اللحظات الأخيرة من كلبشة الشياطين 2024.

الصصصــ}ـــؤآإأحــة اخذت ها القصة من منتدى وعجبني وقلت انزلة هنيا وانشاء الله يعجبكم

::::::::::…. بسسسم الله …..:::::::::::

احترت بصراحة بأي لهجة أكتب الموضوع ..
هل أكتبها بالعامية ..؟ أم الفًصْحَى..؟
الشرقية أم النَجْدِيّة ..!!؟

فقلت ابتكلم فيهم كلِّهُم علشان يقولون عندي 4 لهجات .. << سامي الجابر على غفلة

القصة من نسج الخيال طبعا ..
وراح يكون وقت القصَّة من يوم 29 رمضان المغرب .. إلى 1 شوَّال المغرب .. والسوالف اللي تحصل في هالوقت
..

:: فطورنا الأخير ::

في آخر 5 أيام من رمضان يبدون شيَّابنا يهايطون شوي ويبدون يعزمون ويتهاوشون على العزايم ..
كلن يقول بكرة عندي ..والثاني يقول سبقك فلان .. انت اللي بعده ..
طيب عندك 30 يوم في رمضان ما مسكت الا هالأيام !!
كان التاريخ 29 ..
وجالسين في مجلس أحد الشيَّاب ..
كل السوالف العيد بكرة والا لا ..؟ بيكتمل الشهر والا لا ..
وكلِّهُم يصيرون هذاك اليوم وكالة الأرصاد ..
وأنواع الإفتائات ..

جانا الشايب المعزِّب..
اقلطوا اقلطوا << بصوت جَهْرِي . والا يقول لأحد الشياب اللي صوتهم عالي ..قل لهم يقلطون هههههه
دخلوا الشياب في المقلط ..
سفرة كبيرة .. من كبرها يمكن اننا نقرأ دعاء السفر إذا شفنا الأخير ..
كل شخص جالس في مكانه .
وانواع الأصوات والسواليف والهواش..
صب شوربة , صب قهوة , صب فيمتو , عطني السمبوسة اللي جنبك , ورني التمر اللي عندك وشو؟ ,
وين القشطة , قرّب اللقيمات , حطَّهَا عند الوراعين , صب القهوة عن اللي أكبر منك .. الخ
في هالوقت اللي يصب القهوة يروح في خبر كان إذا ملا الفنجان بيرجع له الفنجان مصفوق براسه .. واذا صب طبيعي ما يوقِّف .
طبعا يمكن 6 يصبون القهوة على السفرة كل واحد يمسك الجهة المسؤول عنها ..

باقي دقيقة على الأذان ..
شوفوا الحالات لجميع الأعمار:
الشياب يستغفرون ويهللون ويسمعون السوالف ..
النص شياب .. يجلسون يسولفون عن اللي راحوا لمكة هالسنة .. واللي يتكلم عن الزكاة ..
واللي يقول بصوت عالي قرِّب صحن الشوربة خلِّنَا نغرف لنا !!
الشباب .. ماسكين التمرة وغاطِّينها في القشطة ويدهم متكِّينها على ركبتهم ووتتدودل ..
الصغار .. مشتهي العصير اللي عند عمِّي محمد هذاك ( ويأشر باصبعه ) ..

طبعا قبل الأذان بـ شوي .. تلقون واحد طالع برَّا بالحوش يتسمَّع الأذان وبيده تمره ..
أول ما يأذن ياكل هالتمرة ويدخل تراه أذّن أفطروا .
يجيك واحد من الشياب داخل عرض .. يقول وين أذَّن !! باقي 10 دقايق ..
والا الشايب الثاني . ما توحي شَي وانا ابوك .. اقعد بس اقعد << على وزن قم بس قم ..

بعد ما يقولون 10 أو 20 تراه أذَّن يبدون الشياب ياكلون ..
من يوم ما يقول لك أذَّن ..
أحس انِّي في حرب داحس والغبرا والا حرب البسوس ..
أنواع تصفيق الملاعق .. ما ادري وشلون يشربون الشوربة ..
والا لازم يطلِّعُون صوت قبل لا يشربون ههههههه
والا اللي يقول إئتِنَا بالدلة << لزوم الفصحى علشان الحرب ..
طبعا اللي لاقيها في هالسفرة كلها ..
اللي يجلس جنب واحد شايب وتوِّه جاي من الرياض أو الشرقية يعني أول مرة يفطر معهم .
أنواع التدليع .. تبي من ذِي والا مِن ذي ( الشوربة ) .. عاد يتمخمخ هالشايب . ويقول اخلطهن لي << يقال له بيرضي الطرفين
وإذا خلص من هالشايب جاك أنت . سلمان وش تبي !! من ذي والا من ذي ..
عاد أنا يقال لي أبتمخمخ .. أقول وش فيها هذي ووش فيها هذي .. وأنا اعرف ان هذي شوربة جريش والثانية شوربة خضار ..
بعدين أقول عطني من هذي
ويجيك الشايب اللي جنبي .. يقول . سلمان . تبي أجيب لك من هذا ..؟ والا اصب لك عصير .
اقول له لا ياعم ما تقصِّر . كل شي قريب ..
طبعا الفطور الجماعي اللي مثل كذا . دفعة وحدة .. مافيه بعد الصلاة شي لازم تَهَبِل المعِدَة آخر يوم

في وسط هالسوالف كلها ..
ينقز لنا شايب من آخر السفرة .
ترا الفطور عندي القَابْلَة ( التزابلة – بكرة ) إذا ما جا العيد ..
ويجيك الثاني .. تراني أبسحِّرْكٌم إذا بكرة تتمَّة الشهر وإذا بكرة عيد ترا العشاء عندي ..
ينقزون الشياب اللي في في بداية السالفة في الأرصاد . يقول واحد منهم بكرة عيد يارجَّال . والثاني يقول عساك على القوة ..
وتبدأ السالفة اللي في المجلس تنعاد وهم على السفرة .. وهواش وإقناع ..
والحجَّة وشي !! العام مكتمل 30 .. هالسنة مهوب مكمِّل .. < ياعيني عليك
والثاني يقول أنا شايف التقويم يقول ان بكرة العيد < ذكَّرني بليبيا ..

يقوم الأول .. افطر عندكم الصائمون وحفَّتكم الملائكة وذكركم الله فيمن عنده
والثاني والثالث والرابع والخامس << قِير ددسن ..

الإمام معنا في السفرة . ينتظر الين يقومون الشياب ويقوم بعدهم ويبدأ يصلي ..
طلعنا للمسجد وصلِّينا . وأنواع الشياب اللي يتاغر . واللي يعطس ..
واللي ماكل له بصل في الفطور والا ثوم واللي ما غسَّل يده زين واللي كل شوي يلعب بالشماغ الله يعافينا بس ويغفر لنا ..

:: ما بعد صلاة المغرب ::

ألحين الشيَّاب يجلسون لهم في مجلس ويبدون يسولفون مع بعض ..
وأنا وأبوي واخواني نطلع نروح بيتنا .. نجلس نشوف طاش وبعدين نرجع للشيَّاب..ونجلس معهم بالمجلس
ألحين كل الشغل على التلفونات . وحاطين على السعودية الأولى ..
اللي ما اذكر حطِّيتها الا أيام طاش عليها قاعدين ينتضرون إعلان العيد والا لا
والشيَّاب ممدِّدِين رجيلاتهم ويقال لهم يشوفون .. ويجيك واحد . يقول يا عَم زكِّيت ؟ تراني أنا ابروح أشتري لي خياش رز وأوزِّعهم ..
قال ايه وانا عمِّك لي 3 أيام وأنا مزكِّي .. كان السعر أرخص من أول
ألحين يدق واحد في المحكمة على ابوه .. ويقول يا يبة .. ترا العيد بكرة شافه واحد في المنطقة الفلانية وبيعلنونه إن شاء الله
خلاص .. من يوم ما يجينا هذا الخبر يبدون يتوظُّون الشيَّاب لصلاة العشاء … ويقوم واحد يأذن فيهم ..
واللي في المجلس كلِّهُم أنواع الاتصالات .. ترا بكرة عيد .. مَشْيُوف الهلال في المنطقة الفلانية كل عام وانت بخير
خلوني أقول لكم حالتي في هاللحظة ..
أمسك جوَّالي .. أتِّصِل في أبوي اللي جالس جنبي << تخيلو ..
أتصل في امي وجدتي وخواتي واخواني اللي بالطريق وأنسباي .. وأبارك لهم
طَبْعا في هالوقت .. ما في شبكة .. وياكثر ما تطلع لك ( خطأ في الإتصال ) ..
بعدين أبدأ افتح رسالة .. وأكتب عيديَّة للي عندي وأرسلها للكل مرة وحدة .. وعادي توصل لهم بعد ساعتين
ألحين كلِّنَا رحنا نصلي العشاء . كل الشياب بعد الصلاة .. يسلمون على بعض ويتعاديدون .
كأنِّهُم أول مرة يشوفون بعض .. واللي توِّه واصل ويسلمون عليه ويتباركون بالعيد ..
يرجعون ألحين للمجلس .. والعشاء عند اللي عزمنا على الفطور الساعة 11 ونص ..
يقول علشاننا افطرنا المغرب بنأخِّر العشاء شوي ..

:: رحلة تسوُّق ::

ورجعت للبيت بعد ما كنت في الاستراحة ..
أول ما دخلت البيت .. انعميت !!
كأن البيت يحترق !!
دخلت الصالة لقيت امِّي تحظِّر الجن << توهم فاكينهم بعد رمضان
‏

يمَّة !! وشو هذا !!؟
قالت وانا امِّك هذا جاوني نطهِّر البيت ..
خلِّه يطهر البيت قبل العيد علشان كل شي يكون نظيف . ونطيِّب ابوك
قلت أبشري .. ولا يهمك ..
عاد ألحين ما فيه أي شغل الا اني أروح فوق أشوف الوضع واللي حاصل
وألقى اخواني واسلم عليهم والحمد لله على السلامة ومن هالكلام ..
جاني هجوم حاد !!
سلمان !!
السروال اللي تحت مخدَّتك من وين ماخذه ‪؟؟‬
قلت شاريه من ابو يمن قبل بعد العشاء
قال خير ان شاء الله
جبه بس جبه .. هذا شاريه من الدمام وادوره ولا لقيته
ومرة ثانية لا تسرق شي من غرفتي
<< أنواع الإضْطِهَاد

في هذا الوقت خلاص .. يا قاتل يا مقتول ..لازم أحاول اني أنفخ على اخوي واتحمل اللي بيجيني
أقول له طس يالله منَّاك بس .. رح عيِّد بالمقوصر أبرد لك ..
حًس اخوي انِّي ملزِّم على قراري وانِّي ماراح أعطيه السروال ..
ويسوِّي ترفيع بالزبيرية ويمسكْهَا بيده .. وأشْوَا انَّهأ شطفتني << عصا ماوكلي ..
من الخوف قلت خلاص خذ السروال اللي يقلعك ..
عندي سروال في الشنطة مشقوق من تحت .. الظاهر أنا اللي أببرد ..
وأخوي اللي أكبر منه هذي حالته برضو .. كل واحد يتسلَّط على اللي أصغر منه .. ..
ألحين صارت في سالفة ثانية ..

في البيت حمَّام تحت وحمَّام فوق ..
اللي تحت للبنات .. واللي فوق للشباب ..
ألحين من اللي بيدخل الحمام أول !!؟
كل شخص يجمِّع عدته
( الشامبو – مزيل العرق – الموس ( أبو تمساح) – الملابس – الفوطة )
واللي مرة مرة مأنْتَك .. ياخذ له علبة كريم يتدهن فيه وهو يتروش ) ..
طبعا أكيد مهما خلَّصنا .. لازم أخوي الكبير ياخذ المكان بالقوَّة ..
والله لو انِّي أتروِّش جاب المفتاح السبير للحمام وفتحه وسحبني مع شوشتي .. لازم هو يتروَّش أول واحد ..
وحنَّا أنواع الإزعاج عند الحمام ..
أحمد .. خلَّصت ؟؟
أحمد خلَّصت .؟؟
يرد علينا : انقلع أنت ويَّاه والا قسم بالله لأحرق ملابسكم << يحسبنا نويق ( نناظر – نشوف ) من تحت باب الحمام ..
ما يدري اننا ننتظره يخلص ..
طلع من الحمام .. وجا الثاني يدخل ..
وشوي أنواع رَجد الباب وتصفيقه … افتح افتح ..
نسيت الشامبو حقي داخل << أحمد يرجع للحمام علشان ياخذ الشامبو . طيب خلنا نتروش فيه ..
ألحين أدور لي شامبو ما لقيت .
وأنزل تحت وأحوس في البيت كله …
والحَمد لله لقيت الشامبو الأحمر .. حبيب القلب

أهم شي انِّي قدرت أتروِّش بنجاح والحمد لله بِغَض النظر عن الأشياء الجانبية . ( السعر )
وانتهت المعركة بنجاح وبدون أي اصابات ولله الحمد ..

:: صلاة العِيد واحتراف كسب العيدية ::

ألحين لبسنا وتضبَّطنا وأنواع العطور .
واللي معطِّر بكلونيا واللي يقال له يرضي ابوي ورايح تحت ومتبخِّر مع الجن اللي تم تحظيرهم ..
ألحين يبدأ الجنِّي الفقير اللي عندي وعلى قَد حاله .. توُّه يوصل لي .
يقول لي سلمان .. أنا مطفِّر ما معي ولا ريال ..!!
قلت بس !! ازْهلها وخلَّها علي هذي أنا اجيبها لك ..

وأطلع مع ابوي لصلاة العيد .. اللي علمي فيها من 6 سنين
وطول الطريق وأنا اقردن بأبوي وأريِّش فيه ..
بسم الله ما شاء الله يايبة … طالع عريس وتِخزي العين ..
ماله خلق ابوي .. مِثل الطِيرَان ما يطربك إلا إذا سخَّنْتِه .
قاعد يقول الله وأكبر الله وأكبر الله وأكبر .. لا إله الا الله .
الله وأكبر الله وأكبر الله وأكبر .. ولله الحمد ..
الله وأكبر كبيرا . والحمد لله كثيرا .. وسبحان الله بكرة وأصيلا ..
أنا حفظتها معه .. وأعلِّي صوتي واسوِّي أنا خاشع مع الدعاء ..
ويناظرني وكأنه يقول بِعَدِي ولدي ..
وصلنا لمسجد العيد بنجاح .. وجلسنا ننتظر الإمام ..
وصل بنجاح … ويوم جينا نصلِّي .. كبَّر التكبيرة الأولى ..
ونقرا الحمد .. وشوي يكبِّر الثانية .. وسلمان جاك صافط الطبلون ويركع << متعوِّد على صلاة الاستراحة السريعة ..
ويجيني كَف على عِلباي .. بس أشوا محد انتبه ..
..
بعد ما خلصنا الصلاة .. والخطبة وكل شي .
طلع ابوي .
وألحين مروِّق وأقدر اتمخمخ معه ..
هلا والله بأبو أحمد << حبَّة على الراس
كل سنة وأنت بخير يا أحلى أبو بالعالم << متأثر بمسلسلات رمضان
وأنت بخير يا ولدي ..
والله بسم الله عليك يايبة .. تِخْزِي العين ..
طالع شباب .. وكأنِّك عريس بسم الله عليك ..
من زمان وانا اقول ابوي حلو . وألحين تأكدت انك أحلى شخص
تصدِّق يا يبة .. حتَّى البشت بسم الله عليه ..
باين ان خَبنته زينة وانِّه من النوع الأصلي ..
قال ايه ياولدي .. هذا سوري وتوِّني خابنه قبل العيد << صرف لك وحدة ..
( ما يدري ان البشت مشهِّب وانِّه معلَّق في البيت من 4 سنين ولا خبن ولا خرابيط .. سلٍِّكُوا له معي )
اي والله يا يبة واضح بسم الله عليك
أفضل بشت شفته .. بسم الله عليك أنت اللي مزيِّنِه ..
ورا ما نخطب لك يايبة وحدة ترجِّعِك شباب ونشيط
وشوي أشوي شي بمخباتي يتحرَّك
أبوي دَاف لي 50 ريال في مخباتي ..
قال هذي وأنا ابوك عيدية منِّي أنا . خاصة فيك .. ولا يشوفونها اخوانك ..
ترا هذي غير اللي ابعطيكم << نجحت الخطَّة ..
أنا اجي وأقول له الله يعافيك ويخلِّيك يايبة ..
أبقول لأمِّي انك ودِّك تعرس ..
قال لي والله ان قلت لها لأحش رجلينك حش << أمداه يقلب !!

الحين وانا ابوك . ابيك تسلِّم على عمَّانك وتصب القهوة والشاهي ..
ابيك تصير سَنع ولا تفشلنا عند الرجاجيل .. قلت أبشر << ما يدري اني ابسحب

أول ما دخلنا المجلس .. لقينا انواع وأشكال الشيَّاب ..
أنا فرحت .. قلت والله ما اطلع من هنا الا وبمخباتي فوق الـ 500 ..
طيب ألحين ياسلمان وش الطريقة !!
بسيطة .. اتبعوني وتشوفون

طبعا أدخل أنا وابوي للمجلس سوا ..
شوي أنا اوقِّف وابوي يمشي يسلم ..
أنا في هذي اللحظة تجيني زرقاء اليمامة ..
شغلتي كلَّها ادوّر الشايب المطنوخ اللي يدفع ولا يقول لا .. علشان أبدا فيه ( وراح أعلمكم ليه بديت فيه ) ..
أروح له .. هلا بعمِّي .. كل عام وانت ( هنا حبَّة راس ) بخير ..
وعيدك مبارك …
ألحين أنا اوقِّف .. ما أتحرَّك من قدَّامه ..
إلين يفهمها ويطلع من مخباته أي مبلغ ويعطيني ( طبعا أنا ظامن انِّه بيعطيني مبلغ جامد ) ..
المهم ويطلِّع 100 ريال … يقول هذي عيديَّة لك وأنا عمِّك . تستاهل …
( في هذي اللحظة أقول لكم ليه بديت فيه .. لأن اللي جنبه بيقعد يشوفه وإذا عطاني 100 ماراح يصير أبخل منه ويعطيني 10 .
فيه فرق واحترافية هنا ) ..
ألحين أمسك ال100 بيدي ..
وأحاول أخلي اللي جنبه يشوفها .. بعدين أروح أسلِّم عليه ..
وهكذا .. كل واحد يغار من اللي جنبه .. وأنا الكسبان …

طلعت من المجلس بعد ما خذت فرَّة كاملة .. بمبلغ ، 741 << الريال كان معي بمخباتي من أول .. وعايدت نفسي

وين ابوي اللي يقول صب القهوة !!؟
ما اعرفه .. خلاص المهم وخذناه .. وش يبون بعد
..
ألحين أطلع من المجلس .. وألقى الشباب واقفين برَّا وكلهم مرسِّمِين ومتكشِّخِين وكل واحد طفران بالنظارات الشمسية …
وشوي وأشوف شلَّة الكورة ..
( انشلوتِّي – دونادوني – مورينهو – غوارديولا – مانسيني – فيرغسون ) ..

شوي اللي يقول اليوم اليوفي بيفوز على الميلان ..
والثاني يقول الميلان بيفوز ..وبيجيب انزاقي القول بعد ..
واللي يقول هاه سلمان اليوم مع برشلونة .؟؟
أقول له انا طول عمري معهم .. بيجيب كلويفرت القول اليوم << ما يدري انه منتقل من زمان .. بس يقال لي اني اعرف …

وشوي واحد يناديني من بعيد ..
سلماااااان ..
وأشوفه .. والقاه اخوي الكبير ..
خير وش تبي؟؟ << بدا الطفران يطلِّع مفعولة …
قال انقلع ألحين للبيت .. وتلقى امِّي مسوِّيَة لها جريش رح جبه
.. ايه خلاص أبروح ألحين ..
وأروح اشغل السيارة وأرجع للإستراحة أنام ..
وأسحب عليهم هم وعيدهم ..
اللي أبيه وخذته ..
ألحين الساعة 9 الصبح .. وانا على النت أشوف وش صار في حليمة حقَّت أمس .. ما تابعتها ..
<< لحد يقلب الموضوع ..

إذا جت الساعة 7 المغرب أصحى من النوم .. ولكل حادث حديث ما ادري وش أسوِّي ..
بكذا انتهت قصَّتنا وإن شاء الله استفدتم من الخبرة في العيد وطريقة التعامل السنعة ..
وأهم شي كيف تملى مخباتك بعد ما كنت مطفِّر ..

ما يستفاد :

1- اجلس في فطور رمضان جنب واحد يعجبك
2- اشتر لك 3 فنايل وسراويل ومقوصرات .. علشان ما تتوهق
3- القوَّة مع اخوانك الكبار ما تنفع .. لانك بتتشوَّة لو استقويت
4- جب لأبوك طاري بنت يخق .. وجب له طاري امك يسب
5- اذا خربتها خربها في آخر شي ولاتجيب الطعَّة وتخربها من البداية وتخرب السالفة كلها ..

في الختام ..