر : لا احلف …والله انها ماشافت خير اللي تواعدك مالت عليك وعليها …
محمد وهو يضحك : ياغبي صدقت لا اضحك عليك هذي الله يسلمك مريوووم
ناصر وفز قلبه : من مريووووم مااعرفها أي وحده ومن متى عرفتها
محمد : ياغبي أختي مريوووم بنت عمتك
ناصر وهو منحرج : اهااااااااا انزين وش كانت تبي غريبه مكلمه هالوقت
محمد : تبي ترجع البيت ماتبي تبات عندكم
ناصر : ليش عسى ماشر
محمد : لاابد بس تقول تبعانه وماتقدر تقعد ولا ثانيه
ناصر وهو يفكر بينه وبين نفسه : اكيد زعلانه من اللي سويته بس والله مو بيدي قهرني كلامها علي …بس مافيه مستحيل اخليها تروح
ناصر : لا اكيد شي ثاني اصلا انا قبل شوي كنت عندهم ومافيها الا العافيه ..
محمد : اكيد يعني بخلي الوناسه واروح لها ..
…
في الريان الجديد ….
وفي بيت محمد بن جابر ال….
كانت العنود فاعده في الصاله ..وفي إيدها الجوال وتشوفه وترفع راسها تفكر …
هيه …أنتي …وش فيج ..
رفعت راسها …شافت أخوها جابر … واقف عندها …
العنود : هااااه لا ابد مافيني شي ..
جابر : انزين وين أمي والبنات
العنود : أمي دخلت حجرتها ومرتك طلعت المطابخ أما وضوح وهنوفي راحوا للجمعيه مع علوووي
جابر :غريبه وأنتي ليش مارحتي معاهم
العنود : مالي مزاج اطلع ….واهي توقف …يالله انا بروح حجرتي تبي شي …
جابر : لا ابد سلامتج
وتقوم العنود رايحه لحجرتها …
دخلت وسكرة على نفسها الباب وقالت بينها وبين نفسها ..لازم اغتنم الفرصه ماحد موجود …لازم اتشجع وسويها ولا راح تضيع الفرصه للابد …
وقعدت على سريرها …ودقت على الرقم اللي اخذته من منيره …
وماهي الا ثواني الا وهي تسمع صوته من الطرف الثاني ..
راشد : ألو …
العنود : ……….
راشد :ألو من معي
العنود : ……….
راشد : لاحول بترد ولا اسكر
العنود وهي في قمة الارتباك تحاول ان الكلمات تطلع بس مافيه فايده الخوف ممتلكها
راشد : الظاهر ماتنعطى وجه …طرااااااااااخ وسكر السماعه
العنود ….يمه صوته يخوف وهو معصب أخااااف يحرجني
وقامت تشوف ساعتها اللي كانت 10 الا ربع … ابيه مابقى شي اكيد بيسافر الحين خلني اكلمه وانهي السالفه وافتك على طوووووول
العنود خذت الجوال ودقت عليه مره ثانيه ….
راشد وهو في قمة الهدوووء: لو سمحت رد تبي شي انا مو فاضي للعب
العنود تشجعت لما شافت ان نبرة صوته هدت ..:ألو
راشد استغرب الصووووت : هلا من معي
العنود : راشد
راشد : معاج راشد مين معاي؟؟؟؟
العنود : اخبارج راشد
راشد وانواع علامات الاستفهام على راسه؟؟؟؟؟؟؟؟: الحمدلله بس ماقلتيلي من انتي ؟؟؟
العنود وهي وشوي وتصيح …:أأأأناااااا ….ال العنود
راشد وهو يحاول يتذكر :العنود من العنود …؟؟؟؟؟
العنود : العنود بنت محمد …بنت عمك
راشد : اهاااا هلا والله بالعنود اخبارج ….غريبه متصله لايكون في الاهل شي ؟؟؟؟
العنود: لالالا بخير الكل بخير وعافيه
راشد : اوووووه اسمحيلي تروعت حسبت حد فيه شي …. شلونج وشلون الاهل وعمي محمد والشباب
العنود : الكل بخير ….راشد …ادري انك مستغرب اتصالي بس انا كلمتك علشان موضوع مهم جدا
راشد: أمري ….تبين شي ..
العنود : مايامر عليك عدو بس الموضوع يخصني ويخصك ….موضوع زواجنا …
راشد وفي محياه ابتسامه …: ايه شفيه ….اذا تبينا نأجله لين تتخرجين خلاص ولا يهمج ..
العنود : لا راشد فهمتني خطأ …مو هذا اللي ابي اكلمك فيه
راشد : اجل وشو ؟؟؟؟؟
العنود : ابقولك الصراحه ….صراحه ….ياااااااااااراشد وسكتت شووووي ماقدرت تكمل خافت
راشد : العنود وينج ….هااااه وش كنتي بتقولين ؟؟؟؟كملي اسمعج
العنود : راشد …. الصراحه أنا ماأقدر اتزوجك
راشد وبدت معالم وجهه تتغير بعد ماكانت الابتسامه ماليه وجهه …..؟؟؟ عسى ماشر …
العنود : راشد صراحه أنا ماأقدر اتخيلك زوج لي . وانت تعرف أني صريحه ومااحب اكذب …وابووووي غاصبني الا اخذك …
راشد وبدت معالم الاحباط والغضب تكسو وجهه …: انزين والمطلووووب
العنود : ابيك توضح لابووووي انك صرفت نظر وانك فكرت وشفت اني مااصلح لك …صراحه ياراشد اسمحلي مااقدر والله مااقدر تكفى لاتظلمني وياااااك
وشوي ينفجر في وجهها راشد وكل حزن الدنيا ماليه ….:
نعم ….. هذي كل السالفه ….ليش انانيه ليش …ليش ماهمج الا نفسج ليش مافكرتي فيني وفي احاسيسي ولا لاني اعرج ومستواي التعليمي مو ذاك الزوووود …اعترفي قولي ….
العنود : لا تكفى ياراشد لاتفهمني غلط ….والله مو عشان جذي …راشد صراحه انتا مو فتى احلامي …ليش ماتقدر تفهمني …وتقدر وضعي
راشد: اقدر وضعج ….وتقولينها وبكل وقاحه وبساطه بس يكووون في علمج انا اللي في راسي بسوووويه وانتي تعرفين هذا زين ….وبالنسبه للعرس راح يتم …..يعني بيتم …وماهمني رايج …
العنود وهي خلاص الدمووووع طفرت من عيونها وغضب الدنيا تجمع وتكون فيها : انا الغلطانه اللي متصله فيك وحاسبتك انسان اهم مالديه كرامته ….بس طلعت انسان بلا شي بلا قلب وضمير واخلاق ياخي مابيك مو غصب مااحبك افهمها ….
راشد واهو خلاص ماعاد يقدر يستحمل اكثر : اقووول بلى كلام واجد ومافيه فايده ..لانه لاراح يقدم ولا يأخر ….ويكون في علمج ترى اول مارد بكلم ابوج وسيده ملكه صراحه ماتنعطيين وجهه
العنود : ياحقير ياسافل ……وتسكر في وجهه
سكرت العنود منه واهي خلاص تلاشى الامل عندهااااا….آه يالقهر أنا غبيه تسرعت …..ألحين خلاص مافيه أمل …اذا كان بتزوجني رغبة فيني ألحين راح يتزوجني علشان يذلني اعرفه مايحب حد يخالف رأيه ….
وقامت تصيح وتصيح …ماقدرت تسوي شي
وراشد كان حاله اسوء واسوء كان في طريقه …لشباب علشان يمشووون للبحرين بالسياره ….
كان اليأس محتويه ….
وقف على جنب الطريق …وحط راسه سكان السياره ….
يارب …ارحمني …ليش الكل ماخذ عني فكره شينه حتى البنت اللي حلمت انها راح تمسك بيدي واعيش حياه جديده معها من بعد اللي صار لي ….تبي تفك نفسها مني ….وش اسوي بحالي …ليش مافكروا بنفسيتي بعد الحادث ليش مافكروا اني ماعدت اقدر اكمل من نظرت الناس لي …واحساسي بالنقص ….فما عدت استحمل ….
…ليش يالعنود دمرتي حلمي واحلامي الجايه ….
كملت دراستي …بالسر علشان ماحسسج انج ماخذه واحد ماعنده شهاده …وكنت ناوي اكمل الجامعه معج برى ….آه ياللاسف
( راشد ….شاب بدوي عمره 26 سنه ..تتجلى فيه معالم الرجوله …وسيم ..ملامحه حاده ..نظره احد …طول شامخ …مثل ماقلنا اعرج ….بسبب حادث تعرض له واهو صف اول ثانوي لما كان يشل مع ربعه …بعد مباراه حافله فاز فيها العنابي …بس انتهت الوناسه لمأساه ربعه اللي معه في السياره اللي مات واللي تشوووه …فأصابته حاله نفسيه لدرجة انه اختلى في نفسه وودع حياته كلها لمدة ثلاث سنوات ….بعيد عن الناس …كان يحس بنظرات الشفقه والعطف من الناس وهو ماتعود على هالشي …بس من اربع سنوات …راجع نفسه وتقبل وضعه ودرس بالسر في مدرسه ليليه ….وجتاز الثالث الثانوي …وبمعدل كبير ….وشتغل بفلوس كان والده مخليها له قبل موته خوفا عليه بما انه ماكمل دراسته …فستلم الاعمال التجاريه اللي كان الوالد يزاولها ..وحقق الكثير لدرجة ان الاعمال تعدت الدوحه …..فكثيرا ماكان يسافر ..تعب كثير …لكن انجز الكثير.)
وفي مكان ثاني ….
مكان تملأه الرومانسيه …
قمة الانسجام بين اثنين …
وعلى صوت فيروز الرائع ..
كانت لطيفة تعيش اجواء خاصه …تحس انها طايره فووووق ..
كانت معزومه على عشاء رومانسي من زوجها على احد المطاعم الشهيره في الدوحه …
لطيفه : خالد …فديت روحك …شكرا على المفاجاه الحلووووه وعلى الطلعه الحلوووه بس انت متعب نفسك وايد معاي توك جاي من شغلك منهد حيلك الا تطلعني …..حبيبي والله تعب عليك
خالد وهو يبتسم ابتسامته اللي تحبها لطيفه وبأسلوبه الغزلي المعتاد : افاااا ان ماطلعت حبيبتي لتو من أطلع …وبعدين من قال اني تعبان ابد ..اصلا الطلعه معاج تنسيني التعب كله …
وشوووي الا دقت تلفون لطيفه تقطع عليهم الجوو …فأبتسمت لطيفه واهي تطلع جوالها من الشنطه وتستأذن من خالد شوووي علشان ترد ….
لطيفه وهي موطيه صوتها : هلا والله بعنووودي اخبارج حبي …
العنود وهي مقطعه روحها من البكي : ألحقيني لطوووف بمووووت
لطيفه وهي متخرعه : عنود وش فيج خوفتيني فيج شي
العنود : الحقير السافل مصر على رأيه
لطيفه واهي ناسيه السالفه : من هو ….من هذا السافل
العنود : الحقير رشوووود لا ويهدد انه بعد كم يوم راح يتقدم لي …أخ بمووووت
وشوي الا خالد يتضايق ويأشر لها بيده تسكر …
فأرتبكت لطيفه وقالت وهي متضايقه : خلاص حبي يكفي بجي …شوفي حبي انا طالعه اول مارد البيت راح اتصل عليج اوكي حبي..
العنود واهي خلاص حست ماحد واقف جنبها ولا فاهمها
سكرت …واهي في قمة اليأس والاحباط كأنها واحد مودينه قبره
لطيفه حست برفيحتها فتمت مبوزه على خالد…لين ارجعوا لبيتهم.
واتمنى ان تتقبلي مروري
مع تحياتي :قطر داري
وننتظرك يالغلا ببارت جديد