في هذي الدنيا الناس تنقسم قسمين , ناس وفيه وناس خاينه الوفي للأبد بتتبعه صفات حلوه مثل الإخلاص والصدق والطيبة ونفس الشي الخاين بيكون كذاب شرير شخص يجرح وماعنده إخلاص ويهتم بنفسه .
في روايتي , فيه ناس تتعذب وناس تستمتع بالتعذيب ناس فقيرة وناس غنية ناس تجرح وناس تنجرح بس اللي يجمع بينهم هو الحب .. يا ترى الحب بيقدر يغير بعض الصفات ؟ ماحد يدري عن هالشي إلا الشخص اللي يحب .
استمتعوا .
دخلت للمدرسه , أول يوم لها بهالمدرسه حطت شنطتها على أقرب كرسي وفصخت عبايتها ودخلتها بشنطتها وهي تشوف أشكال البنات اللي عكسها , هي فقيره وبعكس بنات المدرسه , طبعا هي دخلت للمدرسة لأنها فازت بمسابقة على مستوى المملكة ودخلوها أفخم مدرسة بالرياض , لبست شنطتها السودا وقعدت على كرسي بجنب الدرج كان جنبها شلة بنات كل وحده منهم شكلها يخوف من كثر الميك اب والشعر المجعد , تحمدت هدال ربها وقعدت تنتظر مرت مراقبه من قدام البنات وعلمتهم عن طوابيرهم وكانت بطلتنا " هـــــــــدال " بفصل 3ع/3 وقفت وكان قدامها كثير بنات جت بنت شقرا بيضا بعيون عسليه كانت جميله مره وقفت جنب هدال بالطابور وأول ما وقفت قعدوا البات يصارخون بأسمها " رييييييييييييم " واللي تقول أشتقت لك وحاسوا الطابور وهدال ماتدري من هذي .. بعد ما رتبتهم المراقبه وخلتهم يصعدون للفصل جلست هدال بكرسي بالزاويه جتها بنت بشعرأسود وعيون سودا واسعه تقول " مرحبا , أول مره أشوفك شكلها أول سنه لك بالمدرسه " هزت هدال راسها وسكتت كان شكل هدال ناعم مره رابطه شعرها البني الحرير لفوق ذيل حصان وحاطه روج وردي وراسمه آيلاينر بسيط ملامحها كانت تجذب الكل بالأخص انها بيضا وعيونها بنيه ناعسه جت البنت اللي كانت واقفه معاها بالطابور وقالت لها " أهلين , أنا ريم ممكن أقعد جنبك " قالت هدال بصوتها المبحوح " تفضلي " قعدت ريم وقالت " أنا ريم ال… أتمنى نكون كويسات مع بعض " ابتسمت هدال وهي تقول لنفسها معقول هذي بنت ال… ؟ " وأنا هدال آل … " ابتسمت ريم وهي تقول لها " اسمك غريب ؟" قالت هدال " ابوي الله يرحمه مسميني " وكملوا سوالفهم عادي وتعرفت هدال على بنات ثانيين .
رجعت هدال للبيت مع تاكسي فتحت الباب وقابلها اخوها معاذ اللي كان بيطلع اول ماشافها ابتسم وحضنها على جنب وهو يقول "وش أخبار هدالي مع اول يوم مدرسه ؟" ضمته وردت عليه " تمام يا روح أختك , وين حتروح ؟" قال لها معاذ " للدوام اتصلوا قالوا ان عندي مهمه ويمكن نرابط هناك " قالت له " يلا اجل انتبه لنفسك , بالتوفيق " دخلت من ممر ضيق فيه أربع غرف وبنهايته صاله مفتوحه فيها مطبخ . دخلت للصالة ولقت جدتها تكلمت هدال بالسوري " أنا هون تيته بعرف اشتقتي لي بس شو أعمُل هيك المدرسه " ردت جدتها " هدال كم مره قلت لك لا تتكلمين سوري ! تبين تطردنا زهره من البيت ولا كيف ؟ " ردت هدال " زهره موجوده ؟" تكلمت حرمه كبيره بالسن سمرا وشكلها يخوف " أيه هنا زهره اللي ماعجبتك يابنت السوريه , لولا زوجي الله يرحمه ماكتب بوصيته انه نبقى ببيت واحد كان انتي واخوانك وجدتك بالشارع , بعدين وينه مازن أخوك هذا ماعنده نيه يجي ؟ نحتاج أغراض من البقاله وهو مختفي " مشت هدال لين ما دخلت غرفتها الموجوده بالصاله سكرت الباب وجلست على السرير تفكر بحياتها .
[ هدال . 18 سنة , بنت في غاية الجمال نحيفه بيضا عيونها بنيه وشعرها بني حريري لنصف ظهرها ملامحها ناعمه حيل , امها سوريه وأبوها سعودي توفوا أبوها وأمها بحادث ]
[ معاذ . 27 سنه , الأخ الكبير لهدال أسمر شوي عيونه بنيه واسعه شعرها أسود , يشتغل عسكري ونادر يكون بالبيت ]
[ مازن . 21 سنة , أخو معاذ وهدال يدرس طب بسنته الثالثه وسيم لأبعد الحدود بعيون عسليه وبياض مناسبه , مرح جدا ويحب هدال ويخاف عليها من كل شي ]
[ نادره . جدتهم أم أمهم , سوريه .. معاقه ولا تقدر تتحرك أحفادها يموتون فيها ومستعدين يعطونها كل شي لو أرواحهم ]
[ زهره , 48 سنه , مرت أبوهم الاولى سعوديه وهي عقيم وما تجيب عيال , تكره عيال زوجها مره وجنيها لو تكلموا سوري تهددهم بالطرد دايم ولو أن زوجها ما كتب وصيته أنهم يسكنون مع بعض كان هم الحين بالشوارع ]
[ أبو معاذ وأم معاذ , توفوا بحادث سياره قبل ثلاث سنوات أبو معاذ تزوج زهره بنت خاله وماجابت له عيال وراح تزوج عليها ومن بعدها أهله صاروا يكرهونه ونبذوه وانقطعت علاقته فيهم ]
في مكان ثاني , قصر فخم مره دخلت ريم وسلمت على أمها اللي كانت جالسه على الكنب وجلست قدامها وسألت " أجل اريام ما طلعت من الجامعه ؟ " قالت لها أمها " لا والله مابعد مدري شعندها " قالت ريم لأمها " يمه تخيلي من شفت اليوم ؟" نزل محمد من الدرج وهو يقول " من شفتي ؟" ابتسمت ورمت عليه المناديه وهي تقول " سخييييفف " جلس محمد جنبها وهو يقول " كملوا سالفتكم " قالت ريم " قابلت وحده من آل… يا يمه البنت أخلاقها روعه مره توقعت أنها بتكون مثل نعيمه مليقه مره " قالت أمها " مو كلهم مثل بعض يابنتي مو كلهم " شوي ودخلت أريام تركض وتستهبل وتغني " دنا بحبببوو حبيبي دا اللي بيبقى معااي علطوول … آآآه آآه" قال لها محمد وهو واقف " خير خير ؟ لا يكون راجعه مع بسام ؟ " هزت أريام راسها وهي تضحك وتقول " ياخي هو جا يطلعني من الجامعه شسوي به أقول له روح ؟ " قالت لها أمها " مدري كيف متحملك بسام ذا , ما اقول الا الله يصبره عليك " شوي دق باب البيت ووقف محمد يفتح وشوي رجع وقال " ريم تغطي بسام بيدخل " انقلب وجه اريام وهي تقول " وش رجعه ذا ؟ " شوي دخل بسام ومحمد وأخو محمد الكبير سلطان قامت وقفت أم سلطان وسلمت على زوج بنتها بسام وريم سلمت عليه من بعيد وشرب قهوه , عطى أريام دفترها اللي ناسيته بالسياره وطلع .
قال سلطان وهو يضحك " يمه لا لازم تزوجيني , ماقدر على كذا أنا "
قالت أريام " هيه لا تعلق خلاااص " وراحت تركض فوق ولحقتها ريم .
قالت أم سلطان " من جدك تبي تعرس ؟ " قال لها سلطان " إي والله يمه , خلاص بدخل الثلاثين وانا للحين عازب " قالت له أمه " شوف في وحده في بالي بتصلح لك بس خلني بالأول اتأكد منها ومن أخلاقها وارد لك خبر " ابتسم سلطان ومحمد يعلق " مابقى الا أنا وريم وريف لازم تزوجينا بسرعه يمه " قالت أمه " تبي أزوجك ؟ ابشر ما طلبت " قمط محمد وهو يقول " أنا بختار زوجتي بنفسي مابي حد يختارها لي " شوي نزلت ريف وهي تقول " من اللي بيعرس ؟" قال سلطان لها " ورا ما داومتي اليوم ؟" قالت ريف بابتسامتها اللي تخقق " كيفي والله , بعدين مو أنا دلوعتك ؟ خلاص يحق لي أغيب " قام سلطان وهو يمثل انه معصب وهي انحاشت فوق عند أخواتها .
[ ابو سلطان , 56 سنه , يمتلك شركه بنوك معروفه بالسعوديه ويعتبر من أغنى الشخصيات بالمملكه , شخصيته قويه وشديد شوي ]
[ أم سلطان , 47 سنه , إنسانه تحب الطلعات والحركات مب مغروره بس دايم تفتخر بعيالها وتتمنى تشوفهم شي كبير مثل كل الامهات ]
[ سلطان 29 سنه , ملامحه جمميله بشعر أسود ناعم يشتغل بشركة أبوه يحب أخته الصغيره ريف ودايم معها ]
[ محمد , 24 سنه , يشتغل بشركة أبوه وسيم لأبعد الحدود , بعيون عسليه وشعر أسود عضلات عضوده شوي بارزه وطيب مره وابتسامته تذبح ودايم يلاحقونه البنات بكل مكان يروح له ]
[ اريام , 22 سنه , بيضا عيونها بنيه وشعرها أسود ملامحها حاده وشخصيتها حييل مرجوجه متملكه على ولد عمها بسام وتحبه ويحبها والله يوفقهم بالمستقبل ]
[ ريم , 18 سنه , بيضا بعيون عسليه وشعر أشقر , لو يتكلم أحد عن طيبتها ما يخلص , دايم تجذب الناس بشخصيتها المتفهمه ]
[ ريف 15 سنه , آخر سنه بالمتوسط نسخه مصغره من اريام , كيوته مره وعليها أفكار مب صاحيه ودايم مع فهد ولد عمتها اللي أكبر منها بسنه ]
الجزء الأول مجرد تعريف بأبطال الروايه , رح ينزل بارت بكل ويكند .
ونتتظر البارت الجاي
و بالتوفيق
موفقه……كملي